छत्तीसगढ़ राज्योत्सव
छत्तीसगढ़ राज्य स्थापना के छब्बीस बछर पूरा होय के मउका म नवा रईपुर अटल नगर म अब ले कुछ देर पहली तीन दिन वाले राज्योत्सव के सुभारंभ केंद्रीय श्रम अउ रोजगार मंत्री डॉक्टर मनसुख मांडविया ह करीन। कारीकरम के पगरइती मुख्यमंत्री विष्णुदेव साय करिस। समारोह म विधानसभा अध्यक्ष डॉक्टर रमन सिंह, केंद्रीय राज्य मंत्री तोखन साहू, उपमुख्यमंत्री अरूण साव अउ विजय शर्मा समेत राज्य सरकार के मंत्री, सांसद अउ विधायक अउ आने जन प्रतिनिधि मन उपस्थित रिहिन।
राज्योत्सव म प्रदेस के समृध्द सांस्कृतिक विरासत, लोककला, जनजाति परंपरा अउ विकास यात्रा के झलक देखे ल मिलही। तीन दिन तक होवइया ए राज्योत्सव म प्रदेस के आने-आने अंचल के लोक कलाकार मनके संगे राष्ट्रीय स्तर के नामी कलाकार मन अपन सांस्कृतिक प्रस्तुति देइही।
फेर, राज्योत्सव के दूसर दिन काली दू नवंबर के राज्यपाल रमेन डेका माई पहुना रइही।
उहें, राज्योत्सव के समापन समारोह म केंद्रीय गृह अउ सहकारिता मंत्री अमित शाह सामिल होही।
छत्तीसगढ़ राज्य स्थापना दिवस के मउका म प्रदेस के आने-आने जिला मुख्यालय मन म जिला स्तरीय राज्योत्सव राखे गेहे।
छत्तीसगढ़ राज्योत्सव
मुख्यमंत्री विष्णुदेव साय ह छत्तीसगढ़ राज्य स्थापना दिवस के मउका म प्रदेसवासी मन ल बधाई अउ सुभकामना दीन हे। ओमन किहीन कि ए बछर के राज्योत्सव ह कई मायने म ऐतिहासिक अउ बिसेस हे। ए पहलइया राज्योत्सव होही, जब छत्तीसगढ़ ह नक्सलवाद ले मुक्त होके सांति, विस्वास अउ विकास खातिर नवा युग सोज आगू बाढ़त हे। उहें, मुख्यमंत्री ह आज वायु सेना डहार ले नवा रईपुर अटल नगर स्थित सेंध लेक म राखे गे हवई करतब ले देखिन। भारतीय वायु सेना के आकाशगंगा स्काईडाइविंग टीम, एमआई-सत्रह हेलीकॉप्टर अउ सारंग हेलीकॉप्टर डिस्प्ले टीम के देखाय करतब ह साहस सटिकता अउ सुग्घर व्यावसायिक दक्षता के परिचय दीस।
राज्य अलंकरण-सम्मान
राज्य सरकार ह आज राज्य अलंकरण सम्मान के घोसना कर देहे। संस्कृति मंत्री राजेश अग्रवाल ह आज रईपुर म होय एक ठिन पत्रकारवार्ता म बतइन कि राज्य शासन डहार ले कई ठिन क्षेत्र म सुग्घर योगदान देवइया विभूति अउ संस्था मन ल राज्य अलंकरण देबर चुने गेहे। ओमा सामाजिक सेवा, साहित्य, कला संस्कृति, पत्रकारिता, कृषि, शिक्षा, खेल अउ जनजाति उत्थान समेत आने-आने क्षेत्र म छत्तीस ठिन अलंकरण सामिल हे।
श्री अग्रवाल ल बतइन कि शहीद वीर नारायण सिंह स्मृति सम्मान बर डूमनलाल धु्रव, यति यतनलाल सम्मान बर विश्व गीता धेनु गोविंद पक्षी सेवा धाम कुम्हारी, गुण्डाधुर सम्मान बर संजू देवी अउ मिनीमाता सम्मान बर लोक आस्था सेवा संस्थान गरियाबंद ल चुने गेहे।
अइसने, गुरू घासीदास सामाजिक चेतना अउ अनुसूचित जाति उत्थान सम्मान सुखचंद भास्कर ल, ठाकुर प्यारेलाल सिंह पुरस्कार, प्राथमिक कुडुक मछुवा सहकारी समिति मर्यादित चित्रकोट ल, हबीब तनवीर सम्मान रईपुर के डॉक्टर पुरूषोत्तम चंद्राकर ल अउ महाराजा प्रवीरचंद भंजदेव सम्मान बालोद के टोमन कुमार ल दे जाही।
उहें, हिन्दी साहित्य के क्षेत्र म पंडित सुंदरलाल शर्मा सम्मान डॉक्टर बिहारी लाल साहू ल चक्रधर सम्मान डॉक्टर एम. श्रीराम मूर्ति, दाऊ मंदराजी सम्मान रेखा जलक्षत्री ल खूबचंद बघेल कृषक रत्न पुरस्कार पुन्नी दास भट्ट ल महाराजा अग्रसेन सम्मान बाबूलाल अग्रवाल ल लाला जगदलपुरी साहित्य पुरस्कार दुर्गा प्रसाद पारकर ल अउ खुमान साव सम्मान चंद्रभूषण वर्मा ल दे जाही।
