प्रधानमंत्री-अपील
प्रधानमंत्री नरेंद्र मोदी ह युवा मन ले अपील करे हे कि ओमन सीमित दायरा म झन सोचय अउ नवा-नवा संभावना तलासय। आज आईआईटी खड़गपुर के प्लेटिनम जुबली समारोह म ओमन किहीन कि सीमित विस्वास ले सपना घलो सीमित रह जथे अउ देस के क्षमता घलो सीमित हो जथे। विश्व बैंक के हाल के एक रिपोर्ट के हवाला देवत हुए श्री मोदी ह किहीन सरकार ह गरीब मन ल सशक्त बनाय हे।
ओमन किहीन कि पावर टू एंपावर मूल मंत्र ल लेके मेहा जियत हव। गरीब मन बर ईज ऑफ लीविंग योजना सुरू करीन अउ एखर नतीजा देस आज देखत हे। अभी आप मन वर्ल्ड बैंक के ताजा रिपोर्ट ल जरूर पढ़े होहू। ओमन केहे गेहे कि सिरिफ बारह-तेरह साल म भारत म पचास करोड़ ले जादा लोगन मन गरीबी ले बाहिर निकले हे। एह कोई छोटे परिवर्तन नोहय।
श्री मोदी ह छात्र मन ले विकसित भारत के लक्ष्य प्राप्त करे बर नवाचार करे ल किहीन। प्रधानमंत्री मोदी ह किहीन कि भारत आज चिप ल लेके जहाज तकहर चीज तक निर्माण करत हे।
मुख्यमंत्री-जनदर्शन
मुख्यमंत्री विष्णुदेव साय के जनदर्शन कारीकरम छब्बीस नवंबर बिरसपत ले आयोजित करे जाही। मुख्यमंत्री निवास रायपुर म बिहनिया ग्यारा बजे ले मंझनिया दू बजे तक आयोजित जनदर्शन म मुख्यमंत्री श्री साय आम लोगन ले सीधा मुलाकात कर उंखर समस्या अउ मांग सुनही। मुख्यमंत्री जनदर्शन के दउरान नागरिक मन के समस्या मन ले रूबरू होही अउ उंखर त्वरित निराकरण बर संबंधित अधिकारी मन ल आवश्यक दिसा निरदेस दिही। जनदर्शन म आम लोगन अपन समस्या, मांग अउ सुझाव ल सीधा मुख्यमंत्री के आगू रख सकही।
अंतरर्राष्ट्रीय व्यापार मेला
नई दिल्ली के भारत मंडपम म काली पैतालीसवां भारत अंतरराष्ट्रीय व्यापार मेला के दउरान छत्तीसगढ़ राज्य दिवस मनाय गीस। राज्यपाल रमेन डेका के मुख्य आतिथ्य अउ मुख्यमंत्री विष्णुदेव साय के अध्यक्षता म आयोजित समारोह म छत्तीसगढ़ के लोक संस्कृति अउ जनजातीय परंपरा मनके आकर्षक झलक देखे बर मिलिस। ए बेरा म राज्यपाल ह किहीन कि छत्तीसगढ़ म उद्योग, कृषि, पर्यटन अउ खाद्य प्रसंस्करण के क्षेत्र म निवेस के अपार संभावना हे। ओमन निवेसक मन ले प्रदेस म निवेस करे अउ विकास म भागीदार बने के अपील करीन।
उहें, मुख्यमंत्री ह किहीन कि छत्तीसगढ़ के पहिचान तेजी ले बदलत हे। कभू नक्सलवाद बर चिन्हे जाना वाला बस्तर अउ छत्तीसगढ़ के चर्चा अब विकास, समृध्द जनजातीय संस्कृति, प्राकृतिक सुंदरता बर होवत हे। समारोह म गौरा-गौरी, भोजली, राउत नाचा, सुआ, पंथी अउ करमा नृत्य के मनमोहक प्रस्तुति दे गीस।
प्रसार भारती-पेज से पिच
