राष्ट्रपति-वंदे मातरम्
राष्ट्रपति द्रौपदी मुर्मू अउ लोकसभा अध्यक्ष ओम बिरला ह राष्ट्रीय गीत वंदे मातरम् के एक सौ इंक्यावन साल पूरा होय उपर देसवासी मन ल सुभकामना दे हवय। एक ठिन सोसल मीडिया पोस्ट म राष्ट्रपति ह किहीन हे कि स्वतंत्रता आंदोलन के दउरान वंदे मातरम् देस भक्त मन बर साहस, एकता अउ संकलप के नारा बनिस। ओमन किहीन कि आज घलो ए राष्ट्रीय पहिचान आत्म सम्मान अउ मातृभूमि के प्रति समर्पण के चिन्हा हरय।
स्वच्छता-राष्ट्रीय पुरस्कार
स्वच्छ सर्वेक्षण- दू हजार पच्चीस-छब्बीस म प्रदेस के तीन ठिन सहर-रईपुर, बिलासपुर अउ बिल्हा ल राष्ट्रीय पुरस्कार बर चुने गेहे। राष्ट्रपति ह ग्यारा नवंबर के नई दिल्ली के विज्ञान भवन म होवइया राष्ट्रीय सम्मान समारोह म ए तीनों सहर ल पुरस्कार दिही। मुख्यमंत्री ह किहीन कि ए सम्मान हजारों सफाई मित्र मनके मेहनत के सम्मान हरय, जउन मन रोजे सहर ल साफ अउ सुंदर बनाय बर मेहनत करथे।
कैंसर दिवस
केंद्रीय स्वास्थ्य परिवार कल्याण मंत्री जगत प्रकाश नड्डा ह लोगन मन ले अपील करे हवय कि ओमन कैंसर ले बचाव, एखर सुरूआती संकत ल समझे अउ बेरा म इलाज बर अपन जागरूकता बढ़ावंय। आज राष्ट्रीय कैंसर जागरूकता दिवस उपर सोसल मीडिया पोस्ट म ओमन किहीन कि जागरूकता बढ़ाना अउ बेरा म जांच कराना कैंसर ले मुकाबला बर जरूरी हे। श्री नड्डा ह किहीन कि मुंह, स्तन अउ सर्वाइकल कैंसर के मामला आम हरय अउ एखर जांच कराना चाही। ओमन लोगन मन ल तंबाकू अउ सराब ले दूर रहे, रोजे व्यायाम करे, बने खानपान बनाय राखय अउ कोनो प्रकार के लक्षण दिखे म जांच कराय के सलाह दिन।
सीबीएसई-परीक्षा
केंद्रीय माध्यमिक शिक्षा बोर्ड-सीबीएसई ह एसो के दसवीं अउ बारहवीं कक्षा के बोर्ड परीक्षा के टाइम टेबल जारी कर देहे। दूनों कक्षा के परीक्षा सोलह फरवरी दू हजार सत्ताईस ले सुरू होही। दसवीं के परीक्षा नौ मार्च के अउ बारहवीं के परीक्षा नौ अप्रैल के सिराही। सीबीएसई के दसवीं के बोर्ड परीक्षा म छब्बीस लाख पचास हजार ले जादा अउ बारहवीं के परीक्षा म उन्नीस लाख अस्सी हजार ले जादा छात्र मनके सामिल होय के संभावना हे। सीबीएसई के मुताबिक दसवीं के परीक्षा तिरासी बिसय अउ बारहवीं कक्षा के परीक्षा म एक सौ इक्कीस बिसय म होही।
कोचिंग संस्थान-कानून
छत्तीसगढ़ म कोचिंग संस्थान मनके संचालन म अनुशासन, बढ़िया सैक्षणिक वातावरण अउ छात्र मनके सुरक्षा ल ठीकठाक करे के व्यवस्था करे जाही। एखर बर उच्च शिक्षा विभाग ह छत्तीसगढ़ कोचिंग सेंटर नियंत्रण अउ विनियमन विधेयक के प्रारूप तियार करे हे। विधेयक के प्रारूप म बीस ले जादा छात्र वाले कोचिंग सेंटर के पंजीकरण जरूरी करे, पांच साल के पंजीकरण वैद्यता, सुल्क ले जुड़े पारदर्सिता, पाठ्यक्रम छोड़े उपर सुल्क वापसी अउ छात्रावास के सुरक्षा के नियम प्रस्तावित हे। उहें, छात्र मनके मानसिक स्वास्थ्य बर परामर्स व्यवस्था उत्पीड़न ले जुड़े सिकायत के निपटारा अउ चौबीस घंटा हेल्पलाइन के व्यवस्था घलो प्रस्तावित हे।
