केन्द्रीय मंत्रिमंडल-फैसला
प्रधानमंत्री नरेन्द्र मोदी के अगुवई म केन्द्रीय मंत्रिमंडल के बइठका म काली महत्वपूर्ण फइसला ले गीस। मंत्रिमंडल के आर्थिक कार्यसमिति ह पेट्रोल म ऐथनाॅल मिलाय के बेवस्था म सार्वजनिक क्षेत्र के तेल कंपनी बर ऐथनाॅल खरीद प्रणाली ल मंजूरी देहे। केन्द्रीय सूचना अउ प्रसारण मंत्री प्रकाश जावड़ेकर ह बतईन कि पहिली देसभर म एथेनाॅल के एके दाम रिहीस। फेर, अब एखर आने-आने दाम होही। एथेनाॅल के नवा कीमत बैसठ रूपिया पैसठ पइसा प्रतिलीटर होही।
उहें, मंत्रिमंडल ह पैंकिंग करे म जूट के बोरा ल जरूरी रूप ले बउरे खातिर नियम के विस्तार ल मंजूरी दीन। ए संबंध म श्री जावड़ेकर ह किहीन कि अनाज के पैंकिंग जूट बोरा म होही।
कृषि मंत्री-बयान
छत्तीसगढ़ के कृषि मंत्री रविन्द्र चैबे ह किहीन कि केन्द्र सरकार कोति ले जूट, बारदाना ल बउरे बर जरूरी करे गेेहे, अइसन म अब केन्द्र ले बारदाना देवाय के बादे राज्य म धान बिसाय जा सकही। ओमन किहीन कि बारदाना के बेवस्था नइ होय म धान बिसाय म अबेर होही। ओमन राज्य म चैदह लाख गठान बारदाना के जरूरत बतईन।
उहें, श्री चैबे ह किहीन कि दू नवंबर के राखे गे मंत्रिमंडलीय उपसमिति के बइठका म समर्थन कीमत म धान बिसाय अउ बारदाना के बेवस्था ल लेके गोठबात करे जाही। ओमन किहीन कि राज्य सरकार समर्थन कीमत म किसान मन ले धान बिसाही अउ ढाई हजार रूपिया कुंटल के दर ले ए खरीदी करे जाही।
धान/मक्का-पंजीयन
प्रदेस म समर्थन कीमत म धान अउ मक्का बिसाय बर किसान मनके पंजीयन के तारीख दस दिन बढ़ा दे गेहे। अब ओमन दस नवंबर तक पंजीयन करा सकही।
कोरबा जिला म अब तक तीन हजार दू सौ ले जादा नवा किसान मन अपन पंजीयन कराय हे। उहें, जिला म बारह ठिन जुन्ना अउ दू ठन नवा धान उपार्जन उपकेन्द्र ल सहकारी समिति के दर्जा दे गेहे।
ई-मेगा शिविर
लोगन ल सासन के कल्याणकारी योजना अउ कारीकरम के संबंध म जानकारी दे बर काली इकतीस अक्टूबर के जिला न्यायालय रईपुर परिसर म ई-मेगा विधिक सेवा सिविर लगाय जाही। ए सिविर छत्तीसगढ़ राज्य विधिक सेवा प्राधिकरण बिलासपुर अउ जिला विधिक सेवा प्राधिकरण रईपुर कोति ले लगाय जात हे। एखर तियारी बर जिला न्यायाधीश रामकुमार तिवारी अउ जिला कलेक्टर डाॅक्टर एस. भारतीदासन ह बइठका करीन। एखर सुरूवाती सत्र के सोझे प्रसारण हाईकोर्ट बिलासपुर ले होही।