प्रसार भारती ह गोवा के राजधानी पणजी म संतानवां अंतर्राष्ट्रीय फिल्म महोत्सव म अपन पहिली स्क्रीप्ट पिचिंग पहल पेज से पिच तक सुरू करे हे। प्रसार भारती के अध्यक्ष प्रसून जोशी ह काली एखर सुरूआत करीन। एखर उद्देस्य नवा पटकथा लेखक मन ल सहायता प्रदान करना अउ भारतीय कहानी मन ल देस अउ दुनिया के दर्सक मन तक पहुंचाना हरय। एखर ले भारतीय भाषा मनके उभरत लेखक मन ल नवा अवसर मिलही। ए बेरा म श्री जोशी ह किहीन कि देस के अलग-अलग हिस्सा ले प्रमाणिक अउ अनूठा कहानी मन ल सामने लाय के जरूरत हे।
शिल्पकार-राशि
रायगढ़ जिला के पुसौर विकासखंड के ग्राम एकताल के बेलमेटल सिल्प ले जुड़े तीस झन महिला अउ पुरूष सिल्पकार मन ल तीन महिना के प्रसिक्षण पूरा करे के बाद दस-दस हजार रूपिया मूल्य के आधुनिक औजार अउ उपकरण निसुल्क प्रदान करे गीस। उहें, ग्राम ठेंगापाली के पंद्रह अनुसूचित जाति वर्ग के सिल्पकार अउ सारंगढ़-बिलाईगढ़ जिला के ग्राम कटैल के दू झन अनुसूचित जन जाति वर्ग के सिल्पकार मन ल औजार खरीदे बर पांच-पांच हजार रूपिया के आर्थिक सहायता दे गीस। ए अवसर म छत्तीसगढ़ हस्तसिल्प विकास बोर्ड के अध्यक्ष शालिनी राजपूत ह किहीन कि पारंपरिक सिल्पकार मन ल आधुनिक प्रसिक्षण अउ उन्नत उपकरण उपलब्ध कराय के संगेसंग उंखर उत्पाद मन ल राष्ट्रीय अउ अंतर्राष्ट्रीय बजार तक पहुंचाय के प्रयास करे जात हे।
एनटीए परीक्षा
राष्ट्रीय परीक्षा एजेंसी-एनटीए ह आज संयुक्त सीएसआईआर-यूजीसी नेट परीक्षा के कारीकरम जारी कर देहे। एजेंसी ह बतइन कि परीक्षा उन्नीस, बाईस अउ सत्ताईस दिसंबर के दू पाली म आयोजित करे जाही। उम्मीदवार मन बिसयवार परीक्षा के तारीख अउ समय के जानकारी एनटीए के वेबसाइट म देख सकत हे।
चक्रवात-अकवान
चक्रवात अकवान के असर ले आज घलो रईपुर समेत छत्तीसगढ़ के कई ठन जिला म रूक-रूक के बरसा होय ले आम जनजीवन प्रभावित होय हे। उहें, बेमौसम बरसा ले कई ठन जिला म फसल मन ल घलो नुकसान होय के खबर हे। चक्रवात के प्रभाव ले बेमेतरा जिला के अलग-अलग क्षेत्र म प्रभावित फसल मन के वास्तविक स्थिति के आंकलन करे बर कृषि विभाग अउ अधिकृत बीमा कंपनी डहार ले संयुक्त रूप ले फसल क्षति सर्वेक्षण के काम प्रारंभ कर दे गेहे। क्षेत्रीय ग्रामीण कृषि विस्तार अधिकारी अउ बीमा कंपनी के प्रतिनिधि मन के संयुक्त टीम ह विकासखंड बेरला के अलग-अलग गांव मन म पहंुच के खेत मनके निरीक्षण करीन।
