प्रधानमंत्री स्वनिधि योजना-छत्तीसगढ़
प्रधानमंत्री स्वनिधि योजना के प्रभावी क्रियान्वयन अउ पथ विक्रेता मनके आर्थिक सशक्तिकरण बर छत्तीसगढ़ ल पांच ठिन राष्ट्रीय पुरस्कार मिले हे। आज नई दिल्ली म राखे गे स्वनिधि सम्मान आवार्ड दू हजार छब्बीस म राज्य म फास्टेस्ट मूवर्स श्रेणी म देस म पहिली अउ इनोवेशन एंड बेस्ट प्रैक्टिसेज श्रेणी म दूसरा स्थान मिले हे। उपमुख्यमंत्री अउ नगरीय प्रशासन मंत्री अरूण साव ह राज्य कोति ले ए दूनों पुरस्कार ग्रहण करे हे।
उहें, डिजीटल अडॉप्शन श्रेणी म नगर पालिका परिषद बड़े बचेली ल पहिली अउ दंतेवाड़ा ल दूसरा स्थान मिले हे। एक लाख ले दस लाख तक के आबादी वाला नगरीय निकाय के श्रेणी म बिलासपुर नगर निगम ल दूसरा मिले हे।
मुख्यमंत्री विष्णुदेव साय ह ए उपलब्धि म खुसी जतात किहीन कि प्रधानमंत्री स्वनिधि योजना छोटे व्यावसायी मन ल आर्थिक रूप ले आत्मनिर्भर बनाय म महत्वपूर्ण भूमिका निभाथे। ओमन किहीन कि ए सम्मान पथ विक्रेता मन ल संस्थागत ऋण, डिजीटल लेनदेन अउ स्वरोजगार के बेहतर औसर उपलब्ध कराय के दिसा म राज्य के परयास मनके राष्ट्रीय पहिचान हरय।
कृषि मंत्री पशु टीका
केंद्रीय कृषि अउ किसान कल्याण मंत्री शिवराज सिंह चौहान ह आज भोपाल स्थित आईसीएआर-राष्ट्रीय उच्च सुरक्षा पशुरोग संस्थान म तियार भारत के पहिली स्वदेसी एच-फाईव-एन-वन बर्ड फ्लू टीका राष्ट्र ल समर्पित करीन। श्री चौहान ह एला पशु स्वास्थ्य क्षेत्र म ऐतिहासिक उपलब्धि बतइन। ओमन किहीन कि ए टीका मुर्गी पालन क्षेत्र के सुरक्षा अउ मुर्गी पालक मन के आजीविका ल मजबूत करे म महत्वपूर्ण भूमिका निभाही। ए मउका म कंेद्रीय मंत्री ह संस्थान के वैज्ञानिक अउ सोधकर्ता मन ल ओखर योगदान बर बधाई दीन।
चक्रवात-अकवान
चक्रवात अकवान के असर ले राजधानी रईपुर समेत छत्तीसगढ़ के कई ठिन जिला म काली रतिहा ले रूक-रूक के बारिस होवत हे, जेखर ले आम जीवन प्रभावित होय हे। उहें, बेमौसम बारिस म कई जिला मन म फसल ल घलो नुकसान होय के खबर हे। मौसम विज्ञानी डॉक्टर गायत्री वाणी ह बतइन कि अवइया चौबीस घंटा के दउरान रायगढ़, जांजगीर-चांपा, सक्ति, सारगढ़-बिलाईगढ़, कोरबा अउ जशपुर समेत उत्तरी छत्तीसगढ़ के बहुत अकन जघा म बरसा होही। उहें, एक-दू जघा म भारी बरसा होय के आसंका हे।
इही बीच, चक्रवाती तूफान अकवान के प्रभाव ले बेमौसम बरसा ले देखत कृषि विभाग ह किसान मन ले खेत अउ खलिहान म रखे धान के फसल ल पॉलिथीन या तिरपाल ले तोप के सुरक्षित राखे के अपील करे हे। विभाग ह कहे हे कि प्रधानमंत्री फसल बीमा योजना के तहत बीमित फसल ल नुकसान होय म किसान बहत्तर घंटा के अंतर कृषि रक्षक पोर्टल के टोल फ्री नंबर म सिकायत दरज करावय।
