प्रधानमंत्री-लोंगोवाला पोस्ट
प्रधानमंत्री नरेन्द्र मोदी आज राजस्थान के जैसलमेर जिला म ऐहतिहासिक लोंगोवाला पोस्ट म सैनिक मनके संग देवारी तिहार मनाईस। ए मउका म ओमन सेना अउ सीमा सुरक्षा बल के जवान मन ल संबोधित करत जनता डहार ले जवान अउ उंखर परिजन मन ल देवारी तिहार के बधाई अउ सुभकामना दीन। प्रधानमंत्री ह जवान मन ल आश्वास्त करत किहीन कि सीमा म जाबाज सैनिक मनके हौसला बुलंद राखे बर उंखर मनके हर जरूरत पूरा करना सरकार के प्राथमिकता हवय।
दीपावली-01
कार्तिक अमावस्या के दिन मनाय जाने वाला दीया के तिहार देवारी आज छत्तीसगढ़ सहित पूरा देसभर म बड़ उछाह के साथ मनाय जावत हे। ए तिहार अंधकार अउ निरासा ल दूर भगा के लोगन मनके जिनगी म सुख, सांति अउ समृद्धि लाय के तिहार हे। देवारी के मउका म आज लोगन मन के घर-बार म दीया अउ बिजली के रंग-बिरंगा छालर मनके रोसनी ह जगमगावत हे। अइसन मान्यता हवय कि लंका म जीत हासिल करे के बाद भगराम राम के अयोध्या पहुंचे के खुसी म लोगन मन दीया बार के उंखर सुवागत करे रिहीन। तेखरे सेती ए खुसी म आज के दिन देवारी तिहार मनाय जाथे।
देवारी के मउका म ए बेरा पूजा बर देवी लक्ष्मी के आकर्षक मूर्ति अउ घर मन ल सजाय के जिनीस घलो खरीदत हवय। समृद्धि के प्रतीक माने जाने वाला धान के बाली ले बने झालर यानि फाता के मांग ए दरी बाजार जादा रिहीस।
दीपावली-02
देवारी के मउका म राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह देसवासी मन ल अपन बधाई अउ सुभकामना दीन। उहें, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह घलो प्रदेसवासी मन ल देवारी तिहार के सुभकामना दीन हे।
देवारी के मउका म चंदखुरी स्थित कौशल्या माता मंदिर म हमर राम समिति डहार ले 3636 दीया बारे जाही। राज्य के आने-आने जम्मों 36-गढ़ म चिन्हारी स्वरूप 101 – 101 दीया बारे जाही। एखर बर मुख्यमंत्री भूपेश बघेल ह समिति के संयोजक महंत रामसुंदर दास ल छत्तीस दीया सौंप के दीपदान करीन। कोरोना संक्रमण ल देखत कौशल्या मंदिर म ए दारी रामलीला के आयोजन नइ करे जावत हे।
राष्ट्रपति-संदेश
राष्ट्रपति रामनाथ कोविंद ह देवारी तिहार के मउका म देसवासी मन ल अपन सुभकामना दीन हे। राष्ट्रपति ह अपन संदेस म किहीन हे कि आने-आने धर्म अउ समुदाय मनके लोगन डहार ले संघरा मनाय जाने वाला ए तिहार देस म एकता अउ भाईचारा के भावना ल मजबूत करथे। ए मउका म हमन ल गरीबहा, वंचित अउ जरूरतमंद लोगन के समृद्धि अउ विकास खातिर उम्मीद के एक दीया बने के संकलप लेना चाही।
प्रधानमंत्री-अपील
प्रधानमंत्री नरेन्द्र मोदी ह देसवासी ले अपील करे हे कि ए दारी देवारी तिहार म लोगन म अपन-अपन घर म एक ठिन दीया हमर देस के सैनिक मन खातिर जरूरी लगावय। अपन ट्वीट संदेस म श्री मोदी किहीन कि हमन ल ओ जवान मनके सम्मान म दीया बारना चाही, जउन मन अपन जान ल जोखिम म डारके निडरता ले हमर देस के रक्षा करत हवय।
गौठान दिवस
प्रदेस म काली पन्द्रह नवंबर के गोवर्धन पूजा के तिहार गउठान दिवस के रूप म मनाय जाही। ए अवसर म मुख्यमंत्री भूपेश बघेल ह प्रदेसवासी मन ल बधाई अउ सुभकामना देवत किहीन कि गोवर्धन पूजा लोक जीवन ले जुड़े तिहार हरय। ए दिन गाय मनके पूजा-पाठ करके ओमन ल खिच़ड़ी खवाय जाथे अउ गोधन के रूप म उंखर प्रति श्रद्धा प्रकट करे जाथे।
