प्रधानमंत्री-किसान सम्मान निधि
प्रधानमंत्री नरेन्द्र मोदी काली गुजरात म होवइया एक कार्यक्रम म प्रधानमंत्री किसान सम्मान निधि योजना के चौबीसवां किश्त जारी करही। एमा अवइया किसान मन ल उन्नीस हजार करोड़ रूपिया दे जाही। ए योजना के तहत पात्र भूमिधारक किसान मन ल हर बछर छह हजार रूपिया के वित्तीय सहायता दे जाथे।
वेंकैया नायडू-विकसित भारत
पूर्व उपराष्ट्रपति एम. वेंकैया नायडू ह राष्ट्र निर्माण म हरेक मनखे के जरूरी भूमिका उपर बल दीन। ओमन ह कहिन कि सक्रिय भागीदारी, सामूहिक प्रतिबद्धता अउ समाज बर समर्पित सेवा ले देस के विकास म योगदान दे जा सकत हे। नई दिल्ली म आज ‘‘विकसित भारत के लिए नागरिकों के कर्तव्य‘‘ विषय म आयोजित समारोह म श्री नायडू ह कहिन कि विकसित भारत एक साझा लक्ष्य हे। एला हासिल करे बर हर मनखे ल समाज ल मजबूत बनाय, नागरिक मूल्य ल बनाय राखे अउ देस के प्रगति म योगदान देके जरूरत हे।
नड्डा-विश्व स्ट्रोक दिवस
आज विश्व स्ट्रोक दिवस मनाय जावत हे। ए बछर के संदेस – ‘‘हर मिनट महत्वपूर्ण है, स्ट्रोक के लक्षण पहचाने हैं‘‘। ए बेरा म केन्द्रीय स्वास्थ्य मंत्री जगत प्रकाश नड्डा ह कहिन कि चेहरा के अचानक एक ओर झुक जाना, बांह म कमजोरी आना या बोले म परेसानी होना जइसे लक्षण ल कभी भी नजरअंदाज नइ करना चाही। ओमन ह कहिन कि तुरते चिकित्सा सहायता ले से मरीज के ठीक होय के संभावना म जरूरी अंतर आ सकत हे। श्री नड्डा ह लोगन मन ले स्ट्रोक के सुरूआत लक्षण के जानकारी राखे, जागरूकता फैलाय अउ अइसे लक्षण दिखे म तुरते कार्रवाई करे के अपील करीन।
चक्रवात-केन्द्रीय गृह मंत्री
केन्द्रीय गृह मंत्री अमित शाह ह आज चक्रवात अर्नब ल देखत हुए छत्तीसगढ़ के संग आंध्रप्रदेश, पुद्दुचेरी अउ ओडिशा के मुख्यमंत्री मन ले गोठबात करीन। श्री शाह ओमन ल आपदा ले प्रभावित लोगन मनके परेसानी कम करे बर हरसंभव सहायता के आश्वासन दीन। श्री शाह सोशल मीडिया पोस्ट म कहिन कि राष्ट्रीय आपदा मोचन बल अउ राज्य आपदा मोचन बल के टीम सक्रिय हे अउ युद्धस्तर म बचाव के संग राहत के काम करत हे। ओमन ह बतईन कि चक्रवात ले होय नुकसान के आंकलन करे अउ आने जरूरत के पता लगाय बर सरलग ए राज्य मन म अंतर-मंत्रालयी केन्द्रीय दल भेजे जाही। ओमन ह कहिन कि केन्द्र सरकार प्रभावित लोगन मनके संग खड़े हे।
चक्रवाती तूफान-असर
चक्रवाती तूफान ‘‘अर्नब‘‘ कमजोर होके निम्न दवाब म बदल गेहे। ए चक्रवात के अवइया बारह घंटा म उत्तर डहार बाढ़े के संभावना हे। एखर असर ले आज मध्य अउ उत्तर छत्तीसगढ़ के कतकोन जिला म बरसा होवत हे।
