प्रधानमंत्री-बस्तर
प्रधानमंत्री नरेंद्र मोदी ह किहीन हे कि पाछू बारह बछर म पचास करोड़ भारतीय मन ह गरीबी से बाहिर निकले हे। श्री मोदी ह काली छत्तीसगढ़ के बस्तर म जवान मन संग देवारी तिहार मनाइन अउ उंखर मन संग गोठबात करीन।
प्रधानमंत्री ह बतइन कि गरीबी उपर ए जीत ह नक्सलवाद संग लड़ाई ले जुड़े हे। नक्सलवाद ह पहिली स्कूल, अस्पताल, मेडिकल स्टोर, पोलियो टीकाकरण, मोबाइल टावर अउ उद्योग म रोक, रेलवे पटरी म बमबारी करके लाखों निरदोस नागरिक मन ल अभाव अउ तंगी म ढकेल दे रिहीस। प्रधानमंत्री ह वामपंथी उग्रवाद ले प्रभावित क्षेत्र म बिसेस विकास अभियान के बारे म बतइन, एमा पंद्रह हजार किलोमीटर ले जादा सड़क, नौ हजार पांच सौ ले जादा मोबाइल टावर, लगभग एक सौ पचहत्तर एकलव्य स्कूल, करीब पचास आईटीआई, पचास कौशल विकास केंद्र, हजारों डाकघर, बैंक शाखा अउ एटीएम बनाय गीस। एखरे संग आत्मसमर्पण करइया नक्सली मनके पुनर्वास करे गीस अउ ‘पीएम जनमन‘ के योजना के अंतर्गत दूर-दराज के आदिवासी गांव म पहिली घांव पानी, बिजली अउ सड़क पहुंचाय गीस।
प्रधानमंत्री ह किहीन कि ‘सबका साथ सबका विकास‘ अभियान ह गरीबी ले लड़ाई ल ताकत देहे। ए अभियान ह पचास करोड़ लोगन ल गरीबी ले बाहिर निकाले के संगेसंग नक्सल हिंसा के अंत करे हे। प्रधानमंत्री ह ए क्षेत्र म आय बदलाव के प्रतीक रूप म बस्तर ओलंपिक के घलो जिक्र करीन।
राष्ट्रीय विधिक सेवा दिवस
देस म आज राष्ट्रीय विधिक सेवा दिवस मनाय जावत हे। विधिक सेवा प्राधिकरण अधिनियम उन्नीस सौ सतासी के सरकार ह उन्नीस सौ पंचानवे म लागू करीस। एखर उद्देस्य लोगन ल निसुल्क कानूनी सहायता देवाना हे। ए मउका म देसभर म राज्य विधिक सेवा प्राधिकरण डहार ले जागरूकता सिविर लगाय जावत हे। ए सिविर के माध्यम ले लोगन ल मुफ्त कानूनी सहायता अउ विधिक सेवा प्राधिकरण के दूसर सेवा के जानकारी दे जावत हे।
विधिक सेवा दिवस के मउका म दुरूग जिला म सप्ताहव्यापी विधिक जागरूकता अभियान चलाय जावत हे। जिला विधिक सेवा प्राधिकरण डहार ले आयोजित ए अभियान म गांव, सहर, स्कूल अउ सार्वजनिक स्थल म विधिक जागरूकता कारीकरम अउ साक्षरता सिविर लगाय जावत हे। अभियान के दउरान पैरा लीगल वॉलंटियर मन ह आम लोगन ल उंखर कानूनी अधिकार अउ निसुल्क कानूनी मदद के जानकारी देवत हे।
कैंसर-दवा
कैंसर के इलाज के एक सौ सैंतीस ठन दवई के कीमत कम होय के बाद आज ले लागू हो गे हवय। एखर पहिली, राष्ट्रीय औषधी मूल्य निर्धारण प्राधिकरण ह ए दवा के अधिकतम खुदरा मूल्य म मुनाफा के सीमा तय करे रिहीन। ए फइसला स्वास्थ्य अउ परिवार कल्याण मंत्रालय के अंतर्गत स्वास्थ्य सेवा महानिदेसालय के बिसेसज्ञ समिति के सिफारिस के आधार म ले गे हवय।
एफटीए-कार्यशाला
निर्यातक मन ल अंतर्राष्ट्रीय बाजार म मिले व्यापारिक मउका के जानकारी देबर बारह नवंबर के रईपुर म एक दिन के कार्यसाला कराय जाही। भारत सरकार के वाणिज्य विभाग अउ छत्तीसगढ़ शासन के उद्योग विभाग के मदद ले ए कार्यशाला म मुक्त व्यापार समझौता के माध्यम ले निर्यात बढ़ाय के संभावना उपर चर्चा करे जाही। एमा यूनाइटेड किंगडम, ओमान, न्यूजीलैंड, संयुक्त अरब अमीरात अउ आस्ट्रेलिया जइसन बाजार म भारतीय उत्पाद बर मिलइया मउका के जानकारी दे जाही। कार्यशाला म कतकोन क्षेत्र बर बिसेस सत्र कराय जाही।
राष्ट्रपति-स्वच्छता सम्मान
राष्ट्रपति द्रौपदी मुर्मू ग्यारा नवंबर के नई दिल्ली म स्वच्छ सर्वेक्षण दू हजार पच्चीस-छब्बीस पुरस्कार प्रदान करही। ए पुरस्कार के माध्यम ले स्वच्छ भारत मिसन-सहरी के अंतर्गत उत्कृष्ट योगदान देवइया देस के सबले स्वच्छ सहर ल सम्मानित करे जाही। एमा छत्तीसगढ़ के तीन सहर-रईपुर, बिलासपुर अउ बिल्हा घलो सामिल हे।
