राष्ट्रपति-स्वच्छ सर्वेक्षण
राष्ट्रपति द्रौपदी मुर्मु ह आज नई दिल्ली म राखे गे एक समारोह म स्वच्छ सर्वेंक्षण पुरस्कार दीन। एमा छत्तीसगढ़ के रईपुर, बिलासपुर अउ बिल्हा ल आने-आने श्रेणी म इनाम दे गीस। राज्य के पहिली स्वच्छ सहर के श्रेणी म रईपुर ल पहिली इनाम मिले हे। उहें, स्वच्छ नदी तटवर्ती नगर के श्रेणी म बिलासपुर दूसर स्थान म हे अउ बीस हजार ले कमती जनसंख्या वाले सहर के श्रेणी म बिल्हा ह पहिली स्थान पाय हे।
ए मउका म केन्द्रीय आवास अउ सहरी मामला के मंत्री मनोहर लाल खट्टर, मंत्रालय के राज्यमंत्री तोखन साहू अउ सचिव सतेन्द्र सिंह अउ डी. थारा मौजूद रिहीन। कार्यक्रम म छत्तीसगढ़ के उपमुख्यमंत्री अउ नगरीय प्रसासन मंत्री अरूण साव, नगरीय प्रसासन विभाग के सचिव सोनमणि बोरा समेत रायपुर अउ बिलासपुर के महापौर संघरीन।
केन्द्रीय मंत्रिमंडल उर्वरक
केन्द्रीय मंत्रिमंडल ह रबी सीजन दू हजार छब्बीस-सत्ताईस बर फॉस्फोरस अउ पोटिशियम मिले उर्वरक म पोषक तत्व आधारित सब्सिडी दर ल मंजूरी दे देहे। एखर बर अनुमानित बजट करीबन बैसठ हजार तीन सौ सत्तर करोड़ रूपिया तय करे गेहे। आज नई दिल्ली म केन्द्रीय मंत्रिमंडल के बइठका के बाद संवाददाता मन ल जानकारी देवत सूचना अउ प्रसारण मंत्री अश्विनी वैष्णव ह बतईन कि ए छूट ले किसान मन ल खातू कमती दाम म आसानी ले मिल सकही।
उर्वरक अउ यूरिया, डीएपी, सल्फर जइसन जिनीस के अंतर्राष्ट्रीय कीमत म अभी के रूझान ल देखत सरकार ह चालू रबी सीजन बर फॉस्फोरस अउ पोटेशियम के उर्वरक म पोषक तत्व आधारित सब्सिडी दर ल मंजूरी देके फइसला लेहे। ए व्यवस्था अवइया बछर इकतीस मार्च तक लागू रइही।
राष्ट्रीय शिक्षा दिवस
आज राष्ट्रीय शिक्षा दिवस हरय। ए दिवस हर बछर देस के पहिली सिक्षा मंत्री मौलाना अबुल कलाम आजाद के जयंती के मउका म मनाय जाथे।
राष्ट्रीय सिक्षा दिवस म केन्द्रीय सिक्षा मंत्री प्रल्हाद जोशी ह अइसन सिक्षा व्यवस्था बनाय के सरकार के प्रतिबद्धता दोहराय हे, जउन सबो बर समान मउका सुनिश्चित करे अउ भविष्य के मुताबिक होवय। सोशल मीडिया पोस्ट म श्री जोशी ह किहीन कि प्रधानमंत्री नरेन्द्र मोदी के अगुवई म भारत अइसन सिक्षा प्रणाली विकसित करे के दिसा म आगू बाढ़त हे, जउन नवाचार अउ कौशल विकास ल बढ़ावा देवय।
धान खरीदी
जनजातीय गौरव दिवस के मउका म पन्द्रह नवंबर ले प्रदेस म समर्थन कीमत म धान बिसाय के काम सुरू होही। राज्य सरकार ह चालू खरीफ विपणन बछर बर धान बिसाय के तियारी पूरा कर लेहे। एसो प्रदेस के साढ़े सत्ताईस लाख ले जादा किसान मन ले इकतीस सौ रूपिया प्रति कुुंटल के दर ले अधिकतम इक्कीस क्विंटल एकड़ पाछु धान बिसाय जाही। किसान मनके सुविधा बर प्रदेसभर म इकतीस सौ धान उपार्जन केन्द्र बनाय गेहे।
