कोरोना समाचार/जागरूकता
केंद्रीय स्वास्थ्य मंत्री डॅाक्टर हर्षवर्धन ह मुख्यमंत्री भूपेश बघेल ल कीहिन हे कि छत्तीसगढ़ के हित के पूरा धियान राखे जाही। केंद्रीय मंत्री ह आज फोन म मुख्यमंत्री संग छत्तीसगढ़ म कोरोना संक्रमण के स्थिति अउ वैक्सिन ल लेके गोठबात करीन।
ये गोठबात म मुख्यमंत्री ह केंद्रीय स्वास्थ्य मंत्री ल उपचार के बेवस्था अउ स्वास्थ्य सुविधा म बढ़वार के जानकारी दीन।
एति कोरोना संक्रमण के दूसर लहर ले बांचे बर छत्तीसगढ़ सरकार ह जरूरी उपाय शुरू कर देहे। मुख्यमंत्री के निर्देश म सामान्य प्रशासन विभाग के सचिव डॅाक्टर कमलप्रीत सिंह ह रायपुर अउ बस्तर के कमिश्नर अउ कलेक्टर ल रायपुर अउ जगदलपुर के विमानतल म यात्री मन बर जारी कोविड गाईडलाइन के कड़ाई ले पालन कराय बर कीहिन हे।
इही बीच छत्तीसगढ़ के जाने माने लोक गायिका अउ नारी शक्ति सम्मान ले सम्मानित रजनी रजक ह लोगन ले कोरोना संक्रमण ले बांचे बर जरूरी सावधानी राखे के अपील करीन हे।
होल्ड बाईट – रजनी रजक
(55 सेकण्ड)
धान खरीदी समीक्षा
खाद्य मंत्री अमरजीत भगत ह राज्य म समर्थन मूल्य म धान बिसाय के बेरा बिना मंजूरी दिगर राज्य ले धान के आयात रोके खातिर सीमावर्ती जिला म निगरानी राखे के निर्देश देहे।
आज मंत्रालय म समीक्षा बइठका म खाद्य मंत्री ह अधिकारी मन ल धान खरीदी शुरू होय के पहिली जम्मों तियारी पूरा करे के निर्देश दीन। श्री भगत ह बताइन कि केंद्र सरकार ह धान बिसाय बर छत्तीसगढ़ ल करीबन सतहत्तर हजार गठान नवा बारदाना देहे। ओमन बताइन कि धान बिसाय बर करीबन पौने पांच लाख गठान बारदाना के जरूरत होही।
ओमन कीहिन कि सत्तर हजार गठान प्लास्टिक के नवा बारदाना बिसाय बर आदेश जारी करे गेहे। संगेसंग सार्वजनिक वितरण प्रणाली म एक लाख गठान बारदाना धान बिसाय बर बौरे जाही। बइठका म खाद्य विभाग के सचिव डॅाक्टर कमलप्रीत सिंह अउ सहकारिता विभाग के सचिव आर. प्रसन्ना संग आने बड़का अधिकारी मौजूद रीहिन।
माओवादी मुठभेड़ आत्मसमर्पण
कंाकेर जिला म आज भिनसरहा सुरक्षा बल मन संग होय मुठभेड़ म तीन झिन माओवादी मारे गेहे। एमा एक महिला माओवादी सामिल हे। घटना के जगा ले माओवादी मनके शव के संगेसंग हथियार बरामद करे गेहे। ये मुठभेड़ म एस.एस. बी. के एक जवान घायल होय हे।
पुलिस के मुताबिक ताड़ोकी क्षेत्र म माओवादी मन के इकट्ठा होय के खबर मिले रीहिस। एखर बाद पुलिस अउ एस.एस. बी. के जवान घटना के जगा म पहुंचीन। मउका म पहुंचतेच माओवादी मन ह सुरक्षा बल उपर गोलीबारी शुरू कर दीन। जवान मन कोति ले करे गे जवाबी कार्रवाई के बाद माओवादी जंगल कोति भाग गे। तलाशी के बेरा सुरक्षा बलके गोली लगे ले मारे गे माओवादी के शव, एक एसएलआर, बारा बोर के बंदूक बरामद होय हे।
राज्य के पुलिस महानिदेशक डी.एम. अवस्थी ह ये मुठभेड़ म मिले सफलता बर जवान मनके प्रशंसा करीन हे। एति दंतेवाड़ा जिला म पांच झिन माओवादी मन ह आत्म समर्पण करीन हे। एमा डी.वी. सिंह सुरक्षा दलम प्लाटून सेक्शन के डिप्टी कमांडर सोमडू वेट्टी सामिल हे। एखर उपर तीन लाख रूपिया के इनाम घोषित रीहिस। जिला के पुलिस अधीक्षक अभिषेक पल्लव अउ सीआरपीएफ के डीआईजी विनय कुमार सिंह के आगू ये माओवादी मन आत्म समर्पण करीन। पुलिस के मुताबिक ये माओवादी मन ह लोन वर्राटू अभियान ले प्रभावित होके समर्पण करीन हे।
माओवादी समाचार
सुकमा जिला म माओवादी मन ह नवा अस्पताल भवन अउ स्कूल भवन म तोड़ फोड़ करके ओला नुकसान पहुंचाय हे। केरलापाल के बड़ेसट्टी गांव म भवन नुकसान के संगेसंग पहुंच रद्दा म कतकोन पेड़ काटके गिरा देहे। जेखर ले अवई जवई म मुश्किल होय के समाचार मिले हे।
