राष्ट्रपति-स्वच्छ सर्वेक्षण
राष्ट्रपति द्रौपदी मुर्मू ग्यारा नवंबर के नई दिल्ली म स्वच्छ सर्वेक्षण दू हजार पच्चीस-छब्बीस पुरस्कार प्रदान करही। ए पुरस्कार के माध्यम ले स्वच्छ भारत मिसन-सहरी के अंतर्गत उत्कृष्ट योगदान देवइया देस के सबले स्वच्छ सहर ल सम्मानित करे जाही। एमा छत्तीसगढ़ के तीन सहर-रईपुर, बिलासपुर अउ बिल्हा घलो सामिल हे। कारीकरम म केंद्रीय आवासन अउ सहरी कार्य मंत्री मनोहर लाल खट्टर अउ कंेद्रीय राज्य मंत्री तोखन साहू घलो मौजूद रइही।
छत्तीसगढ़ डहार ले उपमुख्यमंत्री अउ नगरीय प्रशासन मंत्री अरूण साव संघरा विभागीय अधिकारी अउ चयनित नगरीय निकाय के जनप्रतिनिधि अधिकारी स्वच्छता कर्मी मन ह कारीकरम म भाग लिही।
मुख्यमंत्री-जशपुर
जशपुर जिला के पोंगरो गांव म नदी के पानी ले सिंचाई बर खेत मन ल पानी दे जाही। ए काम म बिना बिजली के या डीजल ले चलइया कोनो पंप के उपयोग नइ होय हे। मुख्यमंत्री विष्णुदेव साय ह आज घुघरी नदी म बने पोंगरो एनीकट हाइड्रो पावर पम्पिंग योजना के निरीक्षण करीन। सरगुजा संभाग के ए पहला परियोजना म नदी के जल प्रवाह ले टर्बाइन पंप चलथे। एखर माध्यम ले हर दिन सत्रह लीटर पानी प्रति सेकेंड के दर ले टंकी तक पहुंचाय जावत हे। ए टंकी म सकलाय पानी ल सिंचाई बर आने-आने नंदिया-नरवा तक पहुंचाय जावत हे। पौने तीन करोड़ रूपिया ले बने ए योजना ले एक सौ पैंतीस किसान परिवार ल फायदा मिलही। एमा करीबन अस्सी एकड़ जमीन म सिंचाई हो सकही।
धान खरीदी टोकन
प्रदेस म समर्थन मूल्य म अवइया पंद्रह नवंबर ले धान खरीदी बर किसान मन ल आज ले तुंहर टोकन मोबाइल ऐप के माध्यम ले ऑनलाइन टोकन जारी करे जावत हे। एमा किसान मन ह अपन मोबाइल फोन ले घर बइठे धान बेचे बर टोकन ले सकत हे। ए सुविधा चौबीसो घंटा उपलब्ध रइही।
खबर के मुताबिक ए बछर किसान मन ले इकतीस सौ रूपिया प्रति कुंटल के दर ले धान खरीदी करे जाही। प्रति एकड़ अधिकतम इक्कीस कुंटल धान खरीदे जाही।
विश्व टीकाकरण दिवस
आज विश्व टीकाकरण दिवस हे। ए मउका म केंद्रीय स्वास्थ्य मंत्री जगत प्रकाश नड्डा ह सही बेरा म अउ पूर्ण टीकाकरण के माध्यम ले हरेक लइका अउ गर्भवती माईलोगिन ल सुरक्षित राखे के देस के संकलप ल दोहराइन हे। सोसल मीडिया संदेस म श्री नड्डा ह किहीन हे कि पोलियो अउ माता अउ नवजात शिशु के टीटनेस ल खतम करे म भारत के उपलब्धि सरलग टीकाकरण के परिणाम हे। ओमन ह सार्वभौमिक टीकाकरण कारीकरम, यू-विन डिजिटल प्लेटफॉर्म अउ मिसन इंद्रधनुष अभियान जइसन सुरूआत के बारे म बतावत किहीन कि एखर माध्यम ले जीवन रक्षक टीका मन के पहुंच बाढ़े हेे।