रायपुर स्थित मौसम विज्ञान केन्द्र के मौसम विज्ञानी डॉक्टर गायत्री वाणी ह आकाशवाणी समाचार ल बतईन कि सरगुजा, बिलासपुर अउ रायपुर संभाग के कुछ जिला मन बर ऑरेंज अलर्ट जारी करे गेहे। ए जिला म एक-दू जघा म तेज हवा चले के संग भारी ले अतिभारी बरसा हो सकत हे। उहें, रायगढ़ अउ इंखर तीर जघा मन बर रेड अलर्ट जारी करे गेहे।
राज्यपाल-स्काउट गाइड्स
राज्यपाल रमेन डेका आज लोकभवन स्थित छत्तीसगढ़ मंडपम म भारत स्काउट्स अउ गाइड्स के छत्तीसगढ़ इकाई डहार ले होवइया राज्य पुरस्कार अलंकरण समारोह म मुख्य अतिथि के रूप म सामिल होइन। ए बेरा म ओमन ह प्रदेसभर ले चयनित एक हजार एक सौ बाईस स्काउट्स, गाइड्स, रोवर्स अउ रेंजर्स ल राज्य पुरस्कार प्रदान करीन।
समारोह ल संबोधित करत हुए राज्यपाल ह कहिन कि पर्यावरण संरक्षण आज हमर आगू म बड़का चुनौती म ले एक हे। ओमन कहिन कि स्काउट्स-गाइड्स पर्यावरण संरक्षण, जल संचयन अउ जंगल के रक्षा बर जरूरी भूमिका निभा सकत हे।
समारोह ल स्कूल सिक्षा मंत्री गजेन्द्र यादव ह घलो संबोधित करीन।
विजय शर्मा-अवैध प्रवासी कार्रवाई
छत्तीसगढ़ म अवैध रूप ले रहवइया विदेशी नागरिक अउ घुसपैठिया मनके पहिचान करके उंखर विरूद्ध कार्रवाई करे जाही। एखर बर प्रदेस म पन्द्रह नवंबर ले पन्द्रह जनवरी तक बिसेस सघन जांच अभियान चलाय जाही। अभियान के दउरान औद्योगिक क्षेत्र, निर्माण स्थल, किराया के मकान, होटल, धर्मशाला अउ आने संदिग्ध जघा के जांच करे जाही। उपमुख्यमंत्री अउ गृहमंत्री विजय शर्मा ह मंत्रालय के सबो जिला के नोडल अधिकारी मनके बइठका म ए निरदेस दीन। ओमन ह कहिन कि अवैध प्रवासी मन ल सरण दे, रोजगार उपलब्ध कराय, ओमन ल दूसर राज्य ले लाने अउ उंखर फर्जी दस्तावेज तैयार करइया मनके विरूद्ध घलो कानूनी कार्रवाई करे जाही। उपमुख्यमंत्री ह कहिन कि अवैध प्रवासी मनके पहिचान बर स्थानीय स्तर म जनप्रतिनिधि अउ आम नागरिक मनके सहयोग घलो ले जाही।
मुख्यमंत्री-सरगुजा
मुख्यमंत्री विष्णुदेव साय आज रायपुर ले वीडियो कॉन्फ्रेसिंग के जरिया ले सरगुजा म होवइया जनजातीय समाज के महान जननायक बाबा कार्तिक उरांव के जन्मशताब्दी समारोह म सामिल होइन। ए बेरा म श्री साय ह उंखर आदमकद प्रतिमा के अनावरण करीन। समरोह म मुख्यमंत्री ह डिगमा स्थित सासकीय इंजीनियरिंग महाविद्यालय के नाव ‘‘अभियंता बाबा कार्तिक उरांव छत्तीसगढ़ इंस्टीट्यूट ऑफ टेक्नोलॉजी करे के घोसना करीन।
अवकाश-सूची
