केन्द्रीय मंत्रिमंडल-अग्निवीर
केन्द्रीय मंत्रिमंडल ह चार बछर के सेवा पूरा करे के बाद सेवा ले बाहिर होवइया अग्निवीर मनके सेवा अवधि दू बछर बढ़ाय के मंजूरी दे देहे। नई दिल्ली म आज मंत्रिमंडल के बइठका के बाद पत्रकार मन ल जानकारी देवत प्रमुख रक्षा अध्यक्ष जनरल एन.एस. राजा सुब्रमणि ह सेवा ले बाहिर होवइया पचहत्तर प्रतिशत अग्निवीर मन ल अब दू बछर के अतिरिक्त सेवा अवसर दे जाही। एखर बाद सशस्त्र बल म बने रेहे के इच्छुक अग्निवीर मन ल सेना म सामिल करे जाही। ओमन बतईन कि पच्चीस प्रतिशत अग्निवीर मन ल योग्यता के मुताबिक नियमित बल म सामिल करे जाही। ओमन किहीन कि सेवा अवधि बाढ़े के संग अग्निवीर मन ल जादा मेहनताना मिलही। जनरल राजा सुब्रमणि ह बतईन कि अग्निपथ योजना बछर दू हजार बाईस म सुरू होय रिहीस। ओ बेरा ए तय करे गे रिहीस हे कि अग्निवीर मनके प्रदर्सन के सरलग मूल्यांकन होही अउ योजना के बेरा-बेरा म समीक्षा घलो होही।
उहें, केन्द्रीय मंत्रिमंडल ह विशेष फास्ट ट्रैक अदालत के केन्द्र प्रायोजित योजना ल अवइया पांच बछर बर जारी राखे के मंजूरी देहे। एमा विशेष रूप ले पॉक्सो मामला के सुनवाई बर बनाय गे अदालत घलो सामिल हे। योजना म आने-आने राज्य अउ केन्द्रसासित प्रदेस म साढ़े आठ सौ फास्ट ट्रैक विशेष अदालत चलाय के प्रावधान हवय। ए योजना मार्च दू हजार इकतीस तक जारी रइही।
प्रधानमंत्री-एशियाई पैरा खेल
प्रधानमंत्री नरेन्द्र मोदी काली नई दिल्ली के इंदिरा गांधी खेल परिसर म एशियाई पैरा खेल- दू हजार छब्बीस म भाग लेवइया भारतीय खिलाड़ी मन ले गोठबात करही। भारत ह जापान के आइची-नागोया म होय एशियाई पैरा खेल म अभी तक के अपन सबले बने प्रदर्सन करीस हे। देस के संतानवे पैरा खिलाड़ी मन ह एक सौ चौदह पदक जीतीन। एमा तीस स्वर्ण, पैंतीस रजत अउ उनचास कांस्य पदक सामिल हे। कार्यक्रम म पदक विजेता खिलाड़ी, उंखर प्रसिक्षक, भारतीय पैरालंपिक समिति अउ भारतीय ओलंपिक संघ के अधिकारी, राष्ट्रीय खेल महासंघ के प्रतिनिधि अउ युवा कार्यक्रम खेल मंत्रालय के अधिकारी सामिल होही।
राज्योत्सव-प्रदर्शनी
छत्तीसगढ़ राज्य स्थापना के छब्बीस बछर पूरा होय म नवा रायपुर म राखे गे राज्योत्सव म वन अउ जलवायु परिवर्तन विभाग के प्रदर्शनी ल पहिली इनाम मिले हे। राज्योत्सव के तीसर दिन काली राज्य अलंकरण समारोह म मुख्यमंत्री विष्णुदेव साय ह ए सम्मान दीन। ‘‘बदलता बस्तर-संवरता छत्तीसगढ़‘‘ थीम म तियार ए प्रदर्सनी म बस्तर म सांति के संग बाढ़त पर्यटन अउ आजीविका के मउका ल लेके प्रदेस म वन अउ वन्यजीव संरक्षण के पहल ल सुघ्घर ढंग ले देखाय गीस। एखर बर वन मंत्री केदार कश्यप ह विभागीय अधिकारी-कर्मचारी अउ वन धन केन्द्र ले जुड़े सदस्य मन ल बधाई दीन हे।
