राष्ट्रपति-छत्तीसगढ़ प्रवास
राष्ट्रपति द्रौपदी मुर्मू काली बाईस अक्टूबर ले छत्तीसगढ़ के दू दिन के दउरा म रइही। ए दउरान ओमन ह रईपुर अउ जगदलपुर म राखे गे कतकोन कारीकरम म सामिल होही। राष्ट्रपति काली मंझनिया बारह बजके पैंतालीस मिनट म रईपुर के लोकभवन म पूज्य माता हासी देवी के सम्मान म दू सौ रूपिया के स्मारक सिक्का जारी करही। एखर बाद ओमन ह संझा चार बजे बूढ़ापारा के बलबीर ंिसंह जुनेजा इंडोर स्टेडियम नुआखाई पर्व के मउका म राखे गे ‘सेवा सम्मान पर्व‘ अउ ‘युवा प्रबोधन‘ कारीकरम म मुख्य अतिथि के रूप म सामिल होही।
अमित शाह-पुलिस स्मृति दिवस
केंद्रीय गृह मंत्री अमित शाह ह किहीन कि सरकार देस म नसीला चीज के समस्या ल खतम करे बर इकतीस दिसंबर दू हजार उनतीस के लक्ष्य राखे हे। नई दिल्ली म राष्ट्रीय पुलिस स्मारक म आज पुलिस स्मृति दिवस समारोह म श्री शाह ह देस के पुलिस बल ले नसीला पदार्थ के समस्या ल खतम करे के दिसा म काम करे के आह्वान करीन।
गृह मंत्री ह किहीन कि देस ए बछर इकतीस मार्च के नक्सलवाद ले मुक्त हो गेहे हवय। श्री शाह ह किहीन हे कि नक्सलवाद के खिलाफ ए लड़ाई म तीन हजार छै सौ ले जादा सुरक्षाकर्मी अउ करीबन तेरह हजार निरदोस नागरिक मनके जान गेहे।
एखर पहिली, केंद्रीय गृह मंत्री ह राष्ट्रीय पुलिस स्मृति दिवस के मउका म राष्ट्रीय पुलिस स्मारक ले राष्ट्रव्यापी मोटर साइकिल रैली ल रवाना करीन। ए रैली के बिसय हे-नसीले पदार्थ के विरूध्द लड़ाई।
राष्ट्रपति कला प्रदर्शनी
राष्ट्रपति द्रौपदी मुर्मू ह कलाकार मन ल आर्थिक रूप ले मजबूत बनाय बर अउ उंखर कलात्मक क्षमता ल निखारे उपर जोर दीन हे। ओमन किहीन कि कलाकार मन ल अपन कला के दायरा बढ़ाय बर अउ राष्ट्रीय अंतरराष्ट्रीय स्तर म प्रतिस्पर्धा करे बर प्रोत्साहित करे जाना चाही। राष्ट्रपति ह आज नई दिल्ली म पैंसठवां राष्ट्रीय कला प्रदर्सनी के पुरस्कार समारोह म बोलत रिहीन। श्रीमती मुर्मू ह किहीन कि आज कलाकार मन ल सिरीफ रचनात्मक मउका ले बल्कि आर्थिक मदद, अपन कलाकृति बर व्यापक बाजार अउ कला संग्रह कर्ता मन ले जुड़े के मंच घलो देवाय के जरूरत हे।
पुलिस स्मृति दिवस
आज पुलिस स्मृति दिवस हरय। ए दिवस ल बछर उन्नीस सौ उनसठ म सहीद होय केंद्रीय रिजर्व पुलिस बल के जवान मनके स्मृति म मनाय जाथे। उपराष्ट्रपति सी.पी.राधाकृष्णन अउ प्रधानमंत्री नरेंद्र मोदी ह देस बर सर्वोच्च बलिदान देवइया पुलिसकर्मी मन ल अपन श्रध्दांजलि दीन हे। प्रधानमंत्री ह किहीन हे कि ए दिन पुलिस कर्मी मन बर अपन कृतज्ञता देखाय के मउका हे जउन मन ह कठिन समय म घलो पूरा निष्ठा अउ समर्पण के संग अपन कर्तव्य ल निभाइन।
