मंत्रिपरिषद-निर्णय
मुख्यमंत्री विष्णुदेव साय के अध्यक्षता म आज रायपुर म होय राज्य मंत्रिपरिषद के बइठका म कतकोन जरूरी निर्णय ले गीस। बइठका के बाद पत्रकार मन ले चर्चा करत हुए उपमुख्यमंत्री अरूण साव ह बतईन कि मंत्रिपरिषद ह प्रदेस के गांव म हर परिवार ल साफ पानी देवाय बर ‘‘छत्तीसगढ़ पंचायत ग्रामीण नल-जल संचालन, संधारण अउ प्रबंधन नियम के प्रारूप के अनुमोदन करे हे।
श्री साव ह बतईन कि एक हजार ले कम आबादी वाला ग्राम पंचायत म नल-जल योजना के संचालन अउ संधारण बर ‘‘मुख्यमंत्री नल जल अनुदान‘‘ के जरिया ले वित्तीय सहायता देके प्रावधान करे गेहे। एखर बर ग्राम पंचायत ल हर महीना पचास प्रतिशत जल प्रभार के संग्रहण करना होही।
एखर अलावा मंत्रिपरिषद ह नारायणपुर म बिसेस रूप ले कमजोर जनजातीय समूह के अबूझमाड़िया लइका मन ल उच्च सिक्षा के अच्छा अवसर उपलब्ध कराय बर रामकृष्ण मिशन स्वामी विवेकानंद महाविद्यालय ल तीन बछर बर आवर्ती अउ अनावर्ती अनुदान स्वीकृत करे के निर्णय लेहे।
मंत्रिपरिषद ह राजनांदगांव जिला के कौरिनभांठा गांव म बाल समप्रेक्षण गृह भवन बनाय बर महिला अउ बाल विकास विभाग ल भूमि आवंटित करे के प्रस्ताव ल मंजूरी देहे। उहें, राजनांदगांव सहर के बल्देव भाग स्थित स्टेट हाईस्कूल परिसर के भूमि माध्यमिक सिक्षा मंडल ल आवंटित करे के प्रस्ताव ल घलो मंजूरी दे देहे।
माशिमं-समय सारिणी
छत्तीसगढ़ माध्यमिक सिक्षा मंडल ह दसवीं अउ बारहवीं बोर्ड परीक्षा के समय-सारिणी जारी कर देहे। दसवीं के परीक्षा बारह मार्च ले सुरू होही, जेन आठ अप्रैल तक चलही। उहें, बारहवीं के परीक्षा तेरह मार्च ले सुरू होके पांच अप्रैल तक खतम होही। एखर अलावा सारीरिक प्रसिक्षण पत्रोपाधि परीक्षा बारह मार्च ले बीस मार्च तक होही। सबो परीक्षा बिहनिया नौ बजे ले लेके मंझनिया सवा बारह बजे तक आयोजित करे जाही। पूरा समय-सारिणी अउ आने जानकारी मंडल के वेबसाइट म उपलब्ध हे।
राष्ट्रीय बाल विज्ञान कांग्रेस
रायपुर के पंडित रविशंकर शुक्ल विश्वविद्यालय म बीस अउ इक्कीस नवंबर ल राज्य स्तरीय राष्ट्रीय बाल विज्ञान कांग्रेस के आयोजन करे जाही। छत्तीसगढ़ विज्ञान अउ प्रौद्योगिकी परिषद डहार ले होवइया ए कार्यक्रम म प्रदेस के आने-आने जिला ले चयनित बाल वैज्ञानिक अपन वैज्ञानिक परियोजना अउ नवाचारी विचार के प्रदर्सन करही। ए बछर राष्ट्रीय बाल विज्ञान कांग्रेस के बिसय ‘‘सततता के लिए विज्ञान और नवाचार‘‘ राखे गेहे। ए बिसय म बाल वैज्ञानिक अपन तीर के परेसानी, पर्यावरण संरक्षण, संसाधन के विवेकपूर्ण के उपयोग अउ सतत विकास ले जुड़े चुनौती ल वैज्ञानिक दृष्टिकोण ले समझे अउ उंखर समाधान खोजे के दिसा म अपन परियोजना तैयार करत हे।
