राज्योत्सव-समापन
छत्तीसगढ़ राज्य स्थापना के छब्बीस बछर पूरा होय के मउका म नवा रायपुर म चलत तीन दिन के राज्योत्सव के आज आखिरी दिन हे। समापन कार्यक्रम म केन्द्रीय गृह अउ सहाकरिता मंत्री अमित षाह सामिल होवत हे। उहें, कार्यक्रम के अध्यक्षता मुख्यमंत्री विश्णुदेव साय ह करत हे। कार्यक्रम म कतकोन जघा म अच्छा काम करइया मन ल राज्य अलंकरण ले सम्मानित करे जाही।
ए कार्यक्रम म केन्द्रीय मंत्री श्री षाह ह महतारी वंदन योजना के तैंतीसवां किष्त ल जारी करइया हे। ए बेरा म सड़सठ लाख चालीस हजार ले जादा पात्र माईलोगिन मनके बैंक खाता म छह सौ बत्तीस करोड़ तिरसठ लाख सड़सठ हजार ले जादा के राषि डाले जाही।
राज्योत्सव के समापन कार्यक्रम म प्रदेस के प्रसिद्ध पंथी गायिका पद्मश्री उशा बारले ह अपन प्रस्तुति दीही। उहें, प्रसिद्ध पार्ष्व गायक अभिजीत भट्टाचार्य के घलो उंखर गाना के संग प्रस्तुति होना हे।
एखर ले पहिली, केन्द्रीय गृहमंत्री श्री षाह ह नवा रायपुर अटल नगर के सेक्टर सोलह के पीपल वन म विकसित भारत संकल्प पार्क के लोकार्पण करीन।एखर ले पहिली नवा रायपुर म होय राज्योत्सव के दूसर दिन काली राज्यपाल रमेन डेका ह मुख्य अतिथि के रूप म सामिल होइन। ओमन ह कहिन कि छत्तीसगढ़ ह अपन छब्बीस बछर के यात्रा ल पूरा कर लेहे अउ अब ए राज्य ह नवा जिम्मेदारी, संभावना अउ संकल्प के साथ आगू बाढ़त हे। ओमन ह उम्मीद जतईन हे कि प्रदेस के जवान लइका, माईलोगिन, किसान, मजूर अउ जनजातीय समाज के सामूहिक प्रयास ले छत्तीसगढ़ के विकसित भारत के निर्माण म महत्वपूर्ण भूमिका रइही। प्रदेस के कतकोन जिला मुख्यालय म घलो जिला स्तरीय राज्योत्सव के आयोजन करे जात हे।
नवीकरणीय ऊर्जा शिखर सम्मेलन
नई दिल्ली के भारत मंडपम म चलत भारत नवी-करणीय ऊर्जा षिखर सम्मेलन अउ एक्सपो म छत्तीसगढ़ ह ऊर्जा क्षेत्र म निवेस के संभावना अउ भविश्य के अपन योजना ल प्रमुखता ले प्रस्तुत करीन हे। सम्मेलन के बेरा म मुख्यमंत्री विश्णुदेव साय ह केन्द्रीय मंत्री अउ कतकोन राज्य के मुख्यमंत्री मनके उपस्थिति म होय उच्च स्तरीय गोलमेज बइठका म भाग लीन। ओमन ह अवइया पांच बछर म छत्तीसगढ़ के ऊर्जा क्षेत्र म लगभग पांच लाख सात हजार करोड़ रूपिया के निवेस के संभावना के जानकारी दीन। संगेसंग देस-विदेस के निवेसक अउ उद्योग जगत के प्रतिनिधि मन ल प्रदेस म निवेस बर आमंत्रित घलो करीन।
मुख्यमंत्री ह बतईन कि राज्य सरकार ह बछर दू हजार तीस तक प्रदेस के हरित ऊर्जा क्षमता ल तीन हजार मेगावॉट ले बढ़ाके पन्द्रह हजार मेगावॉट करे के लक्ष्य राखे हे। सम्मेलन के दउरान मुख्यमंत्री ह देस-बिदेस ले आय निवेसक अउ उद्योग जगत के प्रतिनिधि मन ले घलो गोठ करीन। दू ले पांच नवंबर तक चलइया ए वैष्विक सम्मेलन म एक सौ तीस ले जादा देस के प्रतिनिधि मन ह भाग लेवत हे।
केन्द्रीय गृहमंत्री-एफआरआरओ
केन्द्रीय गृहमंत्री अमित षाह ह अवइया बछर तक सबो राज्य के राजधानी म विदेषी क्षेत्रीय पंजीकरण कार्यालय-एफ.आर.आर.ओ. बनाय के निरदेस दीन हे। गृह मंत्रालय ह किहीन हे कि पर्यटन, चिकित्सा अउ षिक्षा के उद्देष्य ले भारत आय वाले विदेषी मनके संख्या म बड़का वृद्धि होय हे। एखरे सेती सबो राज्य म एफ.आर.आर.ओ. नियुक्त करे के जरूरत हवय, जेखर ले एखर ले जुड़े सेवा आसानी ले हो सकही।
देवउठनी-स्थानीय अवकाश