राज्य सासन ह बछर दू हजार सत्ताईस बर सासकीय कार्यालय अउ संस्थान मन म सामान्य अवकाश, सार्वजनिक अवकाश अउ ऐच्छिक अवकाश के सूची जारी कर देहे। सामान्य प्रशासन विभाग ह ए संबंध म अधिसूचना जारी करे हे। जारी आदेस के अनुसार बछर दू हजार सत्ताईस म छत्तीसगढ़ के सासकीय सेवक के निर्धारित सामान्य अवकाश के संग तीन ऐच्छिक अवकाश लेके पात्रता होही।
स्वामी आत्मानंद-सीबीटी परीक्षा
स्वामी आत्मानंद उत्कृष्ट अंग्रेजी माध्यम स्कूल मन म एक हजार आठ सौ बारह खाली संविदा पद के भर्ती बर कम्प्यूटर आधारित परीक्षा-सीबीटी इकतीस अक्टूबर ले चार नवंबर तक आयोजित करे जाही। प्रदेस के आने-आने परीक्षा केन्द्र म होवइया ए परीक्षा म चौंतीस हजार ले जादा अभ्यर्थी सामिल होही।
लोक सिक्षण संचालनालय के अनुसार परीक्षा बर रायपुर म सबले जादा छह केन्द्र बनाय गेहे। एखर अलावा बिलासपुर म छह, दुर्ग म चार, भिलाई म चार, जांजगीर-चांपा म एक, सरगुजा म एक, जगदलपुर अउ बस्तर म दू परीक्षा केन्द्र निर्धारित करे गेहे।
जशपुर-एआई तकनीक
जशपुर जिला के सरकारी स्कूल के लइका मन अब आर्टिफिशियल इंटेलिजेंस कोडिंग अउ रोबोटिक्स जइसन आधुनिक तकनीक सीखही। एखर बर जिला प्रसासन अउ एडु रोबोवर्स के बीच समझौता ज्ञापन म हस्ताक्षर करे गेहे। ए एमओयू के तहत जिला के तीन सरकारी स्कूल म कक्षा नौवीं ले बारहवीं तक के लइका मन ल एक बछर तक व्यावहारिक प्रशिक्षण दे जाही। एमा मशीन लर्निंग अउ इंटरनेट ऑफ थिंग्स के जानकारी घलो दे जाही। विद्यार्थी, कृषि, जल संरक्षण, वन अउ पर्यावरण जइसन बिसय म तकनीक आधारित प्रोजेक्ट तैयार करही। एखर बर हरेक स्कूल म एक बिसेस ट्रेनर नियुक्त करे जाही।
मादक पदार्थ-समीक्षा
उपमुख्यमंत्री विजय शर्मा ह मंत्रालय म मादक पदार्थ के रोकथाम अउ नियंत्रण ल लेके राज्य स्तरीय समीक्षा बइठका लीन। बइठका म ओमन ह सबो जिला म नारकोटिक ड्रग्स अउ साइकोट्रोपिक सब्सटेंसेज-एनडीपीएस एक्ट म दर्ज प्रकरण, मादक पदार्थ के जब्ती, तस्कर के मनके विरूद्ध कार्रवाई, संपत्ति कुर्की, गाड़ी मनके राजसातीकरण अउ जब्त मादक पदार्थ के खत्म करे के जिलावार समीक्षा करीन। बइठका म श्री शर्मा ह इकतीस दिसंबर तक छह महीना ले जादा पुराना जब्त मादक पदार्थ के विधिसम्मत खत्म करे के निरदेस दीन।
माओवादी आत्मसमर्पण
आंध्रप्रदेश के पोलावरम जिला म तीन माओवादी मन ह पुलिस के आगू आत्मसमर्पण करे हे। पुलिस के अनुसार, ये सबो छत्तीसगढ़ अउ आंध्रप्रदेश के पास के इलाका म सक्रिय रिहीन अउ सुकमा जिला के चिंतलनार थाना क्षेत्र के पेंटापाड़ इलाका ले हे। इंखर पहिचान माड़वी कोइंदा, हेमला रजनी अउ कोवासी जोगी के रूप म होय हे।