केंद्रीय स्वास्थ्य मंत्रालय डहार ले हालेच म जारी करे गे आंकड़ा म केहे गेहे कि कोरोना संक्रमण ले सत्तर प्रतिशत पुरूष मन के मउत होय हे। उंहें सतरा साल ले कम उमर के लइका अउ अठारा ले पचीस साल म ए दर ह एक प्रतिशत हवय। आंकड़ा के मुताबिक कोरोना संक्रमण के खतरा सियनहा लोगन मन म जादा देखे जात हे। अइसन म स्वास्थ्य विभाग ह लोगन मन ल सतर्क, सावधान अउ सोशल डिस्टेसिंग के पालन करे के सलाह देहे अउ संगेसंग अपन हाथ ल साबुन पानी ले बीस सेकण्ड तक धोये के बात केहे हे।
ए बेरा छत्तीसगढ़ म एक हजार ले जादा सरकारी केंद्र मन म कोरोना संक्रमण के एंटीजन जांच करे जात हे। एति दंतेवाड़ा जिला म मोबाइल मेडिकल यूनिट डहार ले स्टेट बैंक आॅफ इंडिया के मुख्य शाखा म काम करइया जम्मों अधिकारी अउ कर्मचारी मनके कोरोना जांच करे गीस।
उंहें छत्तीसगढ़ के पंथी नृत्य कलाकार दिनेश जांगडे ह लोगन मनले कोरोना ले बांचे बर जरूरी सावधानी बरते के अपील करे हे।
बाईट – दिनेश जांगड़े (25 सेकण्ड)
चावल गुणवत्ता
केंद्रीय खाद्य अउ उपभोक्ता मामला के मंत्री पीयूष गोयल ह देश म बढ़िया चांउर बांटे उपर जोर देहे। पुष्टई वाले चांउर बांटे ले जुड़े समीक्षा बइठका म भारतीय खाद्य निगम ह समन्वित बाल विकास सेवा अउ मीड डे मिल योजना ल अवइया वित्त वर्ष म देश के जम्मों जिला म बढ़िया चंाउर के सरकारी खरीद अउ बांटे बर योजना बनाय बर केहे गेहे।
खाद्य अउ सार्वजनिक वितरण विभाग, लोक वितरण प्रणाली के माध्यम ले चांउर ले जुड़े केंद्र प्रायोजित योजना चलावत हे। ए योजना ल लागू करे बर पंद्रा राज्य सरकार ले जुड़े जिला मनके पहिचान कर ले गेहे। छत्तीसगढ़ के संगेसंग आंध्रप्रदेश, गुजरात, महाराष्ट्र अउ तमिलनाडु ह अपन अपन जिला म बढ़िया चंाउर बांटे के काम शुरू कर देहे।
धान खरीदी तैयारी
प्रदेश म न्यूनतम समर्थन मूल्य म एक दिसंबर ले शुरू होवइया धान खरीदी ल लेके तियारी जोर पकड़ लेहे। बिसाय गे धान ल राखे बर चबूतरा, हमाल मनके बेवस्था के संगेसंग खरीदी वाले जगा के साफ सफई करे जात हे। एति महासमुंद जिला म घलो जम्मों धान खरीदी केंद्र मन म तियारी चलत हे।
कलेक्टर ह खरीदी केंद्र मन म तार के घेरा लगाय अउ लक्ष्य के मुताबिक बारदाना के बेवस्था करे के निर्देश दीन। ओमन धान के खरीदी जूट वाले बोरा म करे जाय अउ अवइया एक हप्ता के भीतर बोरा मनके उठाव पूरा करे के निर्देश दीन। कलेक्टर ह नवा किसान मनके पंजीयन करे बर ग्राम पंचायत म प्रचार प्रसार करे के निर्देश दीन।
उद्योग छूट
राज्य सरकार ह स्पंज आयरन अउ स्टील सेक्टर के उद्योग मन बर क्षेत्रवार छूट के सीमा ल साठ ले बढ़ाके एक सौ पचास प्रतिशत तक कर देहे।
आधिकारिक जानबा के मुताबिक राज्य सरकार डहार ले मेगा निवेशक मन बर घोषित करे गे पैकेज म जादा ले जादा पंाच सौ करोड़ रूपिया तक के, त उंहें बस्तर संभाग म एक हजार करोड़ रूपिया निवेश मान्य होही। एखर बर प्रस्तावित इकाई मन ल इकतीस अक्टूबर दू हजार चैबीस तक या ओखर पहिली उत्पादन शुरू करना होही।
सरकार ह कोर सेक्टर के उद्योग मन ल राज्य म विद्युत शुल्क म छूट के पात्रता घलो देहे।
राज्यपाल-बुढ़ातालाब भ्रमण
राज्यपाल अनुसूइया उइके ह कीहिन हे कि एतिहासिक बुढ़ातालाब ह रायपुर के संगेसंग पूरा प्रदेश के गौरव हरय। काली बुढ़ातालाब स्थित स्वामी विवेकानंद सरोवर म घुमे के बाद ओमन कीहिन कि अभी तक प्रदेश के लोगन मन ह राज्य के बाहिर दूसर राज्य म घुमे बर जावत रीहिन। फेर अब छत्तीसगढ़ म कतकोन सुघ्घर पर्यटन वाले जगा विकसित होवत हे। ओमन कीहिन कि अवइया बेरा म राजधानी रायपुर ह देश के चुनिंदा शहर म अपन पहिचान बनाही।
डीजीपी निर्देश