इही बीच, मुख्यमंत्री विष्णुदेव साय ह अकवान चक्रवात के सेति फसल मन ल होय नुकसान ल लेके किसान मन ल आस्वस्त करे हे कि राज्य सरकार हर प्रभावित किसान मन संग खड़े हे। किसान मन ल कोनो प्रकार के चिंता करे के जरूरत नइ हे। चक्रवात ले होय फसल क्षति के सर्वेक्षण कराके सबो पात्र किसान मन ल नियमानुसार सहायता रासि उपलब्ध कराय जाही।
उहें, प्रदेस कांग्रेस कमेटी के अध्यक्ष दीपक बैज ह आज रायपुर स्थित राजीव भवन म आयोजित पत्रकारवार्ता म चक्रवाती तूफान अउ बेमौसम बरसा ले फसल मन ल होय नुकसान ल लेके राज्य सरकार ले प्रभावित किसान मन ल राहत देके मांग करीन।
आईईडी-बरामद
कांकेर जिला म सुरक्षा बल ह सर्चिंग अभियान के दउरान तीन किलोग्राम के प्रेसर कुकर आईईडी बरामद करे हे। बम निरोधक दस्ता ह एला मउका म ही निष्क्रिय कर नष्ट कर देहे। पुलिस ले मिले जानकारी के मुताबिक छोटे बेठिया थाना क्षेत्र के ग्राम मोरखण्डी अउ हिंदुर के बीच जंगल पहाड़ी इलाका म जिला पुलिस बल, सीमा सुरक्षा बल अउ बीडीएस के संयुक्त टीम सर्चिंग अभियान म निकले रिहीस। इही दउरान सुरक्षा बल ल लगभग तीन किलोग्राम वजनी एक प्रेसर कुकर आईईडी मिलिस
कोदो-कुटकी-खरीदी
किसान मन ल धान के संगेसंग लघु धान्य फसल मनके खेती बर प्रोत्साहित करे बर ए बछर पहिली घांव मार्कफेड के माध्यम ले कोदो, कुटकी अउ रागी के खरीदी करे जाही। एखर बर चयनित उपार्जन केंद्र मन म व्यवस्था करे जात हे। कृषि विभाग के अनुसार कोदो के समर्थन मूल्य तीन हजार दू सौ रूपिया, कुटकी के तीन हजार तीन सौ पचास रूपिया अउ रागी के पांच हजार दू सौ पचास रूपिया प्रति कुंटल निर्धारित करे गेहे। समर्थन मूल्य उपर खरीदी के लाभ लेबर किसान मन ल एकीकृत किसान पोर्टल म पंजीयन कराना अनिवार्य हे। पंजीयन के अंतिम तिथि तीस दिसंबर राखे गेहे।
जशपुर-पर्वतरोहण प्रशिक्षण
जशपुर जिला के पांच आदिवासी युवा मन के अंतरराष्ट्रीय पर्वतारोहण प्रसिक्षण कारीकरम बर चयन होय हे। चुने गे युवा मन ल बैंगलुरू म अवइया महिना ले अमेरिकी संस्था डहार ले रॉक क्लाइंबिंग गाइड के प्रसिक्षण दे जाही। ए युवा मन ह पाछू बछर ट्राइबल हिमालयन एक्सपीडिशन के दउरान हिमाचल प्रदेस के पीर पंजाल पर्वत श्रृंखला म पांच हजार तीन सौ चालीस मीटर ऊंचा जगत्सुख-वन शिखर म सफलतापूर्वक चढ़ाई करे रिहीन।
विशेष लोक अदालत
चेक बाउंस ले जुड़े लंबित मामला के निराकराण बर आज प्रदेस के आने-आने न्यायालय मन म बिसेस लोक अदालत के आयोजन करे गीस। ए दउरान चेक बाउंस के मामला के आपसी सहमति अउ समझौता के आधार म निराकरण करे गीस।
उहें, वाहन चालक के फरवरी तक लंबित ई चालान मामला के निराकरण बर रायपुर म बारह दिसंबर के लोक अदालत के आयोजन करे जाही।
