केंद्रीय गृह मंत्री-छत्तीसगढ़
केंद्रीय गृह मंत्री अमित शाह ह किहीन हे कि सरकार ह छत्तीसगढ़ म नक्सलवाद के सेति दिव्यांग होय जनजातीय समुदाय के उत्थान बर कृत्रिम अंग अउ आने मदद देत हे। श्री शाह ह ‘‘सेवा संकल्प अभियान‘‘ के अंतर्गत वीडियो कॉन्फ्रेंस के माध्यम ले छत्तीसगढ़ म दिव्यांगजन मन ल सहायक मसीन देवइन। ए मउका म ओमन किहीन कि सरकार ह प्रभावित लोगन मन के जिनगी ल एक घांव फेर संवारे अउ ओमन ल मदद देबर सरलग परयास करत हे।
ओमन किहीन प्रधानमंत्री नरेंद्र मोदी के संकलप रिहीस कि नक्सलवाद के पूरा खातमा बेरा म कर दे जाही अउ आज खुसी के बात हे, कि नक्सलवाद खतम हो गेहे। फेर जउन पीड़ा मिले हे ओला ठीक करे म हमन सरलग परयास करत हन। श्री शाह ह किहीन कि छत्तीसगढ़ सरकार ह बस्तर म विकास अउ जनजीवन ल सामान्य बनाय बर बस्तर ओलंपिक, बस्तर पंडुम अउ नियद नेल्लानार जइसन योजना के माध्यम ले परयास करत हे। केंद्रीय गृह मंत्री ह बतइन कि पांच सौ ले जादा सुरक्षा सिविर म दू सौ ले जादा सिविर मन ल सहीद वीर गुंडाधुर सेवा डेरा के रूप म बिकसित करे जाही।
सर्वोच्च न्यायालय-धर्मांतरण
सर्वोच्च न्यायालय ह बेवस्था देहे कि हिन्दू धरम ले ईस्लाम या आने गैर हिंदू धरम म धर्मांतरण करइया मनखे मन ह पिछड़ा वर्ग के आरक्षण के दावा नइ कर सकय। मद्रास उच्च न्यायालय के फइसला के विरूध्द तमिलनाडु सरकार के याचिका ल खारिज करत न्यायमूर्ति प्रशांत कुमार मिश्रा अउ न्यायमूर्ति चंद्रशेखर के पीठ ह किहीन कि पहिली के सामाजिक पिछड़ापन ल धर्मांतरण के बाद आगू नइ बढ़ाय जा सके।
जन सेवा से देश सेवा-कैप्सूल
प्रधानमंत्री नरेन्द्र मोदी ह सार्वजनिक जीवन म पच्चीस बछर पूरा कर लेहे। उंखर ए यात्रा ‘जन सेवा से देश सेवा‘ के मंत्र अउ सरलग समर्पण ले परिभाषित होथे जउन आज घलो जारी हे।
सेवा अउ सुशासन के इही सोंच ले प्रेरित होके सरकार ह बछर दू हजार सैंतालीस तक विकसित भारत के लक्ष्य ल हासिल करे के दिसा म सरलग काम करत हे। इही सोंच ल भारत सेमीकंडक्टर मिशन के माध्यम ले धरातल म उतारे गेहे। सेमीकंडक्टर आधुनिक इलेक्ट्रानिक मसीन के जरूरी आधार हरय। मोबाइल फोन, कम्प्यूटर, गाड़ी अउ दूर संचार जइसन तकनीकी म एखर बड़का परयोग होवत हे। केंद्र सरकार ह दिसंबर दू हजार इक्कीस म भारत सेमीकंडक्टर मिसन के सुरूआत करीन। ए मिसन बर छिहत्तर हजार करोड़ रूपिया के वित्तीय प्रावधान राखे गेहे। ए पहल के उद्देस्य देस म चिप बनाय के क्षमता बढ़ाना, आयात उपर निर्भरता कम करना हे।
कृष्ण अग्रवाल-सम्मान
