मुख्यमंत्री-औद्योगिक इकाई
मुख्यमंत्री विष्णुदेव साय ह किहीन हे कि प्रदेस म औद्योगिक विकास के लाभ प्रदेस के युवा मन तक रोजगार अउ आर्थिक मउका के रूप म पहुंचही। एहा राज्य सरकार के पहिली प्राथमिकता म सामिल हे। इही उद्देस्य ले नवा औद्योगिक विकास नीति म अइसन श्रम आधारित उद्योग मन ल बिसेस प्रोत्साहन दे जात हे, जेमा कम पूंजी निवेस के संग बड़ संख्या म रोजगार देके क्षमता हे। मुख्यमंत्री ह आज नवा रईपुर म प्रस्तावित नवा औद्योगिक इकाई के भूमि पूजन समारोह म ए बात ल किहीन। ओमन किहीन कि ए परियोजना म एक सौ पचास करोड़ रूपिया ले जादा के निवेस प्रस्तावित हे अउ एखर ले साढ़े तीन हजार ले जादा लोगन मन ल रोजगार मिलही।
जन सेवा से देश सेवा
प्रधानमंत्री नरेंद्र मोदी ह सार्वजनिक जीवन म पच्चीस साल पूरा कर लेहे। ए यात्रा ‘जन सेवा ले देस सेवा‘ के मंत्र ल लेके चलत हे जउन आज घलो जारी हे। इही सोच ल तीन तलाक कानून के माध्यम ले धरातल म उतारे गेहे। तीन तलाक अइसन प्रथा हरय, जेमा मुस्लिम पति ह एके बार म तीन बार तलाक बोल के बिहाव ले समाप्त कर सकथे। ए प्रथा के विरूध्द मुस्लिम माई लोगिन मन ल अब्बर संघर्ष करीन। बाईस अगस्त दू हजार सत्रह के सर्वोच्च न्यायालय ह तत्काल तीन तलाक के प्रथा ल असंवैधानिक घोसित कर दीन।
विशेष-कार्यक्रम
आकाशवाणी केंद्र रईपुर डहार ले ‘जन सेवा से देश सेवा‘ के तहत बिसेस कारीकरम मन के श्रंृखला प्रसारित करे जात हे। इही कड़ी म आज संझा सात बजे ‘एक भारत श्रेष्ठ भारत‘ उपर छत्तीसगढ़ साहित्य अकादमी के अध्यक्ष शशांक शर्मा ले लेगे भेंटवार्ता के प्रसारण करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र रिले करही।
मतदाता सूची-पुनरीक्षण
भारत निर्वाचन आयोग ह छत्तीसगढ़ के संगेसंग सत्रह ठिन राज्य अउ केंद्रशासित प्रदेस मन म मतदाता सूची के बिसेस संक्षिप्त पुनरीक्षण कराय के निरदेस देहे। एखर बर एक जनवरी दू हजार सत्ताईस के पात्रता के तारीख तय करे गेहे। आयोग ह केहे हे कि जउन राज्य अउ केंद्रशासित प्रदेस मन म मतदाता सूची के बिसेस गहन पुनरीक्षण-एसआईआर जारी हे या हालेच म पूरा होय हे उंहा बिसेस संक्षिप्त पुनरीक्षण के कारीकरम बाद म घोसित करे जाही।
एखर पहिली, आयोग ह छूटे पात्र मतदाता, युवा अउ पहिली घांव मत डारे के योग्य लोगन मनके पंजीकरण बर बिसेस अभियान चलाय के निरदेस देहे।
फसल बीमा क्लेम