राज्य सरकार ह रायपुर अउ नवा रायपुर अटल नगर के सबो सासकीय कार्यालय म देवउठनी एकादषी म बीस नवंबर के छुट्टी देके घोशणा करीन हे। एला लेके सामान्य प्रसासन विभाग ह आदेस जारी कर देहे। एखर ले पहिली राज्य सरकार ह नौ नवंबर के गोवर्धन पूजा के छुट्टी घोशित करे रिहीन, जेला बदल के सरकार ह बीस नवंबर कर देहे। ए छुट्टी ह बैंक, कोशालय अउ उप कोशालय म लागू नइ होही।
एनआईटी दीक्षांत समारोह
राष्ट्रीय प्रौद्योगिकी संस्थान-एनआईटी रायपुर के सत्रहवां दीक्षांत समारोह आज पंडित दीनदयान उपाध्याय ऑडिटोरियम म आयोजित करे गीस, जेमा केन्द्रीय कोयला अउ खनन मंत्री जी. किषन रेड्डी ह ए कार्यक्रम म मुख्य अतिथि के रूप म सामिल होइन। उहें, विषिट अतिथि के रूप म मुख्यमंत्री विश्णुदेव साय रिहीन। ए समारोह म एक हजार तीन सौ चौंसठ लइका मन ल उपाधि दे गीस। उहें, पच्चीस झिन ल स्वर्ण पदक अउ पच्चीस झिन ल रजत पदक दे गीस।
सुंदरलाल शर्मा विवि-दीक्षांत समारोह
राज्यपाल रमेन डेका ह आज बिलासपुर के पंडित सुंदरलाल षर्मा मुक्त विष्वविद्यालय के सातवां दीक्षांत समारोह म सामिल होइन। कार्यक्रम म पाछु पांच बछर के चौबीस हजार आठ सौ पढ़ईया लइका मन ल स्नातक, स्नातकोत्तर अउ डिप्लोमा के उपाधि दे गीस। ए कार्यक्रम म राज्यपाल ह कहिन कि युवा मन ह आत्मविष्वास, सरलग कोसिस अउ अपन प्रतिभा के बल म जिनगी म आगू बाढ़य। ए बेरा म विष्वविद्यालय के उन्नत आधिकारिक वेबसाइट के लोकार्पण अउ स्मारिका ‘‘अभ्युदय‘‘ के विमोचन घलो करे गीस।
जशपुर युवा संवाद कार्यक्रम
जषपुर जिला के सासकीय स्नातकोत्तर महाविद्यालय म आज विकसित भारत युवा संवाद कार्यक्रम के आयोजन करे गीस। युवा कार्यक्रम खेल मंत्रालय के अंतर्गत ‘‘मेरा युवा भारत‘‘ कोति ले आयोजित ए कार्यक्रम म जिला के दू सौ ले जादा पढ़ईया लइका अउ युवा मन ह भाग लीन।
कार्यक्रम ल संबोधित करत हुए विधायक रायमुनी भगत ह किहीन कि युवा षक्ति ह देस के सबले बड़े ताकत हरय अउ विकसित भारत ल बनाय म इंखर भूमिका महत्वपूर्ण हवय। ओमन ह लइका मन ले भ्रामक खबर अउ भ्रामक सूचना ले दूर रेहे के अपील करीन हे।
वीबी/जीरामजी-श्रमिक
विकसित भारत-जीरामजी के अंतर्गत श्रमिक मनके ई-केवाईसी म छत्तीसगढ़ ह राश्ट्रीय स्तर म अच्छा प्रदर्सन करे हे। प्रदेस ह अकुषल श्रमिक मनके ई-केवाईसी म इंक्यानवे प्रतिषत ले जादा के उपलब्धि के संग देस के सबो राज्य अउ केन्द्रसासित प्रदेस के संयुक्त रैंकिंग म चौथा अउ राज्य म पहिली स्थान पाय हे।
सामाजिक सुरक्षा नियम
राज्य सरकार ह श्रमिक अउ कर्मचारी मनके सामाजिक सुरक्षा अधिकार ल मजबूत करे के दिसा म छत्तीसगढ़ सामाजिक सुरक्षा नियम अधिसूचित कर देहे। श्रम विभाग ह ए बारे म राजपत्र म अधिसूचना घलो प्रकासित करे हे। नवा व्यवस्था म कर्मकार क्षतिपूर्ति, प्रसूति सुविधा, उपदान भुगतान, भवन अउ आने सन्निर्माण कर्मकार कल्याण अउ असंगठित कर्मकार मनके सामाजिक सुरक्षा ले जुड़े प्रावधान सामिल हरय।
चक्रवात-मुरासू
भीशण चक्रवाती तूफान मुरासू ह आज बिहनिया दक्षिण आंध्रप्रदेष के तीर म ओंगोल करा, नेल्लोर अउ नरसापुर के बीच पहुंचीस अउ अब ए तूफान ह कमजोर होवत हे।
मुरासू के सेती ऐति छत्तीसगढ़ के कतकोन जिला म जोरदरहा पानी गिरत हे। राजधानी रायपुर म आज दिनभर बादल करे के बाद संझा के बारिस होइस। मौसम विभाग ह आज प्रदेस के उन्नीस जिला अउ काली चार नवंबर के पन्द्रह जिला बर यलो अलर्ट जारी करे हे। ए बेरा म ए जिला म हल्का ले मध्यम बरसा होय के संभावना हवय।