पीएम आवास-योजना
प्रधानमंत्री आवास योजना-सहरी के दूसरइया चरण के तहत एक लाख तिरानवे हजार ले जादा नवा मकान मन ल मंजूरी दे गेहे। एखर संग ही ए योजना के तहत स्वीकृत मकान मनके कुल संख्या बीस लाख ले जादा हो गेहे।
केंद्रीय आवासन अउ सहरी कार्य मंत्रालय ह काली नई दिल्ली म समिति के दसवां बइठका के बाद ए जानकारी दीन। मंत्रालय के अनुसार ए मकान छत्तीसगढ़ समेत आंध्रप्रदेस, बिहार, गुजरात, कर्नाटका, मिजोरम, ओडिसा, सिक्किम, तेलंगाना, उत्तर प्रदेस अउ पश्चिम बंगाल म मंजूर करे गेहे। एखर लाभ आर्थिक रूप ले कमजोर वर्ग के पात्र सहरी परिवार मन ल मिलही।
पीएम केयर्स-आधार अनिवार्य
केंद्र सरकार ह पी.एम. केयर्स फॉर चिल्ड्रन योजना के अंतर्गत बिसेस छात्रवृत्ति के लाभ पाय बर आधार प्रमाणीकरण या आधार संख्या के प्रमाण देना अनिवार्य कर देहे। सामाजिक न्याय अउ अधिकारिता मंत्रालय ह ए संबंध म अधिसूचना जारी कर देहे। ए योजना के तहत पहिली ले बारहवीं कक्षा तक पढ़ाई जारी राखे बर सहायता प्रदान करे जाथे।
मंत्रालय ह पी.एम. केयर्स फॉर चिल्ड्रन योजना के तहत छात्रवृत्ति के लाभ लेबर आधार संख्या नइ होय के स्थिति म वैकल्पिक दस्तावेज के प्रावधान करे हे। मंत्रालय के अधिसूचना के अनुसार अट्ठारा बछर ले कम आयु के लइका मन नामांकन आईडी वाला पावती के संग जन्म प्रमाण पत्र या मान्यता प्राप्त शिक्षा बोर्ड डहार ले जारी दसवीं या बारहवीं कक्षा के प्रमाण पत्र या अंक पत्र प्रस्तुत कर सकत हे। उहें, अट्ठारा बछर या ओखर ले जादा आयु के लाभार्थी मतदाता पहिचान पत्र, ड्राईविंग लाइसेंस, भारतीय पासपोर्ट अउ रासन कार्ड जइसे दूसर निर्धारित पहिचान दस्तावेज प्रस्तुत कर सकत हे।
गृह मंत्रालय-जनगणना
केंद्रीय गृह मंत्रालय ह जनगणना अधिनियम के तहत जनगणना संसोधन नियम लागू करे हे। मंत्रालय ह ए संबंध म राजपत्र म अधिसूचना जारी कर देहे। ए संसोधन के अंतर्गत पात्र गणनाकर्ता मन के सूची म शिक्षक, सरकारी अधिकारी, स्थानीय प्राधिकरण के कर्मचारी अउ संबंधित राज्य सरकार या केंद्रशासित प्रदेस के प्रशासन मन डहार ले उपयुक्त समझे जाने वाला दूसर लोेगन मन ल सामिल करे हे।
मतदाता सूची पुनरीक्षण
छत्तीसगढ़ म अवइया बछर एक जनवरी ले फोटोयुक्त मतदाता सूची मन के विशेष संक्षिप्त पुनरीक्षण करे जाही। मुख्य निर्वाचन पदाधिकारी कार्यालय ले मिले जानकारी के अनुसार प्रारूप मतदाता सूची के प्रकासन बारह नवंबर के करे जाही। दावा अउ आपत्ति बारह नवंबर ले ग्यारा दिसंबर तक दर्ज कराय जा सकत हे। दावा आपत्ति मनके निराकरण अट्ठाईस दिसंबर तक करे जाही। मतदाता सूची के अंतिम प्रकासन चार जनवरी के होही। अभियान के तहत एक जनवरी के अट्ठारा बछर के आयु पूरा करइया युवा मनके संगेसंग अवइया बछर एक अप्रैल, एक जुलाई अउ एक अक्टूबर के प्राप्त होने वाला नागरिक घलो अग्रिम आवेदन कर सकत हे। निर्वाचन आयोग के सीमा पोर्टल या मोबाइल ऐप के माध्यम ले घलो आवेदन करे जा सकत हे।
सीएम-हेल्पलाइन
मुख्यमंत्री विष्णुदेव साय ह आम नागरिक मन के समस्या के समयबध्द अउ प्रभावी समाधान के उद्देस्य ले सुरू करे गे हेल्पलाइन-एक सून्य सात छै के उच्च स्तरीय समीक्षा करीन। ए दउरान ओमन अलग-अलग जिला के सिकायतकर्ता मन ले स्वयं बातचीत कर उंखर समस्या अउ समाधान के स्थिति के जानकारी लीन। बइठका म बताय गीस कि नौ जून ले पंद्रह अक्टूबर तक सीएम हेल्पलाइन म दू लाख इकतीस हजार ले जादा सिकायत दर्ज करे गेहे। एमा ले करीब दू लाख छै हजार सिकायत मनके निराकरण करे जा चुके हे। बांचे सिकायत मन उपर कारवाई करे जात हे।
