सरदार पटेल जयंती
देस ह आज महान स्वतंत्रता सेनानी अउ लौह पुरूष सरदार वल्लभ भाई पटेल के एक सौ इंक्यावनवां जयंती म ओमन ल नमन करत हे। हर बछर ए दिन ल राष्ट्रीय एकता दिवस के रूप म मनाया जाथे। सरदार पटेल ह भारत के पहिली उप-प्रधानमंत्री अउ गृह मंत्री रिहीन। ओमन पांच सौ साठ ले जादा रियासत के भारतीय संघ म विलय करके एक अउ सशक्त भारत बनाय म ऐतिहासिक भूमिका निभाइन।
राष्ट्रपति द्रौपदी मुर्मू अउ उपराष्ट्रपति सी.पी.राधाकृष्णन ह आज नई दिल्ली म सरदार पटेल के मूर्ति म पुष्पांजलि चढ़ाइन। उहें, प्रधानमंत्री नरेंद्र मोदी ह गुजरात के स्टैच्यू ऑफ यूनिटी म सरदार पटेल ल पुष्पांजलि अर्पित करीन।
केंद्रीय गृह मंत्री अमित शाह ल नई दिल्ली के मेजर ध्यानचंद नेशनल स्टेडियम म रन फॉर यूनिटी ल हरियर झंडी दिखाइन। ए मउका म ओमन किहीन कि सरदार पटेल ह देस के राजनीतिक अउ भौगोलिक एकता के नींव राखिन हे। श्री शाह लोगन ले नसा के समस्या ल खतम करे बर संघरा काम करे के अपील करीन।
लौह पुरूष सरदार पटेल के जयंती म राज्यपाल रमेन डेका ह लोकभवन म ओमन के फोटो उपर पुष्पांजलि अर्पित करके श्रध्दांजलि दीन।
उहें, मुख्यमंत्री विष्णुदेव साय ह सरदार पटेल के फोटो म फूल चढ़ाके देस के एकता, अखंडता अउ राष्ट्रीय एकीकरण म ओमन के ऐतिहासिक योगदान ल सुरता करीन। श्री साय ह किहीन कि सरदार वल्लभ भाई पटेल ह भारतीय एकता अउ अखंडता के महान सिल्पकार रिहीन।
दक्षिण पूर्व मध्य रेलवे के रईपुर रेलमंडल म लौह पुरूष सरदार वल्लभ भाई पटेल के जयंती के मउका म राष्ट्रीय एकता दिवस के आयोजन करे गीस। ए मउका म मंडल रेल प्रबंधक दयानंद के अगुवई म एकता दौड़ होइस। ए कारीकरम म रईपुर रेल मंडल के अधिकारी, कर्मचारी अउ भारत स्काउट्स-गाइड्स के लइका मन भाग लीन। कारीकरम के दउरान ए सबो झन ल राष्ट्रीय एकता अउ अखंडता ल बनाय राखे बर सपथ घलो देवाय गीस।
केंद्रीय गृह मंत्री दक्षता पदक
आने-आने राज्य, केंद्र शासित प्रदेस, केंद्रीय शसस्त्र पुलिस बल अउ केंद्रीय पुलिस संगठन के चार सौ नब्बे पुलिस कर्मी मन ल बछर दू हजार छब्बीस बर केंद्रीय गृह मंत्री दक्षता पदक ले सम्मानित करे जाय के घोसना करीस। एमा छत्तीसगढ़ के पंद्रह पुलिस अधिकारी अउ जवान घलो सामिल हे। ए पदक ह बढ़िया काम ल मान्यता देहे, पुलिस कर्मी मन म अच्छा पेसेवर मानक ल बढ़ावा देहे अउ ओमन के मनोबल ल बढ़ाय के उद्देस्य ले दे जात हे। गृह मंत्रालय ह हर बछर इकतीस अक्टूबर के सरदार वल्लभ भाई पटेल के जयंती के दिन ए पदक के घोसना करथे।