पुलिस स्मृति दिवस म रईपुर के माना के चौंथा वाहिनी छत्तीसगढ़ सशस्त्र बल के प्रांगन म राखे गे पुलिस स्मृति दिवस परेड म मुख्यमंत्री विष्णुदेव साय सामिल होइन। ए मउका म श्री साय ह सर्वोच्च बलिदान देवइया अमर शहीद मन ल नमन करीन अउ सहीद स्मारक म पुष्पचक्र चघइन। ओमन ह सहीद पुलिस अधिकारी अउ जवान मनके परिवार वाला मन ल सॉल, श्री फल अउ स्मृति चिन्ह भेंट करके सम्मानित करीन। मुख्यमंत्री ह किहीन हे कि छत्तीसगढ़ म नक्सलवाद के खिलाफ मिले निर्णायक सफलता पुलिस अउ सुरक्षा बल के जवान मनके साहस, कर्तव्य निष्ठा अउ बलिदान के परिणाम हे। श्री साय ह किहीन हे कि अमर सहीद मनके बलिदान हमर मनके मार्गदर्सन करत रइही अउ विकसित छत्तीसगढ़ बनाय के संकल्प ल मजबूत करही।
समारोह ल उपमुख्यमंत्री अउ गृह मंत्री विजय शर्मा अउ पुलिस महानिदेसक अरूणदेव गौतम ह घलो संबोधित करीन।
पुलिस स्मृति दिवस के मउका म मुख्यमंत्री ह रईपुर के राजीव स्मृति वन के सहीद वाटिका घलो पहुंचिन। ओमन ह अमर जवान स्तंभ म पुष्प चघाके बलिदान देवइया जवान मन ल अपन श्रध्दांजलि दीन।
भारत अंतराष्ट्रीय व्यापार मेला
नई दिल्ली के भारत मंडपम म अवइया चौदह ले सत्ताईस नवंबर तक ‘भारत अंतर्राष्ट्रीय व्यापार मेला‘ के आयोजन करे जाही। मेला म छत्तीसगढ़ के पवेलियन घलो होही, जेखर बारे म आज मंत्रालय म मुख्य सचिव विकाससील के अध्यक्षता म समीक्षा बइठका होइस। मुख्य सचिव ह व्यापार मेला के दउरान छत्तीसगढ़ पवेलियन के निर्माण, सुरक्षा, ब्रांडिंग अउ दूसर व्यवस्था ल समय-सीमा के भीतर पूरा करे के निरदेस दीन। ए बछर मेला के थीम ‘‘विकास अउ विरासत‘‘ राखे गेहे।
पैन इंडिया रेल जनसंवाद
रेलवे यात्री मनके समस्या ल समझे बर अउ सुविधा म सुधार करे बर काली बाईस अक्टूबर के बिलासपुर संघरा रेलमंडल के सबो स्टेसन म ‘‘पैन इंडिया रेल जनसंवाद‘‘ के आयोजन करे जाही। रेलवे बोर्ड के बिसेस अभियान सिक्स प्वॉइंट ओ के तहत अधिकारी मन ह, यात्री मन ले गोठबात करके उंखर सिकायत अउ सुझाव ल सुनही अउ निपटारा ले जुड़े कदम उठाही। कारीकरम के बाद स्टेसन म स्वच्छता अभियान घलो चलाय जाही, जेमा यात्री अउ आम लोगन के भागीदारी निश्चित करे जाही।
भूपेंद्र नाग-राष्ट्रीय उपाध्यक्ष
कांकेर जिला के भूपेंद्र नाग ल भारतीय जनता युवा मोर्चा के राष्ट्रीय उपाध्य नियुक्त करे गेहे। एखर पहिली, ओमन ह भारतीय जनता युवा मोर्चा के प्रदेस उपाध्यक्ष रहे चुके हे। प्रदेस स्तर म संगठन म जिम्मेदारी निभाय के बाद ओमन ल अब राष्ट्रीय टीम म जघा मिले हे। ए नियुक्ति भाजपा के राष्ट्रीय अध्यक्ष नीतिन नबीन के निरदेस म जारी होय नवा राष्ट्रीय टीम के सूची के तहत करे गेहे।