छत्तीसगढ़ के रायगढ़ जिला के एक ठिन प्राइवेट स्कूल के छात्र कृष्ण अग्रवाल ल नई दिल्ली म होय बारहवां राष्ट्रीय स्तर के प्रदर्सनी अउ परियोजना प्रतियोगिता म फ्लिप इलेक्ट्रिक आयरन फॉर चाइल्ड सेफ्टी प्रोजेक्ट बर राष्ट्रीय स्तर म तीसर पुरस्कार मिले हे। ए पुरस्कार केंद्रीय विज्ञान अउ प्रौद्योगिकीय राज्य मंत्री डॉ. जितेन्द्र सिंह ह दीन।
कृष्ण अग्रवाल के मॉडल के उद्देस्य घर म परयोग होवइया गरम इलेक्ट्रिक आयरन ले छोटे लइका मन ल होय दुघर्टना ले बचाना हे। ए मॉडल म आटो फ्लिप तकनीक के परयोग करे गेहे। एखर ले आयरन ल छोड़े के बाद ओखर गरम हिस्सा ह उपर कोति हो जथे। संगेसंग तीस सेंकेंड म ए आयरन ह बंद हो जथे।
स्कूल शिक्षा मंत्री गजेंद्र यादव ह कृष्ण अग्रवाल के ए सफलता उपर बधई देवत किहीन कि एहा पूरा छत्तीसगढ़ बर गौरव के बात हरय। ओमन किहीन कि ओखर सफलता प्रदेस के छात्र मन ल विज्ञान, अनुसंधान अउ नवाचार के क्षेत्र म आगू बाढ़े बर प्रेरित करही।
नवरात्रि
शारदेय नवरात्रि के पंचमी तिथि के मउका म आज राजधानी रईपुर के परमुख देवी मंदिर अउ पूजा पंडाल मन म बिहनियच ले श्रध्दालु मनके भीड़े देखे जात हे। ए दउरान रईपुर के परमुख देवी मंदिर मन म बिसेस पूजा पाठ, सिंगार अउ अनुष्ठान करे जात हे। संगेसंग डोंगरगढ़ स्थित मां बम्लेश्वरी मंदिर, दंतेवाड़ा के मां दंतेश्वरी मंदिर अउ रतनपुर के मां महामाया मंदिर म घलो बिसेस पूजापाठ करे जात हे।
दूसर कोति, जगदलपुर म पचहत्तर दिन तक चलइया विश्व प्रसिध्द बस्तर-दशहरा म विधान के तहत गेंदा के फूल ले सजे चार चक्का के फूल रथ के दूसर परिक्रमा पूरा होगे। मां दंतेश्वरी के छत्र ल मावली मंदिर अउ राम मंदिर म बिसेस पूजापाठ के बाद रथ म विराजित करे गीस, जेला श्रध्दालु मन ह परंपरा के मुताबिक रस्सी ले खिंचीन।
शिवरीनारायण महोत्सव
तीन दिन तक चलइया शिवरीनारायण महोत्सव के काली मुख्यमंत्री विष्णुदेव साय ह सुभारंभ करीन। ए मउका म कंेद्रीय राज्य मंत्री तोखन साहू, वित्त मंत्री ओपी चौधरी अउ सांसद कमलेश जांगड़े सामिल होइन। मुख्यमंत्री ह शिवरीनारायण म महानदी के तट उपर राखे गे चित्रोत्पला गंगा महाआरती म घलो सामिल होइन। मुख्यमंत्री ह ए मउका म प्रदेस के लोगन मन ल शिवरीनारायण महोत्सव अउ शारदेय नवरात्रि के सुभकामना दीन। ओमन किहीन कि नदी मनके प्रति हमर आस्था तभे सार्थक होही, जब हमन ओखर साफ-सफाई उपर मिलके धियान देबो। मुख्यमंत्री ह जल संरक्षण बर अपनाय जात पांच प्रतिसत मॉडल के संगेसंग आने-आने नवाचार ल आगू लाय उपर जोर दीन।
आवास योजना-समीक्षा बैठक
