पटवारी हड़ताल-स्थगित
प्रदेसभर म पाछू एक महिना ले जादा बेरा तक आने-आने मांग उपर आंदोलन करइया पटवारी मन आज मुख्यमंत्री विष्णुदेव साय ले भेंट करके गोठबात के बाद अपन हड़ताल ल स्थगित कर देइन। संघ के पदाधिकारी मन रइपुर मुख्यमंत्री निवास म श्री साय ले भेंट करके अपन मांग ले जुड़े जानकारी देइन। ए बेरा मुख्यमंत्री ह पटवारी मनके मांग उपर किहीन कि-उंखर समस्या के समाधान, गोठबात अउ आपसी समझ ले करे जाही, राज्य सरकार ह करमचारी मनके समस्या के प्रति संवेदनसील हे। ए बेरा मुख्यमंत्री ह वेतन विसंगति अउ पदोन्नति ले जुड़े मांग के परीक्षन बर उच्च स्तरीय समिति गठित करे के निरदेस देइन हें। ए समिति ह मामला के आने-आने पहलू मनके जांच करके उंखर निराकरण ले जुड़े अपन अनुसंसा पेस करही। मुख्यमंत्री ह हड़ताल अवधि म होय कारवाही मन उपर घलो बिचार करे के भरोसा देवाइन।
ऐति, पटवारी संघ के प्रदेस अध्यक्ष भागवत कश्यप ह किहीन कि-‘‘मुख्यमंत्री ह संघ के मांग उपर सकारात्मक रूप अपनावत उच्च स्तरीय समिति गठन के निरदेस देइन हें, एखर बर मुख्यमंत्री के आभार‘‘।
भाजयुमो-बैठक
भारतीय जनता युवा मोर्चा के प्रदेस कार्य समिति के दू दिन के बइठका आज रइपुर के भाजपा प्रदेस कार्यालय म सुरू होइस। ए बइठका म मुख्यमंत्री विष्णुदेव साय घलो सामिल होइन। ए बइठका 7 सत्र म आयोजित करे जाही। उहें, हर सत्र म आने-आने बिसय उपर बिसेसज्ञ मन अपन बिचार राखके कार्यकर्ता मन ल मार्गदर्सन दिहीं। ए सत्र म भाजपा ल अउ जादा मजबूत बनाय बर, पार्टी के रीति-नीति ल जन-जन तक पहुंचाय के संग केंद्र अउ राज्य सरकार के कल्याणकारी योजना अउ उपलब्धि के जानकारी आम जनता तक पहुंचाय जइसन बिसय उपर बिस्तार ले गोठबात करे जाही।
ऐति, मुख्यमंत्री ह किहीन कि- ‘‘भारतीय जनता युवा मोर्चा ह पार्टी के युवा सक्ति आय। युवा कार्यकर्ता मनके खांद म संगठन ल मजबूत बनाय के संगे-संग सरकार के योजना अउ कारज ल समाज के आखिरी मनखे तक अमराय के जिम्मेदारी हे‘‘।
ऑल इंडिया तेलुगु कॉन्फ्रेंस
मुख्यमंत्री विष्णुदेव साय ह काली राजधानी रइपुर के श्री बालाजी विद्या मंदिर म आयोजित 11वां ऑल इंडिया तेलुगु कॉन्फ्रेंस म सामिल होइन। ए मउका म ओमन तेलुगु समाज के योगदान ल संहरावत किहीन कि-छत्तीसगढ़ के बिकास अउ समृध्दि म तेलुगु समाज के अहम भागीदारी रेहे हे।
मुख्यमंत्री ह छत्तीसगढ़ म आंध्रा एसोसिएसन के 50 बछर के यात्रा ल संहरावत किहीन कि-छत्तीसगढ़ अउ आंध्र प्रदेस के बीच सड़क संपर्क दूनों राज्य के बिकास के नवा संभावना ल साकार करही। श्री साय ह यहू किहीन कि-भारतमाला परियोजना के रइपुर ले विशाखापट्टनम तक बनाय जवइया सड़क रद्दा ले आवागमन जादा सुगम होही। एखर ले दूनों राज्य के बीच आर्थिक संबंध अउ जादा मजबूत होही।