धान बिसाय के काम ल व्यवस्थित अउ साफगोई रूप ले बनाय खातिर सबो उपार्जन केन्द्र म पर्याप्त मात्रा म बारदाना के उपलब्धता, इलेक्ट्रॉनिक तौल मसीन, धान के गुणवत्ता जांच के उपकरण, सुरक्षित भंडारण अउ लाने-लेगे संबंधी व्यवस्था ल प्राथमिकता दे गेहे। किसान मन बर पीये के पानी, बइठे के व्यवस्था, छइंहा अउ बुनियादी सुविधा के बिसेस ध्यान राखे गेहे।
बिरसा मुंडा जयंती-कार्यक्रम
स्वतंत्रता सेनानी अउ जनजातीय नायक भगवान बिरसा मुंडा के जयंती के मउका म प्रदेस के सबो सरकारी अउ प्राईवेट स्कूल मन म कार्यक्रम करे जाही। लोक शिक्षण संचालनालय कोति ले ए संबंध म प्रदेस के सबो संभागीय संयुक्त संचालक अउ जिला सिक्षा अधिकारी मन ल दिसा-निरदेस जारी करे गेहे। एसो पन्द्रह नवंबर के इतवार होय के सेती प्रदेसभर के सबो स्कूल म चौदह या सोलह नवंबर के भगवान बिरसा मुंडा के जीवन, संघर्ष अउ योगदान म आने-आने गतिविधि करे जाही। लोक सिक्षण संचालनालय ह सबो स्कूल मन म होवइया कार्यक्रम म पढ़ईया लइका, सिक्षक अउ संस्था के प्रमुख मनके सहभागिता सुनिश्चित करे बर केहे हे।
रायगढ़-जनजातीय गौरव दिवस
भगवान बिरसा मुंडा के जयंती म भारतीय जनता पार्टी के प्रदेस इकाई कोति ले पन्द्रह नवंबर के रायगढ़ जिला के धरमजयगढ़ म जनजातीय गौरव दिवस मनाय जाही। ए कार्यक्रम म भारतीय जनता पार्टी के राष्ट्रीय अध्यक्ष नितिन नबीन संघरही।
उंखर आगमन अउ आयोजन के तियारी ल देखे बर भाजपा के राष्ट्रीय महामंत्री अउ छत्तीसगढ़ प्रदेस प्रभारी स्मृति ईरानी आज धरमजयगढ़ पहुंच के कार्यक्रम के जघा ल देखीन।
आरटीई-दिशा-निर्देश
राज्य सरकार ह शिक्षा के अधिकार अधिनियम-आरटीई म नवा दिसा-निरदेस जारी करे हे। स्कूल सिक्षा विभाग के मुताबिक कक्षा पहिली ले पांचवीं तक बर एक किलोमीटर अउ कक्षा छठवीं ले आठवीं तक बर तीन किलोमीटर के तय दूरी भीतरी रहवइया पात्र लइका मन ल भर्ती म प्राथमिकता दे जाही। ए व्यवस्था ले आरटीई म आरक्षित पच्चीस प्रतिशत सीट ल भरे म मदद मिलही।
भाजपा-जनजातीय गौरव दिवस
भारतीय जनता पार्टी, जनजातीय गौरव दिवस के मउका म आज ले अट्ठारह नवंबर तक कतकोन कार्यक्रम होही। नई दिल्ली म पार्टी मुख्यालय म संवाददाता सम्मेलन म बोलत भाजपा के राष्ट्रीय महासचिव गजेन्द्र सिंह पटेल ह किहीन कि ए कार्यक्रम ले जनजातीय समुदाय के जीवन म आय बदलाव उंखर उत्थान अउ बने जीवन खातिर लोगन ल जागरूक करे जाही। ओमन किहीन कि प्रधानमंत्री नरेन्द्र मोदी के अगुवई म बछर दू हजार इक्कीस म भगवान बिरसा मुंडा के जयंती ल जनजातीय गौरव दिवस घोषित करे गे रिहीस। श्री पटेल ह किहीन कि बिरसा मुंडा, तिलका मांझी, सिद्धू-कान्हू अउ गोविंद गुरू जइसन जनजातीय नायक मन ल इतिहास म उंखर सही जघा देवाय हे।