मुख्य सचिव विकाससील के अगुवई म आज रईपुर स्थित मंत्रालय म प्रधानमंत्री आवास योजना-सहरी के समीक्षा बइठका होइस। बइठका म मुख्य सचिव ह मंजूर करे गे आवास मन ल जल्दी पूरा करे अउ आवास बनइया हितग्राही मन ल प्रोत्साहित करे के निरदेस दीन। बइठका म अधिकारी मन ह बतइन कि योजना के तहत अब तक दू लाख तिरालीस हजार सतयासी आवास मंजूर करे गेहे, जेमा ले दू लाख पच्चीस हजार चार सौ ग्यारा आवास पूरा हो चुके हे अउ सत्रह हजार तीन सौ अड़सठ आवास के काम चलत हे।
उंहे, ‘‘हर घर मुनगा-घर घर मुनगा‘‘ अभियान के समीक्षा करत मुख्य सचिव ह राज्य के हरेक घर म मुनगा के पउधा मुफत म बांटे के निरदेस दीन। ओमन किहीन कि फरवरी ले मार्च महिना के दउरान ए पउधा बांटे जाही।
दुर्घटना
मुंगेली जिला के दशरंगपुर गांव आज बिहनिया सड़क दुर्घटना म तीन झिन लोगन के मउत होगे। मृतक म मुंगेली विधायक पुन्नूलाल मोहले के भाई अधीन मोहले घलो सामिल हे। जानबा के मुताबिक आज बिहनिया तेज रफ्तार पिकअप ह सड़क के तीर म खड़े लोगन मन ल टक्कर मार दीस। ए घटना म तीन झिन लोगन के मउत होगे।
ऐति, बलौदाबाजार जिला म रईपुर-पलारी रद्दा म होय सड़क दुर्घटना म तीन झिन मनखे के मउत हो गेहे। घोटिया मोड़ के तीर तेज रफ्तार फटफटी सड़क के तीर म खड़े टरक ले टकरागे। ए घटना म घायल एक झिन मनखे के सोमवार के बलौदाबाजार अस्पताल म त उंहे, दू झिन मनखे के रईपुर म काली इलाज के दउरान मउत होगे। तीनों मनखे मन मौसेरा भाई रिहीन अउ रईपुर ले पलारी जावत रिहीन।
उंहें, रानी झरना ले पिकनिक मनाके के लहुटत खानी दू झिन संगवारी के फटफटी ह एक ठिन ट्रेलर ले टकरागे। घटना म फटफटी चलइया मनखे के मउत होगे अउ पाछू बइठे मनखे ह घायल हो गेहे।
विशेष कार्यक्रम
आकाशवाणी केंद्र रईपुर डहार ले बस्तर संभाग म आत्मसमर्पित माओवादी मनके पुर्नवास बर करे जात कामकाज उपर केंद्रित बिसेस कारीकरम के प्रसारण आज संझा सात बजे करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र रिले करही।
बन्नू राम बैद-शिल्प गुरू अवॉर्ड
बस्तर के पारंपरिक ढोकरा सिल्प कला ल राष्ट्रीय पहिचान देवइया कोंडागांव जिला के बरकई गांव के सिल्पकार बन्नू राम बैद के चयन बछर दू हजार पच्चीस के सिल्प गुरू अवॉर्ड बर करे गेहे। ए पुरस्कार बर देसभर के कुल छै सिल्प गुरू मनके चयन करे गेहे। बन्नू राम बैद के चयन केंद्रीय स्तरीय चयन समिति के अट्ठारा जुलाई के होय बइठका म आखिरी रूप ले करे गीस।
महिला टी-ट्वेंटी
नवा रईपुर के सहीद वीर नारायण सिंह अंतरर्राष्ट्रीय क्रिकेट स्टेडियम म काली भारत अउ जिम्बाब्वे के बीच महिला टी-ट्वेंटी क्रिकेट मैच खेले जाही। सीरीज खेले बर दूनों टीम पहिलीच ले रईपुर पहुंच गेहे। भारत अउ जिम्बाब्वे महिला टीम के बीच सोलह, अट्ठारा अउ बीस अक्टूबर के तीन ठिन टी-ट्वेंटी क्रिकेट मैच खेले जाही।