आज दिनभर के खबर ल अपन गुरतुर छतीसगढ़ी भाखा म पढ़व

मुख्यमंत्री-गृहमंत्री मुलाकात
छत्तीसगढ़ के मुख्यमंत्री भूपेश बघेल ह आज नई दिल्ली म केन्द्रीय गृह मंत्री अमित शाह ले भेंट करके बस्तर क्षेत्र म माओवाद समस्या ल जड़ ले मिटाय बर रोजगार के मउका म बढ़वार के आग्रह करीन। ए बेरा म माओवाद प्रभावित क्षेत्र म संचार सुभीता बढ़ाय अउ बस्तर म सीआरपीएफ के दू ठिन अउ बटालियन के तैनाती समेत कतकोन मुद्दा म गोठबात होईस।
ए गोठबात म केन्द्रीय गृहमंत्री ह बिचार करके जल्दी कार्रवाई करे के बात किहीन। भेंट के बेरा मुख्यमंत्री ह किहीन कि बस्तर म लौह अयस्क के भरपूर भंडार हवय। कहूं बस्तर म इस्पात संयंत्र ल तीस प्रतिसत छूट दे जाय त सैकड़ों  करोड़ रूपिया के निवेस अउ हजारांें के संख्या म लोगन बर रोजगार के मउका बनही। मुख्यमंत्री ह लघु वनोपज वन औषधि अउ आने उद्यानिकी फसल के प्रसंस्करण अउ बेचे के बेवस्था बर कोल्ड चैन बनाय खातिर अनुदान देके आग्रह करीन। मुख्यमंत्री ह आजीविका विकास बैंकिंग सुभीता, रद्दा अउ विकास के आने मुद्दा म घलो गोठबात करीन।
उहें, मुख्यमंत्री ह नई दिल्ली दउरा के बेरा आज केन्द्रीय पेट्रोलियम अउ इस्पात मंत्री धर्मेन्द्र प्रधान ले भेंट करके कतकोन बिसय म गोठबात करीन।
धान खरीदी-बैठक
प्रदेस म समर्थन मूल्य म धान बिसाय के काम अवइया एक दिसंबर ले सुरू होही। एखर बर जम्मों तियारी करे जात हे। ए संबंध म मुख्य सचिव आर.पी. मंडल ह आज मंत्रालय ले जम्मों संभागीय कमिश्नर, कलेक्टर, जिला पंचायत के मुख्य कार्यपालन अधिकारी अउ जिला विपणन अधिकारी मन संग वीडियो कान्फ्रेंसिंग ले गोठबात करत समीक्षा करीन। ए बेरा म मुख्य सचिव ह प्रदेस म कोरोना संक्रमण के रोकथाम, धान बिसाय के तियारी अउ उपार्जन केन्द्र म चबूतरा बनाय के संबंध म जरूरी निरदेस दीन। मुख्य सचिव ह अधिकारी मन ले किहीन कि प्रदेस म किसान मन ले धान एक दिसंबर ले बिसाय जाही। एसो करीबन नब्बे लाख मीटरिक टन धान बिसाय के लक्ष्य हवय।
ए बखत बारदाना के कमी ल देखत पीडीएस के एक लाख गठान अउ राईस मिलर्स ले करीबन दू लाख गठान जुन्ना बारदाना ल एकट्ठा करे के लक्ष्य घलो हवय। मुख्य सचिव ह बइठका म किहीन कि मास्क लगाना, दू गज के दूरी अउ घेरी-बेरी हाथ के सफाई के प्रचार-प्रसार जरूरी हवय।
कोरोना समाचार/जागरूकता
भारत बायोटेक ह कोरोना के टीका को-वैक्सीन के तीसर परीक्षण सुरू करे के घोसना करे हे। भारतीय आयुर्विज्ञान अनुसंधान परिषद के भागीदारी ले होवइया ए परीक्षण छब्बीस हजार वांलिटियर म करे जाही। ए भारत म कोविड के टीका बर होवइया सबले बड़े परीक्षण हवय। भारत के औषध महानियंत्रक ह एला मंजूरी देहे। भारत बायोटेक, भारतीय आयुर्विज्ञान अनुसंधान परिषद अउ राष्ट्रीय वायरोलाॅजी संस्थान के मदद ले को-वैक्सीन टीका बनावत हे।
ऐति, छत्तीसगढ़ म कोरोना के जांच देरी ले कराय के सेती कतकोन मामला म मउत होवत हे। एला धियान म राखत डाॅक्टर मन ह सर्दी-खांसी, बुखार, थकान जइसे लक्षण दिखे म तुरते जांच कराय के सलाह लोगन ल देवत हे।
इही बीच, छत्तीसगढ़ के प्रसिद्ध साहित्यकार, कथाकार डाॅक्टर परदेशी राम वर्मा ह लोगन ले कोरोना वायरस ले बांचे बर जरूरी सावधानी राखे के अपील करीन हे।
पीएम-मन की बात