राज्य स्तरीय ए आयोजन के उद्घाटन राज्य विधिक सेवा प्राधिकरण के कार्यपालक अध्यक्ष न्यायमूर्ति प्रशांत कुमार मिश्रा करही। एखर बाद जिला न्यायालय म होवइया आयोजन के प्रसारण घलो ई-प्लेटफाॅर्म ले करे जाही। ए कारीकरम मुख्य रूप ले गरीबी उन्मूलन योजना म केन्द्रित रइही। ए बेरा म राज्य सरकार कोति ले चलाय जात आने-आने योजना म चुने गे पचास हजार ले जादा हितग्राही मन ल सत्तर करोड़ रूपिया ले जादा के उपकरण अउ सहायता रासि बांटे जाही। ए बेरा म सद्भावना सीरीज के विमोचन होही, जेमा अंधबधिर, निःशक्तजन बर जरूरी कानून म तियार करे गे वीडियो दे जाही।
कोरोना समाचार-जागरूकता
यूनिसेफ के छत्तीसगढ इकाई कोति ले लोगन ल आगाह करे गेहे कि प्रदेस म कोरोना संक्रमण के दूसर पारी ले बांचे बर सावधानी राखय। यूनिसेफ के छत्तीसगढ़ हेड जाॅब जकारिया ह किहीन कि देस के दिगर राज्य अउ यूरोप असन कोरोना संक्रमण के दूसर लहर ले बांचे बर सबो झन ल सावधानी राखे बर पड़ही।
यूनिसेफ म छत्तीसगढ़ के स्वास्थ्य बिसेसज्ञ ह लोगन ले अपील करीन कि ओमन इलाज म कोताही झन बरते अउ लक्षण दिखते तुरते डाॅक्टर तीर जावय। बिसेसज्ञ के मानना हे कि कोरोना ले बांचे बर कपड़ा के मास्क बउरे के संग ओखर सफई जरूरी हे। उहें, जउन मन सर्जिकल मास्क बउरत हे, ओमन ए सुरता राखय कि ए मास्क करीबन चार-पांच घंटा तक ही प्रभावी रहिथे।
इही बीच, छत्तीसगढ़ के जाने-माने कवि पद्मश्री सुरेन्द्र दुबे ह लोगन ले कोरोना संक्रमण ले बचाव बर जरूरी सावधानी राखे के अपील करीन हे।
वल्लभ भाई पटेल जयंती-विशेष कार्यक्रम
राष्ट्र काली लौह पुरूष सरदार वल्लभ भाई पटेल के एक सौ पैंतालीसवां जयंती मनाही। ए दिन ल देसभर म एकता दिवस के रूप मनाय जाथे। सरदार वल्लभ भाई पटेल जयंती के मउका म काली आकाशवाणी केन्द्र रईपुर ले एक बिसेस कारीकरम के प्रसारण करे जाही। ‘‘सरदार पटेल-एकता के वाहक‘‘ एखर प्रसारण काली बिहनिया साढ़े दस बजे ले प्रदेस स्थित आकाशवाणी जम्मों केन्द्र एक संघरा रिले करही। ए कारीकरम ल आकाशवाणी समाचार सेवा प्रभाग, नई दिल्ली केन्द्र कोति ले प्रस्तुत करे जाही।
उहें, राष्ट्रीय एकता दिवस के सेती बलौदाबाजार जिला म आज पुलिस विभाग कोति ले सद्भावना एकता दउड़ राखे गीस। ए दउड़ म बड़का पुलिस अधिकारी अउ पुलिस करमचारी सामिल होईन। जीतइया प्रतिभागी मन ल इनाम दे गीस।
माओवादी-गिरफ्तार
बीजापुर जिला म सुरक्षा बल ह एक इनामी समेत चार झिन माओवादी ल गिरफ्तार करे हे। ए माओवादी मन उपर लूटपाट अउ हत्या जइसन गंभीर वारदात म सामिल रेहे के आरोप हवय। जिला पुलिस बल अउ केन्द्रीय रिजर्व पुलिस बल-सीआरपीएफ के संयुक्त टीम ह ए माओवादी मन ल नैमेड़ थाना क्षेत्र के भैरमगढ़ ले गिरफ्तार करे हे।
उहें, इही जिला म माओवादी मिलिसिया कमांडर सुखराम ओयाम ह जिला के पुलिस अधीक्षक कमलोचन कश्यप अउ सीआरपीएफ के उप निरीक्षक कोमल सिंह के आगू आत्मसमर्पण करे हे।
