स्वास्थ्य सुरक्षा अभियान
राज्य म समुदाय स्तर म कोविड सर्विलेंस के संघरा दूसर स्वास्थ्य समस्या के निराकरण बर ‘‘स्वास्थ्य सुरक्षा अभियान‘‘ चलाय जाही। ए अभियान बछर के अंत तक हर हफ्ता चलाय जाही। सघन सामुदायिक सर्वें अभियान बर पहिली ले गठित दल के माध्यम ले ए अभियान ल ग्रामीण अउ सहरी क्षेत्र म संचालित करे जाही।
ए संबंध म स्वास्थ्य विभाग के अतिरिक्त मुख्य सचिव रेणुजी पिल्ले ह जम्मों कलेक्टर मन ल चिट्ठी लिखके निर्देसित करे हे। चिट्ठी म केहे गेहे कि ग्रामीण क्षेत्र अउ सहरी स्लम क्षेत्र म मितानित मनके माध्यम ले बुधवार अउ गुरूवार के दिन अपन कार्यक्षेत्र के घर मन म कोरोना संक्रमण के लक्षण वाले मनखे के अलावा उल्टी अउ दस्त ले पीड़ित लोगन मनके घलो जानकारी ले जाय।
उहें, कोरोना संक्रमण ले बचाव बर स्वास्थ्य विभाग ह अपन विभाग के अधिकारी अउ करमचारी के अलावा दूसर विभाग के करमचारी मन ल घलो प्रसिक्षण देवत हे। ए संबंध म पाछु इक्कीस अउ बाईस अक्टूबर के वीडियो कान्फ्रेंसिंग के माध्यम ले राज्य स्तरीय प्रसिक्षण के आयोजन करे गीस। उहें, आज विधानसभा सचिवालय के अधिकारी अउ करमचारी मन ल प्रसिक्षण दे गीस।
इही बीच, पूर्व अंतर्राष्ट्रीय मुक्केबाज खिलाड़ी अउ अर्जुन पुरस्कार ले सम्मानित राजेन्द्र प्रसाद ह लोगन मन ले कोरोना ले बचाव बर जरूरी सावधानी बरते के अपील करे हे।
होल्ड बाईट – राजेन्द्र प्रसाद (50 सेकेंड)
केन्द्रीय दल-दौरा
केन्द्रीय स्वास्थ्य मंत्रालय के उच्च स्तरीय दल ह मृत्यु दर ल रोके बर कोरोना संक्रमित मरीज के पहिचान जल्दी करे अउ उंखर त्वरित इलाज सुरू करे के निरदेस देहे। तीन सदस्यीय ए दल ह कोविड अस्पताल म आॅक्सीजन सप्लाई अउ बेड के संख्या बढ़ाय के घलो सलाह देहे।
खबर हे कि ए उच्च स्तरीय दल ह काली राजनांदगांव सहर के कोविड अस्पताल के संघरा दूसर उपलब्ध सुविधा के निरीक्षण घलो करीन। ए दल ह सहर के उदयांचल क्षेत्र म संचालित धर्मार्थ कोविड-नाइंटीन केयर सेंटर के अवलोकन करीन।
ए केन्द्रीय दल ह पाछु तीन दिन ले छत्तीसगढ़ के प्रवास म हे। एखर पहिली, ए दल ह दू दिन ले रईपुर अउ दुरूग म घलो कतकोन कोविड अस्पताल के निरीक्षण करे गीस। ए दल के प्रमुख केन्द्रीय स्वास्थ्य मंत्रालय के संयुक्त सचिव ऋचा शर्मा हे।
मरवाही-उपचुपाव
मरवाही विधानसभा उपचुनई बर उम्मीदवार मन ह अपन प्रचार अभियान तेज कर देहे। कतकोन दल के वरिष्ठ दल के नेता अपन प्रत्यासी के पक्ष म कस्बा अउ गांव म जनसंपर्क करे के संगेसंग सभा घलो लेवत हे।
इही कड़ी म आज कांग्रेस के प्रदेस अध्यक्ष मोहन मरकाम ह आज धनोरा, मनोरा, मरवाही अउ कुम्हारी म नुक्कड़ सभा लेके पार्टी प्रत्यासी के डाॅक्टर के.के. धु्रव के पक्ष म प्रचार करीन।
उहें, भाजपा उम्मीदवार डाॅक्टर गंभीर सिंह के पक्ष म विधानसभा नेता प्रतिपक्ष धरमलाल कौशिक ह सभा लीन। संग म भाजपा के वरिष्ठ नेता नंदकुमार साय ह मरवाही अउ निमधा म चुनावी सभा ल संबोधित करीन।
खबर हे कि ए उपचुनई म अस्सी बछर या एखर ले जादा आयु के वरिष्ठ नागरिक, दिव्यांग अउ कोरोना संक्रमित मतदाता मन ल डाक मतपत्र ले मतदान के सुविधा दे गेहे। एखर बर डाक मतपत्र संग्रहण के काम काली ले सुरू होगे हे, जउन ह काली चैबीस अक्टूबर तक चलही।
