प्रधानमंत्री-ऊर्जा सम्मेलन
प्रधानमंत्री नरेंद्र मोदी आज नई दिल्ली के भारत मंडपम् म चार दिवसीय भारत नवीकरणीय ऊर्जा सम्मेलन अउ प्रदर्सनी के उद्घाटन करीन। नवीन अउ नवीकरणीय ऊर्जा मंत्रालय कोति ले आयोजित ए सम्मेलन के बिसय हे- ‘निवेश, नवाचार और प्रेरणा‘।
ए सम्मेलन अउ एक्सपो म एक सौ तीस ले जादा देस के प्रतिनिधि भाग लिही। एमा चालीस ले जादा मंत्री, नीति-निर्माता, निवेशक, वित्तीय संस्थान अउ उद्योग जगत के दिग्गज सामिल होही। ए सम्मेलन स्वच्छ ऊर्जा म निवेस, उद्योग जगत के भागीदारी अउ तकनीकी साझेदारी बर एक वैश्विक मंच के काम करही।
उहें, ए सम्मेलन म छत्तीसगढ़ घलो अपन ऊर्जा क्षेत्र के उपलब्धि अउ निवेस संभावना के संग भागीदारी करत हे। मुख्यमंत्री विष्णुदेव साय आज भारत मंडपम पहुंचके छत्तीसगढ़ पवेलियन के अवलोकन करही। पवेलियन म राज्य के ऊर्जा क्षमता, ग्रीन एनर्जी परियोजना अउ निवेस के मउका ल प्रदर्सित करे गेहे। एखर संगेसंग मुख्यमंत्री निवेसक अउ उद्योग प्रतिनिधि मन ले घलो गोठबात करही।
प्रधानमंत्री-स्वच्छ ऊर्जा
प्रधानमंत्री नरेंद्र मोदी ह किहीन हे कि भारत म स्वच्छ ऊर्जा के दिसा म तेजी ले बदलाव होवत हे अउ देस के ऊर्जा जरूरत मन ल पूरा करे म सौर ऊर्जा के भूमिका सरलग बाढ़त हे। श्री मोदी ह नवीन अउ नवीनीकरणीय ऊर्जा मंत्री प्रल्हाद जोशी अउ ब्लूमबर्ग लिमिटेड के संस्थापक माइकल आर. ब्लूमबर्ग डहार ले लिखे गे एक लेख ल साझा करत ए बात किहीन। प्रधानमंत्री ह श्री जोशी के एक ठिन आने लेख ल साझा करत हुए किहीन कि भारत के सौर ऊर्जा यात्रा नवा मउका के द्वार खोलत हे।
सहकारी विकास निगम-बैठक
केंद्रीय गृह अउ सहकारिता मंत्री अमित शाह के पगरइती म राष्ट्रीय सहकारी विकास निगम के महापरिषद के तिरानवे बइठका नई दिल्ली म आयोजित होइस। बइठका म छत्तीसगढ़ राज्य सहकारी विपणन संघ-मार्कफेड के अध्यक्ष शशिकांत द्विवेदी ह प्रदेस के अगुवई करीन।
बइठका म श्री द्विवेदी ह सहकारिता क्षेत्र म पाछू पांच बछर के दउरान होय बदलाव अउ राष्ट्रीय सहकारी विकास निगम के उपलब्धि के उल्लेख करीन। ओमन छत्तीसगढ़ म किसान, ग्रामीण अर्थव्यवस्था अउ सहकारी समिति मन ल मजबूत बनाय बर राज्य सरकार के प्राथमिकता अउ कोसिस के जानकारी घलो दीन। बइठका म सहकारी संस्था के वित्तीय अउ ढांचागत क्षमता बढ़ाय अउ सहकार ले समृध्दि के लक्ष्य ल आगू बढ़ाय उपर गोठगात करीन। एमा देसभर के सहकारी क्षेत्र के वरिष्ठ अधिकारी अउ प्रतिनिधि मन ह भाग लीन।
केंद्रीय गृहमंत्री-छत्तीसगढ़
