आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री-आह्वान
प्रधानमंत्री नरेन्द्र मोदी ह देसवासी मन ले आह्वान करे हे कि ए बखत देवारी तिहार म स्थानीय जिनीस मन ल बिसावय। ओमन किहीन कि ए बखत के देवारी ल पूरा तरह ले स्थानीय जिनीस के उपयोग करके मनाना हमर संकल्प अउ दायित्व हरय।
प्रधानमंत्री ह वाराणसी म आज वीडियो कान्फ्रेंसिंग के माध्यम ले कतकोन विकास परियोजना मनके आधारसिला अउ आने-आने परियोजना के उद्घाटन करीन। ए मउका म ओमन कहिन कि जब सबो लोगन स्थानीय उत्पाद अउ उंखर गुणवत्ता के तारीफ करे बर लगही, त एखर असर दूसर उपर घलो पड़ही। संगेसंग ए जिनीस ल बनइया मन ल घलो लाभ मिलही।
मरवाही उपुचनाव-मतगणना
मरवाही विधानसभा सीट म होय उपचुनाव बर काली दस नवंबर के वोट मनके गिनती करे जाही। जिला के निर्वाचन अधिकारी ह बतईन कि काली गौरेला के सरकारी गुरूकुल स्कूल म सुरक्षा के बीच बिहनिया आठ बजे ले वोट के गिनती करे जाही। ओमन बतईन कि सबले पहिली डाक मतपत्र के गिनती करे जाही। एखर बाद इलेक्ट्राॅनिक वोटिंग मसीन मनके वोट के गिनती होही। ओमन बतईन कि मतगणना पूरा होय के बाद कोन्हों भी पांच मतदान केन्द्र के वोट के संग वीवीपैट के पर्ची के मिलान करे जाही। मतगणना बर सुरक्षा के कड़ा इंतजाम करे गेहे।
खबर के मुताबिक पाछु तीन नवंबर के होय मतदान म करीबन अटहत्तर प्रतिसत मतदाता मन ह अपन मताधिकार के प्रयोग करे रिहीन। ए सीट बर कांग्रेस अउ भारतीय जनता पार्टी समेत आठ उम्मीदवार चुनाव मैदान म हवय।
पटाखा-समय/सीमा
छत्तीसगढ़ म देवारी तिहार के मउका म सिरिफ दू घंटा ही पटाखा फोड़े जा सकही। राष्ट्रीय हरित अधिकरण-एनजीटी के आदेस के मुताबिक ए दू घंटा के दउरान घलो कम प्रदूषण होवइया पटाखा ही फोड़े जा सकही। फेर, अभी पटाखा फोड़े के बेरा के निर्धारण नइ होय हे।
खबर के मुताबिक देस म दिल्ली संग कतकोन राज्य म एनजीटी ह आज अधरतिहा ले तीस नवंबर तक पटाखा फोड़े म रोक लगा देहे।
जवान घायल/आईईडी/गिरफ्तार
सुकमा जिला म आने-आने माओवादी घटना म एक झिन डिप्टी कमांडेंट समेत एक झिन आने जवान घायल होगे हे। जिला के पुलिस अधीक्षक के.एल. धु्रव ह बतईन कि बीजापुर अउ सुकमा जिला के जवान संयुक्त तलाशी अभियान म निकले रिहीन। इही दउरान माओवादी मन डहार ले लगाय गे स्पाईक होल के चपेट म आय ले डिप्टी कमांडेंट घायल होगे। उहें, विस्फोटक के चपेट म आय ले डिस्ट्रिक्ट रिजर्व गार्ड-डीआरजी के एक झिन जवान घलो घायल होगे। दूनों घायल जवान मन ल एयर लिफ्ट करके अच्छा इलाज बर अस्पताल लाय गेहे।
इही जिला के चिंतागुफा अउ बुरकापाल के तीर सुरक्षा बल ह दस-दस किलो के दू आईईडी बम बरामद करे हे। एखर अलावा माओवादी मन डहार ले लगाय गे पन्द्रह ले जादा स्पाईक होल घलो बरामद करे गेहे।
ऐति, बीजापुर जिला के बासागुड़ा अउ पामेड़ थाना अंतर्गत एक महिला समेत छह झिन माओवादी मन ल गिरफ्तार करे गेहे। खबर के मुताबिक ए माओवादी मनके कब्जा ले पाईप अउ टिफिन बम घलो बरामद करे गेहे।
कोरोना-समाचार/जागरूकता
देस म कोरोना संक्रमण ले स्वस्थ होय के दर बयानवे दशमलव चार-नौ प्रतिसत होगे हे। स्वस्थ लोगन के संख्या उनयासी लाख के करीबन पहुंच गेहे। ए बेरा पांच लाख ले जादा कोरोना मरीज मनके इलाज चलत हे। उहें, देसभर म संक्रमित लोगन के संख्या पच्यासी लाख ले जादा होगे हे।
ओति, छत्तीसगढ़ म कोरोना संक्रमण ले होवइया मउत के आंकड़ा ढाई हजार के करीबन पहुंच गेहे। काली प्रदेस म तेरह कोरोना संक्रमित मनके मउत होय हे। उहें, काली तेरह सौ पचहत्तर नवा कोरोना पाॅजिटिव मरीज मनके पहिचान करे गीस। प्रदेस म बाईस हजार ले जादा कोरोना संक्रमित मरीज मनके इलाज चलत हे।
