प्रधानमंत्री-अंतर्राष्ट्रीय सम्मेलन
प्रधानमंत्री नरेन्द्र मोदी ह किहीन हे कि भारत के सभ्यता ले भरे यात्रा कतकोन साल ले सांस्कृतिक आदान-प्रदान अउ ज्ञान के साझा प्रयास ले अउ बाढ़े हे। भारत के वैश्विक सांस्कृतिक संबंध उपर राखे गे अंतर्राष्ट्रीय सम्मेलन के उद्घाटन सत्र म अपन संदेस म प्रधानमंत्री ह किहीन कि नालंदा जइसन सिक्षा केन्द्र ह भारत अउ एशिया के कतकोन हिस्सा ले बीच ज्ञान के आदान-प्रदान ल बढ़ावा दीन। ओमन किहीन कि भिक्षु, विद्धान, व्यापारी अउ यात्री मन ह भूमि अउ समुद्री रद्दा के माध्यम ले भारतीय विचारधारा ल दुनियाभर म पहुंचईन। प्रधानमंत्री के ए संदेस ल संस्कृति सचिव विवेक अग्रवाल ह पढ़के सुनईन। तीन दिन तक होवइया ए सम्मेलन ह नई दिल्ली के विज्ञान भवन म सोलह अक्टूबर तक चलही।
केन्द्रीय मंत्रिमंडल-निर्णय
केन्द्रीय मंत्रिमंडल ह ग्यारह लाख चालीस हजार ले जादा रेलवे कर्मचारी मन ल अठहत्तर दिन के उत्पादकता-आधारित बोनस दे ल मंजूरी दे देहे। मंत्रिमंडल ह एखर बर दू हजार नौ करोड़ रूपिया ले जादा के पइसा ल मंजूरी देहे। नई दिल्ली म आज प्रधानमंत्री नरेन्द्र मोदी के अगुवई म मंत्रिमंडल के बइठका के बाद सूचना अउ प्रसारण मंत्री अश्विनी वैष्णव ह बतईन कि हरेक साल जइसन एसो घलो तिहार ले पहिली गैर-राजपत्रित रेलवे कर्मचारी मन ल अठहत्तर दिन के तनखा के बराबर दे जात हे। हरेक पात्र रेलवे कर्मचारी मन ल अठहत्तर दिन बर अधिकतम सत्रह हजार नौ सौ इंक्यावन रूपिया के भुगतान करे जाही।
उहें, मंत्रिमंडल ह राष्ट्रीय सामाजिक सहायता कार्यक्रम ल अवइया पांच बछर के बेरा बर जारी राखे ल मंजूरी दे देहे। श्री वैष्णव ह बतईन कि प्रधानमंत्री सामाजिक सहायता योजना म दिव्यांगजन मन बर मानक विकलांगता के मानदंड ए बेरा अस्सी प्रतिशत हवय, ओला चालीस प्रतिशत करे जाही। मंत्रिमंडल ह आईडीबीआई बैंक के पुर्नगठन ल घलो मंजूरी दे देहे।
राज्यपाल-विवि स्थापना दिवस
राज्यपाल रमेन डेका ह आज खैरागढ़ स्थित राजकुमारी इंदिरा सिंह कला संगीत विश्वविद्यालय के सत्तरवां स्थापना दिवस समारोह म सामिल होइन। समारोह ल संबोधित करत ओमन किहीन कि सत्तर बछर के गौरवशाली यात्रा ह छात्र, सिक्षक अउ कर्मचारी मनके सामूहिक योगदान के परिणाम हरय। ओमन छत्तीसगढ़ के लोक कला जइसे पंडवानी, पंथी, राउत नाचा, सुआ नृत्य, करमा अउ बस्तर के जनजातीय नृत्य परंपरा के जिकर करत एला मोबाइल, इंटरनेट अउ डिजिटल मीडिया के माध्यम ले देस-बिदेस के कोना-कोना तक पहुंचाय उपर जोर दीन। ओमन छात्र मन ले बिनती करीन कि कला के क्षेत्र म सफलता पाय बर प्रतिभा के संगेसंग धैर्य, सरलग प्रयास अउ समर्पण बहुते जरूरी हे।
मुख्यमंत्री-पर्यटन विकास मिशन
