पीएम-किसान सम्मान निधि
प्रधानमंत्री नरेंद्र मोदी ह आज गुजरात के बनासकांठा म पीएम-किसान सम्मान निधि योजना के चौबीसवां किस्त के तहत उन्नीस हजार करोड़ रूपिया जारी करीन। प्रधानमंत्री ह किहीन कि पीएम किसान सम्मान निधि ले लगभग साढ़े चार लाख कारोड़ रूपिया सीधे छोटे किसान मनके खाता म भेजे गेहे। ओमन ह किहीन कि एनडीए सरकार ह छोटे किसान मन के धियान राखे हे अउ पीएम किसान सम्मान निधि के जरिया ले ओमन ल सहायता देहे। प्रधानमंत्री ह किहीन कि एनडीएम सरकार ह न्यूनतम समर्थन मूल्य-एमएसपी के वादा पूरा करे हे।
प्रधानमंत्री किसान सम्मान निधि योजना के तहत छत्तीसगढ़ के करीब चौबीस लाख साठ हजार किसान मनके खाता म चार सौ अंठानबे करोड़ अड़तालीस लाख रूपिया भेजे गीस। पीएम किसान उत्सव दिवस के बेरा म रईपुर के कृषि महाविद्यालय म होवइया कारीकरम म मुख्यमंत्री विष्णुदेव साय सामिल होइन। ए मउका म विधायक मनके संग आने जनप्रतिनिधि अउ किसान मौजूद रिहीन।
मुख्यमंत्री-फसल क्षति
मुख्यमंत्री विष्णुदेव साय ह चक्रवात ‘अर्नब‘ अउ बेमौसम बरसा के सेति प्रदेस के आने-आने क्षेत्र म फसल के होय नुकसान ल गंभीरता ले लेवत हुए सबो जिला कलेक्टर ल तुरते फसल क्षति के सर्वेक्षण कराय के निरदेस देहे। ओमन ह किहीन कि प्रभावित किसान मन ल कोनो प्रकार के परेसानी न हो अउ ओमन ल समय म राहत मिल सकय, एखर बर जिला प्रशासन पूरा संवेदनसीलता अउ तत्परता के संग काम करे।
मुख्यमंत्री ह किहीन कि प्रभावित क्षेत्र म फसल के होय नुकसान के तुरते आंकलन करके आरबीसी छै-चार के प्रावधान अउ निर्धारित मानदंड के अनुसार पात्र किसान मन ल सहायता रासि उपलब्ध कराय जाही। ओमन ह स्पष्ट करे हे कि सर्वेक्षण ले लेके सहायता रासि के वितरण तक के पूरा प्रक्रिया म जरूरी विलंब नइ होना चाही।
स्वास्थ्य मंत्री-जनसभा
केंद्रीय स्वास्थ्य मंत्री जगत प्रकाश नड्डा अउ मुख्यमंत्री विष्णुदेव साय आज दुरूग म भारतीय जनता पार्टी डहार ले होवइया लोकतंत्र बचाव, अराजकता हटाओ रैली म सामिल होइन। ए मउका म श्री नड्डा ह कांग्रेस म चुनाव परिणाम ल लेके दोहरा रवइया अपनाय अउ देस म अराजकता फैलाय के आरोप लगइन। श्री नड्डा ह मतदाता सूची के बिसेस गहन पुनरीक्षण-एसआईआर के उल्लेख करत हुए किहीन कि चुनाव म जनता के विस्वास सबले जरूरी हे।
डोमनलाल कोर्सेवाड़ा-निधन
दुरूग जिला के अहिवारा विधानसभा क्षेत्र के भाजपा विधायक डोमनलाल कोर्सेवाड़ा के आज निधन होगिस, ओमन अठहत्तर बछर के रिहीन। श्री कोर्सेवाड़ा लंबा समय ले बीमार रिहीन अउ उंखर इलाज हैदराबाद के एक निजी अस्पताल म चलत रिहीस, जिंहा ओमन आज आखिरी सांस लीन।
डोमनलाल कोर्सेवाड़ा के निधन म भाजपा के प्रदेस अध्यक्ष किरण सिंह देव के संग आने नेता मन ह सोक जतइन।
गिग-कामगार-बोर्ड गठन
केंद्र सरकार ह असंगठित क्षेत्र म काम के आधार म सेवा देवइया गिग अउ डिजिटल प्लेटफॉर्म ले जुड़े काम करइया मन बर राष्ट्रीय सामाजिक सुरक्षा बोर्ड के गठन के आधिकारिक अधिसूचना जारी करे हे। ए बोर्ड के अध्यक्षता केंद्रीय श्रम अउ रोजगार मंत्री करही।
श्रम अउ रोजगार मंत्रालय ह किहीन कि बोर्ड के उद्देस्य पारंपरिक असंगठित श्रमिक मनके संगेसंग लाखों गिग अउ प्लेटफॉर्म श्रमिक मन बर सामाजिक सुरक्षा ले कमी ल दूर करना हे। एखर बर बोर्ड कल्याणकारी योजना तियार अउ उंखर निगरानी करही अउ जरूरी सिफारिस दिही।
महंगाई भत्ता
