प्रधानमंत्री नरेन्द्र मोदी ह देस के युवा मन ले जीवन ल सरल बनाय वाले नवाचार ल बढ़ावा देके अपील करीन हे। ओमन अइसन कोनो भी कारोबार बर युवा मन ल मदद दे बर विश्वास देवाईन हे। भारतीय प्रौद्योगिकी संस्थान दिल्ली के इंक्यावनवां दीक्षांत समारोह म आज श्री मोदी ह किहीन कि नवाचार ले आत्मनिर्भर भारत अभियान सफल हो सकत हे। ओमन किहीन कि आत्मनिर्भरता ह घलो वैश्वीकरण जइसे जरूरी हे।
प्रधानमंत्री ह किहीन कि कृषि क्षेत्र म नवा स्टार्टअप म अतेक संभावना पहिली घांव होय हे। श्री मोदी ह किहीन कि अब युवा मन ल गुणवत्ता, विस्तार के संभावना अउ विश्वसनीयता के नवा मंत्र ल अपनाना होही।
शहरी प्राथमिक स्वास्थ्य केन्द्र-शुभारंभ
स्वास्थ्य मंत्री टी.एस. सिंहदेव ह आज प्रदेस के तीन सहर म पांच प्राथमिक स्वास्थ्य केन्द्र के डिजिटल सुरूवात करीन। एमा रायगढ़ अउ जगदलपुर के दो-दो अउ भाटापारा के एक सहरी प्राथमिक स्वास्थ्य केन्द्र सामिल हे।
स्वास्थ्य मंत्री ह वीडियो कान्फ्रेंसिंग के माध्यम ले बलौदाबाजार म छह ठिन नवा स्वास्थ्य सुविधा केन्द्र के घलो सुरूवात करीन। एखर अलावा रईपुर के तीन ठिन सहरी प्राथमिक स्वास्थ्य केन्द्र भनपुरी, राजातालाब अउ भाटागांव के ‘‘हमर अस्पताल‘‘ के रूप म बढ़ाय के बाद नवा सुविधा के सुरूवात करे गीस।
नीति आयोग के मुख्य कार्यपालन अधिकारी अमिताभकांत ह वीडियो कान्फ्रेंसिंग के माध्यम ले कोरबा संग दस आकांक्षी जिला म निर्धारित करे गे सूचकांक उपर केन्द्र सरकार के योजना अउ विकास काम के समीक्षा करीन।
बइठका म सीईओ ह स्वास्थ्य, पोषण अउ सिंचाई सुविधा बढ़ाय के संग नगदी फसल के खेती अउ दू फसल वाले रकबा ल बढ़ाय बर तैयार करे गे योजना मन म तेजी लाय के जरूरत बतईन। ए मउका म ओमन ह कोरोना संक्रमण के वर्तमान स्थिति के बारे म घलो कोरबा कलेक्टर ले जानकारी लीन।
राष्ट्रीय हरित अधिकरण ह खेत मन म फसल के कटई के बाद बांचे जिनीस ल जलाय म रोक लगा देहे। खेत म बाचे फसल के अवशेष ल जलाय ले पर्यावरण ल होवइया नुकसान ल देखत अधिकरण डहार ले ए आदेस जारी करे गेहे। आदेस म किसान मन डहार ले खेत म फसल अवशेष जलाय म दंड के प्रावधान घलो करे गेहे।
छत्तीसगढ़ म घलो आवास अउ पर्यावरण विभाग ह फसल कटाई के बाद खेत म बाचे फसल अवशेष ल जलाय म रोक लगा देहे। अधिकारी मन ह बतईन कि नियम के उल्लंघन करे जाय म दोसी मनके खिलाफ जुर्माना के प्रावधान हे। वायु प्रदूषण निर्वारण अउ नियंत्रण अधिनियम म ए जुर्माना वूसले जाही। संगेसंग एमा छह महीना के सजा के घलो प्रावधान हे। अधिनियम के कड़ाई ले पालन कराय बर एखर बर समझाईस दे जावत हे। एखर अलावा फसल अवशेष प्रबंधन बर प्रचार करे के संगेसंग किसान मन ले धान के पैरा ल गौठान म दान करे के अपील घलो करे जावत हे।स्वास्थ्य मंत्री-समीक्षा
