मरवाही विधानसभा उपचुनाव बर तेरा झिन अभ्यर्थी मनके नामंाकन पत्र ल वैध पाय गे हावय। उंहें छै झिन के नामंाकन पत्र ल गलती होय के सेती निरस्त कर देगे हावय। अभ्यर्थी मन ह अपन नाव काली उन्नीस अक्टूबर तक वापिस ले सकही। मरवाही उपचुनाव बर मतदान तीन नवंबर के होही। ए उपचुनाव म भाजपा कंाग्रेस संगरा दूसर राजनीतिक दल अउ उम्मीदवार मनके प्रचार अभियान घलो तेज होगे हे। भाजपा सांसद अरूण साव ह आज झगराखांड अउ लालपुर म भाजपा प्रत्याशी डॅाक्टर गंभीर सिंह के पक्ष म चुनावी सभा ल संबोधित करीन। उंहें कंाग्रेस के प्रदेश अध्यक्ष मोहन मरकाम ह आने आने गांव के दौरा करके पार्टी प्रत्याशी डॅाक्टर के.के. ध्रुव के समर्थन म प्रचार करीन।
इही बीच, जनता कंाग्रेस छत्तीसगढ़-जे के अध्यक्ष अमित जोगी अउ उंखर पत्नी ऋचा जोगी के जाति प्रमाण पत्र अउ नामंाकन पत्र के बारे म देगे फैसला के विरोध म उंखर समर्थक मन ह आज रायपुर म राज्य सरकार के पुतला दहन करके प्रदर्शन करीन।
उंहें छत्तीसगढ़ विधानसभा म नेता प्रतिपक्ष धरमलाल कौशिक ह मरवाही विधानसभा उपचुनाव म अमित जोगी के नामंाकन निरस्त करे के मामला म कंाग्रेस के भूमिका ल अलोकतांत्रिक अउ राजनीतिक दुराग्रह के परिचायक बताइन हे।
छत्तीसगढ़ बेरोजगारी दर
छत्तीसगढ़ म बेरोजगारी के दर सितंबर महीना म घटके दू प्रतिशत रहिगे हे, जउन ह राष्ट्रीय स्तर म देश म बेरोजगारी के दर छै दशमलव आठ प्रतिशत ले कमती हे। देश म शहरी क्षेत्र मन म ये दर सात दशमलव नौ प्रतिशत अउ गंवई क्षेत्र म छै दशमलव तीन प्रतिशत रीहिस।
खबर के मुताबिक राज्य सरकार डहार ले करे गे फैसला के सेती उद्योग संगरा कृषि के क्षेत्र म घलो कतकोन काम चलत हे। जेखर ले प्रदेश म रोजगार के मउका सरलग बाढ़त हे अउ बेरोजगारी के दर म कमी दर्ज करे जावत हे।
स्कूल शिक्षा आकलन
प्रदेश म प्राथमिक अउ उच्चतर माध्यमिक स्तर म लईका मनके पढ़ई बर करे गे नवाचारी प्रयास के आकलन फरवरी महीना तक करे जाही। आकलन के प्रकिया म सुधार लाये बर जिला शिक्षा अधिकारी मन ह सरलग निगरानी करही।
स्कूल शिक्षा विभाग के प्रमुख सचिव डॅाक्टर आलोक शुक्ला ह प्राथमिक अउ उच्चतर माध्यमिक स्तर म नवा आकलन – क्या, क्यों और कैसे – विसय म राखे गे वेबिनार म जिला शिक्षा अधिकारी मन ल ए बारे म जरूरी निर्देश दीन। डॅाक्टर शुक्ला ह बताइन कि कोरोना संक्रमण के बावजूद शिक्षक मन डहार ले लइका मनके पढ़ई बर कतकोन प्रयोग करे गे हावय, ए प्रयास के लईका मनके सीखे के प्रक्रिया म का प्रभाव पड़े हे एला शासन जानना चाहत हे। एखरे बर आकलन प्रक्रिया ल अपनाय गे हावय।
प्रयास विद्यार्थी नीट
अखिल भारतीय स्तर के चिकित्सा स्नातक म राष्ट्रीय पात्रता अउ प्रवेश परीक्षा – नीट म छत्तीसगढ़ सरकार डहार ले चलत प्रयास आवासीय विद्यालय के विद्यार्थी मनके प्रदर्शन सुघ्घर रीहिस। एमा एक सौ छियासंठ विद्यार्थी मन ह सफलता पाय हे अउ माओवाद प्रभावित दंतेवाड़ा जिला ले अड़तीस विद्यार्थी मन घलो एमा सामिल हे ।
मुख्यमंत्री भूपेश बघेल अउ आदिम जाति विकास मंत्री डॅाक्टर प्रेमसाय सिंह टेकाम ह नीट परीक्षा म सफल होय विद्यार्थी मन ल अपन शुभकामना दीन हे।
सुपेबेड़ा चिकित्सा सुविधा
सुपेबेड़ा के किडनी रोग ले प्रभावित लोगन मन ल पेरेटोनियल डायलिसिस बर जरूरी फ्लूड लेबर अब रायपुर नइ आना पड़ही। राष्ट्रीय स्वास्थ्य मिशन के राज्य इकाई ह ये सुविधा अब देवभोग सामुदायिक स्वास्थ्य केंद्र म दे दे हवय। नियमित पेरोटोनियल डायलिसिस कराने वाला सुपेबेड़ा के एक झन मरीज ल फ्लूड सामुदायिक स्वास्थ्य केंद्र ले देगे हावय।
