लोक निर्माण मंत्री ताम्रध्वज साहू ह केंद्रीय परिवहन मंत्री नीतिन गडकरी ले काली वीडियो कॅान्फे्रसिंग के माध्यम ले गोठबात करीन अउ ओमन ल छत्तीसगढ़ म राष्ट्रीय राजमार्ग परियोजना के तहत बनने वाले सड़क मन के प्रगति के बारे म जानकारी दीन। श्री साहू ह केंद्रीय मंत्री ले निर्माणाधीन रायपुर-सिमगा-बिलासपुर मार्ग ल जल्दी पूरा करे के आग्रह करीन।
लोक निर्माण मंत्री ह केंद्रीय मंत्री ल बताइन कि रायपुर-सिमगा-बिलासपुर मार्ग म ठेकेदार मनके लापरवाही के कारण ए मार्ग म दुर्घटना के संभावना हमेशा बने रथे। एमा केंद्रीय मंत्री ह शीघ्र जांच प्रतिवेदन प्रस्तुत करे अउ संबंधित ठेकेदार ल नोटिस देके ओखर खिलाफ आवश्यक कार्रवाई करे बर कीहिन ।
ओमन भू अर्जन के लंबित प्रकरण मन ल मुख्यमंत्री अउ मुख्य सचिव ले चर्चा कर शीघ्र पूरा करे के सुझाव दीन। श्री गडकरी ह समीक्षा के दौरान अधिकारी मन ल राष्ट्रीय राजमार्ग परियोजना के तहत सड़क चैड़ीकरण, उन्नयन, मजबूतीकरण अउ पुल निर्माण कार्य खातिर भू अर्जन के प्रक्रिया ल जल्द पूरा करे के निर्देश दीन। ओमन कीहिन कि लक्ष्य के अनुरूप कार्य नइ करइया ठेकेदार मन ल निलंबित करे अउ दू माह के भीतर कार्य के प्रगति ठीक नइ होय ले ओ ठेकेदार मन ल बदलने के निर्देश दीन हे।
सिंचाई परियोजना
प्रदेश के तीन ठिन जरूरी सिंचाई परियोजना – अहिरन – खारंग लिंक परियोजना, छपराटोला फीडर जलाशय अउ रेहर अटेम लिंक परियोजना के काम जल्दी शुरू करे जाही।
ये जानकारी जल संसाधन मंत्री रविंद्र चैबे ह कल रायपुर म होइस सीआईडीसी बोर्ड के बैठक म दीन। तीनों सिंचाई परियोजना मनके पहले सर्वेक्षण कर कार्ययोजना बनाय जाही। ए परियोजना मन ल पूरा करे म लगभग दू हजार करोड़ रूपिया खर्च होही।
माशिमं आवेदन पत्र
छत्तीसगढ़ माध्यमिक शिक्षा मंडल के हाईस्कूल, हायरसेकण्डरी अउ व्यावसायिक मुख्य परीक्षा खातिर आवेदन पत्र सामान्य शुल्क के साथ पंद्रा दिसंबर तक जमा कराये जा सकत हे। उंहें प्रायवेट अउ अवसर परीक्षा खातिर विद्यार्थी विलंब शुल्क के साथ इकतीस दिसंबर तक आवेदन पत्र जमा कर सकहीं।
छत्तीसगढ़ माध्यमिक शिक्षा मंडल के सचिव प्रोफेसर व्ही.के. गोयल ह बताइन कि आवेदन पत्र मंडल के वेबसाइट म आॅनलाईन जमा करे जा सकही।
कोरोना जागरूकता/अपील
कोरोना संक्रमण ले बचाव खातिर ग्रामीण मन ल जागरूक करे अउ पंचायत विभाग के अधिकारी मन बर काली निमोरा स्थित ठाकुर प्यारेलाल राज्य पंचायत अउ ग्रामीण विकास संस्थान म राज्य स्तरीय उन्मुखीकरण कार्यशाला के आयोजन करे गीस। वीडियो कॅान्फे्रसिंग के माध्यम ले आयोजित ए कार्यशाला म राष्ट्रीय स्वास्थ्य मिशन के संचालक डॅाक्टर प्रियंका शुक्ला अउ स्वास्थ्य विभाग के वरिष्ठ अधिकारी मन ह प्रदेश के जम्मों जिला ले जुड़े पंचायत विभाग के अधिकारी मन ल कोरोना संक्रमण ले बांचे के उपाय के जानकारी दीन।
उंहें स्वास्थ्य सुरक्षा अभियान के तहत घर-घर म जाके कोरोना के लक्षण वाले मनके पहिचान कर ओखर मनके जांच कराये जावत हे।
ए बीच छत्तीसगढ़ फिल्म अभिनेता पद्मश्री अनुज शर्मा ह लोगन मनले कोरोनावायरस ले बचाव बर जरूरी सावधानी बरते के अपील करीन हे।
होल्ड बाईट – अनुज शर्मा
(30 सेकण्ड)
चिटफंड कंपनी कार्रवाई
निवेशक मन ले धोखाधड़ी करइया एक ठिन चिटफंड कंपनी उपर राज्य सरकार ह कार्रवाई करत ओखर संपत्ति ल कुर्क कर निवेशक मनके सात करोड़ तैंतीस लाख रूपिया लहुटा दीन हे।
