फर्जी जाति प्रमाण पत्र
अब प्रदेश म फर्जी जाति प्रमाण पत्र के आधार म काम करत सबो सरकारी सेवक मन ल सेवा ले बर्खास्त करे जाही। मुख्यमंत्री भूपेश बघेल ह फर्जी, गलत जाति प्रमाण पत्र धारी सरकारी सेवक मन ल जउन मन न्यायालय ले स्थगन आदेश ले लेहे, ओमन ल छोड़के बाकि मन ल सेवा ले तुरते बर्खास्त करे के निर्देश देहे। संगेसंग ओमन कीहिन हे कि स्थगन आदेश मिले म सबो प्रकरण म महाधिवक्ता के माध्यम ले तुरते सुनवाई करे बर उच्च न्यायालय ले अनुरोध करे जाही।
वित्तमंत्री बयान
केंद्रीय वित्तमंत्री निर्मला सीतारमन ह कीहिन हे कि देश म रोजगार ल बढ़ाय बर आत्मनिर्भर भारत योजना के अंतर्गत कई ठिन कदम उठाय जात हे। ओमन बताइन कि ए योजना म केंद्र सरकार ह ए बछर पहिली अक्टूबर के बाद ले नवा पात्र कर्मचारी मन बर दू बछर के अवधि बर सब्सिडी उपलब्ध कराही। ओमन कीहिन कि ए सब्सिडी आधार ले जुड़े ई.पी.एफ.ओ. खाता म लागू होही।
सीएम-उद्योग सहायता
मुख्यमंत्री भूपेश बघेल ह कीहिन कि राज्य सरकार ह प्रदेश म उद्योग मन ल हरसंभव सहयोग अउ संरक्षण दीहीं। ओमन कीहिन कि स्थानीय उद्योगपति मन ल उद्योग स्थापना बर साधन अउ संसाधन मुहैया कराना अउ उंखर मनके समस्या ल दूर करना सरकार के प्राथमिकता हावय। रायपुर के एक ठिन निजी होटल म काली छत्तीसगढ़ स्पंज आयरन मैनुफैक्चर्स एसोसिएशन डहार ले आयोजित करे गे एक ठिन कार्यक्रम ल संबोधिन करत ओमन कीहिन कि सरकार के औद्योगिक नीति के चलत बड़ संख्या म उद्योगपति मन बस्तर ले लेके सरगुजा तक उद्योग लगाय बर तियार हवय।
धान बारदाना
राज्य सरकार ह अवइया एक दिसंबर ले शुरू होवइया धान खरीदी बर सत्तर हजार नवा बारदाना जेम पोर्टल के माध्यम ले खरीदत हे। एखर अलावा पीडीएस के बारदाना ल इकट्ठा करे जात हे। संगेसंग मिलर के पुराना बारदाना के सत्यापन घलो करे जात हे ।
जानबा के मुताबिक राज्य सरकार ह किसान मनले धान खरीदी बर केंद्र सरकार ले साढ़े तीन लाख बारदाना उपलब्ध कराय के आग्रह करी रीहिन। जेमा केंद्र सरकार ह तीन लाख गठान बारदाना के आपूर्ति कोलकाता के जूट कमिश्नर के माध्यम ले करे के सूचना पाछू तीस जुलाई के राज्य सरकार ल दे रीहिस। उंहें नौ अक्टूबर के संशोधित सूचना पे्रषित करके केंद्र सरकार ह बताये रीहिन कि छत्तीसगढ़ ल दे जाय वाले बारदाना के आपूर्ति म पचास प्रतिशत के कटौती करे गेहे, जेखर बाद छत्तीसगढ़ ल एक लाख तिरालिस हजार गठान बारदाना के आपूर्ति करे जाही।
धान खरीदी प्रभावित झन होवय एखर बर राज्य सरकार ह स्थानीय स्तर म बारदाना के आपूर्ति बर कार्रवाई करत हे। बतादन कि चालू खरीफ बछर म राज्य सरकार डहार ले करीबन पंच्यानबे लाख मीटरिक टन धान खरीदी करे के लक्ष्य राखे गे रीहिस। एखर बर करीबन चार लाख पचहत्तर हजार गठान बारदाना के जरूरत होही।
एंबुलेेंस वाहन
प्रदेश के स्वास्थ्य मंत्री टी.एस. सिंहदेव ह आज अपन निवास कार्यालय ले बीस ठिन नवा एंबुलेंस गाड़ी ल हरा झंडी दिखाकर रवाना करीन। आपात स्थिति म मरीज अउ घायल मन ल अस्पताल पहुंचाय बर ए एंबुलेंस गाड़ी ल आने आने जिला म भेजे जाही। एमन ल मिलाके स्वास्थ्य विभाग डहार ले तीन सौ एंबुलेंस गाड़ी के माध्यम ले आपात चिकित्सा सुविधा जरूरतमंद तक पहुंचाय जा सकही। एमा ले उनतीस उन्नत जीवन रक्षक प्रणाली वाले एंबुलेंस घलो शामिल हे।
सीएम गौठान-पैरादान
मुख्यमंत्री भूपेश बघेल ह गांव के विकास बर गौठान म सशक्त बनाय बर जोर दीन हे। संगेसंग ओमन ह ग्रामीण मनले पैरादान के घलो अपील करीन।
