प्रधानमंत्री-पैरा एशियाई दल
जापान म होय एशियाई पैरा गेम्स म भारत ह अपन अभू तक के सबले बढ़िया प्रदर्सन करे हे। प्रधानमंत्री नरेन्द्र मोदी ह नई दिल्ली म पैरालिंपिक दू हजार छब्बीस म भाग ले भारतीय दल ले गोठ करत हे। जानबा के अनुसार एमा भारत ह तीस स्वर्ण, पैंतीस रजत अउ उनचास कांस्य पदक समेत एक सौ चौदह ठिन पदक जीते हे। ए कार्यक्रम म एथलीट, कोच, भारतीय पैरालिंपिक समिति अउ भारतीय ओलंपिक संघ के अधिकारी, राष्ट्रीय खेल संघ के प्रतिनिधि अउ युवा कार्यक्रम अउ खेल मंत्रालय के अधिकारी हवय।
वीबी/जीरामजी-केन्द्र परामर्श
केन्द्र सरकार ह विकसित भारत रोजगार आजीविका गारंटी मिशन-ग्रामीण जीरामजी अधिनियम के अंतर्गत कतकोन योजना के समन्वय ले चारा सुरक्षा, चारागाह विकास अउ मवेसी ले जुड़े बुनियादी ढांचागत विकास ल मजबूती दे बर सबो राज्य अउ केन्द्रसासित प्रदेस ल परामर्श जारी करे हे। ए परामर्श म ग्रामीण विकास विभाग अउ पशुपालन अउ डेयरी विभाग ह संयुक्त रूप ले जारी करे हे। परामर्श म वीबी जीरामजी प्रारूप के अंतर्गत तीन सौ पचहत्तर ठिन स्वीकृत काम के सूची म बाईस काम के पहिचान करे गेहे।
भाजपा-रैली
भारतीय जनता पार्टी ह देसभर म ‘‘लोकतंत्र बचाओ, अराजकता हटाओ‘‘ अभियान चलावत हे। आज रायपुर के नेताजी सुभाष स्टेडियम म इही अभियान के चलत पदयात्रा निकाले गीस, जेमा मुख्यमंत्री विष्णुदेव साय समेत पार्टी के कतकोन बड़का नेता अउ कार्यकर्ता सामिल होइन।
भाजपा किसान मोर्चा-पत्रकारवार्ता
भारतीय जनता पार्टी किसान मोर्चा के राष्ट्रीय अध्यक्ष बंशीलाल गुर्जर ह आज रायपुर के प्रदेस भाजपा कार्यालय कुशाभाऊ ठाकरे परिसर म एक पत्रकारवार्ता ल संबोधित करीन। ओमन ह केन्द्र अउ राज्य सरकार के किसान हितैषी योजना अउ किसान के कल्याण ले जुड़े बिसय उपर अपन गोठ राखीन। श्री गुर्जर ह किसान मितान योजना के नवा प्रयोग ल संगठन के विस्तार के दृष्टि ले सराहनीय बतईन। ओमन ह कहिन कि किसान मनके समस्या ल सरकार तक पहुंचाय के जिम्मेदारी ए मितान मनके होही। श्री गुर्जर ह बतईन कि राज्य सरकार ह किसान मन ल आदान सहायता के रूप म तीन बछर म लगभग पैंतीस हजार करोड़ रूपिया जारी कर चुके हे।
अरूण साव-कार्यशाला
उपमुख्यमंत्री अउ लोक निर्माण मंत्री अरूण साव ह रायपुर म होय निर्माण मंथन राज्य स्तरीय कार्यशाला म प्रदेसभर के अभियंता मन ल संबोधित करीन। ओमन ह निर्माण काम गुणवत्ता, समयबद्धता अउ नवा तकनीक ल अपनाय बर जोर दीन। श्री साव ह किहीन कि निर्माण काम म गुणवत्ता के संग निर्धारित मानक अउ मापदंड के पालन करे जाय। कार्यशाला म एनआईटी रायपुर के विशेषज्ञ अउ वरिष्ठ अभियंता मन ह सड़क पुल अउ भवन निर्माण, गुणवत्ता नियंत्रण, रखरखाव समेत आने-आने तकनीकी विषय उपर प्रसिक्षण दीन।
