ट्रेन सेवा-शुभारंभ
मुख्यमंत्री विष्णुदेव साय ह आज रायपुर-रावघाट अउ रायपुर-कुरूद के बीच चलने वाला ट्रेन मन ल रायपुर रेलवे स्टेसन म आयोजित कार्यक्रम म हरा झंडा दिखईन। रेलमंत्री अश्विनी वैष्णव वीडियो कॉन्फ्रेंसिंग के माध्यम ले कार्यक्रम म जुड़े रिहीन। ए मउका म ताड़ोकी-रावघाट नवा रेललाइन अउ अभनपुर-कुरूद ब्रॉडगेज रेलखंड के उद्घाटन करे गीस। उहें, रायपुर म एक सौ तैंतीस करोड़ रूपिया के लागत ले बनने वाला इलेक्ट्रिक रेल इंजन मेंटेनेंस फैसिलिटी के घलो सिलान्यास करे गीस।
कार्यक्रम ल वर्चुअल संबोधित करत रेलमंत्री ह किहीन कि अवइया बेरा म छत्तीसगढ़ म सौ ठिन नवा ट्रेन सुरू करना संभव हो सकत हे। श्री वैष्णव ह किहीन कि अवइया कुछ महीना म रायपुर ले धमतरी तक ट्रेन सेवा सुरू करे के दिसा म काम करे जाही। ओमन भविष्य म रायपुर ले रावघाट अउ जगदलपुर होवत कोल्हापुर के रस्ता विशाखापट्टनम तक रेल संपर्क विकसित करे के योजना के जिकर करीन।
उहें, मुख्यमंत्री विष्णुदेव साय ह किहीन कि छत्तीसगढ़ बर आज के दिन सुभ हे। ओमन बतईन कि रावघाट ले ट्रेन रायपुर आही, जबकि रायपुर ले सुरू होवइया ट्रेन कुरूद जाही। दूनों नवा यात्री सेवा के सुरूआत ले राज्य म रेल संपर्क बाढ़ही। श्री साय ह प्रधानमंत्री नरेन्द्र मोदी अउ केन्द्रीय रेल मंत्री अश्विनी वैष्णव के आभार जतात किहीन कि राज्य म रेलवे के क्षेत्र म विकास काम तेजी ले आगू बाढ़त हे।
बतादन कि रायपुर-रावघाट रेललाइन परियोजना के सुरू होय ले बस्तर अउ दक्षिण छत्तीसगढ़ के दूरदराज के इलाका के लोगन मन ल राजधानी रायपुर तक आय-जाय म सुविधा मिलही। उहें, अभनपुर-कुरूद रेल सेवा सुरू होय ले धमतरी क्षेत्र के विद्यार्थी, नौकरीपेशा लोग, व्यापारी अउ रोज के सफर करइया यात्राी मन ल राजधानी तक पहुंचे के अतिरिक्त विकल्प मिलही।
दशहरा पर्व
असत्य म सत्य के जीत के प्रतीक दशहरा परब आज छत्तीसगढ़ समेत देसभर म पारंपरिक उछाह के संग मनाय जात हे। ए मउका म रावण, मेघनाथ अउ कुंभकरण के पुतला मनके दहन करे जाथे। राजधानी रायपुर समेत प्रदेस के जम्मों जिला मन म दशहरा उत्सव के आयोजन करे जात हे। रायपुर के डब्ल्यू आरएसस कॉलोनी म एक सौ एक फीट ऊंचा रावण के पुतला दहन करे जाही। उहें, रावणभाटा मैदान म घलो बिसेस आयोजन करे जात हे।
दशहरा के मउका म आज रईपुर, दुरूग, राजनांदगांव, बिलासपुर समेत प्रदेस के आने-आने थाना, चौकी अउ शस्त्रागार म राखे शस्त्र मनके साफ-सफाई करके विधिविधान ले पूजापाठ करे गीस।