केंद्रीय गृह मंत्री दक्षिता पदक ले छत्तीसगढ़ के जेन पुलिस कर्मी मन ल सम्मानित करे गेहे, ओमा पुलिस अधीक्षक रॉबिन्सन गुरिया, अतिरिक्त पुलिस अधीक्षक अक्षय प्रमोद साबड़िया, अजय कुमार, सुशील कुमार नायक के संगेसंग सहायक पुलिस अधीक्षक आशीष कुमार नेताम, एसआई महेंद्र पोटाई, हेड कांस्टेबल पुरूषोत्तम कूपल अउ रामकुमार डारो, कांस्टेबल भुवनेश्वर मरकाम, जाइणु राम दुग्गा, राजेश सलाम, लिखेश्वरी नाग, चमन लाल, लक्ष्मण राम कोर्रम अउ सोमारू राम वड्डे सामिल हे।
जनगणना
केंद्र सरकार ह अवइया साल के पच्चीस जनवरी ले अट्ठाईस फरवरी के बीच पूरा देस म जनगणना कराय के घोसना करे हे। फेर बर्फबारी वाले अउ चुनाव वाले राज्य ल एमा सामिल नइ करे जाही। गृह मंत्रालय के अधिसूचना अनुसार मणिपुर, गोवा, उत्तरप्रदेस, पंजाब, उत्तराखंड, लद्दाख, हिमाचल प्रदेस अउ जम्मू-कश्मीर ल छोड़के बांकी सबो राज्य अउ केंद्रशासित प्रदेस म जनगणना होही। एखर बाद एक ले पांच मार्च तक पुनरीक्षण करे जाही। जनगणना बर दस जनवरी ले चौबीस जनवरी के बीच ‘स्व-गणना‘ के विकल्प घलो दे जाही।
मतदाता सूची-दावा आपत्ति
छत्तीसगढ़ राज्य निर्वाचन आयोग ह नगरपालिका केे अवइया आम अउ उप चुनई बर मतदाता सूची म दावा-आपत्ति प्रस्तुत करे के आखिरी तारीख बढ़ा देहे। अब पात्र मतदाता मन तीन नवंबर तक दावा-आपत्ति प्रस्तुत कर सकही। पहिली, एखर आखिरी तारीख तीस अक्टूबर निर्धारित रिहीस। आयोग अनुसार, मिले दावा आपत्ति के निराकरण छै नवंबर तक करे जाही। उहें, मतदाता सूची के आखिरी प्रकासन तीस नवंबर के होही।
राज्योत्सव
छत्तीसगढ़ राज्य स्थापना के छब्बीस बछर पूरा होय के मउका म नवा रईपुर अटल नगर म काली एक नवंबर ले तीन नवंबर तक राज्योत्सव के आयोजन करे जाही। केंद्रीय श्रम और रोजगार मंत्री डॉक्टर मनसुख मांडविया ह काली संझा राज्योत्सव के उद्घाटन समारोह म मुख्य पहुना के रूप म सामिल होही। कारीकरम के अगुवई मुख्यमंत्री विष्णुदेव साय ह करही।
उहें, राज्योत्सव के दूसरइया दिन दू नवंबर के राज्यपाल रमेन डेका ह मुख्य पहुना होही। उहें, राज्योत्सव के समापन समारोह तीन नवंबर के केंद्रीय गृह और सहकारिता मंत्री अमित शाह सामिल होही।
नवा रईपुर म आयोजित होवइया तीन दिनी राज्योत्सव के दउरान रंगारंग सांस्कृतिक कारीकरम के प्रस्तुती घलो होही।
जिले की चिट्ठी
आकाशवाणी रइपुर के प्रादेसिक समाचार एकांश, डहार ले प्रस्तुत कारीकरम ‘जिले की चिट्ठी‘ के प्रसारण काली संझा छै बज के पांच मिनट ले छै बज के दस मिनट तक करे जाही। ए कारीकरम ल छत्तीसगढ़ के जम्मों आकाशवाणी केंद्र एके संघरा रिले करहीं। ए दारी के अंक म ‘‘महासमुंद‘‘ जिला के गतिविधि के बारे म जानकारी दे जाही।
बस्तर फाइटर्स-आवेदन
