केन्द्रीय कृषि मंत्री नरेन्द्र सिंह तोमर ह आज आयुष्मान सहकार योजना के शुरूवात करीन। ए योजना ह देस म स्वास्थ्य क्षेत्र के बुनियादी सुविधा म मदद करे बर सहकारी समिति के एक ठिन पहल होही। आयुष्मान सहकार योजना ल राष्ट्रीय सहकारी विकास निगम-एनसीडीसी ह बनाय हे।
कृषि मंत्री ह किहीन कि अवइया बेरा म एनसीडीसी ह चलत सहकारी समिति मन ल दस हजार करोड़ रूपिया के करजा दे सकथे। ओमन किहीन कि वैश्विक महामारी ल देखत जादा ले जादा सुविधा बढ़ाय उपर जोर दे जात हे।
प्रधानमंत्री-उच्च शिक्षा
प्रधानमंत्री नरेन्द्र मोदी ह किहीन हे कि उंखर सरकार कोति ले पाछु छह साल म करे गे कामकाज म उच्च शिक्षण संस्थान मन म घलो पारदर्सिता आय हे। प्रधानमंत्री ह मैसूर विश्वविद्यालय के शताब्दी दीक्षांत समारोह ल वर्चुअल माध्यम ले संबोधित करत किहीन कि केन्द्र सरकार डहार ले अब्बड़ अकन करे गे सुधार ले भारत ह उच्च सिक्षा के क्षेत्र म विश्व के बरोबरी करत हे।
प्रधानमंत्री ह किहीन कि पाछु छह साल म छह ठिन नवा भारतीय प्रौद्योगिकी संस्थान, सोलह ठिन भारतीय सूचना प्रौद्योगिकी संस्थान अउ पन्द्रह ठिन अखिल भारतीय आयुर्विज्ञान संस्थान खोले जाय के मंजूरी दे गेहे, जेखर ले उच्च सिक्षा के क्षेत्र म पढ़ईया छात्र मन ल आगू बढ़े के मउका मिलही।
मरवाही उपचुनाव
मरवाही विधानसभा उपचुनई बर आज नाम वापिस लेके काम पूरा होगे। आज पांच झिन प्रत्यासी मन अपन नाव वापिस लेहे। एखर बाद अब आठ झिन प्रत्यासी चुनाव मैदान म हे। इहां तीन नवंबर के वोट डारे जाही। ऐति, उपचुनई बर प्रचार अभियान घलो जोर पकड़ लेहे।
कांग्रेस के प्रदेश अध्यक्ष मोहन मरकाम ह आज पेण्ड्रा विकासखंड के गांव बचारवार, बंधी अउ अड़भार म लोगन मन ले मिलके पार्टी प्रत्याशी डाॅक्टर के.के. ध्रुव के पक्ष म प्रचार करीन।
त उहें, भाजपा उम्मीदवार डाॅक्टर गंभीर सिंह के समर्थन म भाजपा के बड़का नेता मन सरलग चुनावी सभा लेवत हे। ए दूनों पार्टी के संगेसंग आने उम्मीदवार मन घलो प्रचार अभियान म लगे हे।
मरवाही उपचुनई बर उम्मीदवार मनके खरचा के लेखा-जोखा बर तारीख राखे गेहे। जिला निर्वाचन अधिकारी ह बतईन कि जम्मों उम्मीदवार मन ल राखे गे बेरा अउ जघा म अपन खर्चा करे के बारे म जानकारी देना हे। एखर बर उम्मीदवार मन ल अपन निर्वाचन अभिकर्ता के माध्यम ले खरचा के रजिस्टर अउ जम्मों दस्तावेज ल जांच बर पेस करना होही।
कोरोना-समाचार
प्रदेस म अब तक एक लाख साठ हजार ले जादा कोरोना संक्रमित मरीज के पहिचान करे गेहे। ए बेरा छब्बीस हजार ले जादा मरीज मनके इलाज आने-आने अस्पताल मन म चलत हे। प्रदेस म अब तक एक हजार चार सौ अठहत्तर लोगन मनके मउत कोरोना ले होय हे।
ऐति, रायपुर लोकसभा क्षेत्र के सांसद सुनील सोनी के कोरोना जांच रिपोर्ट पाॅजिटिव आय हे। ओमन संपर्क म आय जम्मों लोगन मन ल ध्यान राखे के अपील करे हे।
उहें, बिलासपुर जिला प्रशासन अउ स्वास्थ्य विभाग डहार ले कोरोना संक्रमण के लक्षण वाले मरीज मनके पहिचान बर दू ले बारह अक्टूबर तक जिला म घरो-घर जाके सर्वें अभियान कराय गीस। ए दउरान तीन लाख इंक्यानवे हजार ले जादा घर के सर्वें करे गीस।
त कोरिया जिला ह कोविड पेंशेंट फीड-बैक रिपोर्ट म बढ़िया स्वास्थ्य सुविधा के आधार म पूरा प्रदेस म दूसर नंबर आय हे। स्वास्थ्य विभाग डहार ले दस ले सत्रह अक्टूबर के बीच संस्थावार करे गे रैंकिंग म कोरिया जिला के कंचनपुर स्थित कोविड केयर अस्पताल ल प्रदेस म दूसरा रैंक मिले हे।
