ब्रिक्स संसदीय सम्मेलन
नई दिल्ली के संसद भवन म आज ले बारहवां ब्रिक्स संसदीय सम्मेलन सुरू होइस। लोकसभा अध्यक्ष ओम बिरला ह सम्मेलन के उद्घाटन सत्र म किहीन कि संसद ह आपसी समझ अउ विस्वास ल मजबूत करे म, अंतर्राष्ट्रीय तनाव ल कम करे म अउ वैश्विक चुनौती के समाधान सांतिपूर्वक तरीका ले निकाले म अपन बड़े भूमिका निभा सकथे। श्री बिरला ह किहीन कि प्रधानमंत्री नरेंद्र मोदी के अध्यक्षता म नई दिल्ली म होय ब्रिक्स सम्मेलन के दउरान संयुक्त घोसना पत्र ल सर्व सम्मति ले अपनाय जाना बड़े उपलब्धि हे। ओमन किहीन कि ए मंच म होय बिचार विमर्स, आपसी विस्वास अउ सहयोग अउ जन केंद्रित विकास बर साझा संकल्प ल अउ मजबूत बनाय म बड़े भूमिका निभाही।
प्रधानमंत्री नरेंद्र मोदी घलो कारीकरम म सामिल होइन। ओमन ह भागीदार देस के प्रतिनिधि मन ले भेंट करीन। दू दिन के कारीकरम के बिसय हे- जन-केंद्रित विकास के लिए संसदों को सशक्त बनाना।
राज्यपाल-दीक्षांत समारोह
राज्यपाल रमेन डेका आज रईपुर के एक ठन निजी विश्वविद्यालय के ग्यारहवां दीक्षांत समारोह म मुख्य अतिथि के रूप म सामिल होइन। समारोह म सोलह झन विद्यार्थी मन ल स्वर्ण पदक, चार सोधार्थी मन ल पीएचडी अउ चार सौ चौसठ विद्यार्थी मन ल स्नातक अउ स्नात्कोत्तर के उपाधि दे गीस। समारोह म राज्यपाल ह युवा मन ले अपन नवा विचार ल स्टार्टअप म बदले के, नवाचार ल अपनाय के अउ उद्यमिता के क्षेत्र म आगू बढ़े के आह्वान करीन हे। ओमन किहीन कि लक्ष्य प्राप्ति बर शिक्षा सबले बड़े माध्यम हे अउ युवा मनके विचार देस के अर्थ व्यवस्था ल नवा दिसा दे सकत हे। राज्यपाल ह किहीन कि युवा मन बर स्टार्टअप अउ उद्यमिता के क्षेत्र म बहुत संभावना हे।
सतर्कता जागरूकता-सप्ताह
प्रदेस म आज ले सतर्कता जागरूकता सप्ताह सुरू हो गेहे। ए सप्ताह एक नवंबर तक चलही। एमा कतकोन जागरूकता कारीकरम होही। सप्ताह के पहिली दिन आज प्रदेस के सबो शासकीय कार्यालय म अधिकारी अउ कर्मचारी मन ल सत्यनिष्ठा के सपथ देवाय गीस।
राष्ट्रपति द्रौपदी मुर्मू, उपराष्ट्रपति सी.पी.राधाकृष्णन अउ प्रधानमंत्री नरेंद्र मोदी ह सतर्कता जागरूकता सप्ताह के सफलता बर अपन सुभकामना दीन हे।
प्रसार भारती के मुख्य कार्यकारी अधिकारी गौरव द्विवेदी ह दैनिक काम म पारदर्सिता, निष्पक्षता, जवबादेही अउ सत्यनिष्ठा ल संगठन के मजबूती अउ नागरिक मनके विस्वास बर महत्वपूर्ण बतइन हे।
उहें, सतर्कता जागरूकता सप्ताह के दउरान आज लोकभवन के समस्त अधिकारी अउ कर्मचारी मन ह प्रशासनिक काम म ईमानदारी अउ पारदर्सिता बनाय राखे के सपथ लीन।
सेंध लेक-निर्माण कार्य
नवा रईपुर अटल नगर के संेध लेक म पानी ल सहेजे बर अउ पर्यावरण देखत पानी सकेले के क्षमता ल बढ़ाय बर चारों डाहर निर्माण काम सुरू करे गेहे। पर्यटक मनके सुविधा बर पाथवे, फूड कोर्ट अउ बगीचा बनाय जावत हे। उहें, प्रवासी अउ स्थानीय पक्षी मन बर लेक के बीचों-बीच आईलैंड घलो बनाय जावत हे। करीब दू सौ एकड़ क्षेत्र म फइले सेंध लेक म साफ-सफाई, गहरीकरण अउ सौंदर्यीकरण के काम करे जावत हे।
गांजा-बरामद
दुरूग पुलिस ह वाहन चेकिंग के दउरान रईपुर ले नागपुर जावत एक ठन गाड़ी ले चार करोड़ रूपिया बरामद करे हे। आरोपी ह नगदी ल गाड़ी के पाछू हिस्सा म बने गुप्त चंेबर म लुकाके लेगत रिहीस। पुलिस ह गाड़ी म बइठे दू झन लोगन ल हिरासत म लेके पूछताछ सुरू कर देहे। मामला के गंभीरता ल देखत आयकर विभाग ल घलो सूचना दे दे गेहे।
