डिजीटल जीवन प्रमाण पत्र
केंद्रीय कार्मिक, लोक शिकायत अउ पेंसन राज्य मंत्री डॉक्टर जितेंद्र सिंह ह आज नई दिल्ली म राष्ट्रव्यापी डिजिटल जीवन प्रमाण-पत्र अभियान के पांचवां चरण के सुभारंभ करीन। ए अभियान तीस नवंबर तक चलही। अभियान म अस्सी साल या ओखर ले जादा उमर के वरिष्ठ पेंसन भोगी, महिला पेंसन भोगी अउ स्वास्थ्य ले जुड़े समस्या के सामना करत लोगन मन बर बिसेस सुविधा दे जाही। जादा उमर के सेति या बीमारी होय के स्थिति म अभियान वाले जघा तक नइ पहुंचइया पेंसन भोगी मन बर घर म ही जीवन प्रमाण पत्र जमा करे के सुविधा दे जाही।
यूपीएससी-परिणाम
संघ लोक सेवा आयोग-यूपीएससी ह काली सिविल सेवा मुख्य परीक्षा दू हजार छब्बीस के परिणाम घोसित कर दीस। ए बार दू हजार पांच सौ छब्बीस अभ्यर्थी मन ल इंटरव्यू बर चुने गेहे। एसो इक्कीस ले तीस अगस्त मुख्य परीक्षा होय रिहीस। इंटरव्यू बर चुने गे अभ्यर्थी मन ग्यारा ले पच्चीस नवंबर तक ऑनलाइन अर्जी म जरूरी जानकारी अपडेट कर सकही।
जनगणना-तैयारी
छत्तीसगढ़ म जनगणना दू हजार सत्ताईस के दूसर चरण के तियारी ल तेज कर देहे। एमा अवइया पच्चीस जनवरी ले अट्ठाईस फरवरी तक गणना करइया मन घरोंघर जाके परिवार के सदस्य मनके गिनती करही। ए काम बर राज्य म करीबन छैंसठ हजार प्रगणक अउ पर्यवेक्षक तैनात करे जाही। एमन ल प्रसिक्षण देबर एक हजार एक सौ बीस फिल्ड ट्रेनर्स अउ साठ मास्टर ट्रेनर्स नामित करे गेहे। मास्टर्स टेªनर्स के राज्य स्तरीय प्रसिक्षण नवा रईपुर म चलत हे। पहिली बैच के प्रसिक्षण दू ले पांच नवंबर तक होइस, जेमा सोलह जिला के मास्टर ट्रेनर्स मन भाग लीन। उहें, दूसर बैच के प्रसिक्षण सोलह ले उन्नीस नवंबर तक होही।
जानबा के मुताबिक जगणना के पहिली चरण म मकान सूचीकरण अउ मकान मनके गणना के काम प्रदेस म एसो मई म पूरा करे जा चुके हे।
विधानसभा-पेपर लेस
छत्तीसगढ़ विधानसभा ल डिजीटल अउ पेपरलेस बनाय के दिसा म जरूरी पहल करे जात हे। इही कड़ी म राष्ट्रीय ई-विधान एप्लीकेशन-नेवा के प्रभावी क्रियान्वयन ल लेके विधानसभा के अधिकारी अउ करमचारी मन ल दू दिन के प्रसिक्षण दे गीस। प्रसिक्षण के दउरान भारत सरकार के संसदीय कार्य मंत्रालय के विसेसज्ञ मन ह प्रतिभागी मन ल एप्लीकेसन के आने-आने तकनीकी मॉड्यूल के जानबा दीन, जेमा प्रश्न, समिति अउ प्रशासनिक मॉड्यूल के संचालन के व्यावहरिक प्रसिक्षण दे गीस। ए एप्लीकेशन के माध्यम ले विधानसभा के प्रश्न अउ सूचना डिजीटल रूप ले पेस करे जा सकही। संगेसंग विधाई दस्तावेज मनके ऑनलाइन प्रबंधन, सूचना मनके तुरते आदान-प्रदान अउ संसदीय कामकाज के संचालन घलो डिजीटल प्लेटफार्म म करे जा सकही।
करंट-मौत/दुर्घटना
बलौदाबाजार म आज हाईटेंशन तार के चपेट म आय ले बाप-बेटा के मउत होगे। उहें, एक झिन माईलोगिन गंभीर रूप ले झूलस गेहे। मिले जानबा के मुताबिक नेहरू चौक स्थित घर के बाहिर ले हाईटेंशन के तार पांच फीट के दूरिहा म रिहीस। इही दउरान राकेश गुप्ता हाईटेंशन के तार के चपेट म आगे। ओला बचाय के परयास म उंखर बेटा अउ गोसाइन घलो झूलस गे। पुलिस मामला के जांच करत हे। उहें, इही जिला के कोतवाली थाना क्षेत्र म तेज रफ्तार ट्रक के चपेट म आय ले फटफटी म बइठे एके परिवार के तीन झिन लोगन के मउत होगे। एमन भाटापारा के खैरताल गांव के रहइया रिहीन।
ऐति, गौरेला-पेंड्रा-मरवाही जिला के गांव अमरपुर के तीर मुख्य रद्दा म होय सड़क दुर्घटना म दू झिन मनखे के मउत होगे। बताय जात हे कि धान कांटे म परयोग होवइया हार्वेस्टर मसीन ह मोटर साइकिल ल अपन चपेट म ले लीस। एखर ले दूनों मनखे के मउत होगे। पुलिस ह गाड़ी चलइया ल पतगवंा के तीर पकड़िन्ं
नितिन नबीन-दौरा
भाजपा के राष्ट्रीय अध्यक्ष नितिन नबीन ह पंद्रह नवंबर के छत्तीसगढ़ के दउरा म रइही। राष्ट्रीय अध्यक्ष के जिम्मेवारी दे जाय के बाद ओखर ए ह पहिली छत्तीसगढ़ दउरा हरय। ए दउरान ओमन रायगढ़ जिला के धरमजयगढ़ म राखे गे जनजातीय गौरव दिवस के कारीकरम म सामिल होही।