भाईदूज/मातर
आज भाईदूज के परब उछाह के संग मनाय जात हे। राजधानी रईपुर समेत प्रदेसभर के आने-आने जिला म भाईदूज के मउका म बहिनी मन भाई ल तिलक लगाके आरती उतारीन अउ सुघ्घर भविष्य के मानता मानीन।
प्रधानमंत्री नरेन्द्र मोदी ह भाईदूज के मउका म देसवासी मन ल सुभकामना दीन हे। सोशल मीडिया पोस्ट म ओमन किहीन कि ए तिहार भाई-बहिनी के बीच मया-परेम के प्रतीक हे।
छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल भाईदूज के बधाई अउ सुभकामना दीन हे।
उहें, प्रदेस के आने-आने जिला म मातर के तिहार मनाय जात हे। ए मउका म कुछेक जघा म अखाड़ा के साधक मन ह कतकोन करतब दिखईन। खबर के मुताबिक आज के दिन राउत समुदाय के लोगन मन मैदान म गाय-गरवा के झूंड के बीच करतब दिखाथे अउ राउत नाचा होथे।
छठ-स्पेशल ट्रेन
छठ पूजा म यात्री मनके सुभीता ल देखत दक्षिण पूर्व मध्य रेलवे कोति ले स्पेशल ट्रेन चलाय जाही। बिलासपुर-छपरा स्पेशल ट्रेन चौदह अउ इक्कीस नवंबर के बिलासपुर ले रवाना होही। उहें, दुर्ग हजरत निजामुद्दीन स्पेशल ट्रेन पन्द्रह नवंबर के चलही। दुर्ग बरौनी स्पेशल ट्रेन ग्यारह, अट्ठारह नवंबर के अउ गोंदिया-पटना स्पेशल ट्रेन तेरह अउ बीस नवंबर के रवाना होही।
कार्यशाला
निर्यातक मन ल अंतर्राष्ट्रीय बाजार म मिलइया व्यापारिक मउका के जानकारी दे बर काली बारह नवंबर के रईपुर म कार्यशाला होही। भारत सरकार के वाणिज्यिक विभाग अउ छत्तीसगढ़ शासन के उद्योग विभाग के मदद ले राखे गे एकदिवसीय कार्यशाला म मुक्त व्यापार समझौता ले निर्यात बढ़ाय के संभावना म गोठबात करे जाही। एमा यूनाईटेड किंगडम, ओमान, न्यूजीलैंड, संयुक्त अरब अमीरात अउ ऑस्ट्रेलिया जइसन बाजार म भारतीय उत्पाद बर मिलइया मउका के जानकारी दे जाही। कार्यशाला म आने-आने क्षेत्र बर बिसेस सत्र होही।
एआई डेटा लैब
राज्य एआई मिशन के प्रदेश म बीस एआई डेटा लैब बनाय जाही। उहें, रईपुर, दुरूग, सरगुजा, बिलासपुर अउ बस्तर संभाग म पांच उत्कृष्टता केन्द्र खोले जाही। ए फइसला मुख्य सचिव विकासशील के अगुवई म काली मंत्रालय म होय राज्य एआई मिशन के पहिली स्टीयरिंग कमेटी म ले गीस। ए मिशन म करीबन एक लाख पचास हजार सरकारी कर्मचारी मन ल एआई बउरे के प्रसिक्षण दे जाही। पहिली चरण म पन्द्रह हजार अधिकारी अउ कर्मचारी मन ल एनआईटी, ट्रिपल आईटी अउ आईआईएम जइसन संस्थान ले प्रसिक्षित करे जाही। एखर संगेसंग स्कूल के पढ़ईया लइका, युवा अउ तकनीकी सिक्षा के छात्र मन बर बिसेस प्रसिक्षण पाठ्यक्रम तियार करे जाही।