मुख्यमंत्री भूपेश बघेल ह कल रायपुर म आयोजित अपन कार्यक्रम म निवेशक मन के खाता म आॅनलाईन राशि अंतरित करीन।
जानबा के मुताबिक राजनांदगंाव के चिटफंड कंपनी याल्स्को रियल स्टेट एण्ड एग्रो फार्मिंग लिमिटेड के विरूद्ध निवेशक मन ह कलेक्टर ले शिकायत करे रीहिन। एखर बाद कलेक्टर ह ए कंपनी के संपत्ति के जानकारी लीन, जउन म डाॅयरेक्टर मनके स्वामित्व के करीब दू सौ ब्यानबे एकड़ अचल संपत्ति पाये गीस। विशेष न्यायालय के आदेश के बाद चिटफंड कंपनी के संचालक अउ अन्य संबंधित मनके संपत्ति ल कुर्क करे गीस।
राज्य सरकार ह दू बछर पहिली धोखाधड़ी के मामला के जांच शुरू कर कंपनी के संचालक मन के विरूद्ध एफआईआर दर्ज करीन। उंहें ए कंपनी म काम करइया स्थानीय युवक मनके विरूद्ध दर्ज मामला ल वापिस ले ले गीस।
नरक-चैदस
आज रूप चैदस हे। एला नरक चैदस घलो केहे जाथे। मानता के मुताबिक आज के दिन ल पाप नष्ट करे के दिन घलो माने जाथे। कार्तिक माह के कृष्ण पक्ष के चतुर्दशी के दिन मृत्यु के देवता यमराज के पूजा के विधान हे। पौराणिक कथा के मुताबिक आजे के दिन भगवान श्री कृष्ण ह नरकासुर के वध करके देवता अउ ऋषि मन ल उंखर आतंक ले मुक्ति दिलाये रीहिन।
परंपरा के मुताबिक रूप चैदस म आज के दिन घर के आंगन अउ बाहर रंगोली सजाके चैदा ठिन दीया जलाये जाथे। राज्य के आने आने जगा म रौशनी के ए तिहार म प्रतिष्ठान अउ घर मन म बिजली के आकर्षक झालर के सजावट करे गेहे।
काली दीया के पर्व देवारी तिहार मनाये जाही। देवारी ल लेके लोगन मन म बड़ उछाह हे। राजधानी रायपुर सहित प्रदेश के बड़का शहर मनके बाजार म काफी चहल पहल अउ रौनक देखे जावत हे।
एति देवारी के सांस्कृतिक परंपरा के मुताबिक मुख्यमंत्री भूपेश बघेल ह आज अपन रायपुर स्थित निवास म धान के झालर बांधे के रस्म ल पूरा करीन। छत्तीसगढ़ के ग्रामीण क्षेत्र मन म अइसन झालर, आंगन अउ द्वार मन म लटकाय जाय के परंपरा हावय। जेला पहटा भी केहे जाथे।
राज्यपाल अनुसूइया उइके अउ मुख्यमंत्री भूपेश बघेल ह प्रकाश के महापर्व देवारी के पूर्व संध्या म प्रदेशवासी मन ल अपन बधाई अउ शुभकामना दीन हे।
प्रधानमंत्री आयुर्वेद संस्थान
प्रधानमंत्री नरेंद्र मोदी ह आयुर्वेद दिवस के अवसर म जम्मों मानवता के कल्याण खातिर समर्पित आयुर्वेद ल भारत के विरासत बताय हे। आज श्री मोदी ह गुजरात के जामनगर म आयुर्वेद अध्ययन अउ अनुसंधान संस्थान के संगेसंग राजस्थान के जयपुर म राष्ट्रीय आयुर्वेद संस्थान के वीडियो कॅान्फे्रंस के माध्यम ले लोकार्पण करीन।
प्रधानमंत्री ह कृषि मंत्रालय, आयुष मंत्रालय अउ आने आने विभाग मनले आग्रह करीन हे कि भारत म पैदा होवइया जड़ी-बूटी के उपयोगिता के बारे म लोगन मन म जागरूकता जगावय।
स्वच्छता पुरस्कार
विश्व शौचालय दिवस उन्नीस नवंबर के राज्य स्वच्छता पुरस्कार के विजेता मन ल पुरस्कृत करे जाही। पंचायत अउ ग्रामीण विकास मंत्री टी.एस. सिंहदेव ए दिन वीडियो कॅान्फे्रसिंग के माध्यम ले आयोजित कार्यक्रम म विजेता प्रतिभागी मन ल पुरस्कृत करहीं।
राज्य स्वच्छ भारत मिशन-ग्रामीण द्वारा अठारा आने आने श्रेणी म चयन करे गे विजेता मन ल कुल चार करोड़ पैंतीस लाख रूपिया के पुरस्कार दे जाही।
बताय जात हे कि राज्य स्वच्छता पुरस्कार दू हजार बीस के तहत पच्चीस जुलाई ले दू अक्टूबर तक प्रविष्ठि मन ल आमंत्रित करे गे रीहिस। अठारा श्रेणी मन म आयोजित ए प्रतियोगिता म लगभग तीन हजार ले जादा संस्था मन अउ मनखे मन ह भागीदारी करे रीहिन।