कोकीन-गिरोह
राजधानी रईपुर म नसा के खिलाफ जारी पुलिस अभियान ल बड़े सफलता मिले हे। रईपुर पुलिस ह कोकीन लवइया एक झिन नाइजीरियन मनखे ल मुंबई ले गिरफ्तार करे हे। एखर पहिली रईपुर ले नसा के कारोबार करइया गिरफ्तार करे गे दू झिन आरोपी मन ले पूछताछ म कतकोन बड़े नाव के पता चले रिहीस, जेखर बाद पुलिस के बिसेस टीम मुंबई गीस अउ एला गिरफ्तार करे हे।
मरवाही-उपचुनाव
मरवाही विधानसभा उपचुनाव बर प्रचार अभियान जोरदरहा चलत हवय। ए उपचुनाव बर तीन नवंबर के वोट डारे जाही।
राज्य के मुख्य निर्वाचन पदाधिकारी रीना बाबा साहेब कंगाले ह बतईन कि मतदान बर डाक घर, बैंक कोति ले जारी करे गे फोटो लगे पासबुक ल घलो पहिचान पत्र के रूप म मान्यता दे जाही। आयोग ह पहिचान पत्र बर मतदाता फोटो परिचय पत्र समेत बारह ठिन दस्तावेज ल मान्य करे हे।
इही बीच, मरवाही उपचुनाव बर जम्मों सेक्टर अधिकारी अउ सहायक सेक्टर अधिकारी मन ल वोट डारे के पहिली प्रसिक्षण दे गीस।
ईद-मिलाद-उन-नबी
पैगम्बर मोहम्मद के जनम दिन ईद-मिलाद-उन-नबी आज छत्तीसगढ़ समेत देसभर म उछाह के संग मनाय जात हे। राष्ट्रपति रामनाथ कोविंद, उपराष्ट्रपति एम. वेंकैया नायडू अउ प्रधानमंत्री नरेन्द्र मोदी ह ए बेरा म लोगन ल बधाई दीन हे।
ऐति, ईद के मउका म आज राज्य के जम्मों प्रमुख मस्जिद अउ ईदगाह म मुस्लिम समुदाय के लोगन मन नमाज अदा करीन। धमतरी म रत्नाबांधा चउक ले ईदगाह तक एक जुलूस निकाले गीस।
हेल्थ वेलनेस सेंटर
राष्ट्रीय स्वास्थ्य मिशन म चलाय जात हेल्थ अउ वेलनेस सेंटर म सुभीता के बढ़वार करे जाही। राजनांदगांव के वेलनेस सेंटर म बीपी, सुगर अउ एनसीडी स्क्रीनिंग के बेवस्था होही। जिला म चलाय जात साठ ले जादा वेलनेस सेंटर मन म हफ्ता म एक दिन पिंक दिवस मनाय जाही।
एलटीसी-छूट
केन्द्रीय वित्त मंत्रालय ह केन्द्र सरकार के कर्मचारी मन असन आने करमचारी मन ल घलो अवकाश यात्रा रियायत एलटीसी नगद वाउचर योजना म आयकर छूट देके फइसला लेहे। एमा राज्य सरकार, सार्वजनिक क्षेत्र के उपक्रम, बैंक अउ प्राईवेट क्षेत्र के करमचारी सामिल हे। सरकार के ए कदम ले प्राईवेट करमचारी मन घलो अपन न्योक्ता ले कर मुक्त नगद रासि ले सकही।
होटल प्रबंधन-पाठ्यक्रम
हाॅस्पिटेलिटी एंड होटल मैनेजमेंट प्रसिक्षण योजना म चलाय जात आने-आने पाठ्यक्रम म भर्ती बर अनुसूचित जनजाति अउ अनुसूचित जाति वरग के योग्य उम्मीदवार मन ले दस नवंबर तक अरजी मंगाय गेहे। उम्मीदवार छत्तीसगढ़ के मूलनिवासी होना चाही। एखर बर अरजी इंस्टीट्यूट के रईपुर के सिटी कार्यालय म जमा कर सकत हे।