उहें, पंडित रविशंकर शुक्ल विश्वविद्यालय म सत्रह नवंबर ले अंतर महाविद्यालय युवा उत्सव के आयोजन करे जावत हे। उन्नीस नवंबर तक चलइया ए उत्सव म नाच, गायन, संगीत, नाटक, चित्रकला, वाद विवाद जइसन प्रतियोगिता होवत हे।
वीबी-जीरामजी-दिशा/निर्देश
केन्द्रीय ग्रामीण विकास मंत्रालय ह विकसित भारत-रोजगार गारंटी अउ आजीविका मिशन ग्रामीण यानि जीरामजी अधिनियम के प्रभावी कामकाज म पारदर्सिता, जवाबदेही अउ नागरिक मनके भागीदारी सुनिश्चित करे बर लोकपाल अउ अपीलीय प्राधिकरण ले जुड़े दिसा-निरदेस जारी करे हे। एमा जिला स्तर म लोकपाल नियुक्त करे के प्रस्ताव करे गेहे। लोकपाल रोजगार कार्ड, मजदूरी भुगतान, देरी ले भुगतान म मुआवजा, काम के जघा म सुविधा, उपस्थिति सूची अउ वैधानिक अधिकार ले हटाय जाय ले जुड़े सिकायत के समाधान करही।
आयकर विभाग-छापा
आयकर विभाग के सोलह आने-आने टीम ह आज एके संघरा रायपुर, दुर्ग, बिलासपुर, रायगढ़ अउ जांजगीर-चांपा के संग प्रदेस के कतकोन जिला म छापामार कार्रवाई करीन। जानबा के मुताबिक ए कार्रवाई कर चोरी के सूचना के आधार म करे गीस। सबो जघा म अधिकारी मन दस्तावेज के जांच करत हे। रायगढ़ के इस्पात कंपनी के मालिक के घर अउ दफ्तर म छापा मारे गीस। उहें, राजधानी रायपुर के चंदखुरी स्थित बहनाकाड़ी गांव के एक फैक्ट्री म घलो आयकर विभाग के टीम ह दबिस दीन। एखरे संग तेलीबांधा, रिंग रोड, शंकर नगर अउ खम्हारडीह इलाका म घलो छापा के कार्रवाई करे गेहे।
भिलाई पावर प्लांट-उपलब्धि
एनटीपीसी अउ स्टील अथॉरिटी ऑफ इंडिया लिमिटेड-सेल के संयुक्त उपक्रम एन.एस.पी.सी.एल. भिलाई पावर प्लांट के यूनिट-टू ह सात सौ तीन दिन तक बिना कोनों रूकावट के संचालन करत हुए उल्लेखनीय रिकॉर्ड बनाय हे। दू सौ मेगावाट अउ एखर ले जादा क्षमता वाले देस के थर्मल पावर स्टेसन म लगातार संचालन के अच्छा रिकॉर्ड म ले एक हवय।
एन.एस.पी.सी.एल. भिलाई के एग्जीक्यूटिव डायरेक्टर अउ हेड ऑफ प्रोजेक्ट नील कुमार शर्मा ह ए उपलब्धि म खुसी जतात हुए कहिन कि ए उपलब्धि एन.एस.पी.सी.एल. परिवार के सामूहिक प्रयास, समर्पण अउ टीमवर्क के परिणाम हे।
लेखापरीक्षा पखवाड़ा
प्रधान महालेखाकार रायपुर डहार ले सत्रह नवंबर ले एक दिसंबर तक ‘‘लेखापरीक्षा पखवाड़ा‘‘ के आयोजन करे जात हे। पखवाड़ा के दूसर दिन आज रायपुर के पंडित विद्याचरण शुक्ल चउक म क्षमता निर्माण प्रसिक्षण कार्यक्रम के तहत जल संसाधन विभाग अउ लोक निर्माण विभाग के काम म मापन के विधि उपर प्रसिक्षण आयोजित करे गीस। ए दउरान अधिकारी अउ कर्मचारी के तकनीकी समझ अउ काम करे के क्षमता ल मजबूत करे के संग विभागीय काम के प्रभावी लेखांकन, वित्तीय प्रबंधन अउ पारदर्सिता ल बढ़ावा दे उपर बल दे गीस। लेखा परीक्षा पखवाड़ा के तहत आज रंगोली प्रतियोगिता घलो आयोजित करे गीस।