संगे पत्रकारिता क्षेत्र म चंदूलाल चंद्राकर स्मृति पत्रकारिता पुरस्कार प्रिंट मीडिया हिन्दी बर प्रमोद कुमार साहू, इलेक्ट्रानिक मीडिया वर्ग म वरूण सखा जी अउ रसिका पांडे। उहें, अंग्रेजी पत्रकारिता बर मधुकर खेल स्मृति पत्रकारिता पुरस्कार शिशिर राय चौधरी ल दे जाही।
एखर संगेसंग चिकित्सा क्षेत्र म धनवंतरी सम्मान, मछली पाले के क्षेत्र म श्रीमती बिलासाबाई केंवट मछुवारा विकास पुरस्कार अउ ग्रामीण परयटन के क्षेत्र म छत्तीसगढ़ राज्य ग्रामीण परयटन पुरस्कार बर घलो प्रतिभा मन के चुनई करे गेहे।
अइसने, सूची म आदिवासी सेवा, श्रम महिला सशक्तिकरण, छत्तीसगढ़ी लोकगीत, लोकनृत्य, पंथी नृत्य, पंडवाणी, फिल्म निर्माण अउ सामाजिक समरसता के क्षेत्र म योगदान देवइया विभूमि मन ल घलो सामिल करे गेहे।
छत्तीसगढ़ स्थापना दिवस-बधाई
राष्ट्रपति द्रौपदी मुर्मू, प्रधानमंत्री नरेंद्र मोदी अउ कंेद्रीय गृह मंत्री अमित शाह ह प्रदेस के रहवइया मन ल राज्य स्थापना दिवस के बधई अउ सुभकामना दीन हे। प्रधानमंत्री ह अपन सुभकामना संदेस म किहीन हे कि छत्तीसगढ़ ह अपन जनजातीय संस्कृति, प्राकृतिक संपदा अउ सुग्घर लोक परंपरा बर जाने जथे। ओमन किहीन कि आज ए देख के खुसी होवत हे कि नक्सलवाद ल जड़ समेत खतम करत हे। हमर ए राज्य ह विकास सोज अउ तेज रफ्तार ले आगू बाढ़त हे।
उहें, केंद्रीय गृह मंत्री अमित शाह ह सोसल मीडिया पोस्ट म लिखे हे कि समृध्द जनजातीय संस्कृति, जुन्ना परंपरा अउ अपार खनिज भंडार ले संपन्न छत्तीसगढ़ ह आज नक्सलवाद के दंस ले मुक्त होके विकास सोज नवा अध्याय लिखत हे।
केंद्र राशि-जारी
केंद्र सरकार ह छत्तीसगढ़ समेत आने राज्य मन ल एक लाख नौ हजार उन्नीस करोड़ रूपिया के टैक्स ल बाटिस हे। एहर चालू वित्तीय बछर म दूसर मउका हे जब नियमित मासिक वितरण के उपराहा रासि राज्य मन ल दे गीस। छत्तीसगढ़ ल तीन हजार छै सौ दू करोड़ रूपिया के रासि आवंटित करे गेहे। वित्त मंत्री ओपी चौधरी ह केंद्र सरकार डहार ले रासि जारी करे उपर प्रधानमंत्री नरेंद्र मोदी अउ केंद्रीय वित्त मंत्री निर्मला सीतारमण मन बर आभार व्यक्त करे हे।
स्टार रेटिंग-पुरस्कार
देस म कोयला अउ लिग्नाइट खनई क्षेत्र म वैज्ञानिक प्रबंधन परिचालन दक्षता, सुरक्षा अउ सरलग विकास ल प्रोत्साहित करे के उद्देस्य ले केंद्रीय कोयला मंत्रालय डहार ले काली दू नवंबर के रईपुर म स्टार रेटिंग पुरस्कार समारोह राखे जाही। ए समारोह म बछर दू हजार चौबीस-पच्चीस के दउरान सुग्घर प्रदर्सन करइया कोयला अउ लिग्नाइट खदान मन ल उंखर सुग्घर काम बर सम्मानित करे जाही। समारोह म केंद्रीय कोयला अउ खनन मंत्री जी. किशन रेड्डी माई पहुना के रूप म रइही अउ पुरस्कार देही। ए समारोह म केंद्रीय कोयला खान राज्य मंत्री सतीशचंद्र दुबे अउ मुख्यमंत्री विष्णुदेव साय घलो सामिल होही। ए समारोह म स्टार रेटिंग पहल वाले सार्ट फिल्म घलो देखाय जाही।
मीडिया कर्मी-बीमा
छत्तीसगढ़ म काम करत मीडिया कर्मी मन ल स्वास्थ्य अउ दुर्घटना बीमा सुरक्षा देवाय बर राज्य शासन ह छत्तीसगढ़ मीडिया कर्मी स्वास्थ्य अउ दुर्घटना समूह बीमा योजना दू हजार छब्बीस के प्रारूप तियार करे हे। ए बारे म तीस नवंबर तक सुझाव मंगाय गेहे।
वन मंत्री-जंगल सफारी
वन मंत्री केदार कश्यप ह बीजापुर जिला के ग्राम उल्लूर म आज इंदिरावती टाइगर रिजर्व जंगल सफारी के वर्चुअल सुभारंभ करीन। एखर संगे अब घूमइया मन जंगल सफारी के जरिया प्राकृतिक सौंदर्य वन्य जीव अउ बड़का जैव विविधता ल तीर ले देख सकही।
हॉकी लीग
छत्तीसगढ़ हॉकी लीग के फाइनल मुकाबला आज संझा राजधानी रईपुर म संस्कारधानी स्ट्राइकर्स अउ मैनपाट टाइटन्स के बीच खेले जाही। ए दउरान केंद्रीय मंत्री मनसुख मांडविया उपस्थित रइही।