पढ़ना लिखना-अभियान
बुनियादी साक्षरता म केन्द्रित पढ़ना-लिखना अभियान छत्तीसगढ़ म घलो संचालित करे जाही। एमा प्रदेस म ए बछर करीबन ढाई लाख निरक्षर मन ल साक्षर बनाय के लक्ष्य राखे गेहे। उहें, अवइया पांच बछर म राज्य के एक तिहाई निरक्षर मन ल साक्षर बनाय जाही।
ए संबंध म केन्द्रीय शिक्षा मंत्रालय स्कूल साक्षरता विभाग के सचिव अनिता करवल के अध्यक्षता म परियोजना अनुमोदन बोर्ड के आॅनलाइन बइठका आयोजित करे गीस। एमा प्रदेस के पढ़ना-लिखना अभियान के वार्षिक कार्ययोजना प्रस्तुत करे गीस। ए अभियान म राज्य के आकांक्षी जिला, माओवाद प्रभावित जिला, राष्ट्रीय अउ राज्य के साक्षरता दर ले कम औसत वाले जिला ल प्राथमिकता दे जाही। संगेसंग नवाचारी गतिविधि ल घलो प्रोत्साहित करे जाही। एमा प्रदेस के पन्द्रह बछर ले जादा उमर के निरक्षर मन ल बुनियादी साक्षरता प्रदान करे जाही।
सीबीएसई-चेहरा पहचान प्रणाली
केन्द्रीय माध्यमिक सिक्षा बोर्ड-सी.बी.एस.ई. ह चेहरा पहचान प्रणाली सुरू करे हे, जेखर माध्यम ले दसवीं अउ बारहवीं कक्षा के पढ़ईया मन अपन डिजिटल सैक्षिक दस्तावेज डाउनलोड कर पाही। ए कम्प्यूटर एप्लीकेशन म पहिली ले सुरक्षित राखे गे डिजिटल इमेज ले चेहरा के मिलान हो पाही। अइसने, डाटा बेस म पहिली ले सुरक्षित विद्यार्थी मनके इमेज के सी.बी.एस.ई. के प्रवेस पत्र म लगे फोटोग्राफ ले मिलान होही। फोटो के मिलान सही होय म प्रमाण पत्र विद्यार्थी मन ल ई-मेल कर दे जाही। डिजिटल सैक्षिक रिकार्ड ले जम्मों दस्तावेज अउ प्रमाण पत्र के मिले ले देस के संघरा विदेसी विद्यार्थी मन ल कतकोन फायदा मिलही।
महिला आयोग सुनवाई
राज्य महिला आयोग डहार ले महिला उत्पीड़न ले जुड़े मामला मनके तुरते सुनवाई करे जात हे। दुरूग जिला म महिला आयोग ह दू दिन म महिला मन ले संबंधित करीबन पचपन मामला के सुनवाई करे हे। राजनांदगांव जिला म घलो महिला उत्पीड़न के मामला म सरलग सुनवाई होवत हे।
ए बारे म आयोग के अध्यक्ष डाॅक्टर किरणमयी नायक ह बतईन कि ज्यादातर मामला घरेलू हिंसा, पारिवारिक विवाद अउ संपत्ति के झगड़ा ले जुड़े हे।
महाअष्टमी
काली महाअष्टमी हे। ए बेरा म प्रदेस के कतकोन देवी मंदिर, सक्तीपीठ अउ पूजापंडाल म कोरोना संक्रमण के दिसा-निरदेस के पालन करत बिसेस हवन-पूजन अउ महाआरती करे जाही।
मुख्यमंत्री भूपेश बघेल ह प्रदेसवासी मन ल दुर्गाष्टमी अउ महानवमीं के सुभकामना देहे। ए बेरा म श्री बघेल ह मां दुर्गा ले प्रदेसवासी मनके सुख-समृद्धि अउ खुसहाली बर प्रार्थना करे हे। अपन सुभकामना संदेस म ओमन केहे हे कि सक्ती के पर्व हमन ल सिखाथे कि नारी के सम्मान हमर परंपरा अउ संस्कृति के हिस्सा होय के संघरा हमर मानवीय मूल्य के हिस्सा हरय। ए मूल्य ल अक्षुण्य बनाय रखना हम सबके महती जिम्मेदारी हे।
राज्यपाल-दर्शन/प्रसाद योजना
राज्यपाल अनुसुईया उइके ह आज राजनांदगांव जिला के डोंगरगढ़ म स्थित मां बम्लेश्वरी देवी के दर्सन करीन। ए बेरा म ओमन देवी मां ले प्रदेस के खुसहाली अउ कोरोना संक्रमण ले मुक्ति के कामना करीन।
