नीति आयोग-राष्ट्रीय कार्यशाला
नीति आयोग ह आज नई दिल्ली के भारत मंडपम म ‘‘मिशन के रूप में नेतृत्व‘‘ बिसय म पहिली कार्यशाला के सुभारंभ करीन। प्रधानमंत्री नरेन्द्र मोदी के शासन प्रमुख के रूप म पच्चीस बछर के अनुभव ले सीख लेके उद्देश्य ले आयोजित होवत पांच राष्ट्रीय कार्यशाला के श्रृंखला के पहिली कार्यशाला हवय। अवइया दिन म ए श्रृंखला के चार आने कार्यशाला आयोजित करे जाही। एखर बिसय हरय – परिणाम देने वाला सुशासन, समावेशी विकास, सभ्यतागत पहिचान अउ वैश्विक मंच पर भारत की भूमिका। ए श्रृंखला अवइया बछर अक्टूबर तक चलही।
पहिली कार्यशाला म आज बछर दू हजार एक के भूकंप के बाद कच्छ के पुनर्निर्माण, कोविड महामारी के दउरान भारत के प्रतिक्रिया, लखपति दीदी पहल अउ अंतरिक्ष क्षेत्र ल निजी भागीदारी बर खोलना सामिल हे।
राष्ट्रपति-मलेरिया नियंत्रण
राष्ट्रपति द्रौपदी मुर्मु ह किहीन हे कि भारत ह अभी कुछेक बरस म मलेरिया नियंत्रण म प्रगति करे हे। राष्ट्रपति ह आज नई दिल्ली म भारतीय चिकित्सा अनुसंधान परिषद-राष्ट्रीय मलेरिया अनुसंधान संस्थान के स्वर्ण जयंती समारोह म बोलत ए बात किहीन। ओमन किहीन कि बने स्वास्थ्य सेवा, दवई, मच्छर नियंत्रण अभियान अउ सामुदायिक भागीदारी ह मलेरिया के मामला ल नियंत्रित करे म प्रभावी भूमिका निभाय हे।
पीएम स्वनिधि योजना
केन्द्रीय आवासन अउ शहरी कार्य मंत्रालय ह प्रधानमंत्री स्वनिधि योजना म बने काम बर छत्तीसगढ़ प्रदेस ल अउ राज्य के तीन नगरीय निकाय – बिलासपुर, बड़े बचेली अउ दंतेवाड़ा ल चुने गेहे। नई दिल्ली के डॉक्टर अंबेडकर इंटरनेशनल सेंटर म बीस नवंबर के राखे गे स्वनिधि सम्मान अवॉडर्स समारोह म ए नगरीय निकाय मन ल सम्मानित करे जाही। छत्तीसगढ़ ल चार राष्ट्रीय पुरस्कार मिले म उपमुख्यमंत्री अउ नगरीय प्रशासन मंत्री अरूण साव ह किहीन कि ए सम्मान नगरीय निकाय के बने काम अउ प्रयास के नतीजा हे।
पीएम स्वनिधि महोत्सव
उपमुख्यमंत्री अउ नगरीय प्रशासन मंत्री अरूण साव आज बिलासपुर के लाल बहादुर शास्त्री स्कूल मैदान म राखे गे संभाग स्तरीय पीएम स्वनिधि महोत्सव म संघरीन। कार्यक्रम म ओमन स्मार्ट ठेला पंजीयन के सुभारंभ करत किहीन कि पथ विक्रेता मन ल पहिचान पत्र मिले ले। ओमन ल व्यवसाय करे म सुभीता होही। उपमुख्यमंत्री ह किहीन कि पीएम स्वनिधि छोटे कारोबारी मनके सपना ल उड़ान देवत हे। कभू ब्याज चुकाय म खरज होवइया कमाई अब कारोबार बढ़ाय, लइका मनके पढ़ई अउ परिवार के खुशहाली म काम आवत हे। ओमन किहीन कि बिना गारंटी के करजा मिले ले लाखांें पथ विक्रेता मन ल अपन कारोबार आगू बढ़ाय के मउका मिले हे। श्री साव ह व्यवसायी मन ल डिजिटल लेन-देन अपनाय अउ पात्र हितग्राही मन ल मिलइया तीस हजार रूपिया तक के यूपीआई लिंक्ड क्रेडिट कार्ड सुविधा के फायदा ले बर प्रेरित करीन।