केंद्रीय गृह अउ सहकारिता मंत्री अमित शाह काली तीन नवंबर के छत्तीसगढ़ के दउरा म आही। ए दउरान श्री शाह रायपुर अउ नवा रायपुर म राखे गे कारीकरम म सामिल होही। निर्धारित कारीकरम के मुताबिक, श्री शाह काली मंझनिया रायपुर के पंडरी स्थित एक निजी अस्पताल के लोकार्पण करही। एखर बाद श्री शाह संझा चार बजे नवा रायपुर अटल नगर के सेक्टर-सोलह स्थित पीपल वन म विकसित भारत संकल्प पार्क के लोकार्पण करही। श्री शाह काली संझा नवा रायपुर स्थित राज्योत्सव मैदान म छत्तीसगढ़ राज्योत्सव के समापन म घलो सामिल होही।
राज्योत्सव
छत्तीसगढ़ राज्योत्सव के आज दूसर दिन हरय। आज के कारीकरम म राज्यपाल रमेन डेका माइपहुना के रूप म सामिल होही। उहें, पर्यटन अउ संस्कृति मंत्री राजेश अग्रवाल कारीकरम के पगरइति करही। राज्योत्सव म आज लोकसंगीत, ओडिसी, कथक, पंडवानी अउ सुआ नृत्य समेत कुल ग्यारा सांस्कृतिक प्रस्तुति आयोजित करे जाही। एखर बाद रायपुर के कलाकार सुनील सोनी ह अपन प्रस्तुति दिही। उहें, बॉलीवुड के पार्शव गायिका स्वास्ति मेहुल डहार ले गाना गाय जाही।
एयर-शो
छत्तीसगढ़ राज्य स्थापना दिवस के मउका म नवा रायपुर के सेंध लेक म आज भारतीय वायु सेना ह एयर-शो के आयोजन करीस। ए मउका म राज्यपाल रमेन डेका ह वायु सेना के जवान मन के अद्भुत शौर्य, साहस अउ हवाई कौशल के प्रदर्सन देखिन। कारीकरम म आकाशगंगा स्काईडाइविंग टीम के जवान मन ह पैरासूट ले उतरके अपन साहस अउ सटीक नियंत्रण के प्रदर्सन घलो करीन। उहें, गरूड़ कमांडोज ह हेलीकॉप्टर ले रेस्क्यू अउ कॉम्बैट ऑपरेसन चलाय के नजारा पेस करीन।
कारीकरम म उपमुख्यमंत्री विजय शर्मा, संस्कृति मंत्री राजेश अग्रवाल समेत जनप्रतिनिधि अउ बड़का संख्या म दर्सक मन मौजूद रिहीन।
सौरभ चंद्राकर-गिरफ्तार
केंद्रीय अन्वेषण ब्यूरो-सीबीआई ह छह हजार करोड़ रूपिया के महादेव ऑनलाइन सट्टाबाजी गिरोह के सरगना अउ मुख्य साजिशकर्ता सौरभ चंद्राकर ल ओमान ले भारत लाइस। इंटरपोल के रेड कार्नर नोटिस के बाद रॉयल ओमान पुलिस ह चंद्राकर ल गिरफ्तार कर लेहे। सीबीआई के एक टीम ओला वापस लाने बर ओमान के मस्कट गे रिहीस। भ्रष्टाचार निवारण अधिनियम अउ छत्तीसगढ़ जुआ निषेध अधिनियम के तहत आपराधिक साजिश, धोखाधड़ी, जालसाजी अउ लोक सेवक रिश्वतखोरी ले जुड़े दू आरोप पत्र मन म सौरभ चंद्राकर ल मुख्य आरोपी बनाय गेहे। प्रवर्तन निदेशालय-ईडी ह बड़ पैमाना म धन शोधन के संबंध म अभियोग दायर करे हे। चंद्राकर उपर अवैध फायदा ल कतकोन जघा के लेनदेन के जरिया ले वितरित करे जाय अउ हवाला के जरिया ले भारत ले बाहिर भेजे जाय के आरोप हे।
एनआईटी दीक्षांत समारोह
