राष्ट्रपति प्रवास
राष्ट्रपति द्रौपदी मुर्मू ह किहीन हे कि केंद्र अउ छत्तीसगढ़ सरकार के साझा परयास ले राज्य अब नक्सल वाद ले मुक्त होके विकास के रद्दा म आगू बाढ़त हे। राष्ट्रपति ह ए बात आज बस्तर-दसहरा समारोह के अंतर्गत राखे गे मुरिया दरबार ल संबोधित करत किहीन।
राष्ट्रपति ह किहीन कि बछर दू हजार सैंतालीस तक विकसित भारत के लक्ष्य ले हासिल करे म छत्तीसगढ़ के महत्वपूर्ण भूमिका होही।
समारोह ल संबोधित करत राज्यपाल रमेन डेका ह किहीन कि बस्तर दसहरा सामूहिक सहभागिता अउ लोकतांत्रिक मूल्य के प्रतीक हरय। जनजातीय समाज म मिल बइठके निरनय लेहे अउ सबो के बात सुने के परंपरा रहे हे। ओमन किहीन कि बस्तर दसहरा अउ मुरिया दरबार ए संदेस देथे कि संवाद ले समस्या के समाधान निकाले जा सकथे।
उहें, मुख्यमंत्री विष्णुदेव साय ह किहीन कि माओवाद ले मुक्त बस्तर म अब नवनिर्माण अउ विकास के बारी हरय। मुख्यमंत्री ह बतइन कि नियद नेल्लानार योजना प्रधानमंत्री ग्राम सड़क योजना अउ पीएम जनमन योजना के माध्यम ले दूरदराज के क्षेत्र मन म बुनियादी सुविधा के बिस्तार करे जात हे। रईपुर ले रावघाट तक रेल सेवा सुरू हो चुके हे अउ रावघाट-जगदलपुर रेल लाइन म काम जारी हे। ए दउरान मुख्यमंत्री ह मांझी मन ल पांच हजार रूपिया अउ चालकीदार मन ल तीन हजार पांच सौ रूपिया मासिक मानदेय देहे के घोसना करीन।
राष्ट्रपति द्रौपदी मुर्मू ह जगदलपुर प्रवास के दउरान बस्तर के पारंपरिक प्रशासनिक व्यवस्था के प्रतिनिधि मन संग गोठबात करीन। ओमन मांझी चालकी अउ मेंबर-मेंबरिन मन संग बइठके मंझनिया के भोजन करीन अउ ओमन के हालचाल पूछिन।
एखर पहिली, राष्ट्रपति ह आज अपन बस्तर प्रवास के दउरान जगदलपु स्थित बस्तर के आराध्य देवी, मां दंतेश्वरी के मंदिर पहुंचके विधि-विधान ले पूजापाठ करीन। राष्ट्रपति ह मां दंतेश्वरी ले देसवासी मनके सुख-समृध्दि, खुसहाली अउ मंगलमय जीवन के कामना करीन।
प्रधानमंत्री-चिन्मय अमृत महोत्सव
प्रधानमंत्री नरेंद्र मोदी ह दू हजार सैंतालीस तक विकसित भारत के निर्माण बर विभाजन कारी सक्ति के विरूध्द समाज ल एकजुट करे के जरूरत उपर बल दिन हे। ओमन आज नई दिल्ली के भारत मंडपम म चिन्मय अमृत महोत्सव वैश्विक सम्मेलन के उद्घाटन करीन। ए मउका म प्रधानमंत्री नरेंद्र मोदी ह किहीन कि जम्मों संस्था ल राष्ट्र विकास अउ देस के गौरव ल बढ़ाय के साझा लक्ष्य के दिसा म काम करना चाही।
प्रधानमंत्री ह किहीन कि सरकार ह नवा भारत के जरूरत के संग देस के शिक्षा व्यवस्था ल जोड़े बर राष्ट्रीय शिक्षानीति सुरू करे हे।
प्रधानमंत्री नरेंद्र मोदी ह किहीन कि युवा ओखर सरकार के नीति अउ पहल म हमेसा ले केंद्र म रहे हे। श्री मोदी ह किहीन कि पच्चीस बछर ले ओमन अपन क्षमता अनुसार देस के सेवा करत हे।
प्रधानमंत्री ह किहीन हे कि भारत ले चुराय गे छै सौ पचास ले जादा प्राचीन मूर्ति अउ वस्तु मन ल पाछू बारह बछर म विदेस ले लहुटाय गेहे। ओमन किहीन कि देस के सांस्कृतिक विरासत ल फेर स्थापित करे जात हे अउ संास्कृतिक स्थल मन ल वैश्विक स्तर म मान्यता मिलत हे। श्री मोदी ह किहीन हे कि भारत के सांस्कृतिक स्थल तेजी ले यूनेस्को के विश्व धरोहर स्थल के सूची म सामिल होवत हे। तीन दिन के ए सम्मेलन म देस विदेस के नौ हजार प्रतिभागी हिस्सा लेवत हे।
सड़क-हादसा मुआवजा
मुख्यमंत्री विष्णुदेव साय ह मनेंद्रगढ़-केल्हारी रद्दा म काली होय बस दुर्घटना म छै मनखे के निधन म दुःख जतइन हे। ओमन मृतक के परिवार के प्रति संवेदना व्यक्त करीन हे। उहें, घायल मन के जल्दी स्वस्थ्य होय के कामना करीन हे। मुख्यमंत्री ह मृतक के परिजन मन ल राज्य शासन कोति ले पांच-पांच लाख अउ घायल मन ल पचास-पचास हजार रूपिया के आर्थिक सहायता प्रदान करे के घोसना करीन हे। ओमन किहीन कि ए कठिन समय म राज्य सरकार प्रभावित परिवार मन संग खड़ा हे, अउ ओमन ल हर संभव सहायता दे जाही।