सामुदायिक स्वास्थ्य केंद्र के डॅाक्टर अउ स्टाफ ल किडनी रोग के इलाज बर बिसेस प्रशिक्षण देगे हावय।
ममता चंद्राकर-कोरोना सावधानी अपील
छत्तीसगढ़ के जाने माने लोक गायिका पद्मश्री ममता चंद्राकर ह लोगन मन ले कोरोना संक्रमण ले बचाव बर जरूरी सावधानी बरते के अपील करे हे –
होल्ड बाईट – ममता चंद्राकर
( 55 सेकेंड)
हमर ग्राम सभा
पंचायत अउ ग्रामीण विकास मंत्री टी.एस. सिंहदेव आज रतिहा साढ़े सात बजे आकाशवाणी रायपुर ले प्रसारित विशेष कार्यक्रम – हमर ग्रामसभा – म छत्तीसगढ़ सरकार के नरवा, गरूवा, घुरूवा अउ बाड़ी योजना के जानकारी दीही। ए कार्यक्रम ल मीडियम वेव 981 किलोहर्टज म सुने जा सकत हे। जेला प्रदेश के सबो आकाशवाणी केंद्र मन ह एके संगरा रिले करही।
खेलो इंडिया कार्यक्रम
खेलो इंडिया कार्यक्रम म नौ राज्य अउ केंद्रशासित प्रदेश के खेल सुविधा ल खेलो इंडिया स्टेट सेंटर आॅफ एक्सीलेंस के रूप म बढ़ाय जाही। एमा छत्तीसगढ़ के अलावा आंध्रप्रदेश, चंडीगढ़, गोवा, हरियाणा, हिमाचल प्रदेश, पुडुचेरी, त्रिपुरा अउ जम्मू कश्मीर शामिल हे।
खेल मंत्रालय ह बताय हे कि राज्य के खेल सुविधा के चुनाव उंखर पाछू कार्य के लेखा जोखा, मूलभूत सुविधा के गुणवत्ता, प्रबंधन अउ खेल संस्कृति के आधार म करे गेहे।
सांसद आमरण अनशन
भाजपा कार्यकर्ता मनके निःशर्त रिहाई अउ ग्यारा झन के खिलाफ दर्ज करे गे अपराध ल वापिस ले खातिर दुर्ग लोकसभा सांसद विजय बघेल डहार ले जारी आमरण अनशन आज खतम होगे। श्री बघेल ह पूर्व मुख्यमंत्री डॅाक्टर रमन सिंह के आग्रह म जूस पीके अपन अनशन ल समाप्त करीन।
स्पेशल ट्रेन
रेलवे ह अवइया तिहार मन ल देखत यात्री मनके सुविधा बर स्पेशल ट्रेन चलाय के फैसला करे हे। एमा पोरबंदर ले हावड़ा के बीच दू हप्ता के पूजा स्पेशल ट्रेन के सुविधा इक्कीस अक्टूबर ले शुरू होही। ये ट्रेन छब्बीस नवंबर तक चलही। अइसने हावड़ा-पोरबंदर पूजा स्पेशल ट्रेन हावड़ा ले हर शुक्रवार अउ शनिवार के तेइस अक्टूबर ले अठाइस नवंबर तक चलही। उंहें पच्चीस अक्टूबर ले ओखा अउ हावड़ा के बीच साप्ताहिक पूजा स्पेशल ट्रेन घलो चलाय जाही। ये रेलगाड़ी उनतीस नवंबर तक चलही।
एखर अलावा त्रिवेन्द्रम-कोरबा-त्रिवेनद्रम द्वि-साप्ताहिक पूजा स्पेशल ट्रेन के संचालन बीस अक्टूबर ले दू दिसंबर तक करे जाही। अइसने दुर्ग-निजामुद्दीन-दुर्ग त्रि-साप्ताहिक पूजा स्पेशल ट्रेन ल बाईस अक्टूबर ले उनतीस नवंबर तक चलाये जाही।
एखरे संग एलटीटी-हावड़ा-एलटीटी द्वि-साप्ताहिक तिहार स्पेशल ट्रेन ल घलो बीस अक्टूबर ले उनतीस नवंबर तक चलाय जाही। बिलासपुर-पटना-बिलासपुर साप्ताहिक पूजा स्पेशल ट्रेन ल तेइस अक्टूबर ले अठाइस नंवबर तक चलाये के फैसला करे गे हावय।
अउ अब थोरकुन समाचार सार म-
– राज्य शैक्षिक अनुसंधान अउ प्रशिक्षण परिषद कोति ले राज्य स्त्रीय प्रतिभा खोज परीक्षा अउ राष्ट्रीय साधन सह प्राविण्य छात्रवृत्ति परीक्षा पंद्रा नवंबर के होही। आवेदन के आखरी तारीख चैबीस अक्टूबर निर्धारित करे गे हावय।
– राजनंादगंाव जिला म सात झिन तहसीलदार अउ नायब तहसीलदार मनके तबादला आदेश जारी करे गेहे।
– इही जिला म लालबाग थाना क्षेत्र के तीर घोरदा गांव म मोटर ले टकराय ले दू झिन लोगन के मउत होगे।
– महासमुंद जिला म गाड़ाघाट के शराब दुकान तीर सुपरवाइजर ले साढ़े ग्यारा लाख रूपिया के लूट के मामला म पुलिस ह छै झिन आरोपी मन ल गिरप्तार करे हे।
अउ
– महासमुंद जिला म गांजा तस्करी के दू ठिन अलग अलग मामला म पुलिस ह चार झिन आरोपी मन ल गिरप्तार करे हे। उंखर मन तीर ले दू ठन लग्जरी कार अउ लगभग तिरासी किलो गांजा बरामद करे गेहे।