नारायणपुर जिला म छत्तीसगढ़ पुलिस विशेष कार्यपालिक बल यानी -बस्तर फाइटर्स के तीन सौ तिरासी खाली पद म भर्ती बर आवेदन मंगाय हे। स्थानीय युवा मन दू नवंबर ले बारह दिसंबर तक आवेदन कर सकत हे। आवेदन के प्रारूप नारायणपुर के पुलिस अधीक्षक कार्यालय, छोटेडोंगर अउ बेनूर के अनुविभागीय अधिकारी कार्यालय अउ जिला के सबो थाना-चौकी ले प्राप्त करे जा सकत हे।
उहें, दंतेवाड़ा जिला म घलो बस्तर फाइटर्स के एक सौ अट्ठाईस पद म भर्ती बर विज्ञापन जारी करे गेहे। पुलिस अधीक्षक कार्यालय डहार ले जारी सूचना अनुसार ए सब पद बर जिला के स्थानीय रहइया मन ही आवेदन कर सकही। आवेदन फॉर्म अउ जादा जानकारी बर अभ्यर्थी मन दंतेवाड़ा पुलिस के आधिकारिक वेबसाइट ल देख सकत हे।
धान उर्पाजन कंेंद्र-स्वीकृत
राज्य सरकार ह प्रदेस म तीन सौ साठ नवा धान उर्पाजन केंद्र के स्वीकृति देहे। एखरे संग प्रदेस म धान उर्पाजन केंद्र के संख्या दू हजार सात सौ चालीस ले बाढ़के तीन हजार एक सौ हो गेहे।
मुख्यमंत्री विष्णुदेव साय ह किहीन हे कि धान खरीदी के पूरा प्रक्रिया म किसनहा मन ल कोनो प्रकार के परेसानी झन होवय, एखर बर जरूरी व्यवस्था सुनिश्चित करे जावत हे। ओमन किहीन कि नवा उर्पाजन केंद्र के स्वीकृति के उद्देस्य बस केंद्र के संख्या बढ़ाना नइ हे, फेर किसान मन बर धान बेेंचे के प्रक्रिया ल सरल, सुलभ अउ सुविधाजनक बनाना हे। नवा धान उर्पाजन केंद्र ले दू लाख ले जादा रजिस्टर किसान ल सीधा फायदा होही। नवा केंद्र के माध्यम ले टोकन लेहे अउ निश्चित अवधि म धान बेंचे के सुविधा मिलही। राज्य सरकार ह किसनहा मन बर ए बछर घलो ‘तुंहर टोकन‘ मोबाइल ऐप के माध्यम ले ऑनलाइन टोकन व्यवस्था करे हे। ए ऐप ले किसान मन अपन मोबाइल फोन ले घर बइठे धान बेंचे बर टोकन प्राप्त कर सकही।
सुनइया मन ल बतादन कि प्रदेस म ए बछर समर्थन मूल्य उपर धान खरीदी पंद्रह नवंबर ले सुरू होही। धान खरीदी व्यवस्था के सुग्घर संचालन बर राज्य सरकार ह पहिली ले तियारी कर लेहे। एखर तहत दू ले पांच नवंबर तक समिति मन म ट्रायल रन होही। उहें, किसान मन बर दस नवंबर ले टोकन ले के व्यवस्था सुरू होही।
मुख्य सचिव-निर्देश
मुख्य सचिव विकासशील ह शासकीय योजना मनके क्रियान्वयन अउ निर्माण काम म तेजी लाय के निरदेस दीन हे। ओमन काली मंत्रालय, महानदी भवन म होय राज्य स्तरीय समीक्षा बइठका म सीएम हेल्पलान म दर्ज सिकायत के गुणवत्तापूर्ण निराकरण करे अउ एखर जानकारी संबंधित विभाग ल देके निरदेस दीन। मुख्य सचिव ह पंद्रह नवंबर ले पहिली सबो फसल के गिरदावरी के काज ल सही ढंग ले पूरा करे ल किहीन। गिरदावरी के जानकारी ग्रामसभा म उपलब्ध कराय के निरदेस घलो दे गेहे।