मन की बात
आकाशवाणी ले प्रसारित ‘मन की बात‘ कारीकरम म प्रधानमंत्री नरेंद्र मोदी ह किहीन हे कि ‘मन की बात‘ कारीकरम ह बारह बछर पूरा कर लेहे अउ ए सफर ह एक ठिन तिरिथ यात्रा असन रहे हे। ओमन किहीन कि ए कारीकरम के सुनइया मन संग म यात्रा करइया असन रहे के संगे मार्गदर्सक घलो प्रधानमंत्री ह तिहार के मउसम म लोकल कारीगर मन डहार ले बनाय जिनिस ल पहिली बउरे के आग्रह करे हे। ओमन आरो दिन कि स्थानीय जिनिस बिसई ले उंखर उछाह बाढ़ही संगे सबके अपना पन ह वोकल फॉर लोकल अभियान ल अउ आगू ले जाही, काबर कि जतके ए अभियान ह आगू बाढ़ही, वतकेच तेजी लेे आत्मनिर्भर भारत के सपना घलो पूरा होही।
श्री मोदी ह किहीन हे कि वोकल फॉर लोकल के भावना स्थानीय प्रोडक्ट ल दुनिया के बाजार तक पहुंचावत हे। ओमन किहीन कि ई-संजीवनी प्लेटफॉर्म के माध्यम ले अब तक करीबन पचास करोड़ टेली-परामर्स दे जा चुके हे। ओमन बतइन कि आज देसभर म करीबन एक लाख नब्बे हजार आयुष्मान आरोग्य मंदिर लोगन मनके जीवन म नवा सुविधा लेके आय हे अउ एहर एक तरह ले ग्राम पंचायत बर स्वास्थ्य केंद्र के रूप म बाढ़त हे। अंगदान उपर प्रधानमंत्री ह किहीन हे कि ए हर उन्नत अनुसंधान म बड़का भूमिका निभाथे। अंगदान ह मानवता के एक ठिन अइसन कदम हे, जउन ह कोनो परिवार के जीवन म खुसी ला सकत हे।
श्री मोदी ह किहीन कि ए बछर गांधी जयंती म खादी ग्रामोउद्योग के जिनिस मनके रिकॉर्ड बिक्री होय हे। उहें, अवइया इकतीस अक्टूबर के देस ह महान भारती वैज्ञानिक नरिंदर सिंह कपानी के सौंवा जयंती मनाही। दुनिया ओमन ल फाइबर ऑप्टिक्स के जनक के रूप म जानथे। श्री मोदी ह किहीन कि इकतीस अक्टूबरेच के सरदार वल्लभ भाई पटेल के जयंती याने एकता दिवस के मउका म देसभर म रन फॉर यूनिटी राखे जथे। ओमन यहू आरो दिन कि एमा सबो झिन ए बछर घलो रन फॉर यूनिटी म उछाह संग भागीदारी देवय।
प्रधानमंत्री ह मोटहा अनाज मिलेट्स बारे म किहीन कि भारत के अनुरोध उपर बछर दू हजार तेईस ल अंतर्राष्ट्रीय मोटा अनाज बछर घोसित करे गे रिहीस। ओमन बतइन कि मेघालय समेत देसभर म किसान मन श्री अन्न के खेती करके अपन आमदनी ल बढ़ावत हे। उहें, ‘मन की बात‘ कारीकरम म प्रधानमंत्री ह अवइया देवारी तिहार अउ छठ परब समेत आने तिहार मन बर देस के रहइवइया मन ल सुभकामना दीन।
डीजीएचएस-निर्देश
स्वास्थ्य सेवा महानिदेशालय-डी.जी.एच.एस. ह सबो सार्वजनिक अउ निजी स्वास्थ्य देखभाल केंद्र मन म एकल-उपयोग वाले मेडिकल उपकरण अउ सर्जिकल जिनिस मन ल दुबारा नइ बउरे के निरदेस दीन हे। महानिदेशालय ह ए बारे म सबो राज्य अउ केंद्र शासित प्रदेस मन के मुख्य सचिव, स्वास्थ्य सचिव अउ स्वास्थ्य सेवा निदेशक मन ल पाती पठोय हे।
किसान पहचान पत्र
केंद्र सरकार ह मार्च दू हजार सत्ताईस के समय-सीमा ले पांच महिना आगूच देसभर म ग्यारा करोड़ किसान पहचान पत्र बना लेहे। एखर उद्देस्य किसान मन ल विशिष्ट डिजीटल चिन्हारी देवाना हे। एखर ले सरकारी योजना, बैंक कर्जा, फसल बीमा अउ आपदा राहत ह पारदर्सी, कुसल अउ बेरा म मिल सकही। संगे कागजी कारवाई अउ घेरी-बेरी सत्यापन के जरूरत कम हो जही।
केंद्रीय कृषि मंत्री शिवराज सिंह चैहान ह किहीन हे कि किसान, पहिचान पत्र, कई ठिन सरकारी योजना मन ले मिलइया फायदा के पारदर्सी वितरण ल तय करही।
आदि बाजार
जनजातीय कार्य मंत्री रामविचार नेताम ह काली रईपुर के टाउनहाल म भारतीय जनजातीय सहकारी विपणन विकास संघ ट्राइफेड डहार ले राखे गे आदि बाजार के सुभारंभ करीन। ए मउका म ओमन किहीन कि आदि बाजार असन आयोजन ले जनजातीय सिल्पकार अउ कारीगर मनके मेहनत ल उचित भाव मिले के संगे उंखर बनाय जिनिस के चैतरफा प्रचार-प्रसार घलो होथे। ए आदि बाजार ह दू नवंबर तक चलही। एखर माध्यम ले कतकोन राज्य के जनजातीय सिल्पकार, कारीगर अउ कलाकार मन ल अपन बनाय जिनिस ल देखाय अउ बेंचे खातिर एक ठिन संघरा मंच दे गेहे।