राज्यपाल-युवा शिविर
राज्यपाल रमेन डेका ह कहिन कि भारत युवा मनके देस हे, जिहां देस के लगभग पैंतीस प्रतिशत आबादी युवा हे। इही युवा शक्ति देस ल बछर दू हजार सैंतालीस तक विकसित अउ आत्मनिर्भर भारत बनाय म सबले बड़का भूमिका निभाही। राज्यपाल ह आज रायपुर के लोकभवन के छत्तीसगढ मंडपम म ‘‘मेरा युवा भारत‘‘ डहार ले आयोजित ‘वंदे मातरम् राज्य युवा सिविर‘ म आने-आने राज्य मन ले आय युवा स्वयंसेवक मन ल संबोधित करत हुए ए बात कहिन। ओमन ह युवा मन ले आह्वान करीन कि ओमन जीवन म जेन भी काम करयं, ओला पूरा लगन, ईमानदारी अउ जिम्मेदारी के संग करय, जेखर ले समाज अउ राष्ट्र के भला होवय।
तेईस नवंबर तक चलइया ए सिविर म महाराष्ट्र, त्रिपुरा, उत्तरप्रदेश, ओड़िशा, तेलंगाना अउ जम्मू-कश्मीर के युवा प्रतिभागी हिस्सा लेवत हे। कार्यक्रम म राज्यपाल ह आने-आने राज्य मन ले आय प्रतिभाशाली युवा स्वयंसेवक मन ल सम्मानित करीन।
कैंसर दवा-संशोधित कीमत
खाद्य अउ औषधि प्रशासन ह छत्तीसगढ़ के दवा निर्माता, वितरक, स्टॉकिस्टो, खुदरा दवा विक्रेता, अस्पताल, मेडिकल कॉलेज अउ कैंसर उपचार संस्थान ल एक सौ सैंतीस गैर-अनुसूचित कैंसर रोधी दवई के संशोधित अधिकतम खुदरा कीमत के पालन सुनिश्चित करे के निरदेस देहे। संशोधित दर नौ नवंबर ले प्रभावी होगे हे।
राष्ट्रीय औषधि मूल्य निर्धारण प्राधिकरण के आदेस के तहत दवई म व्यापार मार्जिन युक्तिकरण लागू करे गेहे, जेखर ले मरीज मन ल कम कीमत म दवाई मिल सकय। सबो दवा विक्रेता अउ अस्पताल ल संसोधित मूल्य सूची प्रदर्सित करे अउ मरीज मन ले निर्धारित एमआरपी ले जादा पइसा न लेके निरदेस दे गेहे। निरदेस के उल्लंघन करे अउ जादा कीमत वसूले म संबंधित संस्थान के विरूद्ध कानूनी कार्रवाई करे जाही।
माओवादी डंप-बरामद
बीजापुर जिला म उसूर थाना क्षेत्र के पुजारीकांकेर के जंगल ले माओवादी डंप बरामद करे गेहे। सुरक्षा बल मन ह सर्चिंग के दउरान माओवादी मन डहार ले छिपा के राखे गे पचास नग बीजीएल सेल जब्त करे हे। उसूर, आवापल्ली, पामेड़ अउ सीआरपीएफ के संयुक्त टीम डहार ले क्षेत्र म सर्च ऑपरेसन चलाके ए कार्रवाई करे गीस।
जिला के अतिरिक्त पुलिस अधीक्षक रविन्द्र कुमार मीणा ह मनखे मन ले अपील करे हे कि क्षेत्र म कोनों भी संदिग्ध सामान अउ विस्फोटक सामग्री दिखाय देय म पुलिस ल एखर सूचना दे जाय।
