धान खरीदी
प्रदेश मा काली पंद्रा नवम्बर ईतवार ले समर्थन मूल्य उपर धान खरीदी सुरू होही। ए बछर प्रदेश के साढे सत्ताईस लाख ले ज्यादा किसनहा मन ले इकतीस सौ रूपिया प्रति क्विंटल के हिसाब ले एक एकड़ पिछु ज्यादा-ले-ज्यादा इक्कीस क्विंटल धान खरीदी करे जाही। किसान मन के सुविधा बर ए बछर प्रदेश मा तीन सौ साठ नवा धान खरीदी केन्द्र बनाए गेहे। नवा केन्द्र मन ला मिला के धान खरीदी केन्द्र के कुल संख्या इकतीस सौ हो गेहे। धान खरीदी ला व्यवस्थित अउ पारदर्शी बनाए बर सब्बो उपार्जन केन्द्र मा पर्याप्त बारदाना के उपलब्धता, इलेक्ट्राॅनिक तउल मसीन, धान के गुणवत्ता जांच बर मसीन, सुरक्षित भंडारण अउ लाए लेजाए के व्यवस्था करे गेहे। किसान मन बर पानी, बइठे के जघा, छांव अउ आने-आने जरूरी सुविधा के बिसेस धियान राखे गेहे।
इही बीच, राज्य सरकार कोति ले सुरू करे गे ‘तंुहर टोकन‘ मोबाईल एप ले किसान मन अपन घर बईठे ही धान बेचे बर टोकन ले सकथे। ए सुविधा के सुरू होए ले किसनहा मन ला धान बेचे बर उपार्जन केन्द्र के चक्कर नई लगाए पडत हे। आॅनलाइन टोकन व्यवस्था ले धान खरीदी ह सरल, सुविधाजनक अउ पारदर्शी बनत हे।
पीएम-जनजातीय गौरव दिवस
प्रधानमंत्री नरेंद्र मोदी ह काली वीडियो कॉन्फ्रेंसिंग के माध्यम ले महाराष्ट्र के गढ़चिरौली म होवइया ‘‘जनजातीय गौरव दिवस‘‘ कारीकरम म सामिल होही। ए कारीकरम ह ‘‘धरती आबा‘‘ भगवान बिरसामुंडा के एक सौ इंक्यावनवां जयंती के मउका म आयोजित करे जावत हे। कारीकरम के दउरान प्रधानमंत्री ह लगभग तीस अरब रूपिया के लागत वाले दू सौ छियालिस विकास परियोजना के लोकार्पण अउ सिलान्यास करही। एखर अलावा श्री मोदी ह एक सौ तिहत्तर आने परियोजना के उद्घाटन घलो करही। जेमन म जनजातीय लइका मन बर अड़तीस एकलव्य मॉडल आवासीय विद्यालय अउ सौ ठन बहुउद्देसीय केंद्र सामिल हे। ए कारीकरम ‘‘जनजातीय गौरव पखवाड़ा‘‘ के समापन के चिन्हा होही, जउन ह एक नवंबर ले पंद्रह नवंबर तक पूरा देस म मनाय जावत हे।
जनजातीय गौरव दिवस
स्वतंत्रता सेनानी अउ जनजातीय नायक भगवान बिरसा मुंडा के एक सौ इंक्यावनवां जयंती काली पंद्रा नवंबर इतवार के छत्तीसगढ़ समेत देसभर मा जनजातीय गौरव दिवस के रूप मा मनाए जाही। ए मउका मा राजधानी रईपुर सहित प्रदेसभर मा आने-आने कारीकरम होही। रईगढ़ जिला के धरमजयगढ़ मा काली राज्य स्तरीय जनजातीय गौरव दिवस के आयोजन करे जाही। ए कारीकरम मा भाजपा के राष्ट्रीय अध्यक्ष नितिन नबीन अउ मुख्यमंत्री विष्णु देव साय ह सामिल होही। ए मउका म भगवान बिरसामुंडा के संघर्ष ल सुरता करे के संगेसंग जनजातीय नायक शहीद वीर नारायण सिंह वीर गुंडाधुर, राजा गेंद सिंह
