कोरोना टीकाकरण तैयारी
छत्तीसगढ़ म कोरोना संक्रमण ले बचे खातिर टीकाकरण के पहिली के तियारी चालू होगे हे। एखर बर केंद्र सरकार के निर्देश के मुताबिक सबो सरकारी अउ निजी स्वास्थ्य संस्था म काम करइया स्वास्थ्य कार्यकर्ता मनके डाटा-बेस तियार करे जात हे।
स्वास्थ्य मंत्री टी.एस. सिंहदेव ह बताइन कि टीका के भंडारण अउ संधारण बर राज्य करा पूरा बेवस्था हे। एखर सुरक्षित संधारण बर अभी पांच सौ तीस कोल्ड-चेन प्वाइंट क्रियाशील हवय। संगेसंग अस्सी नवा कोल्ड चेन प्वाइंट घलो शुरू करे जात हे। ओमन बताइन कि अभी टीकाकरण के कुल संधारण क्षमता एक लाख पांच हजार लीटर हवय, जउन कि जरूरत ले साठ हजार लीटर ले जादा हवय।
एति स्वास्थ्य विभाग के अधिकारी मन बताइन कि टीकाकरण के तियारी ल लेके मुख्य सचिव के अध्यक्षता म राज्य स्तरीय स्टीयरिंग समिति अउ राज्य टास्क फोर्स समिति के गठन करे गेहे। उंहें सबो जिला म जिला कलेक्टर मन नोडल अधिकारी होही।
कोरोना समाचार/जागरूकता
प्रदेश म कोरोना संक्रमण ले बचाव बर लोगन मन ल जागरूक बनाये के उद्देश्य ले केंद्र अउ राज्य सरकार ले अभियान चलाये जात हे। फेर आम मनखेन मन घलो एमा अपन सहयोग देवत हे। राज्य के बालोद जिला के तीन झिन नोनी मन एक छत्तीसगढ़ी गीत के माध्यम ले कोरोना संक्रमण के बचाव बर जरूरी पाय अपनाय के सलाह देवत हे।
ए गीत म रेखा शर्मा, सरिता देवंागन अउ रिया दास ह लोगन मनले मास्क पहिने सोशन डिस्टेसिंग अउ घेरी बेरी हाथ धोय बर पे्ररित करीन।
किसान प्रदर्शन
प्रदेश म धान के खरीदी जल्दी शुरू करे के मांग अउ केंद्र के तीन ठिन कृषि बिल के विरोध म किसान मन ह आज आने आने जिला मन म धरना प्रदर्शन करीन। ए कड़ी म धमतरी, बालोद अउ कंाकेर जिला के किसान मन ग्राम पंचायत पुरूर म धरना प्रदर्शन करत राष्ट्रीय राजमार्ग म चक्का जाम करीन।
ए दउरान गाड़ी मनके अवई जवई ह प्रभावित रीहिस । प्रशासनिक अधिकारी मनके समझाय के बाद ओमन ल हटाय गीस।
उंहें महासमुंद जिला के घोड़ारी गांव म घलो राष्ट्रीय किसान संघर्ष समिति के बैनर म किसान मन धरना प्रदर्शन करीन।
लोकवाणी
मुुख्यमंत्री भूपेश बघेल के मासिक रेडियो वार्ता लोकवाणी के बारहवंा कड़ी के प्रसारण इतवार आठ नवंबर के होही। मुख्यमंत्री ह लोकवाणी म ए दरी – बालक, बालिकाओं की पढ़ाई, खेलकूद और भविष्य – विषय उपर प्रदेश के मनखे मन ले गोठबात करहीं।
ए कार्यक्रम के प्रसारण छत्तीसगढ़ के आकाशवाणी के सबो केंद्र एफ.एम. रेडियो अउ क्षेत्रीय समाचार चैनल म बीहनिया साढ़े दस बजे ले ग्यारा बजे तक करे जाही।
माओवादी समर्पण
बस्तर संभाग म पुलिस डहार ले माओवादी मन ल समाज के मुख्यधारा म सामिल करे बर घर वापसी अभियान चलाये जात हे। एला स्थानीय बोली म लोन वर्राटू अभियान केहे गेहे। ए अभियान ले प्रभावित होके आज दंतेवाड़ा जिला म एक झिन माओवादी ह अपन भरमार बंदूक के संग आत्मसमर्पण कर देहे। जेला दस हजार रूपिया के प्रोत्साहन राशि दे गीस।
हाईस्कूल/हायर सेकण्डरी पूरक आवेदन
माध्यमिक शिक्षा मंडल के हाईस्कूल, हायर सेकण्डरी अउ व्यावसायिक मुख्य परीक्षा म जउन छात्र मन ल पूरक परीक्षा के संग दूसर घ्ंााव पूरक परीक्षा देके पात्रता हावय, ओमन अब आठ नवंबर तक आवेदन कर सकत हे।
माध्यमिक शिक्षा मंडल के सचिव ल मिले जानबा के अनुसार अइसन विद्यार्थी विलंब शुल्क के संग निर्धारित तारीख तक मंडल के वेबसाइट म आवेदन कर सकत हे।
अइसने मानव संसाधन विकास मंत्रालय डहार ले संचालित केंद्रीय क्षेत्रीय छात्रवृत्ति योजना म अब विद्यार्थी मन ई-छात्रवृत्ति पोर्टल म तीस नवंबर तक आॅनलाईन आवेदन कर सकत हे।
सीटीईटी-परीक्षा