प्रदेश के पुलिस महानिदेशक डी.एम. अवस्थी ह कीहिन हे कि राज्य म अवैध शराब बेचे ले जुड़े मामला म संबंधित थाना प्रभारी ल निलंबित करे जाही। श्री अवस्थी ह आज वीडियो काॅन्फ्रेसिंग के माध्यम ले जम्मों पुलिस महानिरीक्षक अउ पुलिस अधीक्षक मनके संग कानून बेवस्था के समीक्षा करीन। ए दउरान ओमन अवैध शराब के बिक्री अउ परिवहन उपर कार्रवाई करे के निर्देश दीन। ओमन राजनंादगंाव, कवर्धा अउ मुंगेली जइसन सीमावर्ती जिला म शराब के अवैध परिवहन उपर विशेष निगरानी राखे के निर्देश देहे।
मिठाई नियम
देवारी तिहार ल देखत प्रदेश के कतकोन जिला म ए बेरा खाद्य अउ औषधि प्रशासन विभाग डहार ले अभियान चलाये जात हे। जेमा मिठई दुकान के जांच करे जात हे। संगेसंग मिठई बनइया मन ल नवा नियम के पालन करे के बात केहे जात हे।
कोंडागांव जिला म आज मिठई बनइया मनके बइठका लेके ओमन ल सेल्फ लाईफ ले जुड़े दिशा निर्देश दे गीस।
जानबा के मुताबिक भारतीय खाद्य सुरक्षा अउ मानक प्राधिकरण ह आम लोगन मन के बीच जुन्ना मिठई ह तिहार के बेरा म झन पहुंचय, एखर बर एक अक्टूबर ले देश म नवा नियम लागू करे हे। ए नियम म मिठई बेचइया मन ल मिठई के हर डिब्बा म मिठई के बने रेहे के तारीख लिखना जरूरी होही।
पालक-स्कूल-फीस
छत्तीसगढ़ छात्र पालक संघ ह शिक्षा विभाग अउ प्रायवेट स्कूल संचालक मन उपर कार्रवाई करे के मंाग ल लेके राजनंादगंाव कलेक्टर ल ज्ञापन सौंपे हे।
एखर मुताबिक पालक मन ह प्रायवेट स्कूल संचालक मन उपर निजी प्रकाशन के किताब बिसाय अउ फीस जमा करे बर छात्र मन उपर दबाव बनाय के आरोप लगाय हे।
एति भारतीय राष्ट्रीय छात्र संगठन – एनएसयूआई ह जिला म डीएलएड प्रथम वर्ष के छात्र मन ल जनरल प्रमोशन देके मांग ल लेके कलेक्टर ल ज्ञापन सौंपिन।
हड़ताल
राजनांदगंाव जिला म छत्तीसगढ़ शासकीय अधिकारी कर्मचारी फेडरेशन संघ के बैनर तले वेतन विसंगति के संगेसंग अपन ग्यारा सूत्रीय मंाग ल लेके कर्मचारी मनके हड़ताल के आज दूसर दिन रीहिस। प्रदर्शन के आखरी दिन सरकारी कर्मचारी मन कलेक्टर ल मुख्यमंत्री के नाव ज्ञापन सौंपीन।
कर्मचारी मन ह मंाग पूरा नइ होय के स्थिति म अनिश्चितकालीन हड़ताल के चेतावनी देहे।
जन्म-मृत्यु प्रमाण पत्र
महासमुंद जिला के गांव गवंतरी मन म जन्म अउ मृत्यु के पंजीयन अब आॅनलाईन होवत हे। ए बारे म कलेक्टर ह बताइन कि जन्म अउ मृत्यु के फर्जी प्रमाण पत्र के कतकोन मामला आगू आय के बाद ए प्रमाण पत्र के आॅनलाईन पंजीयन के काम शुरू कर दे गेहे। संगेसंग जम्मों पेंशनधारी मनके आधारकार्ड ल बैंक खाता ले जोड़े बर केहे गेहे।
अउ अब थोरकुन समाचार सार म-
– काली होय मरवाही विधानसभा उपचुनई म करीबन बारा झिन कोरोना संक्रमित मरीज मन ह घलो वोट डारीन।
– कोरिया जिला के खड़गंवा ब्लाक के धनपुर, अनबोलनी पारा अउ कासाबेहरा गांव म पाछू रतिहा हाथी मनके दल ह उत्पात मचाय हे। ए घटना म एक ठिन मवेशी के मउत होगे अउ फसल ल घलो अब्बड़ नकसान पहंुचाय हे।
– बाबा गुरू घासीदास डहार ले बताय गे सामाजिक एकता अउ समरसता के संदेश देबर निकले सतनाम संदेश यात्रा काली मुंगेली पहुंचीस। ए दउरान समाज ल नशा अउ मांसाहार ले दूर रेहे के संदेश दे गीस।
– राजनंादगांव जिला के सोमनी थानापुलिस ह अवैध शराब तस्करी के मामला म दू झिन आरोपी मन ल गिरप्तार करे हें । ओखर तीर ले नौ पेटी शराब जब्त करे गेहे।
– जांजगीर चंापा जिला के बलौदा थाना क्षेत्र म एक झिन पढ़ईया लइका के अपहरण के मामला आगू आय हे।
अउ
– महासमुंद कलेक्टर अउ जिला पंचायत के सीईओ के संगेसंग आने अधिकारी मन ह बरबसपुर के स्व-सहायता समूह के माइलोगिन मन डहार ले गोबर ले बनाये गे दीया गमला के संगेसंग आने आने सजावटी जीनिस के खरीद करीन।