प्रदेस म रबी सीजन-दू हजार पच्चीस के उद्यानिकी फसल मनके लंबित प्रधानमंत्री फसल बीमा क्लेम के भुगतान अवइया तीन कार्य दिवस के भीतर करे जाही। किसान मनके सिकायत ल गंभीरता ले लेवत कृषि मंत्री रामविचार नेताम ह आज विभागीय अउ बीमा अधिकारी मनके बइठका लेके पात्र किसान मनके बैंक खाता म बीमा रासि के भुगतान तय करे गे बेरा म पूरा करे के निरदेस दीन। ए फइसला ले प्रदेस के आठ हजार चार सौ चवालीस किसान मन ल करीबन तीन करोड़ अस्सी लाख रूपिया के बीमा रासि के फायदा मिलही।
मुख्यमंत्री-पत्रकारवार्ता
राष्ट्रपति द्रौपदी मुर्मू ह बाईस अउ तेईस अक्टूबर के छत्तीसगढ़ के दउरा म रइही। ए दउरान ओमन तेईस अक्टूबर के जगदलपुर जाही अउ उंहा मुरिया दरबार म सामिल होही।
मुख्यमंत्री विष्णुदेव साय ह आज पत्रकार मन ले गोठबात करत किहीन कि राष्ट्रपति के बस्तर आगमन प्रदेस के लोगन मन बर गौरव के बात हरय। मुख्यमंत्री ह नक्सली हिंसा ले प्रभावित अउ आने दिव्यांगजन मन ल सहायक उपकरण बांटे के कारीकरम के जिकर करत किहीन कि सरकार के परयास हे कि नक्सली हिंसा ले प्रभावित लोगन मन ल हर संभव मदद मिले अउ ओमन सम्मान के संग आगू बढ़य।
विजय शर्मा-आवास निर्माण
उपमुख्यमंत्री विजय शर्मा ह किहीन हे कि प्रधानमंत्री आवास योजना के अंतर्गत गरीब अउ जरूरतमंद परिवार मनके घर बनाय म कोनो प्रकार के गड़बड़ी, लापरवाही अउ हितग्राही मनके संग धोखाधड़ी बर्दास्त नइ करे जाही। ओमन किहीन कि आवास बनाय म कोताही बरतइया अउ गरीब मनके संग धोखाधड़ी करइया मनके संग कठोर कानूनी कारवाई करे जाही।
ओमन किहीन कि कबीरधाम जिला के विकासखंड बोड़ला अंतर्गत प्रधानमंत्री जनमन आवास योजना के हितग्राही मन के घर बनाय के नांव म पइसा लेके काम नइ करे के सिकइत उपर दू ठिन अलग-अलग मामला म एफआईआर दरज करे गेहे। दूनों मामला म कुल नौ झिन हितग्राही मन ले पांच लाख नौ हजार रूपिया लेके सिकइत आगू आय हे। सिकइत के आधार म इंखर ले जुड़े ठेकेदार मनके विरूध्द थाना चिल्फी अउ तरेगांव जंगल म अपराध दरज करे गेहे।
क्रिकेट मैच
राजधानी रईपुर के शहीद वीर नारायण सिंह अंतर्राष्ट्रीय क्रिकेट स्टेडियम म आज संझा सात बजे ले भारत अउ जिम्बाब्वे के बीच पहिली महिला टी-ट्वेंटी क्रिकेट मैच सीरीज के सुरूआत होही। तीन मैच के टी-ट्वेंटी सीरीज के पहला मैच आज होही, जेखर बाद आने दू मैच अट्ठारा अउ बीस अक्टूबर के रईपुर के इही मैदान म खेले जाही। टी-ट्वेंटी सीरीज होय के बाद वनडे सीरीज खेले बर टीम मन बड़ौदा जाही। क्रिकेट मैच देखे बर जवइया महिला दर्सक मन बर अंतर्राष्ट्रीय क्रिकेट स्टेडियम म प्रवेस मुफत म राखे गेहे।
हर घर-मुनगा अभियान
