मन की बात
प्रधानमंत्री नरेेंद्र मोदी काली पच्चीस अक्टूबर के बिहनिया ग्यारा बजे आकाशवाणी ले ‘‘मन की बात‘‘ कारीकरम म देस अउ विदेस के लोगन मन संग अपन विचार साझा करही। कारीकरम के प्रसारण आकाशवाणी अउ दूरदर्सन के पूरा नेटवर्क, एआईआर न्यूज वेबसाइट अउ न्यूज ऑन एआईआर मोबाइल ऐप म करे जाही। एखर सीधा प्रसारण आकाशवाणी, दूरदर्सन, प्रधानमंत्री कार्यालय अउ सूचना अउ प्रसारण मंत्रालय के यूट्यूब चैनल म घलो होही। हिन्दी प्रसारण के तुरते बाद आकाशवाणी क्षेत्रीय भाषा मन म घलो ए कारीकरम के प्रसारण करही।
केंद्र सरकार-चिकित्सा उपकरण
केंद्र सरकार ह सबो राज्य अउ कंेद्रशासित प्रदेस मन म सरकारी अउ निजी स्वास्थ्य संस्था मन म एक घांव इस्तेमाल होवइया चिकित्सा उपकरण अउ डिस्पोजिबल सर्जिकल वस्तु मनके दुबारा इस्तेमाल उपर सक्ति ले रोक लगाय के निरदेस देहे।
स्वास्थ्य सेवा महानिदेसालय डीजीएचएस ह एक ठन पत्र म केहे हे कि उनला कुछ निजी अउ कार्पोरेट अस्पताल मन म ए उपकरण अउ वस्तु मनके दुबारा इस्तेमाल करे जाय के जानकारी मिले हे। ए समस्या बिसेस रूप ले हृदय रोग, गुर्दा के बीमारी, कैंसर, हृदय अउ रक्तवाहिका मनके सर्जरी अउ न्यूरो सर्जरी जइसे विशेषज्ञ सेवा मन म देखे गेहे।
महानिदेसालय के अनुसार एक घांव इस्तेमाल के बाद ए उपकरण मन ल संक्रमण मुक्त करके दुबारा इस्तेमाल म लाय जात रिहीस, जबकि इनला केवल एक घांव इस्तेमाल बर बनाय गेहे। एखर ले मरीज मनके सुरक्षा, संक्रमण के रोकथाम, नियम मनके पालन अउ स्वास्थ्य सेवा मनके खर्चा ल लेके चिंता बाढ़त हे।
राज्यपाल-एपीटीआई अधिवेशन
राज्यपाल रमेन डेका आज पंडित रविशंकर शुक्ल विश्व विद्यालय रायपुर म एसोसिएसन ऑफ फार्मास्यूटिकल टीचर्स ऑफ इंडिया-एपीटीआई के अट्ठाईसवां राष्ट्रीय अधिवेशन म सामिल होइन। ए बेरा म राज्यपाल ह किहीन कि सस्ता इलाज, किफायती दवा अउ ग्रामीण क्षेत्र मन तक स्वास्थ्य सेवा पहुंचाना आज देस के आगू प्रमुख चुनौती हरय। एखर समाधान बर चिकित्सक, फार्मासिस्ट, शिक्षक अउ सोधकर्ता मन ल मिलके काम करना होही। ओमन किहीन कि स्वास्थ्य अउ शिक्षा ल केवल कारोबार नही, बल्कि समाज सेवा के माध्यम बनाय जाना चाही। श्री डेका ह नकली दवा मन उपर रोक लगाय, भारतीय पारंपरिक चिकित्सा पध्दति मन उपर वैज्ञानिक सोध करे अउ छत्तीसगढ़ के वनौषधि मनके पारंपरिक ज्ञान ल आगू लाय उपर घलो जोर दीन।
कारीकरम ल फार्मेसी काउंसिल ऑफ इंडिया के अध्यक्ष डॉक्टर मोंटू एम. पटेल अउ पंडित रविशंकर शुक्ल विश्व विद्यालय के कुलपति प्रोफेसर सच्चिदानंद शुक्ला ह घलो संबोधित करीन।
अधिवेशन म देसभर ले लगभग सात सौ शिक्षक, नौ सौ विद्यार्थी अउ फार्मेसी, विपणन अउ उद्योग जगत ले जुड़े प्रतिनिधि मन भाग लीन। ए मउका म सस्ता दवई, सुरक्षित उपचार, ग्रामीण स्वास्थ्य सेवा अउ गुणवत्तापूर्ण सोध के माध्यम ले स्वास्थ्य व्यवस्था ल मजबूत बनाय उपर विचार विमर्स करे गीस।
मुख्यमंत्री-महासमुंद
मुख्यमंत्री विष्णुदेव साय आज महासमुंद जिला के गढ़फुलझर म कोलता समाज डहार ले आयोजित वार्षिक स्नेह सम्मेलन अउ बंधु मिलन कारीकरम म सामिल होइन। ए अवसर म मुख्यमंत्री ह पचास लाख रूपिया के लागत ले बने सर्वमंगल भवन के लोकार्पण करीन। ओमन मंदिर परिसर म पचास लाख रूपिया के लागत ले डोम निर्माण के घोसना घलो करीन। कारीकरम ल संबोधित करत श्री साय ह किहीन कि कोलता समाज मेहनतकस, शिक्षित, समृध्द अउ सामाजिक मूल्य मनके प्रति समर्पित हे। ओमन किहीन कि कृषि, शिक्षा, सेवा अउ सामाजिक क्षेत्र म समाज के लोगन मन अपन विशिष्ट पहिचान बनाय हे।
स्मृति ईरानी-दौरा