विधेयक के प्रभावी क्रियान्वयन बर मुख्य सचिव के अगुवई म राज्य स्तरीय प्राधिकरण अउ जिला मजिस्ट्रेट के अध्यक्षता म जिला समिति बनाय के घलो प्रावधान हे।
नरक-चौदस
आज रूप चौदस या नरक चौदस के परब मनाय जात हे। परंपरा के मुताबिक रूप चौदस ए दिन अंगना अउ बाहिर म रंगोली सजाके चौदह ठिन माटी के दिया जलाय जाथे। रोसनी के ए तिहार म घरोघर बिजली के झालर लगाके सुग्घर ढंग ले घर ल रोसन करे जाथे। काली तीसर दिन दिया के परब देवारी तिहार मनाय जाही। ए तिहार ल लेके लोगन मन ल उछाह देखे जात हे। राजधानी रईपुर के संगेसंग प्रदेस के जम्मों सहर, कस्बा अउ गांव मन के बाजार मन म चहल-पहल अउ भीड़भाड़ देखे जात हे। लोगन मन अपन पसंद के जिनिस बिसावत हे।
प्रधानमंत्री नरेंद्र मोदी ह देवारी तिहार के देसवासी मन ल सुभकामना दे हवय। ओमन किहीन कि प्रकास के ए परब अंधियारा के खिलाफ संघर्ष के हमर संकलप के प्रतीक हरय।
ऐति, प्रदेस के राज्यपाल रमेन डेका अउ मुख्यमंत्री विष्णुदेव साय ह प्रदेस के लोगन मन ल देवारी तिहार के सुभकामना दे हवय।
विद्युत कंपनी-भर्ती
प्रदेस के छत्तीसगढ़ स्टेट पॉवर ट्रांसमिसन कंपनी लिमिटेड, स्टेट पॉवर जनरेसन कंपनी लिमिटेड अउ स्टेट पॉवर डिस्ट्रीब्यूसन कंपनी लिमिटेड म आने-आने पद म भर्ती बर अर्जी सुरू हो गेहे। ए कंपनी मन म कुल एक हजार पांच सौ एक पद म भर्ती करे जाही। एखर बर ऑनलाइन अर्जी छै नवंबर ले सुरू हो चुके हे, जउन छब्बीस नवंबर तक चलही।
भर्ती म द्वितीय श्रेणी के एक सौ पंचानवे अउ तृतीय अउ चतुर्थ श्रेणी के एक हजार तीन सौ छै पद सामिल हे। एमा सबले जादा छै सौ नौ पद डाटा एंट्री ऑपरेटर के पद हवय। उहें, कनिष्ठ अभियंता इलेक्ट्रिकल के एक सौ सड़सठ पद म भर्ती होही। एखर अलावा सहायक अभियंता के एक सौ बावन पद के संगेसंग फायर ऑफिसर, सुरक्षा अधिकारी, प्रोग्रामर, सिफ्ट केमिस्ट अउ मेडिकल स्टाफ के पद घलो भरे जाही।
जनजातीय गौरव दिवस
भगवान बिरसा मुंडा के जयंती पंद्रह नवंबर के प्रदेस म जनजातीय गौरव दिवस के रूप म मनाय जाही। मुख्यमंत्री विष्णुदेव साय ह बतइन कि रायगढ़ जिला के धरमजयगढ़ म पंद्रह नवंबर के ‘जनजातीय गौरव दिवस‘ के आयोजन करे जाही। एमा सामिल होय बर भारतीय जनता पार्टी के राष्ट्रीय अध्यक्ष नितिन नबीन छत्तीसगढ़ आही।