ऑल इंडिया तेलुगु कॉन्फ्रेंस
मुख्यमंत्री विष्णुदेव साय ह काली राजधानी रइपुर के श्री बालाजी विद्या मंदिर म आयोजित 11वां ऑल इंडिया तेलुगु कॉन्फ्रेंस म सामिल होइन। ए मउका म ओमन तेलुगु समाज के योगदान ल संहरावत किहीन कि-छत्तीसगढ़ के बिकास अउ समृध्दि म तेलुगु समाज के अहम भागीदारी रेहे हे।
मुख्यमंत्री ह छत्तीसगढ़ म आंध्रा एसोसिएसन के 50 बछर के यात्रा ल संहरावत किहीन कि-छत्तीसगढ़ अउ आंध्र प्रदेस के बीच सड़क संपर्क दूनों राज्य के बिकास के नवा संभावना ल साकार करही। श्री साय ह यहू किहीन कि-भारतमाला परियोजना के रइपुर ले विशाखापट्टनम तक बनाय जवइया सड़क रद्दा ले आवागमन जादा सुगम होही। एखर ले दूनों राज्य के बीच आर्थिक संबंध अउ जादा मजबूत होही।
बाल विज्ञान कांग्रेस
छत्तीसगढ़ विज्ञान अउ प्रौद्योगिकी परिषद के संग पंडित रविशंकर शुक्ल विश्वविद्यालय के संयोजन म रइपुर म आयोजित दू दिवसीय राज्य स्तरीय बाल विज्ञान कांग्रेस के काली समापन होइस। ए मउका म प्रदेसभर ले आय बाल वैज्ञानिक मन अपन सोध परियोजना अउ वैज्ञानिक मॉडल के जरिया ले अपन प्रतिभा ल देखाइन। ए बेरा 156 सोध परियोजना मनके प्रस्तुति होइस, जिंखर मूल्यांकन आने-आने विश्वविद्यालय अउ महाविद्यालय के पंद्रह झन बिसेसज्ञ मन करिन। उहें, बढ़िया प्रदर्सन करइया वरिष्ठ वर्ग के 10 अउ कनिष्ठ वर्ग के 6 संग 16 बाल वैज्ञानिक समूह के चयन राष्ट्रीय स्तर बर करे गिस। ए समूह मन अवइया बछर 5 ले 18 जनवरी तक नवा रइपुर म होवइया 32वां राष्ट्रीय बाल विज्ञान कांग्रेस म छत्तीसगढ़ के अगुवई करहीं।
उहें, समापन समारोह ल संबोधित करत पंडित रविशंकर शुक्ल विश्वविद्यालय के कुलपति प्राफेसर सच्चिदानंद शुक्ल ह बाल वैज्ञानिक मनके प्रतिभा अउ वैज्ञानिक दृष्टिकोण ल गजब संहराइन।
जीएसटी सहायक आयुक्त-निलंबित
राज्य सरकार ह जीएसटी सहायक आयुक्त अंचला गिरी ल एंटी करप्शन ब्यूरो-एसीबी डाहर ले गिरफ्तार करे के बाद निलंबित कर देहे। बतादन कि- काली कांकेर जिला म अंचला गिरी ल एसीबी के टीम ह डेढ़ लाख रूपिया के रिस्तव लेवत गिरफ्तार करे रिहीस।
केंद्रीय टीम-दौरा
राष्ट्रीय स्वास्थ्य मिसन के 18वां कॉमन रिव्यू के तहत केंद्रीय बिसेसज्ञ मनके टीम ह छत्तीसगढ़ के स्वास्थ्य सेवा मनके समीक्षा करहीं। एखर बर केंद्रीय टीम ह सुकमा अउ बलौदाबाजार जिला के दउरा करही। ए बेरा स्वास्थ्य संस्थान म सुबिधा, चिकित्सा सेवा मनके गुणवत्ता अउ राष्ट्रीय स्वास्थ्य कारीकरम मनके जमीनी स्तर म क्रियान्वयन के आंकलन करही।
उहें, काली रइपुर म आयोजित बइठका म मातृ स्वास्थ्य, शिशु स्वास्थ्य, मलेरिया अउ टीबी के संग आने-आने राष्ट्रीय स्वास्थ्य कारीकरम के प्रगति उपर गोठबात करे गिस।
रायपुर जेल-प्रशिक्षण
