आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री-फिक्की

प्रधानमंत्री नरेन्द्र मोदी ह उद्योग जगत ले अवइया बीस बछर म निवेस संबंधी जम्मों दूरगामी फइसला के आधार ‘‘भारत प्रथम‘‘ ल बनाय के आह्वान करे हे। श्री मोदी ह आज नई दिल्ली म भारतीय वाणिज्य उद्योग परिसंघ फिक्की के सताब्दी समारोह ल संबोधित करत रिहीन। प्रधानमंत्री ह किहीन कि पाछु बारह बछर म युवा, किसान, श्रमिक अउ उद्योग जगत के उद्यमी मन देस के स्थिति ल बदले बर कड़ा मेहनत करे हे। श्री मोदी ह किहीन कि भारत के मजबूत प्रदर्सन के सेती मूडीज रेटिंग्स, एसएंडपी ग्लोबल रेटिंग्स, फिच रेटिंग्स, विश्व बैंक अउ एशियाई विकास बैंक जइसे संस्था देस के विकास दर के अनुमान बढ़ावत हे।

अंतर्राष्ट्रीय व्यापार मेला

नई दिल्ली के भारत मंडपम म आयोजित करे जात पैंतालीसवां भारत अंतर्राष्ट्रीय व्यापार मेला म काली बीस नवंबर के छत्तीसगढ़ी कलाकार मन डहार ले लोक संस्कृति, जनजातीय परंपरा अउ पारंपरिक कला के प्रदर्सन करे जाही। छत्तीसगढ़ राज्य दिवस समारोह म प्रदेस के लोक कलाकार सात ठिन पारंपरिक नृत्य सैली के माध्यम ले राज्य के सांस्कृतिक विविधता अउ विरासत ल राष्ट्रीय मंच म प्रस्तुत करही। ए समारोह म राज्यपाल रमेन डेका मुख्य अतिथि के रूप म सामिल होही। उहें, कार्यक्रम के अध्यक्षता मुख्यमंत्री विष्णुदेव साय करही।

ए सांस्कृतिक संध्या के बिसेस आकर्षण छत्तीसगढ़ के पांरपरिक लोक नृत्य होही। एमा गौर नृत्य, गौरा-गौरी, भोजली, राउत नाचा, सुआ, पंथी अउ करमा नृत्य के प्रस्तुति सामिल हे।

मुख्यमंत्री-लेखापरीक्षा पखवाड़ा

मुख्यमंत्री विष्णुदेव साय ह आज रायपुर के महालेखाकार आवासीय परिसर म ‘‘लेखापरीक्षा पखवाड़ा‘‘ के औपचारिक सुभारंभ करीन। ए मउका म मुख्यमंत्री ह किहीन कि लेखा अउ लेखापरीक्षा संस्था सासन के वित्तीय व्यवस्था ल मजबूत बनाय राखे म महत्वपूर्ण भूमिका निभाथे। ओमन किहीन कि लेखा परीक्षा के टिप्पणी मन ल सासन बर बाधा नहीं, बल्कि सुधार के अवसर समझा जाना चाही।

बतादन कि प्रधान महालेखाकार कार्यालय रायपुर डहार ले सत्रह नवंबर ले एक दिसंबर तक ‘‘लेखापरीक्षा पखवाड़ा‘‘ के आयोजन करे जात हे।

एल मधुनाग-आकाशवाणी महानिदेशक

भारतीय सूचना सेवा के वरिष्ठ अधिकारी एल. मधुनाग ह आकाशवाणी के महानिदेशक के पदभार संभाल लेहे। एखर पहिली श्री मधुनाग नई दिल्ली के भारतीय जनसंचार संस्थान-आई.आई.एम.सी. म कुलसचिव के पद म कार्यरत रिहीन। बछर उन्नीस सौ चौरानवे बैच के भारतीय सूचना सेवा को अधिकारी श्री मधुनाग ल केन्द्रीय संचार ब्यूरो अउ दूरदर्शन समेत सूचना अउ प्रसारण मंत्रालय के आने-आने मीडिया इकाई म काम करे के व्यापक अनुभव हरय।

