रेल सेवा-शुभारंभ
रेल मंत्री अश्विनी वैष्णव अउ मुख्यमंत्री विष्णुदेव साय काली बीस अक्टूबर के रावघाट ले रईपुर अउ रईपुर ले कुरूद बर रेल सेवा के सुभारंभ करही। उहें, ताड़ोकी-रावघाट रेल लाइन अउ अभनपुर-कुरूद ब्रॉड गेज रेल लाइन अउ रईपुर म इलेक्ट्रिक रेल इंजन मेंटनेंस सुबिधा के उद्घाटन करही। कारीकरम म केंद्रीय रेल मंत्री अश्विनी वैष्णव वर्चुअल माध्यम ले जुड़ही।
कृषि मंत्री-पोर्टल
केंद्रीय कृषि मंत्री शिवराज सिंह चौहान ह किसान मन बर संसोधित एग्रीवेल्फेयर पोर्टल के सुभारंभ करीन। एखर ले किसान मन ल सरकारी योजना, आर्थिक सहायता अउ खेती-किसानी ले जुड़े जानकारी मोबाइल म मिलही। ए बेरा म श्री चौहान ह किहीन हे कि एखर ले किसान मन ल योजना के जानकारी ले अउ अरजी करे बर आने-आने कार्यालय के चक्कर नइ लगाय बर पड़ही। एग्रीवेल्फेयर पोर्टल म प्रधानमंत्री किसान सम्मान निधि, प्रधानमंत्री फसल बीमा योजना जइसन परमुख पहल ले जुड़े सेवा एके जघा मिलही। एखर ले किसान मन ल मौसम खातू-बीजा के जानकारी, वैज्ञानिक खेती के तौर-तरीका अउ मंडी भाव के जानकारी मिलही।
उस्ताद बिस्मिल्लाह खान युवा पुरस्कार
केंद्रीय संस्कृति अउ पर्यटन मंत्री गजेन्द्र सिंह शेखावत ह आज संगीत, नाटक अकादमी के बछर दू हजार चौबीस-पच्चीस बर देसभर के एक सौ छै युवा कलाकार मन ल उस्ताद बिस्मिल्लाह खान युवा पुरस्कार दीन। एमा छत्तीसगढ़ के जशपुर जिला के आनंद कुमार पाण्डे सामिल हे। श्री पाण्डे ल अभिनय बर ए पुरस्कार दे गेहे। नई दिल्ली म पुरस्कार समारोह म बोलत केंद्रीय मंत्री श्री शेखावत ह किहीन कि भारत के आत्मा अउ उंखर चिन्हारी सांस्कृतिक परंपरा अउ विरासत म मौजूद हे।
गोठबात म रंगमंच अभिनेता अउ निर्देसक आनंद कुमार पाण्डे ह अपन उपलब्धि म खुसी जतइन। ओमन किहीन कि प्रदेस के नवा कलाकार मन ल बने मउका मिलय एखर बर सरलग काम करत हे। ओमन यहू किहीन कि जशपुर जइसन एक छोटे जघा म हमन सरलग नाटक करत रेहेन अउ छत्तीसगढ़ म बिसेस रूप ले जशपुर जइसन क्षेत्र म जउन कलाकार मन ल प्लेटफॉर्म नइ मिलय उंखर बर हमर परयास हवय कि हमन जुरमिलके युवा मनके प्रतिभा ल आगू लावन अउ ओमन ल एक मंच देवन।
‘उपमुख्यमंत्री-लोकार्पण
उपमुख्यमंत्री विजय शर्मा ह कबीरधाम जिला के गांव भलपहरी अउ अचानकपुर म अटल डिजीटल सेवा केंद्र भवन अउ शासकीय प्राथमिक साला के नवा बने कक्ष के लोकार्पण करीन। ए मउका म श्री शर्मा ह ग्राम भलपहरी अउ अचानकपुर म करीबन अड़तालीस लाख रूपिया के विकास काम के घोसना करीन अउ चौपाल लगाके गांव के लोगन के समस्या सुनत अधिकारी मन ल समस्या के जल्दी निपटारा करे के बात किहीन।
मतदाता सूची-पुनरीक्षण
भारत निर्वाचन आयोग ह मतदाता सूची के बिसेस पुनरीक्षण कारीकरम के समय-सारिणी तय कर देहे। एमा प्रारूप मतदाता सूची के प्रकासन बारह नवंबर के करे जाही। उहें, नांव जुड़वाय, जानकारी म संसोधन कराय अउ दावा आपत्ति बर बारह नवंबर ले ग्यारा दिसंबर तक के बेरा तय होय हे। पुनरीक्षण काम पूरा होय के बाद अंतिम मतदाता सूची के प्रकासन चार जनवरी दू हजार सत्ताईस के होही।
भारत निर्वाचन आयोग ह लोगन मन ले प्रारूप मतदाता सूची म अपन नांव अउ जानकारी जांचे के अपील करीन हे। आयोग ह केहे हे कि पात्र नागरिक तय बेरा म नांव जोड़वाय अउ जरूरी संसोधन बर अरजी देवय, जेखर ले कोनो भी पात्र मतदाता अपन वोट डारे के अधिकार ले वंचित झन होवय।
बीएसपी-स्पष्टीकरण