भारतीय जनता पार्टी के राष्ट्रीय महामंत्री अउ छत्तीसगढ़ प्रदेस प्रभारी स्मृति ईरानी अउ राष्ट्रीय मंत्री अउ छत्तीसगढ़ प्रदेस सह प्रभारी सिध्दार्थ शंभू काली पच्चीस अक्टूबर के दू दिवसीय प्रवास म छत्तीसगढ़ आही। अपन प्रवास के दउरान श्रीमती ईरानी पार्टी पदाधिकारी, सांसद, विधायक समेत निगम आयोग अउ मंडल मनके अध्यक्ष अउ उपाध्यक्ष मन ले संवाद करही। संगेसंग भाजपा कोर ग्रुप के बइठका घलो लिही।
जिले की चिट्ठी
प्रादेशिक समाचार एकांश आकाशवाणी रायपुर डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र एके संघरा रिले करही। ए बखत के अंक म ‘‘मुंगेली‘‘ जिला के गतिविधि के बारे म जानकारी दे जाही।
विमान सेवा
अंबिकापुर ले रायपुर के बीच विमान सेवा सत्ताईस अक्टूबर ले सुरू होही। ए फ्लाइट हफ्ता म तीन दिन मंगलवार, गुरूवार अउ शनिवार के चलही। सरगुजा कलेक्टर अजीत वसंत ह बतइन कि ए फ्लाइट हैदराबाद ले जगदलपुर अउ रायपुर होवत हुए अंबिकापुर पहंुचही। ओमन बतइन कि बहत्तर सीट वाला ए फ्लाइट अंबिकापुर ले मंझनिया उड़ान भरही।
गांजा-बरामद
रायपुर जिला म अवैध मादक पदार्थ मनके खिलाफ चलाय जात ‘‘ऑपरेसन निश्चय‘‘ के तहत सिंघोड़ा पुलिस ह ग्राम रेहटीखोल करा गांजा तस्करी के मामला म चार झन आरोपी मन ल गिरफ्तार करे हे। उंखर करा ले सत्ताईस किलो ले जादा गांजा अउ चार ठन मोबाइल बरामद करे गेहे। जब्त गांजा के कीमत करीब चैदह लाख रूपिया आंके गेहे। ए सबो आरोपी राजस्थान के सिहोरी जिला के रहइया हरय।
एनआईटी-दीक्षांत समारोह
एनआईटी रायपुर के सत्रहवां दीक्षांत समारोह तीन नवंबर के पंडित दीनदयाल उपाध्याय ऑडिटोरियम म आयोजित करे जाही। समारोह म केंद्रीय कोयला अउ खनन मंत्री जी. किशन रेड्डी मुख्य अतिथि होही। ए दउरान बारह सौ ले जादा विद्यार्थी मन ल डिग्री अउ नब्बे ले जादा रिसर्च स्कॉलर्स मन ल पीएचडी के उपाधि प्रदान करे जाही।
बस्तर-दशहरा
जगदलपुर म पचहत्तर दिन तक चलइया बस्तर-दशहरा के तहत आज कुटुम्ब जात्रा के रस्म निभाय गीस। ए रस्म के दउरान बस्तर-दशहरा म सामिल होय बर आय सबो देवी-देवता मनके विधि-विधान ले पूजा-अर्चना के बाद उनला बिदाई दे गीस। ए बेरा म राज परिवार के सदस्य, मां दंतेश्वरी मंदिर के प्रधान पुजारी, राजगुरू अउ बस्तर-दशहरा समिति के अध्यक्ष उपस्थित रिहीन।
बतादन कि काली मुरिया दरबार अउ काछन जात्रा विधान संपन्न होय रिहीस। अवइया मंगलवार सत्ताईस अक्टूबर के दंतेवाड़ा ले आय मावली माता के डोली अउ मां दंतेश्वरी के छत्र के विधि-विधान पूर्वक बिदाई करे जाही।
डूबे-मौत
सूरजपुर जिला के रेन नदी म आज एके परिवार के चार झन लोगन मनके बूड़े ले मउत होगे। मिले जानकारी के अनुसार ग्राम सरस्वतीपुर ले चार झन नहाय बर नदी म गे रिहीन। नहाय के दउरान लइका मन गहरा पानी म चल दीन, जउन ल बचाय बर ओखर पिता ह नदी म छलांग लगा दीस। ए हादसा म चारों झन के बूड़े ले मउत होगे। घटना के सूचना मिले उपर पुलिस अउ गोताखोर मनके मदद ले चारों झन के शव ल नदी ले बाहिर निकाले गीस। पुलिस ह चारों झन के शव ल पोस्टमार्टम बर भेज के मामला के जांच म जुट गेहे। मृतक मन म बाप-बेटा अउ उंखर दू झन रिस्तेदार सामिल हे।
अउ अब थोरकुन समाचार सार म –
– मुख्यमंत्री विष्णुदेव साय ह आज रायपुर स्थित अपन निवास कार्यालय म पूर्व केंद्रीय मंत्री अउ संबलपुर ले सांसद धर्मेन्द्र प्रधान ले सौजन्य मुलाकात करीन। ए दउरान दूनों नेता मनके बीच सम-सामयिक बिसय उपर चर्चा होइस।
अउ
– बलौदाबाजार विधानसभा क्षेत्र म ग्रामीण विकास बर छै करोड़ साठ लाख रूपिया के सड़सठ निर्माण कार्य मनके स्वीकृति दे गेहे। एखर तहत विद्यालय अउ आंगनबाड़ी केंद्र मन म भवन के निर्माण करे जाही।