मंत्रिमंडल-फैसले
केन्द्रीय मंत्रिमंडल ह केन्द्र सरकार के कर्मचारी अउ पेंशन पवइया मन बर तीन प्रतिशत महंगाई भत्ता अउ राहत ल मंजूरी दे देहे। महंगाई भत्ता अउ राहत एक जुलाई दू हजार छब्बीस ले दे जाही।
एक ठिन आने फइसला म केन्द्रीय मंत्रिमंडल ह प्रधानमंत्री विकसित ग्राम स्वराज योजना-पी.एम.वी.जी.एस.आई. ल घलो केन्द्र प्रायोजित योजना के रूप म मंजूरी देहे। एखर उद्देश्य विकसित भारत के परिकल्पना के मुताबिक पंचायत मन ल मजबूत, आत्मनिर्भर, जवाबदेह अउ बने ढंग ले काम करइया स्थानीय स्वशासन संस्था म बदलना हे। एमा देसभर म दू लाख सत्तर हजार ले जादा ग्रामीण स्थानीय निकाय अउ पारंपरिक निकाय सामिल होही।
उहें, केन्द्रीय मंत्रिमंडल ह घरेलू विनिर्माण ल बढ़ावा दे बर कंटेनर विनिर्माण प्रोत्साहन योजना ल घलो मंजूरी दे देहे अउ संगेसंग देस ल उच्च गुणवत्ता वाले खेल जिनीस के वैश्विक केन्द्र के रूप म बनाय बर खेलो इंडिया खेल सामग्री विनिर्माण योजना ल मंजूरी दे गेहे।
स्वास्थ्य-तम्बाकू अभियान
केन्द्रीय स्वास्थ्य अउ परिवार कल्याण राज्यमंत्री प्रताप राव जाधव ह आज नई दिल्ली म तम्बाकू मुक्त युवा अभियान के चौथा संस्करण के सुभारंभ करीन। ए मउका म ओमन किहीन कि ए अभियान के मुख्य उद्देश्य युवा मन ल तम्बाकू ले दूरिहा रखना अउ ओमन ल राष्ट्र विकास म अपन योगदान दे बर आगू लाना हे। ओमन किहीन कि ए जिनीस के सेवन सेहत बर हानिकारक होथे अउ सरीर के हर अंग उपर गलत असर डालथे। श्री जाधव ह किहीन कि देस म बड़ संख्या म कैंसर के मामला तम्बाकू खाय ले जुड़े हे।
मुख्यमंत्री-सूरजपुर
मुख्यमंत्री ह आज वीडियो कॉन्फ्रेंसिंग के माध्यम ले सूरजपुर जिला म दू सौ बत्तीस करोड़ रूपिया ले जादा के विकास काम के लोकार्पण अउ भूमिपूजन करीन। ए मउका म मुख्यमंत्री ह प्रेमनगर नगर पंचायत म डोम बनाय बर एक करोड़ रूपिया, इंडोर स्टेडियम बर पचास लाख रूपिया अउ सड़क बनाय बर एक करोड़ बीस लाख रूपिया देके घोसना करीन।
मुख्यमंत्री ह जल संचय जनभागीदारी अभियान म सूरजपुर जिला के प्रदेस म पहिली अउ देस म चौथा स्थान आय उपर खुसी जतईन। ओमन किहीन कि सूरजपुर जिला म पानी ल बचाय अउ अधोसंरचना विकास बर करीबन एक सौ तीस करोड़ छप्पन लाख रूपिया खरचा करे जाही।
मुख्यमंत्री-करम पूजा परब