प्रधानमंत्री नरेन्द्र मोदी ए महीना के उनतीस तारीख के आकाशवाणी ले ‘‘मन की बात‘‘ कारीकरम म लोगन ले गोठबात करही। एक ट्वीट म श्री मोदी ह किहीन कि जीवन यात्रा ल प्रेरित करइया कतकोन कहानी अउ रोचक जानकारी ओमन ल पहिलीच ले मिले हे। प्रधानमंत्री ह लोगन ले नमो ऐप माईजीओवी म अपन विचार साझा करे बर किहीन हे। एक-आठ शून्य-शून्य एक-एक सात-आठ शून्य-शून्य म हिन्दी या अंग्रेजी म अपन संदेस रिकार्ड कराय जा सकत हे। लोगन एक-नौ-दू-दू म मिस्ड काॅल करके एसएमएस ले अपन सुझाव प्रधानमंत्री ल भेज सकत हे। रिकार्ड करे गे कुछेक संदेस प्रसारित घलो करे जा सकत हे।
लोकवाणी
मुख्यमंत्री भूपेश बघेल ‘‘लोकवाणी‘‘ म ए बखत ‘‘छत्तीसगढ़ सरकार दो वर्ष का कार्यकाल‘‘ बिसय म प्रदेस के लोगन ले गोठबात करही। ए संबंध म कोन्हों भी मनखे आकाशवाणी रईपुर के टेलीफोन नंबर शून्य सात-सात एक दो चार तीन शून्य पांच शून्य एक अउ दू चार तीन शून्य पांच शून्य दू म पच्चीस ले सत्ताईस नवंबर के मंझनिया तीन ले चार बजे के बीच अपन सवाल रिकार्ड करा सकत हे। मुख्यमंत्री के ए मासिक रेडियो वार्ता लोकवाणी के तेरहवां कड़ी के प्रसारण तेरह दिसंबर के बिहनिया साढ़े दस बजे ले होही। एला छत्तीसगढ़ स्थित आकाशवाणी के जम्मों केन्द्र एक संघरा रिले करही।
ईपीएफओ-जीवन प्रमाण पत्र
कर्मचारी भविष्य निधि संगठन ह कोरोना महामारी ल देखत अपन पेंसनधारी मन ल अपन घर के तीर डिजिटल जीवन प्रमाण पत्र जमा कराय बर आने प्रावधान देहे, जेखर माध्यम ले जमा कराय गे जीवन प्रमाण पत्र सामान्य रूप ले वैध होही। कर्मचारी भविष्य निधि संगठन के एक सौ पैंतीस क्षेत्रीय कार्यालय अउ एक सौ सत्रह जिला कार्यालय के संगेसंग पेंशन देवइया बैंक के साखा या फेर तीर के डाकघर म घलो डिजिटल जीवन प्रमाण पत्र जमा कराय जा सकत हे। ए प्रमाण पत्र देसभर म फइले सामान्य सेवा केन्द्र अउ ईपीएफ पेंसनधारक उमंग ऐप म जमा कराय जा सकत हे।
मउत जांच-निर्देश
रईपुर जिला म अभनपुर थाना क्षेत्र तीर केन्द्री म एके परिवार के पांच झिन के मउत के मामला आगू आय हे। मउत होय लोगन म दू झिन लइका, दू झिन माईलोगिन अउ एक पुरूष सामिल हे। ए सबो के सव घर म ही मिले हे। घटना के सूचना मिलते पुलिस अधिकारी के टीम मउका म पहुंचीस। अभी घटना के जांच होवत हे।
इही बीच, प्रदेश के गृहमंत्री ताम्रध्वज साहू ह केन्द्री गांव म एके परिवार के पांच झिन के मउत के मामला ल गंभीरता ले लेवत जांच के निरदेस दीन हे। ओमन जिला के बड़का पुलिस अधीक्षक अजय यादव ले फोन म गोठबात करके मउत के कारण के पता लगाय अउ जांच कराय बर किहीन हे।
छठ-पर्व
प्रदेस म छठ परब के तियारी सुरू होगे हे। छठ पूजा ल लेके राज्य सासन ह जम्मों जिला कलेक्टर अउ पुलिस अधीक्षक मन ल दिसा-निरदेस जारी कर देहे। कोरोना संक्रमण ल देखत प्रसासन के देख-रेख म सोसल डिस्टेंसिंग के पालन करत छठ पूजा करे जाही। ए बेरा म श्रद्धालु मन छठ घाट म जाके पूजा कर सकही।
जारी निरदेस म ए केहे गेहे कि कहू कोरोना के दिसा-निरदेस के पालन नइ करे जाही त आयोजक जिम्मेवार होही। राज्य सासन के दिसा-निरदेस के बाद दुरूग अउ कोरिया समेत आने जिला मन म प्रसासन ह छठ पूजा के संबंध म आदेस जारी करे हे। एसो छठ परब के सुरूवात बीस नवंबर ले होही।
राजनांदगांव-नसबंदी पखवाड़ा
परिवार नियोजन म पुरूष मनके भागीदारी बढ़ाय बर विश्व पुरूष नसबंदी पखवाड़ा के आयोजन अवइया इक्कीस नवंबर ले चार दिसंबर तक करे जाही। राजनांदगांव के मुख्य जिला चिकित्सा अउ स्वास्थ्य अधिकारी डाॅक्टर मिथिलेश चैधरी ह बतईन कि ए पखवाड़ा ले पुरूष नसबंदी के संबंध म समाज म जागरूकता लाना हे। स्वास्थ्य विभाग कोति ले राखे गे ए पखवाड़ा ल दू चरण म मनाय जाही।