एति बिलासपुर उच्च न्यायालय ह झीरम घाटी हत्याकांड के मामला म गिरफ्तार करे गे दू झिन माओवादी मनके जमानत याचिका खारिज कर देहे। न्यायमूर्ति एम.एम. श्रीवास्तव के डिवीजन बेंच म आज ये मामला के सुनवाई होइस। अदालत ह ये मामला म गिरफ्तार कवासी कोसा अउ हिड़मा के जमानत याचिका खारिज कर दीन।
राज्य हथकरघा संघ बयान
राज्य हथकरघा संघ के अध्यक्ष मोतीलाल देवंागन ह कीहिन हे कि कोरोना महामारी के दौर म बुनकर मन ल रोजगार ले जोड़े बर राज्य सरकार ह एक ठिन नवा पहल करे हे। ओमन दावा करीन हे कि करीबन चार हजार बुनकर मन ल हथकरघा संघ कोति ले रोजगार मिलही। ओमन बताइन कि ये काम बर धागा बिसाय के आदेश जारी होगे हे।
भाजपा बैठक
भारतीय जनता पार्टी के कोरिया जिला कार्य समिति के बइठका आज बैकुण्ठपुर म होइस । एमा पार्टी प्रदेश अध्यक्ष विष्णुदेव साय संगठन के महामंत्री पवन साय अउ प्रदेश प्रशिक्षण प्रभारी दीपक पटेल समेत कतकोन बड़का नेता मौजूद रीहिन।
उंहे राजनंादगंाव जिला भाजपा इकाई के आज बइठका होइस । एमा पार्टी के प्रदेश इकाई के आह्वान म एक ले बीस दिसंबर के बीच मंडल स्तरीय प्रशिक्षण शिविर लगाय के तियारी करे म गोठबात होइस।
काॅलेज आंदोलन परिणाम
कोरिया जिला के मनेन्द्रगढ़ म विवेकानंद काॅलेज के पढ़ईया लईका मन ह जनरल प्रमोशन के मांग ल लेके आज प्रदर्शन करीन। विद्यार्थी मन ह काॅलेज के आगू अपन मंाग ल लेके नारेबाजी करीन। नारेबाजी करत आरोप लगाइन कि कोरोना महामारी ल देखत राज्य सरकार कोति ले जम्मों विश्वविद्यालय म छात्रहित म जारी निर्देश के पालन विवेकानंद काॅलेज प्रबंधन ह नइ करीस। जेखर ले विद्यार्थी मनके पढ़ई प्रभावित होय हे।
सरगुजा विकास प्राधिकरण के अध्यक्ष गुलाब कमरो ह महाविद्यालय पहुंच के विद्यार्थी अउ काॅलेज प्रबंधन संग गोठबात करीन। तब कहीं जाके पढ़ईया लईका मन अपन आंदोलन खतम करीन। उंहें हेमचंद यादव विश्वविद्यालय म कई ठन पाठ्यक्रम के परीक्षा परिणाम अभी तक घोषित नइ होय हे। जेखर ले पढ़ईया लईका मन परेसान होवत हे।
गंाजा तस्कर गिरफ्तार
दुर्ग पुलिस ह गंाजा तस्करी बर गाड़ी ल विशेष रूप ले डिजाइन करइया एक अंतर्राज्यीय गिरोह के पर्दाफाश करे हे। ए मामला म दू झिन आरोपी ल गिरफ्तार करके उंखर तीर ले पंच्यानबे किलो गांजी जब्त करे हे।
अतिरिक्त पुलिस अधीक्षक रोहित झा ह बताइन कि दुर्ग पुलिस कोति ले नशीला जीनिस के खिलाफ विशेष अभियान चलाये जात हे। इही बेरा ओडिशा ले धमधा जात चैपहिया गाड़ी म ये गांजा बरामद करे गेहे।
दुष्कर्म मामला आरोपी गिरप्तार
दुर्ग म लईका अउ माइलोगिन मनके आपत्ति जनक वीडियो बनाके सोशल मीडिया म अपलोड करे के मामला म एक आरोपी ल पुलिस ह गिरप्तार करे हे। पुलिस ल केंद्रीय गृह मंत्रालय के एनसीआरबी शाखा ले एक रिपोर्ट मिले रीहिस। एमा ये आरोपी ल बापू नगर खुर्सीपार ले गिरफ्तार करे गीस। जिला के अतिरिक्त् पुलिस अधीक्षक रोहित झा ह बताइन कि गृह मंत्रालय के सी.सी.पी.डब्लू.सी. योजना म लईका अउ माइलोगिन मनले जुड़े सायबर अपराध ल रोके बर आम नागरिक मनले मिले सिकइत के जांच करे जाथे।
श्री झा ह बताइन कि पूछताछ के बाद आरोपी ह ये मंजूर करे हे कि पाछू बछर मार्च महीना म वो ह मोबाइल फोन ले सोशल मीडिया म आपत्ति जनक वीडियो अपलोड करे रीहिस।
उंहें राजधानी रायपुर म पाछू दिन एक नाबालिक नोनी ले होय सामूहिक दुष्कर्म के मामला म पुलिस ह घटना के मुख्य आरोपी अउ पीड़िता के संगी ल गिरफ्तार करे हे। घटना के बाद ले आरोपी फरार रीहिस। उंहें ये मामला म फरार दू आने आरोपी मनके तलाश करे जात हे।