मुख्यमंत्री विष्णुदेव साय ह रायपुर म उरांव आदिवासी विकास संघ डहार राखे गे करम पूजा परब म सामिल होइन। ए मउका म मुख्यमंत्री ह करम राजा के पूजापाठ करके प्रदेस के लोगन मनके सुख-समृद्धि के कामना करीन। ए परब ह प्रकृति के प्रति हमर आस्था, प्रेम अउ सम्मान के भावना ल बताथे। कार्यक्रम म मुख्यमंत्री ह रायपुर जिला के गनोद गांव म पचास लाख रूपिया के लागात ले उरांव समाज बर सामुदायिक भवन बनाय के घोसना करीन।
मुख्यमंत्री-वायुसेना टीम
मुख्यमंत्री विष्णुदेव साय ले आज रायपुर स्थित उंखर निवास कार्यालय म भारतीय वायु सेना के सारंग हेलीकॉप्टर डिस्प्ले टीम के सदस्य मन ह मिलीन। ए मउका म मुख्यमंत्री ह कहिन कि भारतीय वायु सेना ह अपन साहस, अनुशासन, समर्पण अउ दक्षता बर विश्व म सम्मानित हे। ओमन किहीन कि राज्योत्सव के मउका म दू नवंबर के नवा रायपुर स्थित सेंध लेक क्षेत्र म भारतीय वायु सेना के सारंग हेलीकॉप्टर डिस्प्ले टीम डहार ले बिहनिया ग्यारह बजे ले एयर शो करे जाही। एमा पांच हेलीकॉप्टर ह सटीक उड़ान अउ करतब के प्रदर्सन करही।
सारंग हेलीकॉप्टर डिस्प्ले टीम के अगुवई ग्रुप कैप्टन अभिजीत कुमार करही। टीम म दू झिन महिला पायलट स्क्वाड्रन लीडर अंकिता अउ अक्षया घलो सामिल रइही। एयर सो के दउरान दर्सक मन ल हेलीकॉप्टर के आने-आने संरचना, उड़ान अउ रोमांचकारी हवाई गतिविधि देखे के मउका मिलही।
जल शक्ति-ऐप
केन्द्रीय जल शक्ति मंत्री सी.आर. पाटिल ह भू-जल पुनर्भरण के वैज्ञानिक योजना बनाय म मदद बर पुनःभरण मोबाइल ऐप सुरू करे हे। ए ऐप के माध्यम ले तीन किलोमीटर के दायरा म भूजल पुनर्भरण के संभावित क्षेत्र के पहिचान कर सकथे अउ इहां के परिस्थिति के मुताबिक सही संरचना के पता लगा सकथे। वेबपोर्टल गांव स्तर म कृत्रिम भूजल पुनर्भरण संरचना के नक्सा, जी.आई.एस. टूल अउ आने-आने बिसय ले जुड़े आंकड़ा देवा सकथे। एखर ले भूईंया के पानी के बने ढंग ले योजना बनाय म मदद मिलही।
अरूण साव-यूथ कॉनक्लेव
उपमुख्यमंत्री अरूण साव ह रायपुर स्थित राष्ट्रीय प्रौद्योगिकी संस्थान-एनआईटी म राखे गे दू दिन के यूथ कॉनक्लेव-कम-नेशनल कॉन्फ्रेंस के समापन सत्र म सामिल होइन। ए दउरान ओमन प्राध्यापक, वैज्ञानिक अउ छात्र मन ल संबोधित करत किहीन कि इंजीनियरिंग अउ तकनीकी शिक्षा लेवइया युवा मन ल अपन ज्ञान, पढ़ई अउ नवाचार के प्रयोग समाज अउ राष्ट्रहित बर करना चाही। कॉनक्लेव म सुघ्घर शोध पत्र पेस करइया, परियोजना प्रदर्शनी अउ हैकाथॉन म बढ़िया योगदान देवइया युवा प्रतिभागी मन ल सम्मानित करे गीस।
निर्वाचक नामावली-पुनरीक्षण