एसआईआर-फॉर्म 6
भारत निर्वाचन आयोग ह विशेष गहन पुनरीक्षण-एस.आई.आर के दउरान जारी करे गे मसौदा मतदाता सूची म नाम नइ होय म पहिली ले पंजीयन होय मतदाता मनके कोति ले फारम-छै जमा करे के संबंध म स्पष्टीकरण जारी करे हे। सबो राज्य अउ केन्द्रसासित प्रदेस के मुख्य चुनाव अधिकारी मन ल लिखे चिट्ठी म आयोग ह केहे हे कि अइसन मामला म फारम-छै जमा करना गलत घोसना नइ माने जाही अउ न ही एमा जनप्रतिनिधित्व अधिनियम म कोनों किसम के कार्रवाई करे जाही।
मुख्यमंत्री-बैठक
मुख्यमंत्री विष्णुदेव साय ह कहिन हे कि छत्तीसगढ़ ल प्राकृतिक संसाधन के संग ज्ञान, विज्ञान तकनीक अउ नवाचार के सक्ती ले भरपूर बनाना राज्य सरकार के संकलप हे। मुख्यमंत्री ह आज रईपुर म भारतीय विज्ञान संस्थान बेंगलुरू के निदेशक प्रोफेसर जी. रंगराजन अउ संस्थान के बड़का वैज्ञानिक अउ राज्य सरकार के अधिकारी मन संग राखे गे उच्च स्तरीय बइठका म बोलत ए बात कहिन। बइठका म भारतीय विज्ञान संस्थान अउ छत्तीसगढ़ सरकार के बीच तीन महत्वाकांक्षी परियोजना म मदद के संभावना ल लेके गोठबात होइस। एमा प्रदेस म विश्व स्तरीय टेस्टिंग सेंटर, विज्ञान अउ गणित शिक्षक प्रसिक्षण संस्थान के स्थापना के प्रस्ताव सामिल हे। बइठका म छत्तीसगढ़ ल विज्ञान प्रौद्योगिकी, उच्च सिक्षा, कौशल विकास अउ चिकित्सा अनुसंधान के प्रमुख केन्द्र के रूप म विकसित करे के संभावना उपर गोठबात करे गीस।
सौरभ चंद्राकर-सीबीआई
महादेव ऑनलाइन सट्टा ऐप मामला के मुख्य आरोपी सौरभ चंद्राकर ल आज रईपुर के सीबीआई कोर्ट म पेस करे गीस। कोर्ट ह सीबीआई ल आठ दिन के कस्टोडियल रिमांड मंजूर करे हे। सीबीआई के टीम सौरभ चंद्राकर ल दिल्ली लेके जाही, जिहां ओखर ले पूछताछ होही। रिमांड के बेरा खतम होय के बाद सौरभ चंद्राकर ल बारह नवंबर के फेर कोर्ट म पेस करे जाही। खबर के मुताबिक करीबन छह हजार करोड़ रूपिया के सट्टा घोटाला म आरोपी सौरभ चंद्राकर ल काली सीबीआई के टीम दिल्ली ले रईपुर लेके आय रिहीस। एखर पहिली, सौरभ चंद्राकर ल सम्मार के दिल्ली के राउज एवेन्यू कोर्ट म पेस करे गे रिहीस।
मुख्य सचिव-बैठक
मुख्य सचिव विकासशील ह किहीन हे कि छत्तीसगढ़ म सिनेमैटिक अउ प्राकृतिक दृश्य के अपार संभावना हे। आज मंत्रालय म राखे गे उच्च स्तरीय बइठका म मुख्य सचिव ह किहीन कि राज्य के प्रकृति के सुघरई, सांस्कृतिक विरासत अउ कतकोन पर्यटन स्थल ल देस-विदेस के फिल्म बनइया मनके आगू प्रभावी ढंग ले देखाय के जरूरत हे। मुख्य सचिव ह अधिकारी मन ल निरदेस दीन कि प्रदेस म अब फिलिम सूटिंग के मुताबिक जघा के चिन्हारी करके ओखर विकास करे जाय। मुख्य सचिव ह किहीन कि फिलिम बनाय के काम बाढ़े ले पर्यटन क्षेत्र ल बढ़ावा मिलही अउ इहां के लोगन ल कलाकार, तकनीशियन, होटल उद्योग अउ युवा मन बर रोजगार के नवा मउका मिलही। बइठका म राज्य के मौजूदा फिलिम नीति ल अउ जादा व्यवहारिक बनाय म गोठबात करे गीस।