कारीकरम म केंद्रीय आवासन अउ सहरी कार्य मंत्री मनोहर लाल खट्टर अउ कंेद्रीय राज्य मंत्री तोखन साहू घलो मौजूद रइही।
दुघर्टना
गरियाबंद जिला के गोबरा नवापारा थाना क्षेत्र म पाछू रतिहा होय सड़क हादसा म एके परिवार के चार लोगन के मउत होगिस। घटना म कार म बइठे एक झन आदमी ओखर पत्नी अउ दू झन लइका सामिल हे। मृतक ल फिंगेश्वर थाना क्षेत्र के पसौद गांव के रहइया बताय जात हे। जानकारी के मुताबिक एमन सबो झन रईपुर ले देवारी मान के अपन गांव लहुटत रिहीन। इही बीच, राजिम के टीला एनीकट म कार अंतेतंते होके महानदी म गिर गीस।
उहें, जशपुर जिला म राष्ट्रीय राजमार्ग क्रमांक तिरालीस म ट्रक अउ बस के टक्कर ले ट्रक ड्राइवर के मउकच म मउत होगिस। बताय जात हवय कि एक ठन यात्री बस ह पटना ले रईपुर आवत रिहीस। इही दउरान कुनकुरी के सलियाटोली म ट्रक ले उंखर टक्कर होगे। ए हादसा म ट्रक चालक के मउका म मउत होगिस अउ बस म बइठे यात्री मन ल सुरक्षित बताय जात हे।
आगजनी
पाछू रतिहा रईपुर के डूमरतराई के अनाज मंडी के तीन ठन दुकान म आगी लगगे। ए घटना म करोड़ो रूपिया के नुकसान के आसंका जताय जावत हे। जानकारी के अनुसार स्टेशनरी अउ खाय पिये के जिनिस के दुकान म लगे आगी ह देखते देखत एक ठन दूसर दुकान ल घलो अपन चपेट म ले लीस। दुकान म रखे ज्वलनसील समान के सेति आगी जादा फैल गीस। घटना के सूचना मिलते साठ दमकल विभाग के टीम अउ राज्य आपदा मोचन बल-एसडीआरएफ के संग निजी प्लांट मनके करीबन दस ठन दमकल गाड़ी मउका म पहुंच गीस अउ आगी म काबू पाय गीस।
उहें, दुरूग भिलाई के चार ठन आने-आने जघा म घलो पाछू रतिहा आगी लग गीस। ए घटना म कोनो प्रकार के जनहानि होय के सूचना नइ मिले हे।
हाथी हमला-मौत
सूरजपुर जिला म दू ठन आने-आने घटना म हाथी मनके हमला म दू झन लोगन के मउत होगे। पहिली, घटना प्रतापपुर म होइस, जिंहा पंडोपारा निवासी एक झन मनखे अपन खेत म फसल के रखवारी करत रिहीस। इही दउरान हाथी ह ओखर उपर हमला कर दीस। उहें, दूसर घटना सूरजपुर वन परिक्षेत्र के सलकाबीट के सोनपुर म होइस, जिंहा एक ठन दूसर हाथी के सेति एक ग्रामीण के मउत होगे। घटना के बाद वन विभाग ह लोगन ल सावधान रहे के सलाह देहे।
अग्निवीर मैराथन
धमतरी के इंडोर स्टेडियम म पंद्रह नवंबर के बिहनिया पांच बजे ले अग्निवीर महा मैराथन के आयोजन करे जाही। निसुल्क कमांडो प्रसिक्षण केंद्र अउ मीलिट्री एकेडमी के तत्वावधान म होवइया ए प्रतियोगिता म सोलह सौ मीटर के दउड़ होही। पूर्व सैनिक अउ आर्मी, इंस्ट्रक्टर जीवन राम निषाद ह बतइन कि ए प्रतियोगिता म सिरिफ छत्तीसगढ़ राज्य के अइसन अग्निवीर अभ्यर्थी मन ही भाग ले सकही जउन मन भारतीय सेना के अग्निवीर भर्ती के लिखित परीक्षा ल पास कर डरे हे। ओमन बतइन कि प्रतियोगिता म सामिल होवइया अभ्यर्थी बर आधार कार्ड अउ अग्निवीर भर्ती के लिखित परीक्षा के प्रवेस पत्र साथ लाना जरूरी होही।
गोर्वधन पूजा
राजधानी रईपुर समेत प्रदेसभर म काली गोवर्धन पूजा अउ अन्नकूट के तिहार उछाह के संग मनाय जाही। ए मउका म गौ माता के पूजापाठ करके ओला खिचड़ी खवाय जाही। रईपुर के दूधाधारी मठ म घलो अन्नकूट अउ गोवर्धन पूजा के कारीकरम आयोजित करे जाही।
अउ अब पेस हे मौसम के हाल….
छत्तीसगढ़ म जाड़ बाढ़त हे। सरगुजा संभाग म न्यूनतम तापमान म गिरावट दर्ज करे जावत हे। उहें, मध्य छत्तीसगढ़ म घलो बिहनिया अउ रतिहा कुन जाड़ बाढ़ गेहे।
मौसम विभाग के अनुसार अवइया चौबीस घंटा म मौसम साफ रहे के सेति न्यूनतम तापमान म अउ गिरावट आय के संभावना हे। अवइया दू दिन म रतिहा के तापमान म एक ले दू डिग्री सेल्सियस तक गिरावट हो सकत हे। फेर दिन म घाम रइही अउ बिहनिया अउ रतिहा कुन जाड़ के असर अउ बाढ़े के संभावना हे।