अंतर्राष्ट्रीय व्यापार मेला
नई दिल्ली के भारत मंडपम म आयोजित अंतर्राष्ट्रीय व्यापार मेला म छत्तीसगढ़ के प्रकृति के सुघरई, संस्कृति अउ जनजातीय परंपरा देस-विदेस के पर्यटक मन ल मोहत हे। छत्तीसगढ़ टूरिज्म बोर्ड कोति ले मेला म लगाय गे स्टॉल ले प्रदेस के मुख्य पर्यटन स्थल, जलप्रपात, वन्यजीव अभ्यारण्य, ऐतिहासिक धरोहर अउ ग्रामीण पर्यटन के संभावना के जानकारी दे जावत हे। पर्यटक मन ल प्रोत्साहित करे बर पर्यटन मंडल के रिसॉर्ट म बुकिंग कराय म चौदह ले सत्ताईस नवंबर तक तीस प्रतिशत के बिसेस छूट दे गेहे। मेला म बीस नवंबर के छत्तीसगढ़ राज्य दिवस के आयोजन घलो करे जाही।
रायपुर स्टेशन-सॉलिड वेस्ट मैनेजमेंट
रईपुर रेलवे स्टेसन प्रदेस के पहिली स्टेसन हरय, जिहां ठोस अपशिष्ट प्रबंधन के सही व्यवस्था करे गेहे। स्टेसन अउ इहां अवइया-जवइया ट्रेन ले रोजे के करीबन दू टन कचरा निकलथे। अब एला एक संघरा डंप करे के जघा म आने-आने श्रेणी म बांट के निपटारा करे जाही। एखर बर रेलवे अउ निगम के टीम बने हे, जेमा पर्यावरण विभाग के अधिकारी सामिल हे। स्टेसन परिसर म अलग ले कलेक्शन चेम्बर बनाय जाही। इहां ले निकलइया कचरा ल निगम ह सकरी के प्लांट लेके जाही। खाय पीय के बांचे जिनीस अउ साग-भाजी के छिलका ले खातू बनही, उहें प्लास्टिक, कागज अउ गत्ता के रिसाइकिलिंग करे जाही।
महंगाई भत्ता
छत्तीसगढ़ सरकार ह प्रदेस म काम करइया अखिल भारतीय सेवा के अधिकारी मनके महंगाई भत्ता तीन प्रतिशत बढ़ा देहे। अब अधिकारी मन ल साठ प्रतिशत के जघा म तिरसठ प्रतिशत के दर ले महंगाई भत्ता मिलही। बाढ़े महंगाई भत्ता के भुगतान एक जुलाई दू हजार छब्बीस ले करे जाही। ए संबंध म सामान्य प्रशासन विभाग ह आदेस जारी कर देहे।
जनजातीय गौरव दिवस-नाचा
भगवान बिरसा मुंडा के जयंती के मउका म आयोजित जनजातीय गौरव दिवस म नॉर्थ अमेरिका छत्तीसगढ़ एसोसिएशन-नाचा ह महत्ता के भूमिका निभईस। अमेरिका के शिकागो अउ ह्ूस्टन, कनाडा के टोरंटो अउ ब्रिटेन के लंदन म भारतीय राजनायिक मिशन के मदद ले कतकोन कार्यक्रम करे गीस। शिकागो म गणेश कर ह आने-आने राज्य को संगठन मन ल एक मंच म लाय के प्रयास करीन। उहें, टोरंटो म पंकज अग्रवाल अउ लंदन म नाचा यूके ह छत्तीसगढ़ के लोककला, जनजातीय नृत्य अउ पंरपरा ल प्रस्तुत करीन।
शिकागो म नाचा के वैश्विक अध्यक्ष दीपाली सरावगी ल छत्तीसगढ़ अप्रवासी सम्मान बर सम्मानित करे गीस। ओमन किहीन कि अइसन आयोजन के उद्देश्य भगवान बिरसा मुंडा अउ शहीद वीरनारायण सिंह जइसन जनजातीय नायक मनके योगदान ल वैश्विक पहिचान देवाय अउ नवा पीढ़ी ल अपन संस्कृति ले जोड़ना हे। खबर के मुताबिक एसो एक ले पन्द्रह नवंबर तक जनजातीय गौरव पखवाड़ा म कतकोन कार्यक्रम करे गीस।