प्रदेस के स्वास्थ्य मंत्री टी.एस. सिंहदेव ह केन्द्रीय स्वास्थ्य मंत्री डाॅक्टर हर्षवर्धन ले छत्तीसगढ़ बर पर्याप्त संख्या म कोरोना के टीका देवाय बर आग्रह करीन हे। ओमन किहीन कि प्रदेस म टीका के भंडारण, संधारण अउ वितरण के पूरा बेवस्था हे। केन्द्रीय स्वास्थ्य मंत्री डहार ले वीडियो कान्फ्रेंसिंग के माध्यम ले प्रदेस म कोरोना संक्रमण ले निपटे के बेवस्था के बारे म गोठबात के दउरान श्री सिंहदेव ह ए आग्रह करीन अउ बतईन कि राज्य म अभी रोज बाईस ले पच्चीस हजार सैंपल के जांच होवत हे।
कोरोना-जागरूकता
दुर्ग जिले की समाज सेवी नीतू श्रीवास्तव ह लोगन मन ले कोरोना ले बचाव बर जरूरी सावधानी बरते के अपील करे हे।
सिनेमाघर/मल्टीप्लेक्स-निर्देश
राज्य सरकार ह कोरोना संक्रमण ल देखत बंद सिनेमाघर अउ मल्टीप्लेक्स के संचालन बर निरदेस जारी करीन हे। एमा सिनेमाघर अउ मल्टीप्लेक्स के संचालन के जानकारी देवत मानक संचालन प्रक्रिया-एसओपी अउ निरदेस के कड़ाई ले पालन करे बर केहे गे हवय।
लोकवाणी
मुुख्यमंत्री भूपेश बघेल के मासिक रेडियो वार्ता लोकवाणी के बारहवां कड़ी के प्रसारण काली आठ नवंबर के होही। मुख्यमंत्री ह लोकवाणी म ए बखत – बालक, बालिकाओं की पढ़ाई, खेलकूद और भविष्य – विषय उपर प्रदेश के मनखे मन ले गोठबात करहीं। ए कार्यक्रम के प्रसारण छत्तीसगढ़ के आकाशवाणी के सबो केंद्र, एफ.एम. रेडियो अउ क्षेत्रीय समाचार चैनल म बीहनिया साढ़े दस बजे ले ग्यारा बजे तक करे जाही।
जंगल सफारी-बाड़ा
मुख्यमंत्री भूपेश बघेल ह नवा रईपुर के नंदनवन जंगल सफारी अउ जू म वन्यप्राणी मन बर बनाय गे सात ठिन बाड़ा के ई-लोकार्पण करीन। एमा लोमड़ी, सियार, चैसिंगा, काला हिरण, कोटरी, नीलगाय अउ लकड़बग्घा के बाड़ा सामिल हे। एला मिलाके जंगल सफारी म बाड़ा के संख्या बाढ़के अट्ठारह होगे हे।
ए मउका म मुख्यमंत्री ह किहीन कि पर्यावरण अउ प्रकृति ल सहेजे के संग विकास राज्य सरकार के प्राथमिकता हे। जैवविविधता छत्तीसगढ़ के पहिचान हे, जेला आगू बढ़ाय बर वन्यप्राणी मनके संरक्षण जरूरी हे। ओमन बतईन कि जंगल सफारी म सैंतीस ठिन बाड़ा बनाय के लक्ष्य हे, जेखर ले जैवविविधता के संरक्षण म मदद मिलही।
शिक्षा के गोठ