मुख्यमंत्री-फसल नुकसान
मुख्यमंत्री विष्णुदेव साय ह अकवान चक्रवात के सेति फसल मन ल होय नुकसान ल लेके किसान मन ल भरोसा दिलाइन हे कि राज्य सरकार हर प्रभावित किसान मन के संग खड़ा हे। किसान मन ल कोनो तरह के चिंता करे के जरूरत नइ हे। चक्रवात ले होय फसल के नुकसान के सर्वेक्षण कराके जम्मों पात्र किसान मन ल नियमानुसार सहायता रासि उपलब्ध कराय जाही।
मुख्यमंत्री ह किहीन कि राज्य सरकार ह जम्मों जिला कलेक्टर मन ल चक्रवात ले प्रभावित क्षेत्र म फसल मन ल होय नुकसान के सर्वेक्षण कराय के निरदेस दीन हे। सर्वेक्षण के आधार म प्रभावित किसान मन ल राजस्व पुस्तक परिपत्र-आरबीसी छह-चार के प्रावधान के अंतर्गत पात्रता अनुसार आर्थिक सहायता दे जाही, जउन किसान मनके फसल बीमित हे, ओमन ल संबंधित फसल बीमा योजना के प्रावधान के अनुसार पात्र बीमा दावा रासि दिलाय के कारवाई करे जाही। मुख्यमंत्री ह किहीन कि प्रभावित किसान मन ल नियमानुसार सहायता उपलब्ध कराय बर जम्मों जरूरी कदम उठाय जाही।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए बखत ‘छत्तीसगढ़ म भू-जल संरक्षण म करे जात कार्य उपर भारतीय वन सेवा के अधिकारी अउ राज्य कैम्पा के मुख्य कार्यपालन अधिकारी शालिनी रैना ले लेगे भेंटवार्ता के प्रसारण करे जाही। एखर प्रसारण काली इक्कीस नवंबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
देवउठनी एकादशी
देवउठनी एकादसी के परब आज राजधानी रईपुर समेत प्रदेसभर म श्रध्दा अउ उछाह के संग मनाय जात हे। प्रदेस म एला अउ जेठौनी अउ छोटी दिवाली के रूप म घलो जाने जाथे। ए मउका म घर मन म तुलसी अउ भगवान सालीग्राम के प्रतिकात्मक बिहाव करे जाथे।
मुख्यमंत्री विष्णुदेव साय ह प्रदेसवासी मन ल जेठौनी एकादसी अउ तुलसी बिहाव के बधई अउ सुभकामना दीन हे।
अंतर्राष्ट्रीय प्रतियोगिता-सहायता राशि
ओलंपिक, विश्व कप, एशियाड अउ राष्ट्र मंडल खेल जइसे अंतर्राष्ट्रीय प्रतियोगिता म छत्तीसगढ़ के प्रतिनिधित्व करइया खिलाड़ी मन ल तीन लाख रूपिया तक के आर्थिक सहायता दे जाही। खेल अउ युवा कल्याण विभाग ह छत्तीसगढ़ क्रीड़ा प्रोत्साहन योजना के तहत ए वित्तीय बछर बर पात्र खिलाड़ी मन ले तीस नवंबर तक आवेदन मंगाय हे। योजना के अंतर्गत खिलाड़ी मन ल प्रतियोगिता म हिस्सा लेबर यात्रा खरच अउ उच्च गुणवत्ता वाला खेल उपकरण के खरीद म सहायता मिलही। ए रासि वास्तविक खरच या अधिकतम तीन लाख रूपिया दूनों म ले जउन कम होही, ओखर आधार म स्वीकृत करे जाही।