स्वास्थ्य मंत्री-निरीक्षण
स्वास्थ्य मंत्री श्याम बिहारी जायसवाल ह आज मनेन्द्रगढ़ क्षेत्र म निर्माणाधीन स्वास्थ्य अउ चिकित्सा शिक्षा परियोजना के निरीक्षण करीन। ओमन ह आमाखेरवा म बनत दू सौ बीस बिस्तर वाले सिविल अस्पताल, झगराखंड रोड म अस्थाई मेडिकल कालेज अउ बालक-बालिका छात्रावास के संग परसगढ़ी मेडिकल कालेज के निर्माण काम के जायजा लीन। निरीक्षण के दउरान स्वास्थ्य मंत्री ह अधिकारी अउ निर्माण एजेंसी मन ल निर्माण काम म गुणवत्ता के निर्धारित मानक के पालन करे के अउ सबो योजना मन ल तय करे गे बेरा म पूरा करे के निरदेस दीन।
सैनिक स्कूल-आवेदन
अंबिकापुर के सैनिक स्कूल म अवइया सैक्षणिक सत्र बर कक्षा छठवीं अउ नवमीं म प्रवेस बर ऑनलाइन आवेदन के प्रक्रिया सुरू हो गेहे। अखिल भारतीय सैनिक स्कूल प्रवेस परीक्षा इकतीस जनवरी-दू हजार सत्ताईस के आयोजित करे जाही। इच्छुक विद्यार्थी मन ह दू दिसंबर तक ऑनलाइन आवेदन कर सकत हे। उहें, विलंब सुल्क के संग तीन ले छै दिसंबर तक आवेदन करे जा सकही। आवेदन पत्र म गलती ल सुधारे बर सात ले नौ दिसंबर तक मउका मिलही। एखर बर विस्तार ले जानकारी वेबसाइट म हवय।
स्मृति ईरानी-दौरा
भाजपा के राष्ट्रीय महामंत्री अउ छत्तीसगढ़ प्रदेस प्रभारी स्मृति ईरानी काली ग्यारा नवंबर के छत्तीसगढ़ दउरा म आही। ओमन ह बिहनिया नौ बजे दिल्ली ले रईपुर पहुंचही अउ सीधा रायगढ़ बर रवाना होही। इंहा ओमन ह पंद्रह नवंबर के धरमजयगढ़ म होवइया जनजातीय गौरव दिवस के कारीकरम के तियारी के समीक्षा करही। ए दउरान ओमन ह प्रदेस भाजपा के पदाधिकारी अउ नेता मन संघरा बइठका घलो करही। ओखर बाद रईपुर होवत दिल्ली लहुटही।
खबर के मुताबिक भाजपा के राष्ट्रीय अध्यक्ष नितिन नबीन पंद्रह नवंबर के छत्तीसगढ़ दउरा म आही। राष्ट्रीय अध्यक्ष के जिम्मेदारी संभाले के बाद एहा उंखर पहिली छत्तीसगढ़ दउरा होही। ए दउरान ओमन ह रायगढ़ जिला के धरमजयगढ़ म जनजातीय गौरव दिवस के कारीकरम म सामिल होही। मुख्यमंत्री विष्णुदेव साय के नेवता म नितिन नबीन छत्तीसगढ़ आवत हे।
गोर्वधन पूजा
छत्तीसगढ़ संघरा देसभर म आज गोर्वधन पूजा अउ अन्नकूट के तिहार बड़ उछाह के संग मनाय जावत हे। आज के दिन गउ माता के पूजा करे जाथे अउ खिचड़ी के भोग लगाय जाथे। संगेसंग सोहई बांध के गौवंश के रक्षा के प्रार्थना करे जाथे। राजधानी रईपुर के प्राचीन दूधाधारी मठ म घलो अन्नकूट अउ गोर्वधन पूजा के कारीकरम होइस।