बीजापुर-वार्तालाप
पत्र सूचना कार्यालय-पीआईबी रईपुर कोति ले आज बीजापुर जिला के गर्ल्स पोटाकेबिन ऑडिटोरियम म ‘‘वार्तालाप‘‘ कार्यक्रम होइस। ‘‘शांति से विकास की ओर‘‘ विषय म राखे गे ए कार्यक्रम म कलेक्टर विश्वदीप ह जिला म चलत विकास काम अउ अवइया योजना के जानकारी दीन। ओमन किहीन कि माओवाद के प्रभाव कमती होय के बाद जिला म विकास काम ल गति मिले हे। पाछु तीन बछर म नब्बे ले जादा गांव तक बिजली अमराय गेहे। उहें, पचास ले जादा गांव म बिजली के काम चलत हे। जिला म एक हजार किलोमीटर ले जादा रद्दा बनाय जात हे। कलेक्टर ह बतईन कि विकसित भारत जी-रामजी योजना म जिला म करीबन अस्सी करोड़ रूपिया ले जादा के काम मंजूर करे गेहे।
स्वामी आत्मानंद स्कूल-उत्तर पुस्तिका
प्रदेस के स्वामी आत्मानंद उत्कृष्ट अंग्रेजी माध्यम विद्यालय म एक हजार आठ सौ बारह खाली संविदा पद म भर्ती बर राखे गे कम्प्यूटर आधारित परीक्षा के उत्तर पुस्तिका काली पांच नवंबर के जारी करे जाही। उम्मीदवार आठ नवंबर तक उत्तर पुस्तिका म ऑनलाइन दावा आपत्ति दरज करा सकही।
लोक सिक्षण संचालनालय के मुताबिक ए पद म संविदा भर्ती परीक्षा इकतीस अक्टूबर ले आज संझा तक आने-आने पाली म राखे गीस। परीक्षा म करीबन अट्ठाईस हजार ले जादा उम्मीदवार संघरीन।
एनएमएसएसई-परीक्षा तिथि
राष्ट्रीय साधन सह प्रावीण्य छात्रवृत्ति परीक्षा – एन.एम.एम.एस.ई. के तारीख बदल दे गेहे। अब ए परीक्षा बारह दिसंबर के जघा म अवइया बछर तीन जनवरी के होही। छत्तीसगढ़ माध्यमिक सिक्षा मंडल ह ए संबंध म अधिसूचना जारी कर देहे। मंडल ह पहिली ए परीक्षा के आयोजन खातिर बाहर दिसंबर के तारीख तय करे रिहीस। इही दिन केन्द्रीय माध्यमिक सिक्षा बोर्ड सी.बी.एस.ई. कोति ले सी-टेट के परीक्षा बारह अउ तेरह दिसंबर के छत्तीसगढ़ के आने-आने केन्द्र म होही। दूनों परीक्षा के एके बेरा म होय ले परीक्षा केन्द्र के व्यवस्था प्रभावित होय के आसंका ल देखत परीक्षा के तारीख म फेरबदल करे गेहे।
अउ अब थोरकुन समाचार सार म –
– एंटी करप्शन ब्यूरो-एसीबी के टीम ह राजनांदगांव जिला के बसंतपुर थाना म पदस्थ प्रधान आरक्षक किशोर यादव ल बीस हजार रूपिया के रिश्वत लेवत गिरफ्तार करे हे।
– कोरबा जिला म आज कुसमुंडा-गेवरा मुख्य मार्ग म दू ठिन गाड़ी के बीच टक्कर होय ले एक माईलोगिन समेत दू झिन के मउत होगे।
अउ
– दक्षिण पूर्व मध्य रेलवे के रईपुर मंडल के भाटापारा-हथबंध रेलखंड म सिद्धबाबा रेलवे समपार फाटक म मरम्मत काम के चलत सड़त यातायात आज बिहनिया नौ बजे ले छह नवंबर के संझा छै बजे तक बंद रइही।