मुख्य सचिव-राष्ट्रीय सम्मेलन
मुख्य सचिव मनके राष्ट्रीय सम्मेलन के तियारी ल लेके आज नवा रईपुर स्थित मंत्रालय म उच्च स्तरीय बइठका आयोजित करे गीस। मुख्य सचिव विकाससील के अध्यक्षता म होय ए बइठका म राज्य के प्रमुख उपलब्धि, नवाचार अउ आने-आने क्षेत्र म करे गे गुनात्मक सुधार के समीक्षा करे गीस। बइठका म मुख्य सचिव ह शिक्षा, कौसल विकास, स्वास्थ्य अउ पोषण के क्षेत्र म करे गे उत्कृष्ट कार्य मन ल राष्ट्रीय सम्मेलन म प्रमुखता ले प्रस्तुत करे के निरदेस दीन। ओमन संबंधित विभाग ल निर्धारित समय-सीमा म तियारी पूरा करे बर किहीन।
बातों-बातों-में
प्रादेशिक समाचार एकांश के समसामयिक बिसय उपर आधारित सप्ताहिक कारीकरम ‘‘बातों-बातों-में‘‘ ए बखत ‘श्री अन्न मिलेट्स योजना म दुरूग के मर्रा स्थित एग्रीकल्चर कालेज के डीन अनिल कुमार वर्मा ले लेगे भेंटवार्ता के प्रसारण करे जाही। एखर प्रसारण काली चौबीस अक्टूबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया 9 बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
दुर्घटना
महासमुंद जिला के पटेवा थाना क्षेत्र के बावनकेरा करा राष्ट्रीय राजमार्ग क्रमांक तिरपन म आज बिहनिया होय सड़क हादसा म दू मनखे के मउत होगे। उहें, तीन झिन दूसर घायल हो गेहे। जानकारी के मुताबिक संबलपुर ले राजनांदगांव जात कार एक टरक ले टकरागे। सूचना मिले के बाद पुलिस के टीम घटना स्थल म पहुंचिस। जम्मों ल इलाज बर तुमगांव के सामुदायिक स्वास्थ्य केंद्र लाय गीस, जिंहा डॉक्टर मन दू महिला ल मृत घोसित कर दीन। उहें, घायल मनके उपचार जारी हे।
छत्तीसगढ़-पैरा गेम्स
एशियन पैरा गेम्स-दू हजार छब्बीस म छत्तीसगढ़ के तोमन कुमार अउ जम्मू कश्मीर के पैरा तीरंदाज शीतल देवी ह स्वर्ण पदक जीते हे। दूनों झन पैरा तीरंदाजी के कंपाउंड मिक्स्ड टीम स्पर्धा म ए उपलब्धि हासिल करीन। वित्त मंत्री ओपी चौधरी ह दूनों खिलाड़ी मन ल स्वर्ण पदक जीते उपर बधई दीन हे। ओमन किहीन कि ए उपलब्धि छत्तीसगढ़ बर गरब के क्षण हरय।
जानकारी के मुताबिक पैरा तीरंदाज तोमन कुमार बालोद जिला के नवागांव के निवासी हे अउ माओवादी विरोधी अभियान के दउरान आईईडी बिस्फोट म गंभीर रूप ले घायल हो गे रिहीन।
राज्य स्तरीय शालेय क्रीड़ा प्रतियोगिता
अंबिकापुर म आज ले छब्बीसवां राज्य स्तरीय शालेय क्रीडा प्रतियोगिता सुरू हो गेहे। प्रतियोगिता के सुभारंभ सरगुजा संासद चिंतामणि महाराज ह करीन। चार दिन के ए प्रतियोगिता म बस्तर, बिलासपुर, दुरूग, रईपुर अउ सरगुजा संभाग के लगभग चार सौ साठ खिलाड़ी हिस्सा लेवत हे। प्रतियोगिता म फुटबाल, बास्केटबॉल, बैडमिंटन अउ साफ्टबॉल टेनिस के मुकाबला आने-आने आयु वर्ग म आयोजित करे जात हे।
छत्तीसगढ़ हॉकी लीग
काली गुरूवार के रईपुर के सरदार वल्लभ भाई पटेल अंतराष्ट्रीय हॉकी स्टेडियम म खेले गे छत्तीसगढ़ हॉकी लीग के उद्घाटन मैच म न्यायधानी नाइट्स ह राजधानी रॉयल्स ल दू-एक ले हराके जीत हासिल करीस। न्यायधानी नाइट्स कोति ले चिराग अउ केतन कुशवाहा ह एक-एक गोल करीन, जबकि राजधानी रॉयल्स कोति ले रोसन ह एकमात्र गोल करीन। छत्तीसगढ़ हॉकी लीग के तहत आज दू ठिन मैच खेले जाही।
अउ अब पेस हे मौसम के हाल…
मौसम विभाग के अनुसार दक्षिण पूर्व बंगाल के खाड़ी म एक ठिन कम दबाव के क्षेत्र बने हे। अवइया चौबीस घंटा म कम दबाव के क्षेत्र के पश्चिम दिसा कोति बाढ़े के संभावना हे। एखर असर ले दक्षिण बस्तर के मौसम म बदलाव होही। उहें, कम दबाव के क्षेत्र बाढ़ के चक्रवाती घेरा के रूप म स्थित हो जही। मौसम विज्ञानी डॉक्टर गायत्रीवाणी ह बतइन कि अवइया तीन-चार दिन म प्रदेस म बदली बारिस होय के आसार हरय।