ऐति, कारीकरम के तियारी ल देखे बर आज वित्त मंत्री ओपी चौधरी अउ संगठन महामंत्री कर्मवीर सिंह ह अधिकारी मनके संग कारीकरम वाले जघा के निरीक्षण करीन। ए मउका म जिला कलेक्टर मयंक चतुर्वेदी, वरिष्ठ पुलिस अधीक्षक शशिमोहन सिंह के संगेसंग कतकोन अधिकारी मन आय रिहीन।
जिले की चिट्ठी
आकाशवाणी रइपुर के प्रादेसिक समाचार एकांश, डहार ले प्रस्तुत कारीकरम ‘जिले की चिट्ठी‘ के प्रसारण काली संझा छै बज के पांच मिनट ले छै बज के दस मिनट तक करे जाही। ए कारीकरम ल छत्तीसगढ़ के जम्मों आकाशवाणी केंद्र एके संघरा रिले करहीं। ए दारी के अंक म ‘‘राजनांदगांव‘‘ जिला के गतिविधि के बारे म जानबा दे जाही।
विशेष-ट्रेन
रेलमंत्री अश्विनी वैष्णव ह किहीन हे कि देवारी तिहार अउ छठ पूजा के दउरान यात्री मनके बाढ़त भीड़ ल देखत रेलवे ह एसो करीबन अट्ठारा हजार बिसेस रेलगाड़ी चलावत हे। पाछू साल बारह हजार स्पेसल रेलगाड़ी चलाय जात रिहीस अउ ओमा ले कतकोन रेलगाड़ी ल सरलग चलाय जात हे। रेलमंत्री ह किहीन कि यात्री मनके सुरक्षा बर रेलवे सुरक्षा बल के उपराहा तैनाती करे गेहे। उहें, बीस ठिन प्रमुख रेलवे स्टेसन म यात्री मन बर अलग प्रतीक्षा क्षेत्र घलो बनाय गेहे।
बस्तर ओलंपिक
बस्तर ओलंपिक के तीसर संस्करण म एसो बस्तर संभाग के सात जिला ले छै लाख ले जादा खिलाड़ी मन ह प्रतियोगिता बर पंजीयन करवाय हे, जेमा तीन लाख तिरासी हजार ले जादा महिला अउ दू लाख अट्ठारा हजार ले जादा पुरूष सामिल हे। बस्तर ओलंपिक के तहत प्रतियोगिता तीन स्तर म राखे जाही। विकासखंड स्तर के प्रतियोगिता सुरू हो गेहे, त उहें जिला स्तर के सोलह ले पच्चीस नवंबर तक अउ संभाग स्तर के प्रतियोगिता सात ले ग्यारा दिसंबर तक होही। एसो कुल ग्यारा खेल विधा म मुकाबला होही, जेमा एथलेटिक्स, तीरंदाजी, बैडमिंटन, फुटबाल, हॉकी, वेट लिफ्टिंग, कराते, कबड्डी, खो-खो, वॉलीबॉल अउ रस्साकसी सामिल हे।
करंट-महिला मौत
बलौदाबाजार म हाईटेंशन तार के चपेट म आय ले गंभीर रूप ले झुलसे महिला ह आज ईलाज के दउरान दम तोड़ दीन। जानबा के मुताबिक हाईटेंसन बिजली के तार ले नेहरू चौक स्थित घर के रिलिंग म करंट आ गे रिहीस, जेखर ले काली राकेश गुप्ता अउ ओखर बेटा के करंट के चपेट म आय ले मउत हो गे रिहीस।
मेडिकल कॉलेज-सीट
रईपुर, बिलासपुर अउ जगदलपुर के शासकीय मेडिकल कॉलेज मन म स्नात्कोत्तर माने पीजी के तैंतीस ठिन सीट बढ़ाय गेहे। अब मेडिकल कॉलेज मन म पीजी के कुल दू सौ अंठानवे सीट होगे हे। स्वास्थ्य मंत्री श्याम बिहारी जायसवाल ह किहीन हे कि राज्य सरकार ह स्वास्थ्य सुविधा के बिस्तार बर सरलग काम करत हे। मेडिकल कॉलेज मन म पीजी के सीट बढ़े ले बिसेसज्ञ डॉक्टर मनके संख्या बाढ़ही अउ मरीज मन ल बने उपचार मिल सकही।