मुख्यमंत्री-पर्यटन विकास मिशन के तहत प्रदेस के प्रमुख पर्यटन वाले जघा ल आधुनिक सुविधा ले सुघ्घर बनाय जाही। पहिली चरण म चित्रकोट जलप्रपात, मैनपाट, सिरपुर, हसदेव बांगो जलाशय अउ राजिम ल उच्च प्रभाव वाले पर्यटन के रूप म विकसित करे के योजना हे। मुख्यमंत्री ह काली मंत्रालय म पर्यटन विभाग के उच्च स्तरीय समीक्षा बइठका म किहीन कि इहे के खानपान, हस्तशिल्प, लोककला अउ संस्कृति ल पर्यटन अर्थव्यवस्था ले जोड़के आय के स्थायी साधन विकसित करे जाय। मुख्यमंत्री ह किहीन कि पर्यटन के विकास सिरिफ कोनो जघा के सौंदर्यीकरण या अधोसंरचना बनाय तक सीमित नइ होना चाही। एखर सोझे फायदा इहां के लोगन मन ल मिलना चाही।
दुर्ग-शिक्षक सम्मान समारोह
स्कूल शिक्षा मंत्री गजेन्द्र यादव ह किहीन हे कि सिक्षक मनके समर्पण अउ राज्य सरकार के सरलग प्रयास ले छत्तीसगढ़ के सिक्षा व्यवस्था ह बढ़िया होवत हे। ओमन काली दुरूग जिला के खालसा पब्लिक स्कूल म राखे गे सिक्षक सम्मान समारोह म सामिल होइन। ए मउका म ओमन मुख्यमंत्री सिक्षा गौरव अलंकरण के तहत दुरूग अउ बेमेतरा जिला के बढ़िया काम करइया सिक्षक, प्राचार्य अउ प्रधान पाठक मन ल सम्मानित करीन। सिक्षामंत्री ह किहीन कि छात्र मन ल सिक्षित अउ संस्कारवान बनाय म सिक्षक मनके बड़का भूमिका हे।
यात्री बस-किराया
राज्य सरकार ह यात्री बस मनके किराया के नवा दर तय कर देहे। एखर तहत साधारण, डीलक्स अउ वातानुकूलित सुपर लक्जरी बस मन बर आने-आने किराया तय करे गेहे। त उहें, दिव्यांग यात्री मन ल किराया म पचास प्रतिशत तक के छूट देके प्रावधान करे गेहे।
नवा भाव के मुताबिक साधारण बस सेवा म सुरूआती पांच किलोमीटर के यात्रा बर प्रतियात्री दस रूपिया देना होही, जेखर बाद हरेक किलोमीटर बर एक रूपिया पचहत्तर पइसा प्रतियात्री के दर ले किराया ले जाही। उहें, डिलक्स बससेवा म पहिली पांच किलोमीटर के किराया बारह रूपिया तय करे गेहे, जेखर बाद यात्री मन ल हरेक किलोमीटर बर दू रूपिया बीस पइसा प्रतियात्री के दर ले भुगतान करे बर पड़ही।
विशेष कार्यक्रम
आकाशवाणी केन्द्र रायपुर डहार ले ‘‘जन सेवा से देश सेवा‘‘ के तहत विशेष कार्यक्रम के श्रृंखला प्रसारित करे जात हे। इही कड़ी म आज संझा सात बजे ‘‘श्री अन्न-मिलेट्स‘‘ उपर दुरूग जिला के मर्रा-पाटन स्थित एग्रीकल्चर कॉलेज के डीन डॉक्टर अनिल कुमार वर्मा ले लेगे भेंटवार्ता के प्रसारण करे जाही। ए कार्यक्रम ल छत्तीसगढ़ स्थित आकाशवाणी के जम्मों केन्द्र रिले करही।
मुख्यमंत्री-कार्टून फेस्टिवल