राज्य सरकार ह शासकीय अधिकारी-कर्मचारी मनके महंगाई भत्ता अउ पेंसनर मनके महंगाई राहत ल दू प्रतिसत बढ़ाय हे। वित्त विभाग के आदेस के अनुसार अवइया एक नवंबर ले महंगाई भत्ता अउ महंगाई राहत के दर अंठावन प्रतिसत ले बाढ़ के साठ प्रतिसत हो जाही। ए निरनय ले प्रदेस के लगभग तीन लाख पचयासी हजार शासकीय कर्मचारी अउ एक लाख पचास हजार पेंसनर ल लाभ मिलही।
राष्ट्रीय पात्रता परीक्षा
राष्ट्रीय पात्रता-सह-प्रवेस परीक्षा सुपर स्पेशियलिटी नीट-एसएस ए बछर ग्यारा अउ बारह दिसंबर के आयोजित करे जाही। राष्ट्रीय आयुर्विज्ञान परीक्षा बोर्ड-एन.बी.ई.एम.एस. ह जारी अधिसूचना म बतइन कि परीक्षा देसभर के आने-आने परीक्षा केंद्र म कम्प्यूटर आधारित जरिया ले होही। आवेदन पत्र जमा करे के आखिरी तारीख अट्ठारा नवंबर हे। बोर्ड ह अभ्यर्थी मन ल पात्रता मानदंड, परीक्षा सुल्क, परीक्षा प्रक्रिया अउ आने जरूरी जानकारी बर अपन आधिकारिक वेबसाइट म उपलब्ध सूचना पुस्तिका देखे के सलाह दीन हे।
ईओडब्ल्यू-छापा
छत्तीसगढ़ के सराब घोटाला मामला म राज्य आर्थिक अपराध अन्वेसन अउ एंटी करप्सन ब्यूरो के टीम ह आज रईपुर, दुरूग, भिलाई, बिलासपुर, राजनांदगांव, गोबरा-नवापारा अउ कोरबा म दस ले जादा जघा म छापा के कारवाई करीन। रईपुर म रियल स्टेट कारोबारी के घर म ईओडब्ल्यू के टीम ह दबिस देके जांच पड़ताल करीन। उहें, राजनांदगांव म दू कारोबारी के ठिकाना म छापा के कारवाई करे गीस। एखर अलावा गोबरा-नवापारा म ज्वेलर्स अउ कपड़ा कारोबारी, बिलासपुर म कोयला कारोबारी, दुरूग जिला के पुरानी भिलाई म एक ट्रांसपोर्टर अउ कोरबा जिला के कटघोरा म दू ठिकाना म घलो दबिस दे गीस। जांच पड़ताल के बारे म अभी अधिकृत रूप ले विस्तृत ब्योरा नइ मिल पाय हे।
सारंग हैलीकॉप्टर प्रदर्शन
छत्तीसगढ़ राज्य स्थापना दिवस के मउका म भारतीय वायु सेना के सारंग हेलीकॉप्टर प्रदर्सन टीम डहार ले नवा रईपुर अटल नगर स्थित सेंध लेक के उपर हवाई प्रदर्सन एक अउ दू नवंबर के बिहनिया साढ़े ग्यारा बजे ले करे जाही। एयर कमोडोर नंदकुमार बाला ह आज रईपुर म पत्रकारवार्ता म ए जानकारी दीन।
ग्रुप कैप्टन अभिजीत कुमार ह बतइन कि सारंग हेलीकॉप्टर टीम डहार ले लगभग पंद्रह मिनट के हवाई प्रदर्सन करे जाही। ओमन ह बतइन कि सारंग हेलीकॉप्टर टीम डहार ले भारत के आने-आने राज्य मनके संग कतकोन देस म पंद्रह सौ ले जादा हवाई प्रदर्सन करे जा चुके हे।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए बखत ‘सतर्कता जागरूकता सप्ताह म भारतीय वन सेवा के सेवानिवृत्त अधिकारी भानुप्रताप सिंह ले लेगे भेंटवार्ता के प्रसारण करे जाही। एखर प्रसारण काली 31 अक्टूबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया 9 बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
बस्तर-सड़क स्वीकृत
केंद्रीय ग्रामीण विकास मंत्री शिवराज सिंह चौहान ह किहीन हे कि छत्तीसगढ़ म बस्तर संभाग के एक हजार एक सौ अड़सठ बसाहट ले जुड़े सड़क के काम आने-आने चरण म करे जात हे। एमा ले चार सौ पचयासी बसाहट के काम स्वीकृत करे जा चुके हे। एखर अलावा प्रधानमंत्री ग्राम सड़क योजना के चौंथा चरण के बैच-टू म अवइया दू सौ अस्सी बसाहट ल जोड़े बर दू सौ तिरसठ सड़क काम के प्रस्ताव मिले हे। ए सड़क के कुल लंबाई आठ सौ इकतालीस किलोमीटर हे। एखर अनुमानित लागत आठ सौ चार करोड़ रूपिया हे।
मुख्यमंत्री विष्णुदेव साय अउ उपमुख्यमंत्री विजय शर्मा ह बस्तर के विकास बर केंद्र सरकार के संवेदनसीलता अउ सकारात्मक पहल बर प्रधानमंत्री नरेंद्र मोदी अउ केंद्रीय ग्रामीण विकास मंत्री शिवराज सिंह चौहान ल आभार जतइन।