बाल विज्ञान कांग्रेस
लइका मन म वैज्ञानिक सोच, अनुसंधान अउ नवाचार ल प्रोत्साहित करे के उद्देस्य ले चौबीसवां राज्य स्तरीय बाल विज्ञान कांग्रेस के आज रईपुर स्थित पंडित रविशंकर शुक्ल विश्व विद्यालय म सुभारंभ होइस। ए बछर एखर बिसय हे-सततता के लिए विज्ञान एवं नवाचार।
छत्तीसगढ़ विज्ञान अउ प्रौद्योगिकीय परिषद डहार ले राखे गे ए कारीकरम म प्रदेस के आने-आने जिला ले आय बाल वैज्ञानिक अपन सोध परियोजना प्रस्तुत करत हे। ए बछर प्रदेस के जम्मो जिला ले बयालिस सौ ले जादा समूह के आठ हजार ले जादा बाल वैज्ञानिक मन पंजीयन कराय हे। जिला स्तरीय प्रतियोगिता म चयनित हरेक जिला के पांच बाल वैज्ञानिक राज्य स्तरीय आयोजन मन अपन परियोजना के प्रस्तुति दिही। एमा ले चयनित प्रतिभागी मन ल राष्ट्रीय बाल विज्ञान कांग्रेस म छत्तीसगढ़ के प्रतिनिधित्व करे के मउका मिलही।
स्पेशल एजुकेटर-भर्ती
प्रदेस म स्पेसल एजुकेटर के अड़तीस पद म सीधा भर्ती बर आवेदन प्रक्रिया सुरू हो गेहे। लोक शिक्षण संचालनालय ह एखर बर संचित विज्ञापन जारी करे हे। इच्छुक अउ पात्र अभ्यर्थी चार दिसंबर तक आवेदन जमा कर सकत हे। अभ्यर्थी निर्धारित प्रारूप म आवेदन पत्र व्यक्तिगत रूप ले या पंजीकृत डाक के माध्यम ले बस्तर, बिलासपुर, दुरूग, रईपुर अउ सरगुजा संभाग के संयुक्त संचालक, शिक्षा कार्यालय मन म जमा कर सकत हे। विभाग ह स्पष्ट करे हे कि जम्मो जिला अउ संभाग के पद बर अलग-अलग आवेदन करे के जरूरत नइ हे। एके आवेदन जम्मों विज्ञापित रिक्त पद बर मान्य होही। विस्तृत जानकारी बर लोक सिक्षण संचालनालय के वेबसाइट के अवलोकन करे जा सकत हे।
नर्सिंग पाठ्यक्रम-काउंसिलिंग
प्रदेस म नर्सिंग पाठ्यक्रम के रिक्त सीट म प्रवेस बर दूसरइया अउ तीसरइया चरण के संयुक्त काउंसिलिंग आयोजित करे जात हे। एखर बर ऑनलाइन आवेदन बाईस नवंबर के मंझनिया दू बजे तक करे जा सकही।
डंप बरामद
कोंडागांव जिला म आज सुरक्षा बल ह बड़का मात्रा म बिस्फोटक अउ दूसर जिनिस बरामद करे हे। आत्मसमर्पित माओवादी के निसानदेही म सुरक्षाबल ह पुंगारपाल थाना क्षेत्र के बेड़मा गांव के जंगल म दू अलग-अलग जघा ले ए जिनिस बरामद करे हे। नक्सल सेल, डीआरजी, बस्तर फाइटर्स अउ बम निरोधक दस्ता के संयुक्त टीम ह घटना स्थल ले एक ठिन हैंड ग्रेनेड, दू जिलेटिन रॉड, लगभग पच्चीस मीटर कार्डेक्स वायर, करीबन दू सौ मीटर इलेक्ट्रिक वायर, चौदह टिफिन, ग्यारा बैटरी सेट अउ दूसर सामग्री बरामद करिस।