चक्रवात अर्नब
बंगाल के खाड़ी म उठत चक्रवात ‘अर्नब‘ ह आंध्रप्रदेस के तट डहार ल बढ़त हे। चक्रवात ‘अर्नब‘ के कल तक भीषण चक्रवाती तुफान म बदले के आसंका हे।
चक्रवात ‘अर्नब‘ के असर छत्तीसगढ़ के मौसम म घलो दिखे के संभावना हे। मौसम विज्ञानी डॉक्टर गायत्रीवाणी ह बतइन कि एखर प्रभाव ले सत्ताईस अक्टूबर के सुकमा अउ दंतेवाड़ा अउ अट्ठाईस अउ उनतीस अक्टूबर के प्रदेस के सबो जिला म बरसा हो सकत हे।
इही बीच, भारत सरकार के कैबिनेट सचिव डॉ. टी.वी. सोमनाथन ह आज नई दिल्ली ले सबो राज्य के मुख्य सचिव मन संग वीडियो कॉन्फ्रेंसिंग के माध्यम ले बइठका करीन। ओमन ह चक्रवात ले निपटे बर तियारी करे के निरदेस दीन। छत्तीसगढ़ डहार ले मंत्रालय ले अपर मुख्य सचिव मनोज कुमार पिंगुआ बइठका म सामिल होइन। ओमन ह राज्य म करे जावत तियारी के जानकारी दीन।
इही बीच, बंगाल के खाड़ी म उठत चक्रवाती तुफान ‘अर्नब‘ के संभावित प्रभाव ले देखत छत्तीसगढ़ म प्रशासन ल अलर्ट म राखे गेहे। राज्य सरकार ह सबो जिला के कलेक्टर मन ल जरूरी तियारी करे बर निरदेस देहे। ए संबंध म मंत्रालय म अपर मुख्य सचिव मनोज कुमार पिंगुआ के अध्यता म बइठका होइस, जेमा सत्ताईस ले उनतीस अक्टूबर तक चक्रवात ले निपटे के तियारी के समीक्षा करे गीस। बीजापुर, सुकमा, दंतेवाड़ा, बस्तर, नारायणपुर जिला म बिसेस सावधानी बरते बर केहे गेहे। संगेसंग किसान मन बर फसल के सुरक्षा बर जरूरी सलाह जारी करे के अउ फसल अउ मवेसी मन ल होवइया नुकसान ल कम करे के निरदेस दे गे हवय।
दुघर्टना
बिलासपुर ले रईपुर आवत एक ठन यात्री बस ह टरक ले टकरागे। ए हादसा आज बिहनिया सिमगा तीर दरचुरा गांव म होइस, जेमा तीन झन लोगन के मउत होगे अउ करीबन आठ झन घायल हो गेहे, जउन मन ल सिमगा अस्पताल म भर्ती कराय गे हवय।
कृषि उत्पादन आयुक्त-बैठक
बस्तर संभाग म किसान मनके आमदनी बढ़ाय बर अउ ग्रामीण अर्थव्यवस्था ल मजबूत बनाय बर एकीकृृत कृषि प्रणाली ल बढ़ावा दे जाही। कृषि उत्पादन आयुक्त सिध्दार्थ कोमल परदेसी ह आज जगदलपुर म राखे गे संभाग स्तरीय खरीफ समीक्षा अउ रबि के तियारी के बइठका म अधिकारी मन ल ए दिसा म मिलजुलके प्रयास करे के निरदेस दीन। ओमन किहीन कि कृषि के संग उद्यानिकीा, पशुपालन, मत्स्य पालन अउ कुक्कुटपालन जइसन गतिविधि ल जोड़के किसान मन के आय के नवा स्त्रोत विकसित करे जा सकथे। ओमन स्थानीय संसाधन के अनुरूप कम लागत म जादा लाभ देवइया कृषि आधारित मॉडल तियार करे उपर जोर दीन।
शालेय क्रीडा प्रतियोगिता
खैरागढ़ फतेह सिंह खेल मैदान म छब्बीसवां राज्य स्तरीय शालेय क्रीडा प्रतियोगिता सुरू हो गेहे। चार दिवसीय ए प्रतियोगिता के उद्घाटन डोंगरगढ़ विधायक हर्षिता स्वामी बघेल ह करीन। प्रतियोगिता म रईपुर, सरगुजा, बिलासपुर, दुरूग अउ बस्तर संभाग के करीबन तीन सौ तीस खिलाड़ी मन भाग लेवत हे, एखरे संग पचास झन खेल अधिकारी घलो सामिल हे। प्रतियोगिता म बालक अउ बालिका वर्ग के खिलाड़ी मन ह फुटबाल अउ खो-खो म अपन प्रतिभा के प्रदर्सन करही।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता काली सत्ताईस अक्टूबर के दिन बिहनिया साढ़े ग्यारा बजे ले राज्यमंत्रि परिषद के बइठका होही। बइठका म कतकोन बड़े फइसला ले जाही।
अउ
– राज्य सरकार ह नौ नवंबर गोवर्धन पूजा के दिन सार्वजिनक अवकास घोसित करे हे। पहिली एला ऐच्छिक अवकास के सूची म सामिल करे गे रिहीस। अब शासन ह संसोधन आदेस जारी करके एला सार्वजनिक अवकास म बदल देहे।