प्रधानमंत्री नरेंद्र मोदी ह गोर्वधन पूजा के मउका म देसवासी मन ल अपन सुभकामना दीन हे। श्री मोदी ह कामना करीन कि ए पवित्र तिहार ह लोगन के जिनगी म ऊर्जा अउ उछाह लाय। ओमन ह सबके सुख-सौभाग्य के कामना करीन।
राज्यपाल रमेन डेका ह गोर्वधन पूजा के मउका म रईपुर के सदर बाजार के श्री बांकेबिहारी मंदिर जाके पूजापाठ करीन। उहें, मुख्यमंत्री विष्णुदेव साय ह गोर्वधन पूजा के मउका म गौमाता के पूजापाठ करके प्रदेसवासी मनके मंगलमय जीवन के कामना करीन। एखरे संग प्रदेस के कतकोन जघा म भगवान शिव अउ माता पार्वती के बिहाव के सोभा यात्रा गौरा-गौरी घलो निकाले गीस।
छठ-पर्व
राज्य के तरिया अउ नदिया के किनारे छठ परब के तियारी सुरू हो गेहे। चार दिन के छठ महापरब तेरह नवंबर के नहाय खाय के रसम संग सुरू होही। छठ महापरब आयोजन समिति महादेवघाट के अध्यक्ष राजेश कुमार सिंह ह आज एक ठन पत्रकारवार्ता म बतइन कि ए बछर छठ पूजा खारून नदी के महादेवघाट म उछाह के संग मनाही। ओमन बतइन कि छठ पूजा के परब रइपुर-बिलासपुर, भिलाई, दुरूग, कोरबा, बस्तर अउ दूसर सहर म धूमधाम ले मनाय जाथे। रईपुर म पचास ले जादा जघा म छठ पूजा के आयोजन होही। छठ महापरब उत्तर भारत के एक ठन बड़े परब हे, जउन ह तेरह नवंबर ले सुरू होके सोलह नवंबर के सिराही। खरना चौदह नवंबर के होही।
उहें, संझा के अरघ पंद्रह नवंबर के अउ बिहनिया के अरघ सोलह नवंबर के दे जाही।
गंगोत्री धाम-कपाट
उत्तराखंड के उत्तराकासी जिला के गंगोत्री धाम के कपाट आज मंझनिया कुन बारह बजके पांच मिनट म सीतकाल बर बंद कर दे गीस। अन्नकूट तिहार अउ गोर्वधन पूजा के मउका म पूजापाठ के बाद मंदिर के कपाट बंद कर दे गीस। एखर बाद मां गंगा के उत्सव डोली सेना के बैंड अउ पारंपरिक गाजा-बाजा के संग उंखर सीतकालीन प्रवास स्थल मुखबा गांव बर रवाना होइस। अवइया छै महिना तक श्रध्दालु मन ह मुखबा गांव के मुखीमठ म मां गंगा के दर्सन अउ पूजापाठ कर सकही।
दुघर्टना
महासमुंद जिला म खरोरा गांव के तीर एक ठन सड़क हादसा म दू झन लोगन के मउत होगे। मिले जानकारी के अनुसार पाछू रतिहा ए हादसा ओतका बखत होइस, जब एक ठन गाड़ी अंतेतंते होके बिजली खंभा ले टकरा गीस। ए घटना म अउ तीन झन घायल होय हे, जेमा ले एक झिन के हालत गंभीर बताय जावत हे।
अउ अब पेस के मौसम के हाल…
मौसम विभाग के अनुसार अवइया चौबीस घंटा म प्रदेस के मौसम सुष्क रइही। रईपुर, अंबिकापुर, राजनांदगांव अउ दुरूग संघरा कतकोन सहर के तापमान म एक ले दू डिग्री सेल्सियस तक के गिरावट दर्ज करे गेहे। उहें, अवइया कुछ दिन म प्रदेस म जाड़ बाढ़े के संभावना घलो जताय गेहे।