प्रदेस के जेल मन म कैदी मनके सुधार, पुनर्वास अउ आत्मनिर्भरता बर संचालित ‘‘निश्चय‘‘ कारीकरम के तहत शिक्षा अउ कौशल बिकास ल प्रोत्साहन दे जावत हे। इही कड़ी म आज केंद्रीय जेल रइपुर म आयोजित कारीकरम म कम्प्यूटर शिक्षा अउ ब्यूटी पार्लर प्रसिक्षण पूरा करइया 70 झन बंदी मन ल परमान पत्र दे गिस। एमा 40 झन पुरूस बंदी मन ल ‘‘कोर्स ऑन कम्प्यूटर कॉन्सेप्ट‘‘ अउ 30 झन माईलोगन ल ‘‘असिस्टेंट हेयर ड्रेसर-एडवांस‘‘ के तहत प्रसिक्षण दे गिस। ए उदिम ह बंदी मन ल रिहाई के बाद सम्मानजनक रोजगार ले जोड़े बर अउ समाज के मुख्यधारा म लहुटाय बर आय।
क्रिकेट सट्टा-खुलासा
बिलासपुर पुलिस ह ऑनलाइन क्रिकेट सट्टा के जरिया ले करोड़ांे रूपिया के अवैध कमाई अउ हवाला नेटवर्क के जरिया ले पइसा ल देसभर म बगरइया गिरोह के खुलासा करे हे। जांच म करीबन 25 करोड़ रूपिया के अचल संपत्ति ले जुड़े दस्तावेज घलो आगू आइस।
जिला के वरिष्ठ पुलिस अधीक्षक रजनेश सिंह ह बतइन कि-नगर कोतवाली म दर्ज अपराध विवेचना के बेरा पुलिस ल सट्टा कारोबार ले जुड़े लेनदेन अउ संपत्ति निवेस के अहम जानकारी मिले हें। अभी हालेच म करे गे तलासी म करीबन 8 लाख नगदी बरामद करे गिस। संगे-संग सोन के जेवर, महंगा घड़ी, बैंक कागजात अउ संपत्ति के रिकॉर्ड घलो जब्त करे गिस। ओमन बतइन कि पुलिस जांच म सुनील रोहरा, मनीष रोहरा अउ जबलपुर निवासी आकाश गोगा के नांव आगू आइस। फेरहाल पुलिस ह ए जम्मो मामला के जांच करत हे।
कार्यशाला
छत्तीसगढ़ राज्य महिला अयोग डाहर ले राष्ट्रीय महिला आयोग अउ पंडित रविशंकर शुक्ल विश्वविद्यालय के सह-आयोजन म काली रइपुर म ‘‘मानव तस्करी अउ महिला मनके घरेलू हिंसा ले संरक्षण‘‘ बिसय उपर राज्य स्तरीय प्रसिक्षण कार्यसाला के आयोजन करे जाही। कार्यसाला के सुभारंभ राज्यपाल रमेन डेका करहीं। ए मउका म महिला अउ बाल विकास मंत्री लक्ष्मी राजवाड़े मौजूद रइहीं। उहें, कार्यसाला के समापन मुख्यमंत्री विष्णुदेव साय के उपस्थिति म होही।
ए कार्यसाला म न्यायपालिका, पुलिस, महिला अउ बाल विकास, उच्च शिक्षा के संग स्वैच्छिक संस्था मन ले जुड़े करीबन 500 प्रतिभागी सामिल होहीं। ए बेरा मानव तस्करी अउ घरेलू हिंसा ले जुड़े कानून मन के परभाव उपर गोठबात करे जाही।
दुर्घटना
सक्ती जिला म आज होय एक ठन सड़क हादसा म 3 युवक के मउत होगे। मिले जानकारी ले डभरा थाना इलाका के छिवारीपाली गांव के तिर रइपुर- डभरा रद्दा म बस ह फटफटी ल जोरदार टक्कर मारिस, जेमा फटफटी सवार तीनों युवक के मउका म ही मउत होगिस। बताय जावत हे कि बस ह रइपुर ले डभरा डाहर जावत रिहीस, इही बेरा हादसा होगे।
ओति, बिलासपुर म एक ठन तेज रफ्तार कार ह ट्रेलर ले टकरागे, जेमा एक झन युवती के मउत होगे। उहें, 8 झन आने लोगन घायल होगिन, जेमा ले दू के हालत गंभीर हे।