मुख्यमंत्री विष्णुदेव साय ह रईपुर स्थित अपन निवास कार्यालय म विधि-विधान ल शस्त्र के पूजा करके मां भगवती के आराधना करीन। ए मउका म मुख्यमंत्री ह प्रदेसवासी मन ल विजयादशमीं तिहार के सुभकामना दीन।
बस्तर-दशहरा
पचहत्तर दिन तक चलइया विश्व प्रसिद्ध बस्तर दशहरा के तहत आज कुंवारी पूजा अउ जोगी उठाई के रसम अदा करे गीस। उहें, आज रतिहा मावली परघाव पूजा विधान घलो संपन्न होही। ए रस्म म दंतेवाड़ा ले बस्तर दशहरा म सामिल होय बर आय मावली माता अउ दंतेश्वरी माता के डोली अउ छत्र ल विधि-विधान पूर्वक परघाही। एखर पहिली, काली निशा जात्रा के रस्म निभाग गे रिहीस।
आरएसएस-वार्षिक विजयदशमी उत्सव
राष्ट्रीय स्वयंसेवक संघ-आर.एस.एस. के प्रमुख डॉक्टर मोहन भागवत ह केहे हे कि पश्चिम ले उपजे एक लहर भारत समेत पूरा दुनिया के सालीनता, संस्कृति अउ मानवता के मूल्य ल खतम करे के कोसिस करत हे। ओमन किहीन कि विकसित देस घलो ए लहर के प्रभाव के सामना करत हे।
नागपुर के रेशिमबाग मैदान म आरएसएस के वार्षिक विजयादशमी उत्सव समारोह म श्री भागवत ह किहीन कि देस ल तोड़े के कोसिस करइया ताकत सुनियोजित रणनीति के साथ काम करत हे। श्री भागवत ह किहीन कि विरोध प्रदर्सन समाज म विभाजन ल बढ़ावा दे सकत हे।
प्रधानमंत्री नरेन्द्र मोदी अउ केन्द्रीय गृहमंत्री अमित शाह ह राष्ट्रीय स्वयं सेवक संघ के एक सौ एकवां स्थापना दिवस म कार्यकर्ता मन ल बधाई दीन। सोशल मीडिया पोस्ट म श्री मोदी ह किहीन कि आरएसएस ह सेवा, राष्ट्र निर्माण अउ सामाजिक सद्भाव के एक उल्लेखनीय सतक पूरा कर लेहे।
उस्ताद बिस्मिल्लाह खां युवा पुरस्कार
प्रदेस के डॉक्टर आनंद कुमार पांडेय अउ घनश्याम साहू ल प्रतिष्ठित उस्ताद बिस्मिल्लाह खां युवा पुरस्कार-दू हजार पच्चीस ले सम्मानित करे गेहे। काली नई दिल्ली म आयोजित समारोह म केन्द्रीय संस्कृति अउ पर्यटन मंत्री गजेन्द्र सिंह शेखावत ह दूनों कलाकार मन ल सम्मान प्रदान करीन।
जशपुर म रंगमंच के अलख बारे वाले डॉक्टर आनंद पांडेय ल उत्कृष्ट अभिनय अउ सारंगढ़ के घनश्याम साहू ल विशिष्ट नाट्य लेखन के संघरा छत्तीसगढ़ी फिलिम म प्रभावशाली पटकथा लेखन बर राष्ट्रीय सम्मान मिले हे।
ए उपलब्धि म मुख्यमंत्री विष्णुदेव साय अउ पर्यटन अउ संस्कृति मंत्री राजेश अग्रवाल ह डॉक्टर आनंद पांडेय अउ घनश्याम साहू ल बधाई अउ सुभकामना दीन हे। श्री साय ह एला पूरा छत्तीसगढ़ बर पूरा गरब के क्षण बतईन हे।
हॉकी लीग