एखर, पहिली भाजपा राष्ट्रीय अध्यक्ष के दउरा के तियारी के जानबा लेबर प्रदेस प्रभारी स्मृति ईरानी ह छत्तीसगढ़ आही।
भर्ती-अधिसूचना
छत्तीसगढ़ कर्मचारी चयन मंडल ह आने-आने विभाग म कुल एक हजार सात सौ तीन पद म भर्ती बर अधिसूचना जारी कर देहे। भर्ती म सहायक ग्रेड-तीन के एक हजार दू सौ छै, जिला इकाई संवर्ग म सहायक उपनिरीक्षक के दू सौ उनयासी, हिन्दी शीघ्र लेखक के तीस, उपनिरीक्षक अ, शीघ्रलेखक सामान्य शाखा के चौंतीस, स्टेनो टाइपिस्ट के तेईस, डाटा एंट्री ऑपरेटर के पच्चीस, शीघ्रलेखक विभाषीय के तेरह, पंजीयक लिपिक के पचास, सहायक उप निरीक्षक अ सामान्य शाखा के चालीस अउ शीघ्रलेखक अंग्रेजी के तीन पद सामिल हे। ए जम्मों पद बर ऑनलाइन अर्जी भरे के काम पांच नवंबर ले सुरू हो गेहे, जउन ह सत्ताईस नवंबर तक चलही। लिखित भर्ती परीक्षा दस जनवरी दू हजार सत्ताईस के होही।
मुख्य सचिव-बैठक
प्रदेस म कृषक उन्नति योजना खरीफ के तहत किसान मन ल अनुदान रासि देके काम ल पारदर्सी अउ सरल बनाय जाही। मुख्य सचिव विकाससील ह आज मंत्रालय महानदी भवन म राखे गे समीक्षा बइठका म अधिकारी मन ल ए बारे म जरूरी निरदेस दीन। बइठका म धान खरीदी पोर्टल, एग्रीस्टैक अउ डिजीटल क्रॉफ सर्वे के आंकड़ा ल एकीकृत करे उपर जोर दीन। योजना के फायदा लेबर किसान मन ल एग्रीस्टैक म पंजीयन अउ डिजीटल क्रॉफ सर्वे म एखर ले जुड़े भुंईया म धान के फसल के दरज होना जरूरी होही।
एखर अलावा, धान खरीदी के तहत कम ले कम एक फसल लेनदेन होना जरूरी होही। ए जम्मों पात्रता होय के बाद रकबा के सत्यापन करे जाही। पाछू साल धान नइ बेचइया किसान मनके मामला म भौतिक सत्यापन के निरदेस घलो दे गेहे।
धनतेरस
प्रदेस के संगेसंग पूरा देस म धनतेरस के तिहार आज भक्तिभाव अउ उछाह के संग मनाय जात हे। धनतेरस के संग आज ले पांच दिन तक चलइया देवारी तिहार के सुरूआत होगे। आज के दिन धन के बढ़ोत्तरी बर कुबेर अउ स्वास्थ्य ल ठीकठाक राखे बर आयुर्वेद के देवता भगवान धनवंतरी के पूजा करे जाथे। धनतेरस के परब कार्तिक कृष्ण पक्ष के त्रयोदसी के दिन मनाय जाथे। आज प्रदेस के बाजार मन म जोरदरहा भीड़ देखे जाथे।
प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह धनतेरस के मउका म लोगन मन ल बधई अउ सुभकामना दे हवय।
युवा-संवाद
राष्ट्रव्यापी ‘विकसित भारत युवा संवाद-अपना वोट जानें अभियान इकतीस राज्य अउ केंद्रशासित प्रदेस मन म होइस। एमा पांच सौ छत्तीस युवा संासद मन भाग लीन। युवा कार्य अउ खेल मंत्रालय डहार ले ‘मेरा युवा भारत‘ के माध्यम ले राखे गे ए अभियान के माध्यम ले एक लाख ले जादा युवा मन तक पहुंचे गीस अउ एमा पांच सौ ले जादा युवा हस्ती मन भाग लीन। ए अभियान ले देसभर के कालेज अउ सिक्षण संस्थान मन म चुनावी जागरूकता उपर गोठबात करे गीस।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए बार ‘देवारी तिहार म पटाखा फोड़े के दउरान सावधानी बरते अउ आंखी उपर होवइया परभाव के बारे म नेत्र रोग बिसेसज्ञ डॉ. दिनेश मिश्रा ले लेगे भेंटवार्ता के प्रसारण करे जाही। एखर प्रसारण काली 07 नवंबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया 9 बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
अउ अब थोरकुन समाचार सार म –
– दुरूग जिला न्यायालय परिसर म आम लोगन के सहायता बर पुलिस सहायता केंद्र सुरू करे गेहे। जिला अउ अपर सत्र न्यायाधीश शेख अशरफ, कलेक्टर अभिजीत सिंह अउ वरिष्ठ पुलिस अधीक्षक विजय अग्रवाल के उपस्थिति म ए सहायता केंद्र के उद्घाटन करे गीस।
अउ
– भिलाई के औद्योगिक क्षेत्र स्थित एक ठिन निजी कारखाना म आज बिहनिया आगी लग गे। सूचना मिले के बाद पुलिस अउ अग्निसमन के टीम ह मउका म पहुंचिन अउ आगी ल बुझाइन।