प्रधानमंत्री-जनजातीय गौरव दिवस
प्रधानमंत्री नरेंद्र मोदी ह किहीन हे कि-15 नवंबर बछर- दू हजार इक्काईस के जनजातीय गौरव दिवस सुरू होय के बाद ले एहा राष्ट्रीय उत्सव बन गेहे। महाराष्ट्र के गढ़चिरौली म आयोजित कारीकरम ल वर्चुअल संबोधित करत प्रधानमंत्री ह किहीन कि-एके बेरा रिहीस, जब देस के परब अउ दिवस बिदेसी नजरिया ले जाने जावत रिहीस, फेर अब भारत ह स्वाभिमान के भावना के संग अपन बिरासत, इतिहास अउ अपन पुरखा मन ल सुरता करथे। एहा राष्ट्रीय चेतना म बदलाव के परिचायक हे। श्री मोदी ह यहू किहीन कि-देस ह आज अपन आदिवासी नायक-नायिका मन ल सोरियावत हे।
अपन संबोधन म प्रधानमंत्री ह किहीन कि-जनजातीय गौरव दिवस देस के अइसन परब आय, जेखर ले जनजातीय समाज के मान जुड़े हे अउ भगवान बिरसा मुंडा के प्रेरणा जुड़े हे। इही ऊर्जा के संग देस ह आज अपन नायक मन ल गरब ले सुरता करत हे।
प्रधानमंत्री ह यहू किहीन कि-देस के दू ठन प्रमुख उपलब्धि मनके गोठ चारों मुड़ा होथे। पहिली उपलब्धि 50 करोड़ लोगन ल भारी गरीबी ले बाहिर लाना अउ दूसरइया देस ल नक्सलवाद अउ माओवादी आतंक ले मुक्त कराना हे। सरकार ह ओ इलाका मन उपर बिसेस धियान देवत हे, जउन लंबा बेरा ले बिकास के दउंड़ म पाछू रिहीन। देस म 100 ठन आकांक्षी जिला अउ 500 आकांक्षी बिकासखंड मन बर बिसेस अभियान सुरू करे गेहे। ऐति, कृषि धन-धान्य योजना के तहत घलो सबले पछवाय 100 ठन जिला मन उपर बिसेस धियान दे जाव हे।
बिरसा मुंडा-जयंती
स्वतंत्रता सेनानी अउ जनजातीय नायक भगवान बिरसा मुंडा के जयंती के मउका म आज रायगढ़ जिला के धरमजयगढ़ म राज्य के स्तरीय जनजातीय गौरव दिवस के आयोजन करे गिस। जेमा भारतीय जनता पार्टी के राष्ट्रीय अध्यक्ष नितिन नबीन वर्चुअली सामिल होइन। उहें, कारीकरम म मुख्यमंत्री विष्णुदेव साय, उप मुख्यमंत्री अरूण साव, विजय शर्मा अउ केंद्रीय राज्य मंत्री तोखन साहू मौजूद रिहीन।
कारीकरम ल संबोधित करत भाजपा के राष्ट्रीय अध्यक्ष नितिन नबीन ह किहीन कि-जनजातीय गौरव दिवस महान जनजातीय नायक मन के संघर्ष, त्याग अउ बलिदान ल सोरियाय के संग उंखर गुण ल नवा पीढ़ी तक अमराय के मउका आय। ओमन किहीन कि-छत्तीसगढ़ ह वीर, बलिदानी अउ समृध्द जनजातीय संस्कृति के धरती आय। श्री नबीन ह आगू किहीन कि-बस्तर के जेन इलाका म कभू बंदूक के आरो सुनावत रिहीस, उंहा आज खेल के मैदान तियार होवत हे। लइका अउ युवा मन शिक्षा, खेल अउ कला-कौशल के जरिया ले अपन सपना ल नवा उड़ान देवत हे। छत्तीसगढ़ सरकार ह बस्तर के युवा मनके हाथ म बंदूक के जघा खेल जिनिस अउ हिंसा के जघा नवा उम्मीद देय के कारज करे हे।
उहें, मुख्यमंत्री ह किहीन कि जनजातीय समाज के सम्मान, संस्कृति अउ परंपरा के संरक्षण अउ हर जनजातीय परिवार तक बिकास योजना मनके लाभ पहुंचाना सरकार के प्राथमिकता आय।
कारीकरम म मुख्यमंत्री ह पद्मश्री बुधरी ताती, जागेश्वर यादव, पंडीराम मंडावी ल सम्मानित करिन। संगेसंग जनजातीय नृत्य प्रतियोगिता के विजेता मन ल पुरस्कार अउ आने-आने योजना के हितग्राही मन ल लाभ वितरण करिन।
