राष्ट्रपति-दौरा
राष्ट्रपति द्रौपदी मुर्मू अवइया बाईस अउ तेईस अक्टूबर के छत्तीसगढ़ दउरा म रइहीं। ए दउरान ओमन रइपुर अउ जगदलपुर म आयोजित आने-आने कारीकरम म सामिल होहीं। बाईस अक्टूबर के राष्ट्रपति ह लोकभवन म मंझनिया कुन ‘‘पूज्य माता हासी देवी‘‘ के सम्मान म 200 रूपिया के स्मारक सिक्का जारी करहीं। एखर बाद संझा चार बजे ओमन रइपुर के बूढ़ापारा बलबीर ंिसंह जुनेजा इंडोर स्टेडियम म नुआखाई परब के मउका म अयोजित ‘सेवा सम्मान परब‘ अउ ‘युवा प्रबोधन‘ कारीकरम म मुख्य अतिथि के रूप म सामिल होहीं।
उहें, राष्ट्रपति ह तेईस अक्टूबर के बिहनिया ग्यारा बजे जगदलपुर के माई दंतेश्वरी मंदिर म पूजापाठ करहीं। एखर बाद ओमन जगदलपुर म बस्तर दसेरा के मउका म आयोजित मुरिया दरबार कारीकरम म सामिल होहीं।
ट्रेन-शुभारंभ
रावघाट ले रइपुर अउ रइपुर ले कुरूद बर यात्री रेलगाड़ी सुरू होवइया हे। ए दूनों रेलगाड़ी ल परनदिन 20 अक्टूबर के हरा झंडा दिखाके रवाना करे जाही। मंझनिया अढ़ई बजे रेल मंत्री अश्विनी वैष्णव ह दिल्ली ले वर्चुअल जुड़के रावघाट ले रइपुर जवइया रेलगाड़ी ल हरा झंडा दिखाहीं, उहें, मुख्यमंत्री विष्णुदेव साय ह रइपुर रेलवे स्टेसन ले कुरूद जवइया गाड़ी ल रवाना करहीं। ऐति रेलवे बोर्ड ह दूनों सेवा मनके सूचना ल जारी कर देहे।
महिला क्रिकेट मैच
महिला क्रिकेट म भारत अउ जिम्बाब्वे के बीच तिसरइया टी-ट्वेंटी अंतरर्राष्ट्रीय मैच के श्रृंखला के दूसरइया मुकाबला आज रइपुर के सहीद वीर नारायण सिंह क्रिकेट स्टेडियम म अब ले थोरकिन देर बाद संझा 7 बजे खेले जाही। बतादन कि स्मृति मंधाना के अगुवई म भारतीय टीम ह श्रृंखला म एक-सून्य ले आगू हे। यहू बतादन कि टी-ट्वेंटी क्रिकेट के तीनों मुकाबला म माईलोगन दर्सक मन ल निसुल्क प्रवेस दे जावत हे। ए श्रृंखला के तीसरइया अउ आखिरी मुकाबला बीस अक्टूबर के खेले जाही।
नवरात्र-अष्टमी
छत्तीसगढ़ समेत देसभर म आज दुरगा अष्टमी आस्था अउ भारी उछाह के संग मनाय जावत हे। आजे के दिन महागौरी के रूप म सक्ति के उपासना करे जाथे। राजधानी रइपुर के संगे प्रदेस के आने-आने सक्तिपीठ अउ मंदिर म आज बिसेस हवन-पूजन करे जावत हे। उहें, उपास रखइया कतकोन झन श्रध्दालु मन आजेच कन्याभोज घलो करइन।
ऐति, मुख्यमंत्री विष्णुदेव साय ह काली संझा राजधानी रइपुर के काली माता मंदिर, कालीबाड़ी अउ दुर्गा पंडाल पहुंचिन। जिंहा बिधि-बिधान ले मातारानी के पूजापाठ करके जम्मों प्रदेसवासी मनके सुख-सांति अउ खुसहाली के कामना करिन।
उपमुख्यमंत्री-चौपाल
उप मुख्यमंत्री विजय शर्मा ह काली कबीरधाम जिला के अंधरीकछार, बोरिया अउ महली गांव म चौपाल लगाके ग्रामीण मनके समस्या सुनिन। ए बेरा श्री शर्मा ह अधिकारी मन ल सिकइत मनके तुरते निराकरण करे के निरदेस दीन। संगेसंग प्रधानमंत्री आवास योजना के तहत स्वीकृत आवास मनके निरमान बेरा म पूरा कराय बर जोर देवत किहीन कि-आवास निरमान म लापरवाही पाय जाय म ओखर ले जुड़े लोगन उपर सख्त कार्रवाही करे जाही।
कैंसर दवा
केंद्र सरकार ह कैंसर के मरीज मन ल राहत देय के मंसा ले 137 दवा मन के कीमत ल कम करे के फइसला लेहे। राष्ट्रीय औषधि मूल्य निर्धारण प्राधिकरण ह ए दवा मन उपर दुकानदार अउ वितरक मनके मुनाफा के सीमा तय कर देहे। रसायन अउ उर्वरक मंत्रालय के डहार ले-ए उदिम ले दवा मनके जादा ले जादा चिल्हर म 70 प्रतिसत तक कमती हो सकत हे। उहें, नवा कीमत अवइया महिना के 9 तारीख ले लागू होही।
बातदन कि दवा दुकान अउ अस्पताल मन ल कम कीमत म दवा बेचे के संग नवा कीमत के सूची घलो देखाय ल परही। मरीज अउ दवा मनके नवा कीमत, ‘‘फार्मा सही दाम ऐप‘‘ अउ प्राधिकरण के वेबसाइट म देखे जा सकथे। सरकार के कहना हे कि ए उदिम ले कैंसर के इलाज सस्ता अउ मरीज मन ल आसानी ले दवा मिल सकही।