रायपुर के सरदार वल्लभ भाई पटेल अंतर्राष्ट्रीय हॉकी स्टेडियम म काली इक्कीस अक्टूबर ले हॉकी लीग के आयोजन करे जाही। एक नवंबर तक चलइया ए लीग म राज्य के छह टीम – चक्रधर चैंपियंस, न्यायधानी नाइट्स, राजधानी रॉयल्स, मैनपाट टाइटन्स, संस्कारधानी स्टांइकर्स अउ बैलाडीला बुल्स हिस्सा लीहीं। प्रतियोगिता म कुल अट्ठारह मैच खेले जाही। भारत के सबले प्रतिष्ठित अउ सफल फील्ड हॉकी खिलाड़ी म ले एक सरदार सिंह ल छत्तीसगढ़ हॉकी लीग के पहिली सीजन के लीग एंबेसडर घोषित करे गेहे। लीग के मैच हर दिन संझा साढ़़े पांच बजे ले हिन्दी अउ छत्तीसगढ़ी भाखा म देखे जा सकही। ए लीग के जम्मों मैच के लाइव स्ट्रीमिंग जिया हॉटस्टार म करे जाही।
महिला टी-20 मैच
महिला क्रिकेट म भारत अउ जिम्बाव्वे के बीच तीसरा अउ आखिरी टी-ट्वेंटी अंतर्राष्ट्रीय मुकाबला आज रायपुर के शहीद वीरनारायण सिंह अंतर्राष्ट्रीय क्रिकेट स्टेडियम म खेले जाही। मैच संझा सात बजे ले सुरू होही। भारत ह इतवार के खेले गे दूसर टी-ट्वेंटी मैच म जिम्बाव्वे ल नौ विकेट ले हरा के श्रृंखला म दू-शून्य के अजेय बढ़त बना लेहे।
रेलवे-सलाह
भारतीय रेल ह यात्री मन ल रेलगाड़ी अउ रेलवे परिसर म मोबाइल फोन के स्पीकर म संगीत, वीडियो या दूसर ऑडियो चलाय ले बाचे के सलाह देहे। अइसे करे ले दूसर मन ल परेसानी होय म संबंधित यात्री ल रेलवे परिसर ले हटाय जा सकत हे अउ एक हजार रूपिया तक के जुर्माना लगाय जा सकत हे। बिसेस परिस्थ्तिि म यात्री के टिकिट या पास घलो जब्ती करे जा सकत हे। रेलवे ह अपन जम्मों मंडल ल सार्वजनिक उद्घोषणा अउ स्टेसन मन म सूचना पट्टिका के माध्यम ले यात्री मन ल जागरूक करे के निरदेस देहे। निरदेस के लगातार उल्लंघन करे म यात्री ल छह महीना तक के जेल, पांच हजार रूपिया तक जुर्माना या दूनों सजा हो सकत हे।
डब्ल्यू.डब्ल्यू.डब्ल्यू.एफ-हरित दिवाली
वर्ल्ड वाइड फंड फॉर नेचर – भारत कार्यक्रम केन्द्र – संसाधन भागीदार ह देसव्यापी हरित दिवाली अभियान सुरू करे हे। ए अभियान म नागरिक मन ले पटाखा ले परहेज करे अउ पर्यावरण के अनुकूल स्वच्छ अउ हरित देवारी मनाय के आग्रह करे गेहे। पर्यावरण, वन अउ जलवायु परिवर्तन मंत्रालय ह केहे हे कि ए अभियान आठ नवंबर तक चलही। मंत्रालय ह बताय हे कि ए अभियान स्कूल, कॉलेज, शैक्षणिक संस्थान, आवासीय कल्याण संघ अउ स्थानीय समुदाय मन तक पहुंचही। ए अभियान म राष्ट्रीय स्वच्छ वायु कार्यक्रम के अंतर्गत अवइया एक सौ तीस सहर मन म बिसेस ध्यान दे जाही।