छत्तीसगढ़ हॉकी लीग
रईपुर के सरदार वल्लभ भाई पटेल अंतर्राष्ट्रीय हॉकी स्टेडियम म अभी ले थोरकुन देर बाद ‘‘छत्तीसगढ़ हॉकी लीग‘‘ के सुरूआत होही। एक नवंबर तक चलइया एक लीग म राज्य के छै टीम-चक्रधर चैंपियनस, न्यायाधानी नाइट्स, राजधानी रॉयल्स, मैनपाट टाइटन्स, संस्कारधानी स्टाइकर्स अउ बैलाडीला बुल्स भाग लेवत हे। प्रतियोगिता म कुल अट्ठारा मैच खेले जाही। भारत के सबले प्रतिष्ठित अउ सफल फील्ड हॉकी खिलाड़ी मन ह एक सरदार सिंह ल छत्तीसगढ़ हॉकी लीग के पहिली सीजन के लीग एंबेसडर घोसित करे गेहे। लीग के मैच हर दिन संझा साढ़े पांच बजे ले हिंदी अउ छत्तीसगढ़ी भाखा म देखे जा सकही। ए लीग के सबो मैच के लाइव स्ट्रीमिंग जियोहॉटस्टारम करे जाही।
सीबीएसई-प्रशिक्षण कार्यक्रम
केंद्रीय माध्यमिक शिक्षा बोर्ड-सीबीएसई ले जुड़े स्कूल के शिक्षक अउ प्राचार्य मन बर निष्ठा ऑनलाइन प्रसिक्षण कारीकरम के चक्र दुबारा सुरू कर दे गेहे। शिक्षा मंत्रालय के प्रमुख कारीकरम म ए बखत शिक्षक मन ल आधुनिक शिक्षण विधि के संगेसंग साइबर सुरक्षा, ई-कचरा प्रबंधन अउ एक्सन रिसर्च जइसन सम-सामयिक बिसय के ट्रेनिंग दे जाही।
दुर्घटना
कांकेर जिला के नंदनमारा तीर पाछू रतिहा होय सड़क दुर्घटना म दू झन युवक मनके मउत होगिस। घटना ले नाराज ग्रामीण मन ह आज बिहनिया बाईपास रद्दा म चक्काजाम कर दीन, जेखर सेति अवई-जवई प्रभावित होइस। मउका म पहुंचे प्रशासनिक अधिकारी अउ पुलिस बल ह ग्रामीण मन ल समझाइस दीस जेखर बाद चक्काजाम सिराइस।
ऐति, गौरेला-पेंड्रा-मरवाही जिला म घलो पाछू रतिहा आने-आने जघा म होय सड़क हादसा म दू झन लोगन के मउत होगिस। उहें, बीस ले जादा लोगन घायल हो गेहे।
सिरपुर-यूनेस्को
महासमुंद जिला के ऐतिहासिक नगरी सिरपुर ल यूनेस्को के विश्व धरोहर के अस्थाई सूची म सामिल करे गेहे। यूनेस्को के वेबसाइट म एला ‘‘सिरपुर कल्चरल एंड आर्कियोलॉजिकल लैंडस्केप‘‘ नाम ले दर्ज करे गेहे। एखर ले सिरपुर के ऐतिहासिक अउ सांस्कृतिक विरासत ल वैश्विक पहिचान मिले के उम्मीद हे। फेर स्थाई विश्व धरोहर के दर्जा पाय बर अभी नामांकन अउ मूल्यांकन के प्रक्रिया पूरा करना होहीं।
अउ अब थोरकुन समाचार सार म –
– बीजापुर जिला के पुर्नवास केंद्र म प्रसिक्षण लेवइया एक झन पुर्नवासित माओवादी ह फांसी लगाके आत्महत्या कर लेहे। पुलिस ह ए मामला के जांच सुरू कर देहे।
अउ
– जिला रोजगार अउ स्वरोजगार मार्गदर्सन केंद्र बालोद डहार ले काली बाईस अक्टूबर के संयुक्त जिला कार्यालय के रोजगार कार्यालय म रोजगार मेला के आयोजन करे जाही। मेला म चार निजी नियोजक मन डहार ले दू सौ पंद्रह तकनीकी अउ गैर तकनीकी पद म भर्ती करे जाही।