मुख्यमंत्री ह आज रईपुर म कार्टून वॉच पत्रिका डहार ले राखे गे कार्टून फेस्टिवल म सामिल होइन। ए मउका म ओमन किहीन कि कार्टून बनइया समाज ह जागरूक करे के संगेसंग सोच अउ आत्ममंथन बर प्रेरित करथे। ओमन किहीन कि कार्टून सिरिफ मनोरंजन के माध्यम नइ हरय, भलूक समाज के एक ठिन दर्पण हरय। ए गंभीर विषय सामाजिक परिस्थिति अउ विसंगति ल हास्य अउ व्यंग के माध्यम ले लोगन मन तक पहुंचाय वाले प्रभावशाली रचनात्मक विधा हरय। मुख्यमंत्री ह कार्टूनिस्ट आर.के लक्ष्मण के योगदान ल सुरता करत कहिन कि उंखर जाने-माने ‘‘कॉमन मैन‘‘ सिरिफ एक ठिन कार्टून चरित्र नइ हरय, भलूक देस के सामान्य नागरिक मनके आसा, अपेक्षा, जिज्ञासा अउ चिंता के पहिचान बन गे।
मतदाता जागरूकता
सारंगढ़ स्थित सासकीय लोचन प्रसाद पांडेय महाविद्यालय म मतदाता जागरूकता कार्यक्रम राखे गीस। कार्यक्रम म छात्र-छात्रा मन ल ‘‘कोई मतदाता छूटे ना‘‘ के संकलप के संग निष्पक्ष अउ सक्रिय रूप ले वोट के काम म भाग ले बर सपथ देवाय गीस। ए मउका म नवा पंजीकृत युवा मतदाता मन ल डिजिटल ई-इपिक के प्रति ल बांटे उपर जोर दीन। महाविद्यालय के छात्र-छात्रा मन ह ‘‘मेरा वोट-मेरी ताकत‘‘ अउ ‘‘वोट फॉर बेटर इंडिया‘‘ जइसन विषय उपर रंगोली के माध्यम ले मतदाता जागरूकता के संदेस दीन।
सीजीपीएससी परीक्षा-स्थगित
छत्तीसगढ़ लोक सेवा आयोग ह सूबेदार, उपनिरीक्षक संवर्ग अउ प्लाटून कमांडर के मुख्य परीक्षा-दू हजार चौबीस ल स्थगित कर देहे। आयोग ह ए बारे म आधिकारिक सूचना जारी कर देहे। ए परीक्षा ह दू, तीन अउ चार नवंबर के होना रिहीस। फेर कोनों कारण ले ए परीक्षा ल स्थगित कर दे गेहे। आयोग ह स्पष्ट करे हे कि परीक्षा के नवा तारीख के घोषणा बाद म करे जाही।
अउ अब पेस हे मौसम के हाल…
प्रदेस ले दक्षिण-पश्चिम मानसून के वापिस लहुटे के बीच मौसम विभाग ह पन्द्रह अक्टूबर ले दक्षिण-छत्तीसगढ़ म हवा-गरेर के संग गाज गिरे के संभावना जताय हे। ए दउरान एक-दू जघा म हल्का बरसा हो सकथे। मौसम विभाग के मुताबिक पूर्वी-उत्तरप्रदेश अउ ओखर तीर-तखार वाले जघा म एक ठिन उपरी हवा म चक्रवाती घेरा बने हे, जेखर असर ले मौसम म बदलाव देखे जाही।
अउ अब थोरकुन समाचार सार म –
– कौशल विकास अउ उद्यमशीलता मंत्रालय ह इंडिया स्किल्स प्रतियोगिता बर पंजीकरण के बेरा ल उन्नीस अक्टूबर तक बढ़ा देहे।
– मुख्यमंत्री के अगुवई म सत्ताईस अक्टूबर के मंत्रालय म राज्य मंत्रिपरिषद के बइठका राखे गेहे।
– उपमुख्यमंत्री विजय शर्मा ह कबीरधाम जिला के बोड़ला म साठ लाख रूपिया के लागत के दू ठिन विकास काम के भूमिपूजन करीन।
– सुकमा जिला के मेट्टागुड़म कैंप म पदस्थ केन्द्रीय रिजर्व पुलिस बल-सीआरपीएफ के सब इंस्पेक्टर देवानंद यादव ह अपन सर्विस हथियार ले खुदे ल गोली मारके आत्महत्या कर लीन।
अउ
– कांकेर जिला के पखांजूर स्थित माटोली गांव म रतनजोत के बीजा खाय ले सात झिन लइका के तबीयत बिगड़गे। जम्मों लइका मनके इलाज पंखाजूर के सिविल अस्पताल म चलत हे।