सीएम-घोषणा
मुख्यमंत्री विष्णुदेव साय ह अंतर्राष्ट्रीय कलाकार दिवस के मउका म काली दुरूग जिला के अहिवारा के बानबरद गांव म राखे गे पंडवानी महासम्मेलन म सामिल होइन। ए मउका म मुख्यमंत्री ह किहीन हे कि तीजन बाई के सुरता अउ उंखर समृध्द सांस्कृतिक विरासत ल अवइया पीढ़ी तक पठोय खातिर राज्य सरकार ह बड़का पहल करत हे। उंखर गृह गंाव गनियारी ल कला ग्राम के रूप म बनाय जाही अउ तीजन बाई के नांव म उंहा के हाईस्कूल के नामकरण करे के पहल करे जाही। ओमन यहू बतइन कि तीजन बाई के नांव म लोककला अलंकरण इही बछर ले राज्योत्सव के मउका म दे जाही।
राष्ट्रीय पैरा केनो चैंपियनशिप
भारतीय कयाकिंग कैनोइंग एसोसिएसन डहार ले उन्नीसवां राष्ट्रीय पैरा केनो चैंपियनशिप के आयोजन काली ले भोपाल म होही। अट्ठाईस अक्टूबर तक चलइया ए चैंपियनशिप म छत्तीसगढ़ के पैरा केनो टीम घलो हिस्सा लिही। भोपाल रवाना होय ले पहिली छत्तीसगढ़ के टीम ह आज छत्तीसगढ़ प्रदेस कयाकिंग कैनोइंग एसोसिएशन के अध्यक्ष बलदेव सिंह भाटिया ले मुलाकात करीस।
शिक्षा विभाग-छुट्टी आवेदन
स्कूल शिक्षा विभाग म अब अधिकारी, शिक्षक अउ गैर शिक्षकीय कर्मचारी मन कागज म आवेदन देके छुट्टी नइ ले सकही। ओमन ल अब छुट्टी लेबर विभागीय एच.आर.आई.एम.एस. पोर्टल म ऑनलाइन एप्लीकेसन देना रइही। लोकसिक्षण संचालनालय डीपीआई ह बीते तेईस अक्टूबर के नवा आदेस निकालके ऑफलाइन आवेदन झोंके उपर पूरा तरह ले रोक लगा देहे। उहें सबो जिला शिक्षा अधिकारी मन ल ए नियम के सख्ती ले पालन कराय के निरदेस दे गेहे।
सतर्कता जागरूकता सप्ताह
प्रदेस म काली छब्बीस अक्टूबर ले सर्तकर्ता जागरूकता सप्ताह राखे जाही। एहर एक नवंबर तक चलही। सप्ताह के आगू दिन बिहनिया ग्यारा बजे प्रदेस के सबो सरकारी ऑफिस म अधिकारी अउ कर्मचारी मन भ्रष्टाचार के खिलाफ सपथ लेही। सप्ताह के दउरान कई ठिन जागरूकता वाले कारीकरम होही। सामान्य प्रशासन विभाग ह एखर बर सबो सरकारी विभाग, विभागाध्यक्ष संभागायुक्त अउ कलेक्टर मन ल जरूरी दिसा निरदेस जारी करे हे।
दुर्घटना
राजधानी रईपुर के वीआईपी चैक तीर आज होय सड़क हादसा महतारी -बेटी के मउत होगे। मिले जानकारी मुताबिक टेमरी गांव के रहवइया महतारी-बेटी दूपहिया गाड़ी ले रईपुर आवत रिहीन, तभे वीआईपी चैक तीर तेज रफ्तार टरक ह उंखर गाड़ी ल अपन चपेट म ले लीस। ए एक्सीडेंट म महतारी के मउकच म मउत होगे। उहें, बेटी ह अस्पताल ले जात बेरा परान त्याग दीस। पुलिस ह टरक ड्राइवर ल गिरफ्तार कर लेहे।
ओति, कोरिया जिला के नगर गांव तीर आज बिहनिया यात्री बस अउ चार पहिया वाहन आमने-सामने टक्कर होय ले एक झन माईलोगिन के मउकच म मउत होगे। उहें, चार झिन लइका समेत चैदह झिन मनखे घायल हे। इंखर सबो के इलाज बैंकुंठपुर जिला अस्पताल म चलत हे।
शरद-पूर्णिमा
आज शरद पूर्णिमा हरय। ए मउका म मंदिर देवाला के संगेसंग घरोघर तसमई बनाके चंदा के उजियारा म रतिहा रखे जथे अउ एला अमृत के चिन्हारी मांग के प्रसाद स्वरूप सेवन करे जथे। जघा-जघा शरद पुन्नी के बेरा म कई ठिन कारीकरम राखे गेहे।
अउ अब पेस हे मौसम के हाल…
मौसम विभाग ले मिले जानकारी मुताबिक बंगाल के खाड़ी म कमती दबाव के क्षेत्र बने के सेति प्रदेस के मौसम म बदलाव देखे ल मिलही। मौसम विज्ञानी डॉक्टर गायत्रीवाणी ह बतइन कि ए कमती दबाव के क्षेत्र ह चक्रवात म बदल के उत्तरी आंध्र प्रदेस के तट म लैंडफाल कर सकत हे। एखर परभाव ले सत्ताईस अक्टूबर के सुकमा अउ दंतेवाड़ा, उहें अट्ठाईस अउ उनतीस अक्टूबर के प्रदेस के सबो जिला म बरसा हो सकत हे।