राष्ट्रीय प्रौद्योगिकी संस्थान-एनआईटी रायपुर के सत्रहवां दीक्षांत समारोह काली तीन नवंबर के आयोजित करे जाही। केंद्रीय कोयला अउ खान मंत्री जी. किशन रेड्डी ए कारीकरम के माईपहुना होही। उहें, विशिष्ट पहुना के रूप म मुख्यमंत्री विष्णुदेव साय मौजूद रइही। समारोह के पगरइति एनआईटी के बोर्ड ऑफ गवर्नस के अध्यक्ष डॉक्टर सुरेश हावरे अउ संस्थान के निदेशक प्रोफेसर एन.व्ही. रमना राव करही।
दीक्षांत समारोह म एक हजार तीन सौ चौंसठ विद्यार्थी मन ल उपाधि दे जाही। उहें, विद्यार्थी मन ल पच्चीस स्वर्ण पदक अउ पच्चीस रजत पदक घलो दे जाही।
जीरामजी-अधिसूचित
केंद्र सरकार ह विकसित भारत-रोजगार अउ आजीविका मिसन-ग्रामीण-विकसित भारत-जी-राम-जी के तहत सिकायत मनके निपटारा बर नियम अधिसूचित करे हे। ए नियम के तहत राज्य सरकार मन डहार ले ग्राम पंचायत, ब्लॉक अउ जिला स्तर म समयबध्द, बहु-स्तरीय सिकायत निवारण व्यवस्था स्थापित करे जाही। मंत्रालय ह किहीन कि संबंधित स्तर मन उपर नामित ‘सिकायत निवारण अधिकारी‘ सिकायत मिले म उंखर पंजीकरण करके जांच करे उंखर निपटारा करे बर जिम्मेदार होही। सिकायत दर्ज कराय के काम ल सरल बनाय बर कोनो भी मनखे योजना के काम ले जुड़े कोनो प्रकार के मामला म सिकायत कर सकत हे। एखर बर संबंधित अधिकारी के समक्ष व्यक्तिगत रूप ले स्पीड पोस्ट, टेलीफोन या केंद्र सरकार डहार ले निर्धारित डिजिटल माध्यम ले सिकायत करे जा सकही। नियम के अनुसार सिकायत के जांच सात कार्य दिवस के भीतर पूरा करना होही अउ सिकायत मिले के पंद्रह दिन के भीतर निपटारा करना होही।
हॉकी-लीग
छत्तीसगढ़ हॉकी लीग के पहिली सीजन के खिताब मैनपाट टाइटंस ह जीत लेहे। काली खेले गे फाइनल मुकाबला म सुग्घर प्रदर्सन करत हुए मैनपाट टाइटंस ह संस्कारधानी स्ट्राइकर्स ल चार-दू ले हराइन। पुरस्कार वितरण समारोह म मुख्यमंत्री विष्णुदेव साय अउ केंद्रीय खेल मंत्री मनसुख मांडविया ह विजेता अउ उपविजेता टीम ल ट्रॉफी दीन। संगेसंग टूर्नामंेट म उत्कृष्ट प्रदर्सन करइया खिलाड़ी मन ल सम्मानित घलो करे गीस।
अउ अब पेस हे मौसम के हाल…
बंगाल के खाड़ी के उपर बने भीषण चक्रवाती तूफान मुरासु पश्चिम-उत्तर-पश्चिम दिसा म आगू बाढ़त हे। चक्रवात अंाध्र प्रदेस के नेल्लोर ले करीबन एक सौ साठ किलोमीटर पूर्व-दक्षिण-पूर्व अउ चेन्नई ले एक सौ अस्सी किलोमीटर उत्तर-पूर्व म केंद्रित हे। मौसम विभाग ह बतइन कि एखर आज रतिहा बेरा म नेल्लोर अउ नरसापुर के बीच दक्षिण आंध्र प्रदेस के तट ल पार करे के संभावना हे।
मौसम विभाग ह चक्रवाती तूफान मुरासु के असर ले छत्तीसगढ़ म अवइया अड़तालीस घंटा के दउरान जोरदरहा पानी गिरे चेतावनी दे गेहे। संगेसंग प्रदेस के एक-दू जघा म तेज हवा चले अउ गाज गिरे के आसंका घलो जताय गेहे।