मरवाही उपचुनाव-01
मरवाही विधानसभा उपचुनाव बर काली वोट डारे जाही। इहां बिहनिया आठ बजे ले संझा छह बजे तक वोट डारे जाही। भारत निर्वाचन आयोग ह मतदान बर जम्मों जरूरी तियारी पूरा करे लेहे। ए उपचुनाव बर काली संझा ले ही प्रचार-प्रसार रूक गेहे। एखर बाद रतिहा ले ही उम्मीदवार घर-घर जाके लोगन ले मिलत हे। कोरोना संक्रमण के सेती उम्मीदवार मन ल जादा ले जादा पांच झिन कार्यकर्ता संग प्रचार करे के मंजूरी दे गेहे।
राज्य के मुख्य निर्वाचन पदाधिकारी रीना बाबा साहेब कंगाले ह बतईन कि मतदान दल ल भेजे के काम काली ले सुरू होगे हे। श्रीमती कंगाले ह किहीन कि कोरोना संक्रमण ल देखत मतदान केन्द्र मन म कोरोना प्रभावित मतदाता मन बर बिसेस प्रबंध करे गेहे। ओमन ल मतदान के आखिरी एक घंटा म वोट डारे के सुभीता दे गेहे। अस्सी बछर ले जादा के सियान मनखे, दिव्यांग अउ कोरोना प्रभावित मन ल पहिली घांव डाक मतपत्र ले वोट डारे के सुभीता दे हवय। संगेसंग मतदान केन्द्र म वोट डारे बर अवइया मतदाता मन ल मास्क पहिरना अउ अपन हाथ ल सैनिटाईज करना जरूरी हे। स्वतंत्र, निष्पक्ष अउ सांतिपूर्ण ढंग ले मतदान कराय बर मरवाही विधानसभा क्षेत्र म बनाय गे जम्मों दू सौ छियासी मतदान केन्द्र म सुरक्षा के चाक-चैबंध बेवस्था करे गेहे। ए केन्द्र मन म सीएएफ अउ सीआरपीएफ के दस कंपनी ल तैनात करे गे हे।
मरवाही विधानसभा क्षेत्र म एक लाख नब्बे हजार नौ सौ सात मतदाता हवय। ए उपचुनाव बर काली वोट डारे के संग आठ झिन उम्मीदवार के भाग्य ईवीएम म कैद हो जही। एमा प्रमुख रूप ले भारतीय जनता पार्टी के डाॅक्टर गंभीर सिंह, कांग्रेस के डाॅक्टर के.क.े ध्रुव, राष्ट्रीय गोंडवाना पार्टी के डाॅक्टर उर्मिला सिंह अउ अंबेडकराईड पार्टी आॅफ इंडिया ले पुष्पा खेलन सामिल हे। मरवाही विधानसभा क्षेत्र म काली वोट डारे बर सार्वजनिक अउ सामान्य छुट्टी दे गेहे।
मरवाही उपचुनाव-02
मरवाही विधानसभा क्षेत्र म उप निर्वाचन के सेती भारत निर्वाचन आयोग ह मीडिया म कोनों भी प्रकार के एक्जिट पोल के प्रकाशन या प्रसारण म सात नवंबर के संझा साढ़े छह बजे तक रोक लगा देहे। संगेसंग मतदान सिराय के अड़तालीस घंटा पहिली ले ही पूर्व मतदान सर्वेक्षण म घलो रोक हवय।
उहें, मतदान निश्चित करे बर निर्वाचन आयोग ह पहिचान पत्र म मतदाता फोटो परिचय पत्र समेत बारह ठिन दस्तावेज ल मान्य करे हे। मतदाता वोट डारे बर आधार कारड, ड्राईविंग लाइसेंस, मनरेगा जाॅब कार्ड, स्वास्थ्य बीमा कार्ड, पैन कार्ड या फोटो लगे पेंशन दस्तावेज के उपयोग कर सकत हे।
धान खरीदी
राज्य सरकार ह प्रदेस म समर्थन कीमत म धान बिसाय के काम अवइया एक दिसंबर ले सुरू करही। खाद्य मंत्री अमरजीत भगत के अगुवई म आज रईपुर म राखे गे मंत्रिमंडलीय उप समिति के बइठका म ए फइसला ले गीस। एमा धान बिसाय के तियारी के समीक्षा के संगेसंग बारदाना अउ समर्थन मूल्य म खरीदी के कार्ययोजना ल लेके गोठबात होईस।
पाछु पत्रकार मन ले गोठबात करत वन मंत्री मोहम्मद अकबर ह बतईन कि केन्द्र सरकार कोति ले तय करे गे समर्थन कीमत म ही प्रदेस म धान बिसाय जाही। एकड़ पाछु पन्द्रह कुंटल धान के खरीदी होही।
कोरोना समाचार/जागरूकता
राज्य म काली रतिहा तक कोरोना संक्रमण के पन्द्रह सौ तिरालीस नवा मामला आगू आय हे। उहें, कोरोना संक्रमण ले ग्यारह झिन के मउत होगे हे। राज्य म ए बखत बाईस हजार ले जादा सक्रिय मामला हवय।