हाथी-उत्पात
जशपुर जिला के कुनकुरी वन परिक्षेत्र म हाथी मनके हमला ले एक झिन माईलोगिन के मउत होगे। वन विभाग के टीम ह मउका म पहुंच के तीर-तखार के गांव वाले मन ल हाथी ले सतर्क रेहे बर केहे हे।
उहें, बालोद जिला के डौंडीविकासखंड के गांव रजोड़डीह के तीर-तखार म बाईस ठिन हाथी के दल ह घुमत हे। ए हाथी मन ह छापर गांव म खेत म लगे फसल मन ल अब्बड़ नकसान पहुंचाय हे। वन विभाग के टीम ह ए सीमा ल गे गांव मन म हाका परा के लोगन मन ल हाथी मन ल दुरिहा रेहे के अउ जंगल म नइ जाय के सलाह देहे।
कोरोना-जागरूकता
ए बेरा तिहार मन ल धियान म राखत प्रदेस म लोगन मन ल कोरोना संक्रमण ले बांचे बर जरूरी सावधानी बरते के बारे म जागरूक करे के उद्देश्य ले सहर, कस्बा के संगेसंग गांव-गतौरी मन म घलो जागरूकता अभियान चलाय जात हे।
इही कड़ी म आज रईपुर ले जागरूकता रथ रवाना करे गीस। केन्द्रीय सूचना अउ प्रसारण मंत्रालय के रीजनल आउटरीच ब्यूरो अउ पत्र सूचना कार्यालय रईपुर के अपर महानिदेशक सुदर्शन पनतोड़े ह हरा झंडी देखाके कला जत्था के संग जागरूकता रथ ल रवाना करीन।
एखर पहिली, कारीकरम वाले जघा म छत्तीसगढ़ी लोक कला मंच-नवा अंजोर के कलाकार मन ह कोरोना संक्रमण के रोकथाम बर जागरूकता गीत अउ नाच के प्रस्तुति दीन।
उहें, छत्तीसगढ़ के जाने माने लोक गायिका छाया चंद्राकर ह लोगन मन ले कोरोना संक्रमण ले बचाव बर जरूरी सावधानी बरते के अपील करे हे –
होल्ड बाईट – छाया चंद्राकर (01 मिनट)
कृषि कानून-कांग्रेस
नवा कृषि कानून अउ उत्तरप्रदेस के हाथरस म होय घटना ल लेके अखिल भारतीय कांग्रेस कमेटी ह इकतीस अक्टूबर के पूरा देस म किसान अधिकार दिवस अउ पांच नवंबर के महिला अउ दलित उत्पीड़न विरोधी दिवस मनाय के फइसला लेहे।
कांग्रेस अध्यक्ष सोनिया गांधी के अगुवई म पार्टी महासचिव अउ प्रदेस प्रभारी के संग होय बइठका के बाद संगठन प्रभारी के.सी. वेणुगोपाल ह बतईन कि कांग्रेस ह इकतीस अक्टूबर के किसान अधिकार दिवस मनाही। त उहें, पांच नवंबर के महिला अउ दलित उत्पीड़न विरोधी दिवस मनाय जाही। संगेसंग ए दिन राज्य स्तर म धरना प्रदर्शन घलो करे जाही।
मौसम
प्रदेस म अवइया चैबीस घंटा के दउरान एक-दू जघा म हल्का ले मध्यम बरसा होय के संभावना हे। त उहें, प्रदेस के दक्षिणी जघा म तापमान म गिरावट हो सकथे।
मौसम विभाग ले मिले जानबा के मुताबिक उपरी हवा के एक ठिन चक्रवाती घेरा ह पूर्व मध्य बंगाल के खाड़ी अउ ओखर तीर-तखार म स्थित हे, जेखर परभाव ले अवइया चैबीस घंटा म निम्नदाब के क्षेत्र बने के संभावना हे, जेखर सेती प्रदेस के दक्षिणी भाग म कोनों-कोनोें जघा म हल्का ले मध्यम बरसा हो सकथे।
संक्षिप्त समाचार
अउ अब थोरकुन समाचार सार म–
– पूर्व सांसद स्वर्गीय परसराम भारद्वाज के पांचवां पुण्यतिथि के मउका म खरौद म राखे गे कारीकरम म ओमन श्रद्धांजलि दे गीस।
– रायगढ़ जिला म सरिया क्षेत्र के भटली गांव के तीर दू ठिन फटफटी के बीच होय टक्कर म एक झिन मनखे के मउत होगे अउ एक झिन मनखे घायल होगे।
अउ
– कबीरधाम जिला म कोतवाली पुलिस ह सट्टा खेलाय के आरोप म एक झिन नाबलिग के संग पांच झिन लोगन मन ल गिरफ्तार करे हे।