केंद्रीय शिक्षक पात्रता परीक्षा- सीटीईटी इकतीस जनवरी दू हजार इक्कीस ल आयोजित करे जाही। एखर ले पहिली सीटीईटी परीक्षा ए बछर म पांच जुलाई के देशभर के एक सौ बारा ठिन शहर म होना रीहिस । फेर प्रशासनिक कारण के चलत एला रोक देगे रीहिस।
केंद्रीय माध्यमिक शिक्षा बोर्ड – सीबीएसई ह एक ठिन विज्ञप्ति म बताइन कि सुरक्षित दूरी अउ आने सुरक्षा उपाय के सेती परीक्षा ह अब एक सौ पैंतीस ठिन शहर म आयोजित करे जाही। नवा परीक्षा केंद्र म – लखीमपुर, नौगंाव, बेगुसराय, गोपालगंज, पूर्णिया, रोहतास, बिलासपुर, हजारीबाग, जमशेदपुर, लुधियाना, अंबेडकर नगर, बिजनौर, बुलंदशहर, गोंडा, मैनपुरी, प्रतापगढ़, शाहजहंापुर,सीतापुर अउ उधमसिंह नगर शामिल हे।
सीटीईटी के वेबसाइट – डब्लू डब्लू डब्लू डॅाट सीटीईटी डॅाट एनआईसी डॅाट इन – म शहर के एक ठिन सूची घलो उपलब्ध हे।
व्यवहार न्यायाधीश/रक्षा सेवा परीक्षा
छत्तीसगढ़ लोक सेवा आयोग डहार ले व्यवहार न्यायाधीश के प्रारंभिक परीक्षा चुने गे अभ्यर्थी मन बर लिखित परीक्षा दस नवंबर के आयोजित करे जाही। ये परीक्षा रायपुर शहर के तीस ठिन केंद्र मन म बीहनिया दस बजे ले बारा बजे तक होही।
उंहें संघ लोक सेवा आयोग नई दिल्ली डहार ले संयुक्त रक्षा सेवा परीक्षा आठ नवंबर के होही। एखर बर रायपुर शहर म आठ ठिन परीक्षा केंद्र बनाय गेहे। ये परीक्षा तीन पाली म होही। परीक्षा के संचालन बर कलेक्ट्रेट कार्यालय के कक्ष क्रमंाक छै ल कंट्रोल रूम बनाय गेहे।
जवान मौत
बीजापुर जिला के चिनाकोड़ेपाल म आज एक झिन केंद्रीय रिजर्व पुलिस बल-सीआरपीएफ जवान के मउत होगे। ये जवान तलाशी अभियान बर आने जवान के संग बीहनिया निकले रीहिस। पुलिस अधीक्षक कमलोचन कश्यप ह बताइन कि सीआरपीएफ के एक सौ सत्तरवंा बटालियन म पदस्थ ये जवान शिकारी मन डहार ले अवैध रूप ले लगाये गे बिजली तार के चपेट म आय ले उंखर मौत होगे।
हाथी आतंक
कोरिया जिला के खड़गंवा विकासखंड म हाथी के हमला ले दू झिन मवेशी के मउत होगे। ए हाथी मन ह पाछू रतिहा मुगुम, बारी, बड़ेकलवा, धनपुर, कांसाबहरा, अउ खैरबहरा गांव म उत्पात मचाय रीहिन, जेखर ले कुछ ग्रामीण मनके घर ल नुकसान पहुंचीस। उंहें पंद्रा झिन ग्रामीण मनके फसल घलो बर्बाद होगे।
एति घटना के सूचना मिलत वन विभाग के टीम ह गांव म पहुंचीस अउ ग्रामीण मन ल हाथी ले सुरक्षित दूरी बनाय राखे बर कीहिन। बताय जात हे कि ए इलाका म चालीस ले जादा हाथी मनके दल कुछ दिन ले घूमत रीहिन। जउन कि काली रतिहा गांव म उत्पात मचाय के बाद जंगल कोति लहुट गे।
समाचार सार म-
– दुर्ग सांसद विजय बघेल के तबियत खराब होय के सेती ओमन ल एम्स म भर्ती कराय गेहे। एखर पहिली ओमन भिलाई के सेक्टर-9 अस्पताल म पाछू चार दिन ले भर्ती रीहिन।
– देशभर म माइलोगिन मन संग होत अपराध के खिलाफ आज रायपुर म महिला कंाग्रेस कार्यकर्ता मन राज्यसभा संासद फूलोदेवी नेताम के नेतृत्व म धरना प्रदर्शन करीन।
– राज्य म अपराध बाढ़े अउ युवा मन ल रोजगार नइ देके आरोप लगात भारतीय जनता युवा मोर्चा के कार्यकर्ता मन ह प्रदेश अध्यक्ष अमित साहू के नेतृत्व म दंतेवाड़ा शहर म धरना प्रदर्शन करीन।
– जांजगीर जिला के बलौदा म एक झिन स्कूली लईका के अपहरण होगे रीहिस। ए लईका पुलिस ल आज बिलासपुर के तीर मिलिस, संगेसंग पांच लाख रूपिया के फिरौती मंगइया दू झिन मनखे ल घलो गिरप्तार करीन।
– इही जिला के नवागढ़ गंाव म लूट के घटना म दू झिन मनखे ल पुलिस ह गिरप्तार करे हे।
अउ
– बलौदाबाजार जिला म पुलिस ह लोगन मन ल जादा ब्याज के लालच देके निजी कंपनी म निवेश कराय अउ करोड़ो रूपिया के ठगी करे के मामला म छै झिन मनखे ल गिरप्तार करीन हे।