सहीद झाडा सिरहा, हिड़मा मांझी अउ संत गहिरा गुरू के योगदान ल घलो सुरता करे जाही। उहें, जनजातीय परिवार मन बर घर, पढ़ई-लिखई, माईलोगिन के कल्याण अउ जंगल के अधिकार ले जुड़े योजना मनके प्रगति ल घलो साझा करे जाही।
पंडित जवाहरलाल नेहरू-जयंती
आजाद भारत के पहिली प्रधानमंत्री पंडित जवाहरलाल नेहरू के आज जयंती हवय। पंडित नेहरू के जयंती ल देसभर म बाल दिवस के रूप म मनाय जावत हे। राष्ट्रपति द्रौपदी मुर्मू ह आज राष्ट्रपति भवन म आने-आने स्कूल अउ संगठन के विद्यार्थी, शिक्षक अउ अभिभावक मन ले गोठबात करीन। ए मउका म राष्ट्रपति ह किहीन कि लइका मन देस के भविष्य हवय। ओमन लइका मन ल आत्मविस्वास ले भरे हुए जिम्मेदार नागरिक बनाय उपर बल दीन।
उहें, प्रधानमंत्री नरेंद्र मोदी, रक्षा मंत्री राजनाथ ंिसंह, कांगे्रेस अध्यक्ष मल्लिकार्जुन खड़गे, पाटी के बड़का नेता सोनिया गांधी अउ आने नेता मन घलो नेहरू जी ल पुष्पांजलि चढ़ाइन।
निर्वाचक नामावली-संशोधित कार्यक्रम
प्रदेस म नगरीय निकाय के आम अउ उप चुनई बर वोटल लिस्ट तियार करे के संसोधित कारीकरम जारी करे गेहे। राज्य निर्वाचन आयुक्त अजय सिंह ह बतइन कि चार सौ अट्ठाईस पद बर आम चुनई अउ दस पद बर उप चुनई के प्रक्रिया पूरा करे जाही। भिलई, भिलई-चरौदा, रिसाली अउ बीरगांव नगर निगम के महापौर समेत चैदह अध्यक्ष अउ चार सौ पार्षद पद बर आम चुनई होही। उहें, अध्यक्ष के एक अउ पार्षद के नौ पद बर उप चुनई होही। निर्वाचक नामावली बर बीस नवंबर तक निर्धारित प्रारूप म आवेदन करे जा सकत हे। दावा आपत्ति के निपटान के बाद तीस नवंबर के वोटर लिस्ट के आखिरी प्रकासन करे जाही।
विश्व मधुमेह दिवस
आज विश्व मधुमेह दिवस हवय। ए दिवस ह मधुमेह यानी सुगर के सही समय म पहिचान, उचित उपचार अउ सबो झन ल सुग्घर स्वास्थ्य सुविधा देवाय के प्रति जागरूकता ल बढ़ाय बर मनाय जावत हे। ए बछर के बिसय हे-मधुमेह का समय रहते इलाज। ए दिवस ह दुनिया भर म सुगर के बाढ़त मामला ले निपटे बर साझा परयास के महत्ता ल घलो उजागर करथे।
स्वनिधि महोत्सव
उपमुख्यमंत्री अउ नगरीय प्रशासन मंत्री अरूण साव ह आज रईपुर के पंडित दीनदयाल उपाध्याय ऑडिटोरियम म राखे गे स्वनिधि महोत्सव म सामिल होइन। ओमन पथ विक्रेता मन ले गोठबात करके ओमन के व्यापार, परिवार अउ पीएम स्वनिधि योजना ले ओमन के जीवन म आय बदलाव के जानकारी लीन। ए मउका म श्री साव ह लाभार्थी मन ल चेक यूपीआई पेमेंट बॉक्स अउ प्रसस्ति पत्र प्रदान करीन। संगेसंग ए योजना के सुग्घर क्रियान्वयन बर बैंक, बैंक साखा अउ नगरीय निकाय ल घलो सम्मानित करे गीस। महोत्सव ल सांसद लक्ष्मी वर्मा अउ नगरीय प्रशासन विभाग के प्रमुख सचिव सोनमणि बोरा ह घलो संबोधित करीन।