एनआईटी-सीएमडीसी-एमओयू
राष्ट्रीय प्रौद्योगिकी संस्थान-एनआईटी रायपुर अउ छत्तीसगढ़ मिनरल डेवलपमेंट कॉपोर्रेशन-सीएमडीसी ह खनन अउ खनिज क्षेत्र म कृत्रिम बुद्धिमत्ता-एआई आधारित तकनीकी नवाचार ल बढ़ावा दे बर समझौता ज्ञापन उपर हस्ताक्षर करीन हे। एनआईटी रायपुर म होय कार्यक्रम म संस्थान के निदेशक डॉक्टर एन.वी. रमना राव अउ सीएमडीसी के मुख्य महाप्रबंधक संजय कनकने ह एमओयू म हस्ताक्षर करीन। पांच बछर के समझौता म खनन क्षेत्र के असली परेसानी के समाधान बर एआई आधारित तकनीक अउ प्रोटोटाइप विकसित करे जाही।
चिकित्सा महाविद्यालय प्रवेश
छत्तीसगढ़ के सरकारी चिकित्सा कॉलेज म चालू सैक्षणिक सत्र बर सहबद्ध अउ स्वास्थ्य देखरेख क्षेत्र के ग्यारह ठिन पाठ्यक्रम म प्रवेस के प्रक्रिया ह सुरू होगे हे। एमा ले तीन डिप्लोमा अउ आठ स्नातक पाठ्यक्रम सामिल हरय। प्रवेस संबंधी जानकारी बर अभ्यर्थी मन ह वेबसाइट म जा के देख सकत हे।
विशेष कार्यक्रम
आकाशवाणी केन्द्र रायपुर डहार ले बस्तर संभाग म आत्मसमर्पित माओवादी मनके पुनर्वास बर होवत काम म केन्द्रित विसेस कार्यक्रम के प्रसारण आज संझा सात बजे करे जाही। ए कार्यक्रम ल छत्तीसगढ़ के आकाशवाणी के सबो केन्द्र ह रिले करही।
अग्निवीर सेवा-अवधि
केन्द्रीय मंत्रिमंडल ह अग्निवीर मनके सेवा अवधि ल दू बछर अउ बढ़ाय के फइसला ल काली मंजूरी दे देहे। चार बछर के सेवा पूरा करे के बाद सेवा ले बाहिर होवइया अग्निवीर मनके सेवा अवधि बढ़ाय के निर्णय के मुख्यमंत्री विष्णुदेव साय ह स्वागत करीन हे। ओमन ह कहिन हे कि ए निर्णय ले अग्निवीर मन ल चार बछर के प्रारंभिक सेवा पूरा करे के बाद दू बछर तक अउ राष्ट्र के सेवा करे के मउका मिलही। संगेसंग निर्धारित चयन मानदंड ल पूरा करे वाले इच्छुक अग्निवीर नियमित सैन्य सेवा म घलो सामिल हो सकथे।
मुख्यमंत्री-करम परब महोत्सव
मुख्यमंत्री विष्णुदेव साय ह काली जशपुर जिला के बनगांव म होय करम परब महोत्सव के समापन समारोह म सामिल होइन। ए अवसर म श्री साय ह किहीन कि करम परब ह हमर समृद्ध जनजातीय संस्कृति, गौरवशाली परंपरा अउ पूर्वज मनके अमूल्य धरोहर हरय। ए कार्यक्रम म मुख्यमंत्री ह बनगांव म सामाजिक भवन निर्माण बर पचास लाख रूपिया अउ सीसी रोड बनाय बर बीस लाख रूपिया देके घोषणा करीन। ओमन ह बनगांव म अखड़ा निर्माण अउ सहसपुर म मिनी स्टेडियम निर्माण के घलो घोषणा करीन।
