आज दिनभर के खबर ल अपन गुरतुर छत्तीसगढ़ी भाखा म पढ़व

मुख्यमंत्री-बिरसा मुंडा-प्रतिमा

मुख्यमंत्री विष्णुदेव साय ह आज बिलासपुर स्थित गुरूघासी दास केंद्रीय विश्व विद्यालय परिसर म जनजातीय गौरव दिवस के मउका म बनाय गे ‘धरती आबा भगवान बिरसा मुंडा के मूर्ति के अनावरण करीन। ओमन भगवान बिरसा मुंडा ल नमन करत देस के स्वतंत्रता, जनजातीय समाज के अधिकार अउ स्वाभिमान के रक्षा बर उंखर महान संघर्ष के बलिदान ल सुरता करीन। ए मउका म मुख्यमंत्री ह विश्व विद्यालय परिसर म बने जनजातीय वीथिका के घलो अवलोकन करीन।
मुख्यमंत्री ह जनजातीय गौरव दिवस के मउका म राखे गे राष्ट्रीय संगोष्ठी ल संबोधित करत किहीन कि भगवान बिरसा मुंडा जनजातीय गौरव, स्वाभिमान अउ स्वतंत्रता संग्राम के महा नायक रिहीन। ओमन कम उमर म ही अंग्रेजी शासन के अन्याय अउ सोसन के विरूध्द जनजातीय समाज ल सकेल के ऐतिहासिक उलगुलान आंदोलन के अगुवई करीन। जल, जंगल अउ जमीन के अधिकार मनके रक्षा बर ओखर संघर्ष देस के इतिहास के गौरवसाली अध्याय हरय।

राष्ट्रपति शिल्पकार मुलाकात

आज प्रदेस के कोंडागांव अउ रायगढ़ ले नई दिल्ली के राष्ट्रपति भवन म पचास झिन बेलमेटल सिल्पकार मन ह राष्ट्रपति द्रौपदी मुर्मू ले मिलिन। राष्ट्रपति भवन म होय ए बिसेस मुलाकात ह छत्तीसगढ़ के समृध्द जनजातीय संस्कृति, पारंपरिक कारीगरी अउ सिल्पकार मनके पीढ़ी के साधना ल राष्ट्रीय स्तर म नवा पहिचान दीन। ए मउका म छत्तीसगढ़ हस्तसिल्प विकास बोर्ड के अध्यक्ष सालिनी राजपूत अउ सचिव राजेश सिंह राणा घलो सामिल रिहीन।
राष्ट्रपति ह प्रदेस के सिल्पकार मन डहार ले धातु ले तियार देवी-देवता, पशु-पक्षी, लोकजीवन अउ पारंपरिक कारीगरी के प्रसंसा करीन।

धान खरीदी

प्रदेस म काली पंद्रह नवंबर ले समर्थन मूल्य म धान बिसाय के काम प्रदेस के सहकारी समिति मन म सुरू हो गेहे। आज दूसर दिन आने-आने केंद्र मन म किसान मन ले धान खरीदी करे गीस। राज्य सरकार डहार ले एसो के खरीफ विपणन बछर म प्रदेस के करीबन सत्ताईस लाख पचास हजार किसान मन ले धान खरीदी के बेवस्था करे गेहे। प्रदेस के तैंतीस जिला मन म कुल तीन हजार पंचानवे धान उर्पाजन केंद्र बनाय गेहे। धान सहकारी केंद्र के माध्यम ले अब तक कुल एक लाख अंठानवे हजार कुंटल धान के उपार्जन करे जा चुके हे।
दुरूग जिला म एक सौ तेईस केंद्र मन म धान के खरीदी सुरू हो गेहे।