माओवादी सामग्री-बरामद
नारायणपुर जिला के ग्राम डंुगा अउ रेकावाया के जंगल म तलासी अभियान के दउरान सुरक्षा बल मन ह ड्रिल मसीन, वेल्डिंग मसीन, कटर मसीन, बेंच ग्राइंडर समेत आने-आने प्रकार के मसीन उपकरण बरामद करे हे। एखर अलावा मोटर, वायर, बाइंडर, रॉकेट सेट, ड्रिल बिट समेत आने तकनीक जिनिस घलो बरामद करे गेहे।
सीबीआई-महादेव सट्टा ऐप
केंद्रीय अन्वेषण ब्यूरो यानी-सीबीआई ह ऑनलाइन सट्टाबाजी प्लेटफार्म महादेव ऐप के चलइया मनके छै राज्य के तैंतीस ठिन ठिकाना म तलासी लेहे। सीबीआई ह बतइस कि ए तलासी ह पादू कुछेक दिन म मुख्य आरोपी सौरभ चंद्राकार ले पूछताछ के दउरान मिले जानकारी के आधार म करे गेहे।
छठ पर्व
छठ महापर्व के आज दूसरइया दिन हे। एला खरना के नांव ले जाने जाथे। उपवास के तिसरइया दिन काली ईतवार के आने-आने नदिया अउ तरिया तीर के घाट मन म डूबत सुरूज देव ल पहिली अघ्र्य दे जाही। एखर बर राजधानी रईपुर के महादेव घाट के संगेसंग प्रदेस के आने-आने नदिया अउ तरिया म बेवस्था करे गेहे। काली संझा महोदवघाट म छत्तीसगढ़ी कलाकार तिलकराजा साहू अउ केसरी साहू ह छत्तीसगढ़ी सांस्कृतिक कारीकरम प्रस्तुत करही। ए मउका म मुख्यमंत्री विष्णुदेव साय ह घलो उपस्थित रइही।
उहें, परनदिन सोलह नवंबर के उगत सुरूज देव ल अघ्र्य दे के संगेसंग चार दिन छठ परब ह सिराय जाही।
अंगारमोेती-मड़ई
धमतरी जिला के गंगरेल म आदिसक्ति मैया अंगारमोती मंदिर म काली पारंपरिक मड़ई के आयोजन करे गीस। लोक आस्था, जनजातीय संस्कृति अउ अति जुन्ना परंपरा के ए संगम म जुरियाय बर बिहनिया ले ही भक्त मनके ताता लगे रिहीस।
दुर्घटना
महासमुंद जिला म आज होय एक सड़क हादसा म तीन झन के मउत होगे। उहें, दू झन घायल हे। ए हादसा बागबाहरा थाना क्षेत्र के राष्ट्रीय राजमार्ग नंबर तीन सौ तिरपन उपर ओ बेरा होइस, जब एक ठिन एंबुलेंस ह अंतेतंते होके रद्दा तीर खड़े ट्रक म टकरा गीस। एमा दू माईलोगिन के मउका म ही मउत होगे, फेर एक आने मनखे ह इलाज के दउरान दम तोड़ दीस।
उहें, गरियाबंद जिला के अमलीपदर-धुर्वागुड़ी रद्दा म आज एक तेज रफ्तार मोटरसाइकिल ह अंतेतंते होके खेत म गिर गे। जेखर ले मोटरसाइकिल सवार युवक के मउत होगे।