कोरोना समाचार/जागरूकता
कोरोना संक्रमण ले बचाव खातिर प्रदेस म प्रति एक लाख आबादी म अट्ठाईस सैंपल मनके आर.टी.पी.सी.आर. जांच करे जाही। राज्य सरकार डहार ले प्रदेस के लगभग तीन करोड़ आबादी के मुताबिक रोजे करीबन 8400 सैंपल मनके आर.टी.पी.सी.आर. जांच करे के लक्ष्य निर्धारित करे गे हवय।
इही बीच, छत्तीसगढ़ के प्रसिद्ध पंथी नृत्य कलाकार दिनेश जांगड़े ह लोगन मन ले कोरोना वायरस ले बांचे खातिर जरूरी सावधानी बरते के अपील करीन हे।
होल्ड बाईट – दिनेश जांगड़े (35 सेकेंड)
ओति, दुरूग जिला म जिला प्रशासन ह कोरोना प्रोटोकाॅल के पालन करत हुए कंटेनमेंट जोन के बाहिर बने सिनेमाघर अउ मल्टीप्लेक्स मन म आज ले संचालित करे के ससर्त अनुमति दे दीन हे। सिनेमाघर अउ मल्टीप्लेक्स मन ल पचास प्रतिसत क्षमता के साथ संचालित करे जाही।
पटाखा-समय
राष्ट्रीय हरित अधिकरण-एन.जी.टी. के आदेस के मुताबिक देवारी तिहार म आज रतिहा आठ बजे ले दस बजे तक फटाखा फोड़े जा सकही। असइने, उच्चतम न्यायालय डहार ले जारी निरदेस के मुताबिक लोगन मन अब कम प्रदूषण वाला हरित फटाखा ही फोड़ सकत हे। अइसन फटाखा जउन म जादा प्रदूषण अउ ध्वनि उत्पन्न होथे, ओला अउ संगेसंग सीरीज पटाखा अउ लड़ी मन ल फोड़े म रोक रइही।
इही बीच, नई दिल्ली के अखिल भारतीय आयुर्वेदिक संस्थान म वरिष्ठ डाॅक्टर आशुतोष विश्वास ह किहीन हे कि फटाखा ले वायु प्रदूषण के स्तर बढ़थे, जउन लोगन मनके सांस अउ ह्दय ल नुकसान पहुंचाथे।
शहीद जवान-परिजन मुलाकात
प्रदेस के आने-आने जिला मन म पुलिस अधिकारी देवारी तिहार के मउका म सहीद जवान मनके परिवार ले भेंट करे बर उंखर पहुंचत हे।
इही कड़ी म मुंगेली जिला के पुलिस अधीक्षक अरविंद कुजूर अउ आने अधिकारी मन ह सहीद जवान मनके परिजन मन ले भंेट करके ओमन ल देवारी के सुभकामना अउ उपहार दीन।
उहें, दंतेवाड़ा जिला म डी.आई.जी. सुंदरराज पी. ह सहीद मनके परिवार ले भेंट करके उंखर हालचाल जानीन। ए दउरान ओमन डी.आर.जी. के जवान अउ महिला कमांडों मन ल घलो देवारी तिहार के सुभकामना देके उंखर मनके हौसला बढ़ाईन।
मतदाता सूची-पुनरीक्षण
भारत निर्वाचन आयोग के निरदेस के मुताबिक छत्तीसगढ़ म ए समय बिसेस संक्षिप्त मतदाता पुनरीक्षण के काम चलत हवय। एमा अवइया 16 नवंबर के विस्तृत मतदाता सूची के प्रकाशन करे जाही। एखर बाद 16 नवंबर ले -15 दिसंबर के बीच दावा-आपत्ति प्रस्तुत करे जा सकही। प्राप्त दावा-आपत्ति के निराकरण पांच जनवरी तक करे जाही।
राज्य के मुख्य निर्वाचन पदाधिकारी रीना बाबा साहेब कंगाले ह बतईन कि मतदाता सूची के अंतिम प्रकाशन 15 जनवरी 2021 तक कर दे जाही। ए कारीकरम के तहत अइसन युवा मतदाता जेखर आयु 01 जनवरी 2021 तक 18 वर्ष हो जही, ओमन ए मतदाता सूची म अपन नाव जुड़ा सकत हे।
संक्षिप्त समाचार
अउ अब थोरकुन समाचार सार म-
– राष्ट्र आज देस के पहला प्रधानमंत्री पंडित जवाहर लाल नेहरू के 131वां जयंती म ओमन मन ल सुरता करत हे। आज के दिन ल बाल दिवस के रूप म मनाय जाथे।
अउ
– प्रदेस के जम्मों नर्सिंग छात्रा मन ल क्लीनिकल प्रसिक्षण ले बर अपन-अपन संस्था म उपस्थिति दर्ज कराना जरूरी होही। ए संबंध म चिकित्सा सिक्षा विभाग डहार ले जम्मांें विद्यार्थी मन ल निरदेस जारी कर दे गे हवय।