धान खरीदी
प्रदेशभर म आज ले समर्थन मूल्य धान खरीदी सुरू होगे हे। मुख्यमंत्री विष्णुदेव साय ह आज रायगढ़ जिला के धरमजयगढ़ ले धान खरीदी तिहार सुभारंभ करिन। ए मउका म ओमन किहीन कि- एसो के खरीफ बछर म किसान मनके सुबिधा ल चेत म राखत प्रदेसभर म धान खरीदी केंद्र मनके संख्या ल बढ़ाके कुल 3 हजार एक सौ केंद्र के जरिया ले खरीदी के बेवस्था करे गेहे। मुख्यमंत्री ह बतइन कि-प्रति एकड़ 21 कुंटल के निर्धारित अधिकतम सीमा ले कम धान बेचइया पात्र किसान मन ल घलो कृषक उन्नति योजना के तहत प्रति एकड़-13 हजार 8 सौ 39 रूपिया के आदान सहायता रासि दे जाही।
बतादन कि एसो प्रदेस के साढ़े सत्ताईस लाख किसान मन ले इकतीस सौ रूपिया प्रति कुंटल के दर ले जादा ले जादा 21 कुंटल प्रति एकड़ धान खरीदे जावत हे।
इही बीच, प्रशासन डहार ले धान खरीदे के निगरानी, अवैध धान परिवहन अउ बिक्री ल रोके बर प्रदेस के सबो सीमा इलाका म बिसेस बेवस्था करे गेहे।
ईडी संपत्ति जब्त
प्रवर्तन निदेशालय ह सराब घोटाला ले जुड़े मामला म कारवाही करत पूर्व मुख्यमंत्री भूपेश बघेल के बेटा चैतन्य बघेल के संपत्ति ल अपन कब्जा म ले लिस। ईडी के अनुसार दुरूग जिला के कुम्हारी म विट्ठल कॉलोनी चैतन्य बघेल के नांव म हे, जेखर 355 प्लॉट के अनुमानित कीमत 61 करोड़ रूपिया हे। ईडी ह कारवाही के बेरा कॉलोनी के मुख्य द्वार म नोटिस घलो चस्पा करे हे, जेमा मामला ले जुड़े प्लॉट के विवरण दे गेहे।
कर्मचारी-रैली
छत्तीसगढ़ कर्मचारी अधिकारी फेडरेसन ह पटवारी के अनिश्चितकालीन आंदोलन ल समर्थन देय हे। फेडरेसन के प्रांतीय संयोजक कमल वर्मा ह बतइन कि आंदोलन के समर्थन म 18 नवंबर के प्रदेसभर म रैली निकाल जाही।
दुर्घटना
कोरबा जिला के कटघोरा थाना इलाका म राष्ट्रीय राजमार्ग-130 म होय सड़क हादसा म दू यात्री मनके मउत होगे। उहें, चार झन आने लोगन गंभीर रूप ले घायल होइन। ए हादसा बरपाली के अनूप ढाबा के तिर होइस। मिले जानकारी ले कुनकुरी ले रइपुर जवइया यात्री बस ल चालक ह यात्री मन ल उतारे बर सड़क तिर रोकिस। इही बेरा पाछू ले आवत तेज रफ्तार ट्रेलर ह जोरदार टक्कर मारिस, जेखर ले बस के पाछू डहार बइठे दू यात्री मनके मउका म ही मउत होगे।
छठ पर्व
छठ महापरब के तीसरइया दिन आज उपास रखइया मन प्रदेस के आने-आने तरिया अउ नदिया तिर सकला के बुड़त सुरूज देवता ल अर्घ्य देइन। रइपुर के खारून नदी महादेवघाट, बिलासपुर के अरपा नदी, दुरूग के शिवनाथ अउ आने-आने नदिया तिर श्रध्दालु मन बुड़त सुरूज ल अर्घ्य देइन। उहंें, आज संझा महोदवघाट म सांस्कृतिक कारीकरम घलो आयोजन करे जावत हे।
ऐति, राष्ट्रपति मुर्मू अउ प्रधानमंत्री नरेंद्र मोदी ह छठ पूजा के मउका म देसवासी मन ल बधाई देइन हें।बतादन कि चार दिन के ए छठ पूजा के समापन काली बिहनिया उवत सुरूज ल अर्घ्य देय के संग होही।