राष्ट्रीय प्रेस दिवस  

आज राष्ट्रीय प्रेस दिवस हरय। ए दिन ल देस के लोकतंत्र ल मजबूत बनाय म स्वतंत्र, जिम्मेदार अउ नैतिक पत्रकारिता के बड़का भूमिका ल रेखांकित करथे। आजे के दिन बछर उन्नीस सौ छैंसठ म भारतीय प्रेस परिषद-पीसीआई ह काम सुरू करीन। एसो के राष्ट्रीय प्रेस दिवस समारोह के बिसय हे-‘‘पत्रकारिता लोकलुभावन या जिम्मेदार‘‘।
सूचना अउ प्रसारण मंत्री अश्विनी वैष्णव ह आज नई दिल्ली म प्रेस परिषद कोति ले राखे गे कारीकरम म भाग लीन। ए मउका म ओमन किहीन कि तकनीकी प्रगति, इंटरनेट अउ समाज के बदलत जरूरत के सेति मीडिया क्षेत्र म अवइया पांच साल म पाछू दू दसक के तुलना म जादा बदलाव देखे बर मिलत हे। ओमन किहीन कि बदलाव अपनाय बर तियार रहइया लोगन मन ही मीडिया उद्योग म नवा अगुवई करइया बनही। ए मउका म भारतीय प्रेस परिषद के अध्यक्ष न्यायमूर्ति रंजना प्रकाश देसाई ह घलो अपन बात राखिन।

कैदी फरार

महासमुंद जिला जेल ले आज मुंधरहा चार झिन कैदी मन ह दीवाल कूद के फरार होगे। हमर संवाददाता ले मिले जानबा के मुताबिक ए कैदी मन ह जेल म मिले ओढ़े बर कंबल ल परयोग करके दीवाल पार करके भाग गे। फरार कैदी मनके पहिचान धरमवीर, लीलाधर, राजेंद्र अउ पंचराम के रूप म होय हे। जेमा ले तीन झिन आरोपी एन.डी.पी.एस. अधिनियम के तहत अउ एक झन कैदी चोरी के मामला म जेल म बंद रिहीस। महासमुंद के अतिरिक्त पुलिस अधीक्षक ह ए घटना के पुष्टि करे हे। पुलिस कि बिसेस टीम बनाके फरार कैदी मन ल खोजे बर सघन अभियान चलाय जात हे।

ऑडिट पखवाड़ा  

प्रधान महालेखाकार कार्यालय रईपुर डहार ले प्रदेस म काली ले एक दिसंबर तक ऑडिट पखवाड़ा के आयोजन करे जाही। ए दउरान राज्य के वित्तीय अउ लेखा व्यवस्था ल मजबूत बनाय अउ सरकारी विभाग अउ महालेखाकार कार्यालय के बीच बढ़िया तालमेल राखे बर कतकोन कारीकरम करे जाही। इही कड़ी म छब्बीस नवंबर के रईपुर म राज्य स्तरीय कार्यसाला होही। ए कार्यसाला के उद्घाटन वित्त मंत्री ओपी चौधरी ह करही। कार्यसाला म राज्य शासन के बजट नियंत्रण अधिकारी, जिला कोषालय अधिकारी अउ आने-आने विभाग मनके आहरण अउ संवितरण अधिकारी मन सामिल होही।

चिकित्सा महाविद्यालय-प्रवेस  

छत्तीसगढ़ के शासकीय चिकित्सा महाविद्यालय मन म ए बेरा के                 सैक्षणिक सत्र बर सहायक अउ स्वास्थ्य देखभाल सेवा ले जुड़े ग्यारह ठिन पाठ्यक्रम मनके प्रवेस के काम सुरू हो गेहे। एमा आठ स्नातक अउ तीन ठिन डिप्लोमा पाठ्यक्रम सामिल हे। ए पाठ्यक्रम मन म छात्र मन ल रोग के जांच, उपचार म डॉक्टर मनके सहयोग, नेत्र परीक्षण अउ स्वास्थ्य सूचना के प्रबंधन जइसन क्षेत्र म प्रसिक्षण मिलही।