धान खरीदी

प्रदेस म ए दिन म किसान मन ले समर्थन मूल्य म धान खरीदी करे जात हे। अब तक करीबन अड़तीस हजार किसान मन ले एक लाख चवालीस हजार मीटरिक टन ले जादा धान के खरीदी करे जा चुके हे। राज्य सरकार डहार ले किसान मनके सुविधा बर सुरू करे गे तुहंर टोकन ऐप के जरिया प्रदेस म चार लाख अड़सठ हजार ले जादा टोकन जारी करे जा चुके हे। एखर माध्यम ले किसान मन ह लगभग चौबीस लाख चालीस हजार मीटरिक टन धान बेचे बर टोकन प्राप्त करे हे। ए बछर प्रदेस के साढ़े सत्ताईस लाख ले जादा किसान मन ले इकतीस सौ रूपिया प्रति कुंटल के दर ले अधिकतम इक्कीस कुंटल प्रति एकड़ धान खरीदे जात हे।

इही बीच, सहकारिता मंत्री केदार कश्यप ह धान खरीदी व्यवस्था के समीक्षा करत अधिकारी मन ले किहीन कि धान बेचइया किसान मन ल कोनों भी तरह के परेसान झन होवय। ओमन उपार्जन केन्द्र म जम्मों जरूरी बुनियादी सुविधा सुनिश्चित करे अउ किसान मन ल उंखर उपज के भुगतान बेरा म करे के निरदेस दीन। श्री कश्यप ह धान के उठाव अउ भंडारण म कमी ल रोके बर नियमित निगरानी अउ सुरक्षा के बने उपाय करे बर किहीन। सहकारिता मंत्री ह अधिकारी मन ल एग्रीस्टेक पोर्टल म पंजीकृत किसान मन ले ही धान खरीदे अउ अल्पकालीन कृषि ऋण के समय म कम्प्यूटर प्रविष्टि करे के घलो निरदेस दीन।

विशेष कार्यक्रम

आकाशवाणी केन्द्र रायपुर डहार ले बस्तर संभाग म आत्मसमर्पित माओवादी मनके पुनर्वास बर होवत काम म केन्द्रित बिसेस कार्यक्रम के प्रसारण आज संझा सात बजे करे जाही। ए कार्यक्रम ल छत्तीसगढ़ के आकाशवाणी के सबो केन्द्र रिले करही।

स्वनिधि सम्मान अवार्ड समारोह

नई दिल्ली के डॉक्टर अंबेडकर इंटरनेशनल सेंटर म काली बीस नवंबर के ‘‘स्वनिधि सम्मान पुरस्कार‘‘ समारोह के आयोजन करे जाही। समारोह म प्रधानमंत्री स्वनिधि योजना म उत्कृष्ट काम करे बर छत्तीसगढ़ राज्य के संगेसंग प्रदेस के तीन नगरीय निकाय – बिलासपुर, बड़े बचेली अउ दंतेवाड़ा ल पुरस्कृत करे जाही। केन्द्रीय आवासन अउ सहरी कार्यमंत्री मनोहर लाल खट्टर ए पुरस्कार दीहीं। उपमुख्यमंत्री अउ नगरीय प्रशासन मंत्री अरूण साव के अगुवई म राज्य सासन के वरिष्ठ अधिकारी, संबंधित निकाय के निर्वाचित जनप्रतिनिधि अउ अधिकारी मनके टीम ए पुरस्कार ग्रहण करही।

स्काउट गाईड-सम्मान समारोह

रायपुर म आज भारत स्काउट्स अउ गाइड्स के एक दिन के सेमिनार अउ सम्मान समारोह आयोजित करे गीस। ए मउका म स्काउटिंग के क्षेत्र म उत्कृष्ट योगदान देवइया बयालीस पदाधिकारी अउ सदस्य मन ल सम्मानित करे गीस। समारोह ल भारत स्काउट्स अउ गाइड्स के मुख्य राष्ट्रीय आयुक्त डॉक्टर के.क.े खंडेलवाल ह संबोधित करीन।

अरूण साव-लोकार्पण/भूमिपूजन

उपमुख्यमंत्री अरूण साव ह बेमेतरा जिला के मारो नगर पंचायत म दू करोड़ इकतीस लाख रूपिया ले जादा के आने-आने विकास कार्य के लोकार्पण अउ भूमिपूजन करीन। ओमन मारो म शॉपिंग कॉम्पलेक्स अउ हाट-बाजार बर एक-एक करोड़ रूपिया देके घोसना करीन। उहें, जल आपूर्ति सुविधा के विस्तार बर तीस करोड़ रूपिया देके घलो ऐलान करीन। श्री साव ह किहीन कि राज्य सरकार ह नगरीय क्षेत्र म मूलभूत सुविधा के विस्तार अउ नागरिक मन ल बेहतर सुविधा देवाय बर प्रतिबद्ध हरय।