इही बीच, छत्तीसगढ़ चेम्बर आॅफ कामर्स एंड इंडस्ट्रीज के अध्यक्ष जितेन्द्र बरलोटा ह लोगन मन ले कोरोना ले बचाव बर जरूरी सावधानी बरते के अपील करे हे।
कर्मचारी उपस्थिति-निर्देश
राज्य सरकार ह मंत्रालय अउ विभागाध्यक्ष कार्यालय म अधिकारी अउ करमचारी के सत-प्रतिसत उपस्थित के आदेस जारी करे हे। ए बेवस्था अवइया सत्रह नवंबर ले लागू होही। ए दउरान सोसल डिस्टेंसिंग बनाय राखे अउ         अधिाकारी-करमचारी मन ल निजी गाड़ी ले कार्यालय आय के सलाह दे गेहे।
खबर के मुताबिक कोरोना संक्रमण के सेती कमरचारी मन ल पचास प्रतिसत उपस्थिति के निरदेस दे गे रिहीस।
मुख्यमंत्री-पाटन दौरा
मुख्यमंत्री भूपेश बघेल ह आज दुरूग जिला के पाटन तहसील के बोरेन्दा गांव के दउरा करीन। ए दउरान मुख्यमंत्री ह साग-भाजी लगइया स्व-सहायता समूह के माईलोगिन मन ले गोठबात करीन। संगेसंग उत्पादित साग-भाजी ल घलो देखीन। ए मउका म स्व-सहायता समूह के माईलोगिन मन ह मुख्यमंत्री ल बारहमासी करेला के टुकनी घलो भेंट करीन।
ताम्रध्वज/डहरिया-दौरा
प्रदेस के लोक निर्माण मंत्री ताम्रध्वज साहू ह कहिन कि रज्य म टू लेन सड़क के ही निर्माण करे जाही। अब कहू घलो सिंगल लेन सड़क नइ बनही। अपन बलरामपुर प्रवास के दउरान श्री साहू ह विजय नगर गांव म इकचालीस करोड़ रूपिया ले ज्यादा के आने-आने निर्माण काम के भूमिपूजन अउ सिलान्यास करीन। संगेसंग ओमन ह बलरामपुर-रामानुजगंज जिला के चांदो ले कुसमी रद्दा म पुल निर्माण के मंजूरी घलो दीन।
ऐति, नगरीय प्रसासन अउ श्रम मंत्री डाॅक्टर शिवकुमार डहरिया ह बलौदाबाजार-भाटापारा जिला के प्रवास के दउरान विकास काम बर करीबन नौ करोड़ रूपिया के आने-आने निर्माण काम के भूमिपूजन अउ सिलान्यास करीन। ए मउका म ओमन कहिन कि सबो नगरीय निकाय म स्वच्छता उपर बिसेस जोर दे जात हे।
नवीन उद्योग नीति
प्रदेस के वाणिज्य अउ उद्योग मंत्री कवासी लखमा ह कहिन कि राज्य म उद्योग लगे ले स्थानीय निवासी मन ल रोजगार मिलही। संगेसंग कामगार के पलायन म घलो रोक लगही। काली रईपुर के न्यू सर्किट हाउस म औद्योगिक नीति के संबंध म वेबीनार ल संबोधित करत ओमन कहिन कि नवा औद्योगिक नीति म सरकार ह उद्योग मन ल जमीन, बिजली दर म छूट, अनुदान सहायता, आने-आने स्वीकृति प्रदान करे के संग कतकोन आने बेवस्था करे हे। श्री लखमा ह कहिन कि सरकार ह अच्छा उद्योग नीति बनाय हे। अब उद्योगपति मन ल उद्योग लगाय बर आगू आना चाही।
खबर के मुताबिक प्रदेस के अर्थव्यवस्था ल मजबूत करे के उद्देश्य ले राज्य सरकार ह औद्योगिक नीति-दू हजार उन्नीस-चैबीस म इक्कीस संसोधन अधिसूचित करे हे। एखर तहत सरकार ह लद्यु अउ मध्यम श्रेणी के उद्योग मन ल नगद या जीएसटी म अनुदान देके निर्णय लेहे। उहें, अनुसूचित जाति अउ अनुसूचित जनजाति श्रेणी के उद्यमी मन बर बिसेस औद्योगिक निवेस प्रोत्साहन पैकेज के घोसना करे गेहे।
हमर ग्राम सभा
राज्य के पंचायत अउ ग्रामीण विकास मंत्री टी.एस. सिंहदेव ह काली रेडियो म राज्य सरकार के नीति, योजना अउ कारीकरम ले संबंधित श्रोता मनके सवाल के जवाब दीन। ओमन ह काली संझा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म वाट्सऐप संदेस मनके माध्यम ले श्रोता मन डहार ले पूछे गे सवाल के उत्तर देके उंखर जिज्ञासा के समाधान करीन। श्री सिंहदेव ह हमर ग्राम सभा म माध्यान्ह भोजन, राष्ट्रीय ग्रामीण आजीविका मिशन, नरवा, गरूवा, धुरवा, बाड़ी योजना संग प्रधानमंत्री आवास योजना ले संबंधित सवाल मनके जवाब दीन।