इही बीच, लोक निर्माण विभाग ह सीएम हेल्पलाइन म दर्ज सिकायत मन के समाधान म लापरवाही बरते के सेति तेरह झन अधिकारी मन ल कारण बताओ नोटिस जारी करे हे। एमा तीन अधीक्षण अभियंता, पांच कार्यपालन अभियंता अउ पांच झन अनुविभागीय अधिकारी सामिल हे। नोटिस म केहे गेहे कि अधिकारी मन अपन लिखित जवाब नोटिस मिले के पंद्रह दिन के भीतर लोक निर्माण विभाग के सचिव के आगू प्रस्तुत करंय।
जिले की चिट्ठी
प्रादेशिक समाचार एकांश आकाशवाणी रायपुर डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र एके संघरा रिले करही। ए बखत के अंक म ‘‘बालोद‘‘ जिला के गतिविधि के बारे म जानकारी दे जाही।
स्कूल-दीपावली अवकाश
राज्य सरकार ह प्रदेस के स्कूल मन म ए साल घोसित देवारी के छुट्टी म आंसिक संसोधन करे हे। अब देवारी के छुट्टी पंाच दिन के बजाय छै दिन के होही। स्कूल शिक्षा विभाग डहार ले जारी संसोधित आदेस के अनुसार शासकीय, अनुदान प्राप्त अउ गैर अनुदान प्राप्त स्कूल अउ डी.एड, बी.एड अउ एम.एड महाविद्यालय मन म छै नवंबर ले ग्यारा नवंबर तक छुट्टी रइही।
उहें, दसहरा के छुट्टी आज ले सुरू हो गेहे, जउन ह इक्कीस अक्टूबर तक रइही।
खाद्य मंत्री-धान खरीदी
खाद्य मंत्री दयालदास बघेल ह आगामी खरीफ विपणन बछर म समर्थन मूल्य उपर धान खरीदी के तैयारी मन ल लेके रायपुर म वरिष्ठ अधिकारी मनके समीक्षा बइठका लीन। बइठका म श्री बघेल ह किहीन हे कि किसान मन ल पंजीयन अउ टोकन ल लेके धान बेचे म कोनो प्रकार के परेसानी नइ होना चाही। ओमन धान खरीदी केंद्र मन म पर्याप्त बारदाना, इलेक्ट्रानिक तौल, बिजली अउ पेयजल के व्यवस्था सुनिश्चित करे बर किहीन। संगेसंग खाद्य मंत्री ह धान के उठाव अउ कस्टम मीलिंग म तेजी लाय अउ खरीदी प्रक्रिया ल पारदर्सी अउ व्यवस्थित बनाय उपर घलो जोर दीन।
सड़क निर्माण-निविदा
प्रदेस म सड़क अउ पुल अधोसंरचना के बिस्तार बर दू सौ सैंतालीस करोड़ इक्यासी लाख रूपिया के अट्ठारा निर्माण कार्य मनके निविदा मन ल मंजूरी दे गेहे। ए बारह पुल अउ छै सड़क निर्माण अउ उन्नयन के काम सामिल हे। लोक निर्माण विभाग के अनुसार ए काम मन बर चयनित निर्माण एजेंसी मन ल जल्द ही कार्यआदेस जारी कर निर्माण सुरू करे के निरदेस दे देहे।
नवोदय विद्यालय-प्रवेश
जवाहर नवोदय विद्यालय म अवइया सैक्षणिक सत्र बर कक्षा नवमीं अउ ग्यारहवीं म प्रवेस बर आवेदन के अंतिम तिथि पंद्रह अक्टूबर ले बढ़ाके बाईस अक्टूबर कर देहे। अब विद्यार्थी मन बाईस अक्टूबर तक ऑनलाइन आवेदन कर सकत हे। आवेदन के प्रक्रिया निसुल्क हे। आवेदन बर आधिकारिक वेबसाइट म लॉग इन करे जा सकत हे।
अउ अब पेस हे मौसम के हाल..
मौसम विभाग ह दक्षिण छत्तीसगढ़ म अवइया पांच दिन तक कुछेक जघा म हल्का ले मध्यम बरसा होय के संभावना जताय हे। संगेसंग कुछेक जघा म गाज गिरे के चेतावनी घलो दे गेहे। मौसम विज्ञानी डॉक्टर गायत्री वाणी ह आकाशवाणी समाचार ल बतइन कि प्रदेस म नमी आय ले बदली-बरसा के स्थिति बनत हे।
तबादला
प्रदेस सरकार ह राज्य प्रशासनिक सेवा के तेईस झन अधिकारी मनके तबादला कर देहे। एमा प्रवर, वरिष्ठ अउ कनिष्ठ श्रेणी के अधिकारी सामिल हे। सामान्य प्रशासन विभाग ह पाछू उनतीस सितंबर के जारी आदेस म संसोधन करत हुए अधिकारी मन ल नवा पदस्थापना देहे।
टी-20 क्रिकेट मैच
नवा रायपुर स्थित शहीद वीर नारायण सिंह अंतर्राष्ट्रीय क्रिकेट स्टेडियम म काली भारत-जिम्बाब्वे के बीच खेले गे पहिली महिला टी-20 क्रिकेट मैच म भारतीय टीम ह चार विकेट ले जीत हासिल कर तीन मैच के श्रृंखला म एक सून्य के बढ़त हासिल कर लेहे। जिम्बाब्वे ह पहिली बल्लेबाजी करत हुए निर्धारित बीस ओवर म पांच विकेट के नुकसान म एक सौ चौदह रन बनाइन। जवाब म भारतीय टीम ह सोलहवां ओवर म ही छै विकेट के नुकसान म एक सौ सोलह रन बनाके मैच अपन नाम कर लीन।
श्रृंखला के दूसरइया मैच काली खेले जाही।