इही बीच, डोंगरगढ़ ल केन्द्र सरकार के प्रसाद योजना म सामिल करे जाय म प्रदेस के पर्यटन मंत्री ताम्रध्वज साहू ह एला छत्तीसगढ़ बर उपलब्धि बतईन। ओमन किहीन कि एखर ले राज्य के पर्यटन ल विश्व स्तर म अलग पहिचान मिलही। उहें, श्रद्धालु अउ पर्यटक के संख्या बाढ़े ले स्थानीय लोगन ल रोजगार घलो मिलही।
खबर हे कि प्रसाद योजना म डोंगरगढ़ ल धार्मिक स्थल के रूप म विकसित करे जाय अउ सौंदर्यीकरण बर करीबन चवालीस करोड़ रूपिया के स्वीकृति दे गेहे।
जल जीवन मिशन-टीम गठित
मुख्यमंत्री भूपेश बघेल ह जल जीवन मिशन के तहत कार्य आवंटन प्रक्रिया के संबंध म मिले सिकायत के परीक्षण बर तीन सदस्यीय समिति गठित करे हे। ए समिति म मुख्य सचिव, वित्त विभाग के अपर मुख्य सचिव अउ लोक स्वास्थ्य यांत्रिकी विभाग के सचिव ल घलो सामिल करे गेहे।
खबर हे कि जल जीवन मिशन के तहत ग्रामीण इलाका म बछर दू हजार चैबीस तक पाईप लाइन के माध्यम ले घरों-घर पेयजल आपूर्ति के लक्षय निर्धारित करे गेहे।
आंदोलन-प्रदर्शन
वेतन विसंगति दूर करे अउ क्रमोन्नत वेतनमान के मांग ल लेके छत्तीसगढ़ सहायक सिक्षक फेडरेशन ह अवइया अट्ठाईस अक्टूबर के राजधानी रईपुर म एक दिवसीय मौन सत्याग्रह अउ आंदोलन करही। संगेसंग मुख्यमंत्री के नाम ज्ञापन घलो सौंपे जाही।
उहें, राजनांदगांव जिला के बिजली करमचारी मन ह अपन बारह सूत्रीय मांग ल लेके पर्रीनाला के क्षेत्रीय कार्यालय के आगू म आज प्रदर्सन करीन।
ट्रेन अतिरिक्त कोच
रेल विभाग डहार ले अवइया त्यौहारी सीजन ल देखत यात्री मनके मांग म दक्षिण पूर्व मध्य रेलवे ले गुजरइया तीन ठिन यात्री रेलगाड़ी म एक ठिन अतिरिक्त कोच के सुविधा दे जावत हे। जानकारी के मुताबिक बिलासपुर-पटना पूजा स्पेशल ट्रेन म आज ले सत्ताईस नवंबर तक, दुरूग-छपरा ट्रेन अउ दुरूग-भोपाल एक्सप्रेस म आज ले एक ठिन उपरहा स्लीपर कोच के सुविधा दे गेहे।
संक्षिप्त समाचार
अउ अब थोरकुन समाचार सार म-
– राज्य सरकार ह प्रधान मुख्य वनसंरक्षक राकेश चतुर्वेदी ल वन बल प्रमुख के पद म नियुक्त करे हे।
– दुरूग रेंज के पुलिस महानिरीक्षक विवेकानंद सिन्हा ह महिला अउ लइका मन संग घटित होवइया अपराध के समीक्षा अउ कार्रवाई बर अतिरिक्त पुलिस अधीक्षक नेहा पांडेय ल नोडल अधिकारी अउ उंखर सहायता बर उप पुलिस अधीक्षक राकेश कुमार जोशी के नियुक्ति करे हे।
– एक ठिन निजी स्वयंसेवी संस्था ह राज्य सरकार ल कोरोना संक्रमण ले बचाव बर दू हजार पीपीई किट प्रदान करे हे।
– रायगढ़ जिला म घरघोड़ा थाना क्षेत्र म बैहामुड़ा गांव के तीर ट्रक के चपेट म आय ले एक झिन ग्रामीण के मउत होगे।
– राजनांदगांव जिला के राजाभानपुरी के तीर घलो राष्ट्रीय राजमार्ग म ट्रक के चपेट म आय ले एक झिन लड़की के मउत होगे। उहें, एक झिन दूसर मनखे गंभीर रूप ले घायल होगे।
– धमतरी सहर म सट्टा खेलाय के आरोप म चार झिन आरोपी मन ल गिरफ्तार करे गेहे। इंखर तीर ले आठ मोबाइल फोन, एक टीवी अउ करीबन संतावन हजार रूपिया नगद जब्त करे गेहे।
– कबीरधाम जिला म मुआवजा रासि दे जाय के नाम म ठगी करइया आरोपी ल चारभाटा थाना के पुलिस ह गिरफ्तार करे हे।