प्रदेस म नगरीय निकाय अउ त्रिस्तरीय पंचायत मनके आम अउ उपचुनई बर निर्वाचक नामावली के पुनरीक्षण के काम ए बेरा चलत हे। राज्य निर्वाचन आयोग के मुताबिक प्रारंभिक मतदाता सूची के प्रकासन तेईस अक्टूबर के कर दे गेहे। मतदाता सूची उपर दावा अउ आपत्ति तीस अक्टूबर तक पेस करे जा सकथे। दावा-आपत्ति के निपटारा तेरह नवंबर तक करे जाही। मतदाता सूची के आखिरी प्रकासन तीस नवंबर के होही। राज्य निर्वाचन आयुक्त अजय सिंह ह पात्र मतदाता मन ले प्रारंभिक सूची म अपन नाव अउ विवरण जांचे के अपील करे हे।
चक्रवाती तूफान-अर्नब
चक्रवाती तूफान ‘‘अर्नब‘‘ ह आज बिहनिया आंधप्रदेश के तट ले टकरा गे। तट ले टकराय के बेरा चक्रवात के अधिकतम हवा के रफ्तार एक सौ पच्चीस ले एक सौ पैंतीस किलोमीटर प्रतिघंटा रिहीस।
रायपुर के मौसम विज्ञानी डॉक्टर गायत्री वाणी ह बतईन कि बिहनिया साढ़े आठ बजे तक, ए प्रणाली तटीय आंध्रप्रदेश अउ नरसपुर के तीर यनम के उपर केन्द्रित रिहीस। एखर छत्तीसगढ़ के उत्तर-पश्चिम कोति बाढ़े के संभावना हे। एखर प्रभाव ले प्रदेस के कतकोन जिला म भारी बरसा होय के संभावना हे। मौसम विभाग ह आज बस्तर, दंतेवाड़ा, सुकमा, कोंडागांव, बीजापुर अउ गरियाबंद जिला बर रेड अलर्ट जारी करे हे। त उहें, रायपुर, बलौदाबाजार, धमतरी, महासमुंद, बालोद, बेमेतरा अउ कबीरधाम जिला बर ऑरेंज अलर्ट जारी करे गेहे।
मौसम विभाग ह काली उनतीस अक्टूबर के उत्तर छत्तीसगढ़ के कोनो कोनो जिला म भारी ले बहुत भारी बरसा होय के चेतावनी जारी करे हे। चक्रवात के खतरा ल देखत बस्तर संभाग के जम्मों जिला म प्रसासन ह हाईअलर्ट म हवय।
एनटीए-आवेदन
राष्ट्रीय परीक्षा एजेंसी-एनटीए ह विश्वविद्यालय अनुदान आयोग के राष्ट्रीय पात्रता परीक्षा-यूजीसी नेट दिसंबर दू हजार छब्बीस बर ऑनलाइन अरजी जमा करे आखिरी तारीख बढ़ा देहे। एनटीए के मुताबिक ऑनलाइन अरजी जमा करे अउ परीक्षा सुल्क भुगतान करे के आखिरी तारीख इकतीस अक्टूबर तक कर दे गेहे। पात्र उम्मीदवार जूनियर रिसर्च फेलोशिप-जेआरएफ, सहायक प्रोफेसर अउ पीएचडी म प्रवेस बर बिना कोनो विलंब सुल्क के आधिकारिक वेबसाइट म ऑनलाइन अरजी कर सकथे।
रेलवे स्टेशन मास्टर
भारतीय रेलवे ह आने-आने रेलवे भर्ती बोर्ड अउ जोन म स्टेशन मास्टर के पद बर एक हजार दू सौ पैंसठ खाली पद ल भरे के घोसना करे हे। ए विशेष भर्ती प्रक्रिया के तहत उम्मीदवार मन ल पात्रता आवश्यकता, परीक्षा प्रक्रिया अउ खाली पद ले जुड़े एक ठिन विशिष्ट अधिसूचना मिलही। ऑनलाइन अरजी प्रक्रिया पच्चीस नवंबर तक चलही।