राजनांदगांव जिला म कोरोना संक्रमित मरीज मनके पहिचान बर स्वास्थ्य सुरक्षा अभियान के सुरूवात करे गीस। एमा मितानिन, आंगनबाड़ी कार्यकर्ता मन गांव अउ सहर म सर्वें करही अउ संदिग्ध मरीज मनके सूची स्वास्थ्य विभाग ल दीहीं। अवइया इकतीस दिसंबर तक चलइया ए अभियान म हर बुधवार अउ बिरस्पत के सर्वें करे जाही।
इही बीच, पद्मश्री डाॅक्टर अरूण दाबके ह लोगन ले कोरोना संक्रमण ले बचाव बर जरूरी सावधानी राखे के अपील करीन हे।
पुलिस-शौर्य पदक
राज्य स्थापना दिवस के मउका म बने काम करइया प्रदेस के सात झिन पुलिस जवान मन ल सौर्य पदक ले सम्मानित करे गेहे। मुख्यमंत्री के रईपुर स्थित निवास म राखे गे समारोह म मुख्यमंत्री भूपेश बघेल ह पुलिस जवान मन ल ए सम्मान दीन।
समारोह म राज्यपाल अनुसुईया उइके वर्चुअल रूप म मौजूद रिहीन। राज्य अलंकरण समारोह म सम्मानित होवइया पुलिस जवान म निरीक्षक मोहसीन खान रईपुर, उप निरीक्षक जितेन्द्र एसैया सुकमा, सहायक उप निरीक्षक गणेश करमरका बीजापुर, प्रधान आरक्षक रामलाल कश्यप अउ कुटुम राव दंतेवाड़ा, आरक्षक देबाआनंदम अउ आरक्षक गोपी इस्ताम सामिल हे।
समारोह म विधानसभा अध्यक्ष डाॅक्टर चरणदास महंत, नेता प्रतिपक्ष धरमलाल कौशिक समेत कतकोन आने मंत्री अउ जनप्रतिनिधि मौजूद रिहीन।
जीएसटी संग्रहण
वस्तु अउ सेवा कर-जीएसटी संग्रहण म बढ़वार के मामला म देसभर म छत्तीसगढ़ अउ आंध्रप्रदेश संयुक्त रूप ले पहिली स्थान म हवय। केन्द्रीय वित्त मंत्रालय कोति ले जारी सूची के मुताबिक पाछु बछर अक्टूबर म राज्य म पन्द्रह सौ सत्तर करोड़ रूपिया के जीएसटी सकलाय रिहीस। पाछु बछर के तुलना म एसो अक्टूबर महीना तक चार सौ चार करोड़ रूपिया जादा जीएसटी मिले हे।
हमर ग्राम सभा/लोकवाणी
पंचायत अउ ग्रामीण विकास मंत्री टी.एस. सिंहदेव ह किहीन हे कि वन अधिकार कानून के मदद ले जल, जंगल अउ जमीन के प्रबंधन म वनवासी मन के भागीदारी निश्चित करे जा सकय हे। ए बात श्री सिंहदेव ह आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म वन अधिकार कानून के संबंध म जानकारी देवत किहीन। ओमन बतईन कि वन अधिकार पत्र के नामंजूर करे मामला म फेर ले विचार करके पात्र लोगन ल एखर फायदा दे जात हे।
उहें, मुख्यमंत्री भूपेश बघेल के मासिक रेडियोवार्ता ‘‘लोकवाणी‘‘ के बारहवां कड़ी के प्रसारण इतवार आठ नवंबर के होही। मुख्यमंत्री लोकवाणी म ए बखत ‘‘बालक बालिकाओं की पढ़ाई, खेलकूद और भविष्य‘‘ बिसय म प्रदेस के लोगन ले गोठबात करही। ए कारीकरम के प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल ले बिहनिया साढ़े दस बजे ले ग्यारह बजे तक करे जाही।
सुकमा-सड़क सुधार
सुकमा जिला के माओवाद प्रभावित गोलापल्ली क्षेत्र म माओवादी कोति ले नकसान करे गे रद्दा म सुधार काम पूरा कर ले गेहे। डीआरजी के जवान मन ह ए क्षेत्र म रद्दी होय रद्दा के मरम्मत करीन, जेखर बाद इहां अवई-जवई सुरू होगे हे। जिला पुलिस अधीक्षक कन्हैया लाल ध्रुव ह सुरक्षा बल के काम के प्रसंसा करीन।
खबर के मुताबिक करीबन दू महीना पहिली माओवादी मन ह इहां के रद्दा म जघा-जघा गढ्ढा कर दे रिहीन।
समर्पण अभियान-दुर्ग
राज्य म सियान मनके मदद बर सुरू करे गे ‘‘समर्पण‘‘ अभियान म दुरूग पुलिस ह वरिष्ठ नागरिक मन बर स्वास्थ्य परीक्षण सिविर लगाय गीस। ए सिविर म दू सौ ले जादा वरिष्ठ नागरिक मनके स्वास्थ्य के जांच करे गीस अउ समर्पण अभियान म उंखर पंजीयन होईस।
जिला के पुलिस अधीक्षक प्रशांत सिंह ठाकुर ह बतईन कि जम्मों सियान मनके संबंध म जानकारी ले जात हे अउ ए अभियान म बने काम करइया पुलिस कमरचारी मन ल इनाम घलो दे जाही।