मुख्यमंत्री-सीबीजी संयंत्र
बिलासपुर जिला के सेंदरी गांव म गोवर्धन योजना म करीबन पचहत्तर करोड़ रूपिया के लागत ले कंप्रेस्ड बायोगैस संयंत्र लगाय जात हे। मुख्यमंत्री विष्णुदेव साय ह काली भारत पेट्रोलियम, कॉर्पोरेशन लिमिटेड कोति ले लगाय जात ए संयंत्र ल देखीन। ओमन परियोजना के बढ़वार, कचरा प्रसंस्करण के प्रस्तावित व्यवस्था, गैस अउ जैविक खातू बनाय के जानकारी लीन। करीबन दस एकड़ क्षेत्र म बनाय जात ए संयंत्र म हरेक दिन एक सौ तीस टन नगरीय ठोस अपशिष्ट के प्रसंस्करण करे जाही। एखर ले करीबन पांच टन कंप्रेस्ड बायोगैस अउ सोलह टन ठोस जैविक खातू बनही। ए संयंत्र के लगे ले रोजगार के मउका बाढ़ही अउ किसान मन ल जैविक खातू मिल सकही।
लोक शिक्षक संचालनालय-आदेश
लोक शिक्षण संचालनालय ह उन्नीस ठिन जिला के जिला सिक्षा अधिकारी मनके नवंबर महीना के वेतन अवइया आदेस तक रोक देहे। घेरी-बेरी चेतावनी अउ पर्याप्त समय देके बादो संबंधित अधिकारी मन ह मांगे गे जानकारी ल नइ दीन। संचालनालय ह एला छत्तीसगढ़ सिविल सेवा आचरण नियम के उल्लंघन माने हे।
संचालनालय ह आठ अक्टूबर के सबो जिला सिक्षा अधिकारी मन ल गूगल सीट भेजके सिक्षक अउ कर्मचारी मनके जानकारी मांगे रिहीस, जउन विद्या समीक्षा केन्द्र-वी.एस.क.े ऐप म उपस्थिति दरज नइ करत हे। सोलह अक्टूबर के एक घांव फेर ओ स्कूल मनके सूची मांगे गीस। एखर बादे तीन अउ चार नवंबर के स्मरण पत्र भेजे के बादो कई ठिन जिला ले पूरा अउ सही जानकारी नइ पहुंचीस, तभे कार्रवाई करे गीस।
ईओडब्ल्यू-प्रश्न पत्र लीक मामला
प्रदेस म पटवारी ले राजस्व निरीक्षक बने बर राखे गे विभागीय परीक्षा के प्रश्न पत्र लीक करे के मामला म आर्थिक अपराध अन्वेषण ब्यूरो-ईओडब्ल्यू ह दू झिन आरोपी ल गिरफ्तार करे हे। दूनों आरोपी ल दिल्ली ले गिरफ्तार करके रईपुर लाय गीस। बिसेस न्यायालय ह ओमन ल तेईस नवंबर तक आठ दिन के पुलिस रिमांड म सौंप देहे। ईओडब्ल्यू के मुताबिक, दूनो प्रश्न पत्र छपाई समिति ले जुड़े आरोपी वीरेन्द्र जाटव के संग मिलके पेपर लीक करे के साजिस रचे रिहीन। आरोप हवय कि परीक्षा के पहिली उम्मीदवार मन ल प्रश्न पत्र दे गे रिहीस अउ ओखर बदला म पइसा वसूले गे रिहीस हे।
दुर्ग-ठगी
दुरूग म शेयर बाजार अउ सोना म निवेस करके हर महीना फायदा देवाय के झांसा देके इकतीस लाख रूपिया के धोखाधड़ी के मामला आगू आय हे। पीड़ित के सिकईत म मोहन नगर पुलिस ह आरोपी के खिलाफ धोखाधड़ी के अपराध दरज करके जांच सुरू कर देहे। आरोपी ह खुद ल चार्टर्ड अकाउंटेंट अउ सेयर बाजार के अनुभवी ट्रेडर बताके प्रार्थी ले आने-आने बैंक खाता म रकम जमा करवईस।