आज दुर्ग जिला के पाटन क्षेत्र म जनसंपर्क अभियान के बेरा ओमन कीहिन कि एखर ले फसल के सुरक्षा घलो होही । संगेसंग जैविक खेती ल घलो बढ़ावा मिलही। ओमन ह किसान मनले कीहन कि पर्यावरण ल प्रदूषण ले बचाय बर खेत म फसल अवशेष ल जलाय के बजाय गौठान म पैरादान करय। श्री बघेल ह यहू कीहिन कि धान उत्पादन करइया किसान मन ल एथेनाॅल के प्लांट लगे ले मदद मिलही। उंहे किसान मन के आमदनी घलो बाढ़ही।
ओमन बताइन कि गांव के विकास ही सरकार के सबले पहिली प्राथमिकता हरय। ए मउका म मुख्यमंत्री ह गोबर ले दीया, तोरण, शुभ लाभ बनइया माइलोगन ले भेंट मुलाकात करीन। ओमन कीहिन कि माइलोगिन मन हर क्षेत्र म अच्छा काम करत हे, अउ उंखर मनके ए काम ले छत्तीसगढ़ ल देश के बाहिर घलो पहिचान मिले हे।
मुख्यमंत्री शुभकामना
मुख्यमंत्री भूपेश बघेल ह दिवारी के बेरा म प्रदेश के सभी जवान मनके परिजन मन ल बधाई दीन हे। मुख्यमंत्री ह अपन संदेश म कीहिन कि जवान मन असाधारण वीरता अउ कत्र्तव्यनिष्ठा के परिचय देत अपन जान के बारे म नइ सोचिन अउ शहीद होगे। ओमन ह कीहिन कि जवान मनके साहस सबो झन बर अनुकरणीय हवय।
श्री बघेल ह कीहिन कि शहीद जवान मनके परिजन मन ल ंिचंता करे के कोनो जरूरत नइ हावय। राज्य सरकार ओखर मनके हरसंभव मदद करही। उंहें शहीद जवान मनके परिजन मन ल दे जाय अनुग्रह अनुदान के राशि घलो तीन लाख रूपिया ले बढ़ाके अब बीस लाख रूपिया कर दे गेहे।
जानबा के मुताबिक मुख्यमंत्री के शुभकामना संदेश ल पुलिस महानिदेशक अउ जिला के पुलिस अधीक्षक मन डहार ले शहीद मनके परिजन ल भेंट करे जाही।
लोक प्रसारण दिवस
आज लोक प्रसारण दिवस मनाये जात हे। ए दिन उन्नीस सौ सैंतालिस म महात्मा गांधी के नई दिल्ली के आकाशवाणी स्टूडियो म आय के सुरता म मनाये जाथे। राष्ट्रपिता ह विस्थापित लोगन मन ल संबोधित करे रीहिन, जउन मन बंटवारा के बाद अस्थायी रूप ले हरियाणा के कुरूक्षेत्र म रहत रीहिन।
ए बेरा म नई दिल्ली के आकाशवाणी परिसर म हर बछर विशेष कार्यक्रम के आयोजन घलो करे जाथे।
कोरोना समाचार/जागरूकता
रायपुर के भीमराव अंबेडकर अस्पताल के वरिष्ठ चिकित्सक डॅाक्टर ओ.पी. सुंदरानी ह कोरोना संक्रमण के लक्षण दिखे म तुरते जांच कराय या फेर विशेषज्ञ चिकित्सक ल दिखाय बर कीहिन हे। डॅाक्टर सुंदरानी ह बताइन कि वर्तमान म प्रदेश म कोरोना संक्रमण के दर म कमी आय हे। फेर आईसीयू म होवइया मौत के आकड़ां बाढ़े हे।
ओमन बताइन कि अभी के बेरा म ग्रामीण क्षेत्र ले अइसने मामला जादा आवत हे, जेखर मनके उमर साठ बछर ले जादा हे अउ जउन मन कोरोना लक्षण दिखे म जांच कराय या विशेषज्ञ चिकित्सक ल दिखाय म देरी करीन हे। डॅाक्टर सुंदरानी ह कीहिन कि घर के जवान लईका मन ल कोरोना संक्रमण बर जारी करे गे दिशा निर्देश के पालन करना चाही ताकि उंखर मनके घर के सियान मन कोरोना ले बांच सकय।
इही बीच बिलासपुर जिला के मुख्य चिकित्सा अउ स्वास्थ्य अधिकारी डॅाक्टर प्रमोद महाजन ह लोगन मनले कोरोना संक्रमण ले बंाचे बर जरूरी सावधानी बरते के अपील करीन हे।
धनतेरस
छत्तीसगढ़ संग देशभर म धनतेरस के तिहार हंसी खुशी ले मनाये जाथे। धनतेरस के संगेसंग दिवारी तिहार के परब शुरू हो जाथे। आज के दिन धन म बढ़ोत्तरी करे बर कुबेर अउ स्वस्थ रेहे बर आयुर्वेद के देवता धनवंतरी के पूजा करे जाथे। धनतेरस के तिहार कार्तिक कृष्ण पक्ष के त्रयोदशी के दिन मनाये जाथे।
ट्रेन परिचालन
रेल यात्री मनके सुविधा ल धियान म राखत रेल विभाग डहार ले अलीपुरद्वार ले लोकमान्य तिलक के बीच पूजा स्पेशल ट्रेन संचालित करे जाही। ए गाड़ी केवल अलीपुरद्वार ले तेरा अउ पंद्रा नवंबर के लोकमान्य तिलक बर चलाये जाही। ये गाड़ी प्रदेश के बिलासपुर अउ रायपुर स्टेशन ले होके जाही।