छत्तीसगढ़ म कुपोषण अउ एनीमिया ल रोके बर ‘‘हर घर मुनगा-घर घर मुनगा‘‘ अभियान सुरू करे जाही। एमा घर के संगेसंग आंगनबाड़ी केंद्र, स्कूल, आश्रम, अउ छात्रावास मन म मुनगा के पउधा लगाय जाही। ए बारे म काली मंत्रालय म मुख्य सचिव विकाससील के अगुवई म बइठका होइस। अभियान के तहत उद्यानिकी, कृषि अउ वन विभाग के नर्सरी मन म मुनगा के पउधा तियार करे जाही। फरवरी अउ मार्च म ए तियार होय पउधा ल मुफत म बांटे गेहे। जम्मों जिला कलेक्टर मन अभियान के निगरानी करही।
बातों बातों में
प्रादेशिक समाचार एकांश के सम सामयिक बिसय उपर आधारित सप्ताहिक कारीकरम ‘बातों बातों में‘ म ए दारी मतदाता मनके सत्यापन अउ युवा मतदाता मनके पंजीकरण बर चलाय जात बिसेस अभियान उपर मुख्य निर्वाचन पदाधिकारी यशवंत कुमार ले लेगे भेंटवार्ता उपर केंद्रित रइही। एखर प्रसारण काली सत्रह अक्टूबर के आकाशवाणी केंद्र रईपुर डहार ले एफएफ अउ प्रायमरी चैनल म बिहनिया नौ बजे ले प्रसारित करे जाही। एला छत्तीसगढ़ स्थित आकाशवाणी के जम्मों केंद्र रिले करही।
हल्दी बीज-जांच
प्रदेस म हल्दी बीजा बांटे म कथित अनिमियतता के सिकइत उपर कृषि विभाग ह जांच सुरू कर देहे। कृषि मंत्री रामविचार नेताम के निरदेस के बाद उद्यानिकी विभाग ह जांच बर संचालनालय स्तर म टीम बनाय हे। विभाग ले जुड़े जिला अधिकारी मन ले हितग्राही मन ल बांटे गे बीजा के मात्रा, ओखर गुनवत्ता, भुगतान अउ फसल के भौतिक सत्यापन ले जुड़े कागजात मंगाय गेहे। जांच म किसान मनके खेत म हल्दी के फसल अउ बोय गे रकबा के सत्यापन करे बर डिजीटल क्रॉप सर्वे कराय जाही। जेखर बाद जीपीएस आधारित तस्वीर के माध्यम ले अभिलेख अउ खेत मनके अभी के स्थिति के मिलान करे जाही।
एसडीओ-कार्यालय
गरियाबंद जिला के देवभोग म लोक निर्माण विभाग के एसडीओ ऑफिस म काम सुरू हो गेहे। नवा भवन के काम पूरा होय के बाद ऑफिस ल गरियाबंद ले देवभोग ट्रांसफर करे गेहे। लोक निर्माण विभाग के सचिव मुकेश कुमार बंसल ह पाछू दस अक्टूबर के गरियाबंद के निरीक्षण के दउरान देवभोग म नवा ऑफिस सुरू करे के निरदेस दीन।
अउ अब थोरकुन समाचार सार म
– महासमुंद पुलिस ह खैर लकड़ी के अवैध परिवहन, तस्करी अउ फर्जी बिलिंग के अंतर्राज्यीय मामला म एक झिन आरोपी ल हिमाचल प्रदेस के सिरमौर जिला ले गिरफ्तार करे गेहे। आरोपी के तीर ले एक करोड़ सत्तर लाख रूपिया नगद अउ करीबन पंद्रह टन अवैध खैर के लकड़ी बरामद करे गेहे।
– सरगुजा जिला के उदयपुर थाना क्षेत्र म साल्ही मोड़ के तीर पाछू रतिहा तेज रफ्तार गाड़ी के टक्कर ले फटफटी म बइठे दू झिन मनखे के मउकच म परान छूट गे।
अउ
– रइपुर पुलिस कमिश्नर ह लॉरेंस बिश्नोई गैंग के नांव उपर कांग्रेस नेता ल धमकी देके पच्चीस करोड़ रूपिया मांगे के आरोपी सोएब ढेबर के गिरफ्तारी उपर दस हजार रूपिया के इनाम घोसित करे गेहे।