खेल बचाओ अभियान
किसान मन ल खेती के नवा तरीका, फसल उत्पादन, संसाधन के सही उपयोग, टिकाउ खेती अउ केंद्र सरकार के किसान कल्याण योजना मनके बारे म जागरूक करे के मंसा ले ‘‘खेत बचाओ अभियान‘‘ सुरू करे जावत हें। ए अभियान बाईस अक्टूबर ले सुरू होके तीस नवंबर तक चलही। कंेद्रीय कृषि अउ किसान कल्याण मंत्री शिवराज सिंह चौहान अभियान के तियारी के ऑनलाइन समीक्षा करिन। ए बेरा श्री चौहान ह राज्य मन ले अपील करिन कि- ए अभियान म किसान, कृषि बिज्ञानी, अउ जिला प्रशासन के भागीदारी सुनिश्चित करके अभियान ल गंभीरता ले लागू करे जाय, ताकि किसान मन ल एखर सोज्झे लाभ मिल सकय।
‘‘शौर्यांजलि-बस्तर‘‘
मुख्यमंत्री विष्णुदेव साय ह काली राजधानी रइपुर म आयोजित ‘‘शौर्यांजलि-बस्तर के नायक मन ल समर्पित‘‘ कारीकरम म सामिल होइन। ए बेरा ओमन बस्तर म सांति अउ सुरक्षा खातिर अपन परान गंवाय 50 जवान मन ल श्रध्दांजलि देइन अउ उंखर परिजन मनके सम्मान करीन। ए मउका म मुख्यमंत्री ह किहीन ओमन यहू किहीन कि सांतिपूर्ण, सुरक्षित अउ विकसित बस्तर बनाना ही सहीद मन ल सच्चा श्रध्दांजलि होही। कि-बस्तर के सुरक्षा खातिर अपन बलिदान देवइया वीर जवान मनके त्याग ह सुरता रइही।
हॉकी लीग
राजधानी रइपुर म 21 अक्टूबर ले 1 नवंबर तक हॉकी लीग के आयोजन करे जाही। जेमा सबो मैच के सोज्झे प्रसारण जियोहॉटस्टार म करे जाही। लीग के मुकाबला हरेक दिन संझा साढ़े 5 बजे ले हिंदी अउ छत्तीसगढ़ी भाखा म देखे जा सकथे। जियोहॉटस्टार म सोज्झे प्रसारण ले हॉकी लीग ल देस अउ बिदेस म चिन्हारी मिलही।
छत्तीसगढ़ हॉकी लीग ल हॉकी इंडिया ले मान्यता मिले हे। जेमा प्रदेस के छै सहर के अगुवई करइया छै फ्रेंचाइजी टीम हिस्सा लिहीं। प्रतियोगिता म कुल अट्ठारा मुकाबला खेले जाहीं। जेमा सबले उपर के चार टीम सेमीफाइनल म पहुंचही। एखर बाद फाइनल मुकाबला एक नवंबर के खेले जाहीं।
ए लीग म ओलंपियन सुरेंद्र कुमार, प्रदीप मोर, एस.वी. सुनील, ललित कुमार उपाध्याय, शमशेर अउ चिंगलेन साना सिंह कंगुजाम जइसन भारतीय हॉकी के दिग्गज खिलाड़ी घलो सामिल होहीं।
अउ अब थोरकुन समाचार सार म –
– पश्चिम बंगाल के राजधानी कोलकाता के चोरबागान दुरगा पंडाल म काली संझा भगदड़ माते ले 19 लोगन के मउत होगे। उहें, 25 झन आने लोगन घायल होगिन। ए घटना उपर राष्ट्रपति, उपराष्ट्रपति, प्रधानमंत्री अउ छत्तीसगढ़ के मुख्यमंत्री विष्णुदेव साय ह दुख जतइन।
– उप मुख्यमंत्री विजय शर्मा ह काली कबीरधाम जिला के मड़मड़ा गांव म आंगनबाड़ी अउ अटल डिजिटल सेवा केंद्र के लोकार्पण करिन।
– जनजातीय गौर दिवस के मउका म नवा रइपुर के आदिम जाति अनुसंधान अउ प्रसिक्षण संस्थान डहार ले राज्य स्तरीय चित्रकला अउ फोटोग्राफी प्रतियोगिता के आयोजन करे जाहीं। दूनों प्रतियोगिता म अनुसूचित जनजाति वर्ग के अट्ठारा बछर या ओखर ले जादा उमर के प्रतिभागी हिस्सा ले सकहीं। चित्रकला प्रतियोगिता बारह अउ तेरह नवंबर के होही। उहें, फोटोग्राफी प्रतियोगिता घलो उहीच महिना म होही।
– रइपुर के गुढ़ियारी थाना म तोड़फोड़ के मामला म भारतीय जनता युवा मोर्चा के नेता शुभांकर द्विवेदी ल पुलिस ह गिरफ्तार करे हे।
– कोरबा जिला के दर्री थाना इलाका म गोपालपुर रद्दा म होय सड़क हादसा म दू झन माईलोगन के मउत होगिस।
अउ
– मरीज मनके सुबिधा ले चेत म राखत रइपुर के अंबेडकर अस्पताल के बाह्यरोगी विभाग के ओपीडी काली 19 अक्टूबर के खुले रइही। उहें, अस्पताल के आपात चिकित्सा सेवा चौबीसों घंटा जारी रइही।