प्रदेस म स्कूल शिक्षा विभाग डहार ले ई-न्यूज लेटर ‘‘शिक्षा के गोठ‘‘ नवंबर महीना के अंक जारी करे गेहे। एखर बिसेसता ए हे कि एला इंटरैक्टिव पीडीएफ के फाॅर्मेट म दे गेहे, जेमा इवेंट पेज म फोटो ल छूते साथ वीडियो मोबाइल म सीधा चले बर लगही। एखर बिसेसता हे कि नवाचारी गतिविधि म सूरजपुर जिला ले मिस्ड काॅल गुरूजी, सुकमा ले मोटर साइकिल गुरूजी, दुरूग ले सोयाबड़ी ब्लैक बोर्ड, बलौदाबाजार ले कबाड़ ले जुगाड़ अउ जांजगीर-चांपा ले समर्पण मंच ल बिसेस स्थान दे गे हवय।
उहें, प्रदेस म पढ़ना-लिखना अभियान के लक्ष्य ल पूरा करे बर सबो जिला म बिसेस रणनीति बनाय जाही। राज्य साक्षरता मिशन प्राधिकरण के संचालक ह सबो जिला सिक्षा अधिकारी, जिला परियोजना अधिकारी अउ डाईट के प्राचार्य मन ल देवारी के बाद सर्वें के काम सुरू करे के अउ सर्वें दल जल्दी बनाय के निरदेस दीन हे।
सैनिक स्कूल-प्रवेश परीक्षा
अखिल भारतीय सैनिक स्कूल प्रवेश परीक्षा के आयोजन अवइया बछर दस जनवरी के करे जाही। ए परीक्षा तेईस राज्य अउ एक केन्द्रसासित प्रदेस म तैंतीस सैनिक स्कूल म छठवीं अउ नवमीं कक्षा म प्रवेस बर कराय जाही। दाखिला बर आॅनलाइन आवेदन प्रक्रिया बीस अक्टूबर ले सुरू होगे हे अउ ए महीना के उन्नीस तारीख तक चलही। आॅनलाइन आवेदन बर अभ्यर्थी मन ल वेबसाइट म पंजीकरण म कराना पड़थे।
हज-आवेदन
हज-दू हजार इक्कीस बर आॅनलाइन आवेदन के प्रक्रिया आज ले सुरू होगे हवय। आॅनलाइन हज आवेदन हज कमेटी के वेबसाइट म मौजूद हे। छत्तीसगढ़ राज्य हज कमेटी के अध्यक्ष मोहम्मद असलम खान ह बतईन कि एखर आखिरी तारीख दस दिसंबर राखे गेहे। इच्छुक आवेदक मन डहार ले केन्द्रीय हज कमेटी के मोबाइल ऐप्लीकेशन के माध्यम ले घलो आॅनलाइन आवेदन करे जा सकत हे। हज यात्री मनके पहिली उड़ान छब्बीस जून दू हजार इक्कीस ले सुरू होही। उहें, हाजी मनके स्वदेस वापसी तीस जुलाई दू हजार इक्कीस ले होही।
संक्षिप्त समाचार
अउ अब थोरकुन समाचार सार म-
– भारत स्काउट्स अउ गाइड्स के स्थापना दिवस के मउका म आज प्रदेस के आने-आने जिला मन म कारीकरम आयोजित करे गीस।
– छत्तीसगढ़ माध्यमिक शिक्षा मंडल डहार ले दसवीं अउ बारहवीं के पूरक परीक्षा बर आॅनलाइन आवेदन करे के आखिरी तारीख ल बढ़ाके आठ नवंबर कर दे गेहे।
– महासमुंद पुलिस ह पिथौरा थाना क्षेत्र म डकैती के प्रयास करे के मामला म पांच झिन आरोपी मन ल गिरफ्तार करे हे।
– राजनांदगांव जिला म पुलिस ह सराब के अवैध बिक्री के मामला म कार्रवाई करत दस झिन आरोपी मन ल गिरफ्तार करे हे।
अउ
– जांजगीर अउ नैला के तीन ठिन दुकान मन म प्रसासन के टीम ह छापामार कार्रवाई करत लाखों रूपिया के फटाखा जब्त करे हे।