ए महोत्सव म जिला के कतकोन जघा ले आय नर्तक दल समेत उरांव समाज के छह हजार ले जादा लोगन मन ल पारंपरिक वेशभूषा म मांदर अउ ढोल नगाड़ा के थाप म सामूहिक नृत्य करीन।
बुनकर/स्व सहायता समूह राशि
देवारी ले पहिली राज्य सरकार ह बुनकर सहकारी समिति अउ महिला स्व-सहायता समूह ल उंखर मनके मजूरी दे देहे। एखर चलत इंखर बैंक खाता म नौ करोड़ इकचालीस लाख रूपिया डाले गेहे। ग्रामोद्योग मंत्री गजेन्द्र यादव ह किहीन कि बुनकर अउ महिला स्व-सहायता समूह के बेरा राहत पारिश्रमिक भुगतान करना सरकार के बड़का प्राथमिकता हे। ओमन ह किहीन कि राज्य सरकार ह रोजगार ले जोड़के बुनकर अउ माईलोगिन मन ल आर्थिक रूप ले सशक्त बनाय बर काम करत हे।
राज्यपाल-डीएमएफ
राज्यपाल रमेन डेका ह आज लोकभवन म जिला खनिज न्यास-डीएमएफ के गतिविधि, खनन प्रभावित क्षेत्र म विकास कार्य अउ अवइया पांच बछर के कार्ययोजना के संबंध म बइठक लीन। ए बइठक म ओमन ह डीएमएफ के पइसा के प्रभावी अउ सुनियोजित उपयोग बर दू बछर के रोडमैप तैयार करे के निरदेस दीन हे। ओमन ह किहीन हे कि खनन प्रभावित क्षेत्र म प्रदूषण नियंत्रण बर डीएमएफ ले जरूरी काम कराय जाय। संगेसंग ओमन ह पर्यावरण संरक्षण के बारे म बात करत हुए वैज्ञानिक तरीका ले रेत उत्खनन करे के बात कहिन हे।
भूपेन हजारिका-पुण्यतिथि
भारत रत्न डॉक्टर भूपेन हजारिका के आज पुण्यतिथि हरय। केन्द्रीय गृहमंत्री अमित शाह डॉक्टर हजारिका के पुण्यतिथि म ओमन ल श्रद्धांजलि दीन। सोशल मीडिया पोस्ट म श्री शाह ह किहीन कि महान गायक अउ संगीतकार डॉक्टर हजारिका ह देस ल एक समृद्ध, सांस्कृतिक विरासत दीन हे।
उहें, राज्यपाल रमेन डेका ह आज लोकभवन म डॉक्टर हजारिका के पुण्यतिथि म ओमन ल नमन करत हुए फूल चढ़ईन।
मुख्य सचिव-बैठक
मुख्य सचिव विकासशील के अध्यक्षता म आज मंत्रालय म परियोजना निर्माण अउ क्रियान्वयन समिति के बइठक होइस, जेमा राज्य म प्रस्तावित कतकोन निर्माण अउ विकास काम के प्रगति के समीक्षा होइस। मुख्य सचिव ह अधिकारी मन ल निरदेस दीन हे कि प्रस्तावित निर्माण काम के लागत विश्लेषण म स्पष्टता राखे जाय।
गांजा-बरामद
कांकेर जिला म पुलिस ह कचरा ले बोरी म भरे चार सौ किलो ले जादा के गांजा पकड़े हे। पकड़े गे गांजा के अनुमानित कीमत करीबन दू करोड़ रूपिया ले जादा के बताय जात हे। जानबा के अनुसार गांजा तस्करी के सूचना मिले के बाद पुलिस ह केशकाल ले कांकेर के बीच तीस किलोमीटर तक तस्कर मनके पीछा करे रिहीन। फेर, ओमन भाग गे रिहीन। गांव वाला मनके सूचना म पुलिस ह कचरा के ढेर ले गांजा के बोरी ल जब्त करे हे।