यूजीसी नेट-परीक्षा

राष्ट्रीय परीक्षा एजेंसी-एनटीए ह आज विश्वविद्यालय अनुदान आयोग-राष्ट्रीय पात्रता परीक्षा यानी यूजीसी नेट के परीक्षा के कार्यक्रम जारी कर देहे। एजेंसी के अनुसार, परीक्षा ए बछर चौदह ले अट्ठारह दिसंबर अउ इक्कीस दिसंबर के आयोजित करे जाही। परीक्षा दू पाली म होही। पहिली पाली बिहनिया नौ बजे ले मंझनिया बारह बजे तक अउ दूसरा पाली मंझनिया तीन बजे ले संझा छह बजे तक राखे जाही।

माशिमं-प्रायोगिक/प्रायोजना कार्य

छत्तीसगढ़ माध्यमिक सिक्षा मंडल ह बछर दू हजार सत्ताईस के हाईस्कूल अउ हायर सेकेंडरी परीक्षा म सामिल होवइया नियमित विद्यार्थी मनके प्रायोगिक परीक्षा अउ प्रायोजना कार्य के आयोजन के तिथि निर्धारित कर देहे। प्रायोगिक परीक्षा अउ प्रायोजना कार्य एक ले बीस जनवरी के बीच प्रदेस के जम्मों मान्यता प्राप्त सिक्षण संस्था मन म राखे जाही। मंडल ह ए संबंध म सबो मान्यता प्राप्त सिक्षण संस्था के प्राचार्य मन ल जरूरी दिसा-निरदेस जारी करे हे।

शिक्षा मंत्री-समीक्षा

स्कूल शिक्षा मंत्री गजेन्द्र यादव ह काली नवा रायपुर म सिक्षा विभाग के संभागीय अधिकारी मनके बइठका लेके प्रदेस म सैक्षणिक गुणवत्ता, पाठ्यक्रम के प्रगति, बोर्ड परीक्षा के तियारी अउ विद्यालय के व्यवस्था मनके समीक्षा करीन। ओमन अधिकारी मन ल जम्मों स्कूल म निर्धारित समय-सीमा के भीतर पाठ्यक्रम पूरा कराय अउ सैक्षणिक गतिविधि के निगरानी सुनिश्चित करे बर किहीन। श्री यादव ह सिक्षक विहीन अउ एकल सिक्षक वाले विद्यालय अउ दिव्यांग सिक्षक मनके पदस्थापना वाला विद्यालय के स्थिति के समीक्षा करत जरूरत के अनुसार सिक्षक मनके व्यवस्था सुनिश्चित करे के निरदेस दीन। ओमन किहीन कि हरेक सनिवार के स्कूल मन म कम से कम एक घंटा योग अउ खेल गतिविधि म लइका मनके सहभागिता सुनिश्चित करे जाय। सिक्षा मंत्री ह जम्मों विद्यालय मन म ‘‘हमारा स्वच्छ स्कूल‘‘ अभियान के तहत स्वच्छता गतिविधि संचालित करे के निरदेस दीन।

हज यात्रा

ए बछर हज यात्रा म जाने वाला चयनित यात्री मन बर हज कमेटी ऑफ इंडिया डहार ले दूसरइया किश्त जमा करे के आखिरी तिथि के निर्धारण करे गेहे। छत्तीसगढ़ राज्य हज कमेटी के चेयनमैन मिर्जा एजाज़ बेग ह बतईन कि हज यात्री दूसरा किश्त के रासि तीस नवंबर तक जमा कर सकत हे। जादा जानकारी बर छत्तीसगढ़ राज्य हज कमेटी के रायपुर के बैरनबाजार स्थित कार्यालय ले संपर्क करे जा सकत हे।

अंतर्राष्ट्रीय फिल्म महोत्सव

संतावनवां भारतीय अंतर्राष्ट्रीय फिल्म महोत्सव-आई.एफ.एफ.आई. काली बीस नवंबर ले गोवा म सुरू होही। नौ दिन के ए महोत्सव म दुनियाभर के फिल्म निर्माता, कलाकार अउ सिनेमा प्रेमी हिस्सा लीहीं। ‘‘सीमाओं से परे कहानियां‘‘ बिसय म आयोजित ए महोत्सव म भारतीय सिनेमा के विविधता दर्शाय जाही। संघरा दुनियाभर के कहानी अउ विचार ल बड़का पर्दा म प्रस्तुत करे जाही।