‘‘एआईआर उभरते सितारे‘‘  

आकाशवाणी ह संगीत के युवा प्रतिभा मन ल राष्ट्रीय मंच देवाय के उद्देस्य ले ‘‘एआईआर राइजिंग स्टार्स‘‘ माने ‘‘एआईआर उभरते सितारे‘‘ नांव के बिसेस संगीत कारीकरम के पहिली श्रंृखला सुरू करत हे। ए श्रृंखला के तहत देसभर म सत्रह ले तीस नवंबर तक छब्बीस जघा म संगीत कारीकरम होही। जेमा तीस साल ले कम उमर के युवा कलाकार मन अपन संगीत प्रतिभा के प्रदर्सन करही। ए पहल आकाशवाणी के नब्बे साल पूरा होय के मउका म समारोह के हिस्सा हरय।

छठ पर्व  

उगत सूरज ल अर्घ्य देके संगेसंग आज चार दिन तक चले छठ परब सिरागे। बिहनियच ले बिलासपुर स्थित अरपाघाट के संगेसंग रईपुर, दुरूग अउ रायगढ़ के संगेसंग राज्य के कतकोन नदिया तरिया म श्रध्दालु मन ह उगत सूरज ल अर्घ्य दीन। मुख्यमंत्री विष्णुदेव साय ह आज बिहनिया कुनकुरी स्थित छठ घाट म उगत सूरज ल अर्घ्य देके पूजापाठ करीन। ए मउका म मुख्यमंत्री ह कुनकुरी नगरवासी मन बर पंद्रह करोड़ रूपिया ले जादा के बिकास काम के घोसना करीन। जेमा छठ तालाब ल सुग्घर ढंग ले अउ सांस्कृतिक भवन बनाय सामिल हे।

कबड्डी प्रतियोगिता  

छब्बीसवां राज्य स्तरीय जूनियर बालिका कबड्डी प्रतियोगिता के खिताब राजनांदगांव के टीम ह जीत लेहे। गौरेला-पेण्ड्रा-मरवाही जिला के पेण्ड्रा म  होय प्रतियोगिता के फाइनल मुकाबला म राजनांदगांव ह बिलासपुर ल हराइस। बिलासपुर के टीम ह उप विजेता रिहीन। त उहें, मेजबान गौरेला-पेण्ड्रा-मरवाही ह तीसर स्थान म अपन जघा बनाइन। तेरह ले पंद्रह नवंबर तक होय ए तीन दिन के प्रतियोगिता म प्रदेस के छब्बीस जिला ले तीन सौ चौसठ बालिका खिलाड़ी मन ह भाग लीन।

अउ अब पेस हे मौसम के हाल…

मौसम विभाग के मुताबिक बंगाल के खाड़ी के दक्षिण पूर्वी अउ ओखर ले सटे दक्षिण-पश्चिमी दिसा म बने उच्च दबाव उत्तर-पश्चिम दिसा म आगू बाढ़त हे। अवइया चौबीस घंटा म बंगाल के खाड़ी के मध्यवर्ती जघा म ए उच्च दबाव  चक्रवाती तूफान म बदले के संभावना हे। मौसम विभाग ह एखर अउ जादा तीव्र होके उत्तर-पश्चिम दिसा म आगू बढ़े अउ शुक्रवार तक भीषण चक्रवाती तूफान के रूप म बदले के संसो जताय गेहे। ए सिस्टम के प्रभाव ले छत्तीसगढ़ म उन्नीस नवंबर के कोनो-कोनो जघा  म हल्का बरसा हो सकथे। उहें, बीस अउ इक्कीस नवंबर के एक-दू जघा म भारी बरसा होय के चेतावनी दे गेहे।

अउ अब थोरकुन समाचार सार म –

– दुरूग जिला के डीआईजी अउ वरिष्ठ पुलिस अधीक्षक विजय अग्रवाल ह तीन सौ सैंतीस पुलिस अधिकारी अउ कर्मचारी मनके नवा पद स्थापना आदेस जारी करे हे। एमा तीन सहायक उप निरीक्षक, चौंसठ झिन प्रधान आरक्षक अउ दू सौ आरक्षक सामिल हेे।

अउ

– जांजगीर-चांपा जिला म सब इंस्पेक्टर के संगेसंग छै झिन पुलिस कर्मी मन ल निलंबित कर दे गेहे। ए पुलिस कर्मी मन उपर रिस्वत लेके आरोप हे।