भिलाई इस्पात संयंत्र बीएसपी ह सोसल मीडिया अउ प्रिंट मीडिया प्रकासन म भिलाई इस्पात संयंत्र ल बेचे के योजना के संबंध म प्रसारित होवत खबर ल गलत अउ भ्रामक बताय हे। इस्पात मंत्रालय ह अपन आधिकारिक सोसल मीडिया ले ए दावा के खंडन करे हे। संगेसंग प्रेस सूचना ब्यूरो-पीआईबी के फैक्ट चेक इकाई ह ए खबर ल गलत अउ निराधार बताय हे। संयंत्र प्रबंधन ह अपन कर्मचारी, हितधारक अउ लोगन ले अपील करे हे कि अइसन सूचना म भरोसा झन करय अउ न ही एला आगू प्रसारित करय।
राष्ट्रीय बाइक-रैली
राष्ट्रीय एकता दिवस के मउका म ‘एक भारत श्रेष्ठ भारत‘ अउ नसा मुक्त भारत सशक्त भारत के संदेस के संग निकले राष्ट्रीय बाइक रैली आज कवर्धा पहुंचिस, जिंहा उपमुख्यमंत्री विजय शर्मा ह ओडिसा अउ छत्तीसगढ़ पुलिस के बाइक राइडर्स मनके सम्मान करीन। एखर बाद रैली ल हरियर झंडी दिखाके मध्यप्रदेस बर रवाना करे गीस। ए बेरा म उपमुख्यमंत्री ह किहीन कि ए रैली सिरिफ यात्रा नोहय, भलुक राष्ट्रीय एकता ल मजबूत करे अउ नसा मुक्त समाज बनाय बर जन-जागरूकता अभियान हे। फाइट अगेंस्ट ड्रग्स थीम म निकले ए रैली देस के अट्ठाईस राज्य अउ आठ केंद्रशासित प्रदेस म राष्ट्रीय एकता अउ नसा मुक्ति के संदेस पहुंचाही। एखर पहिली, काली रईपुर के पुलिस परेड मैदान म राखे गे समारोह म पुलिस महानिदेसक डीजीपी अरूणदेव गौतम अउ एडीजी अमित कुमार ह ए रैली ल हरियर झंडी देखाके रवाना करीन।
निलंबन
अंबिकापुर म ड्यूटी के दउरान सराब पिये अउ काम म कोताही बरते के मामला म दुरूग पुलिस के एक सहायक उप निरीक्षक अउ एक आरक्षक ल निलंबित कर देहे। मिले जानकारी के मुताबिक दूनों पुलिस करमचारी मन ल सत्रह अक्टूबर के एक आरोपी ल न्यायालय म पेस करे बर सरगुजा भेजे गे रिहीस। मामला ल गंभीरता ले लेवत दुरूग के वरिष्ठ पुलिस अधीक्षक विजय अग्रवाल ह दूनों ल निलंबित कर देहे।
गांजा-बरामद
जगदलपुर म पुलिस ह छब्बीस किलो ले जादा गांजा संग तीन झिन आरोपी ल गिरफ्तार करे हे, जेखर अनुमानित कीमत करीबन एक लाख तीस हजार रूपिया बताय गेहे। पुलिस के मुताबिक मुखबिर ले मिले सूचना म नानगुर थाना पुलिस अउ एंटी नार्कोटिक्स टास्क फोर्स के संयुक्त टीम ह कारवाई करत ए तीनों आरोपी ल पकड़े हे। ए तीनों आरोपी म एक झिन ओडिसा के रहवइया हरय अउ दू झन मध्यप्रदेस के बताय जात हे।
नवरात्र-दशहरा
देसभर समेत छत्तीसगढ़ म आज महाअष्टमी अउ महानवमीं मनाय जाथे। आज मां दुर्गा के सिध्दीदात्री रूप के पूजापाठ करे जात हे। राजधानी रईपुर म जघा-जघा कन्याभोज अउ भंडारा के आयोजन करे जात हे। आज बिहनियच ले जंवारा विर्सजन करे गीस। काली पूजा पंडाल म विराजे देवी प्रतिमा के विर्सजन करे जाही। उहें, काली विजयादसमी के परब म प्रदेस ले कतकोन जघा रामलीला के मंचन संग रावण के पुतला दहन करे जाही। राजधानी रईपुर के डब्ल्यूआरएस कालोनी म दसेरा उत्सव ल लेके बिसेस तियारी करे जात हे। ए बखत ए सौ फीट के रावण के पुतला बनाय गेहे। उहें, रईपुर के रावणभाटा मैदान म घलो दसेरा म कारीकरम होही।
इही बीच, राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉ. रमन सिंह ह दसेरा परब के मउका म प्रदेसवासी मन ल बधई अउ सुभकामना दीन हे।
महिला क्रिकेट मैच
नवा रईपुर के शहीद वीर नारायण सिंह अंतरराष्ट्रीय क्रिकेट स्टेडियम म भारत अउ जिम्बाब्वे के बीच काली खेले गे दूसर महिला टी-20 मैच म भारतीय महिला टीम ह जिम्बाब्वे ल नौ विकेट ले हरा दिन, ए जीत के संग भारत ह तीन मैच के टी-20 सीरीज म दू-सून्य के बढ़त बना लेहे। जिम्बाब्वे ह टास्क जीत के पहिली बल्लेबाजी के फइसला करीन। ए सौ तीन रन के लक्ष्य भारतीय टीम ह एकतरफा अंदाज म सड़सठ गेंद बाकी रहत सीरिफ आठ ओवर पांच बॉल म हासिल कर लीन। सेफाली वर्मा ल प्लेयर ऑफ द मैच चुने गीस। ओमन बढ़िया बल्लेबाजी करत सीरीफ पच्चीस गेंद म नाबाद पचपन रन बनाइन।