राज्य म लोगन मनके खान-पान म पौष्टिक तत्व के कमी ल पूरा करे के संगेसंग कुपोषण ले मुक्ति बर अवइया एक नवंबर ले फोर्टिफाइड राईस वितरण योजना के सुरूवात करे जाही। पायलट प्रोजेक्ट के रूप म ए योजना कोंडगांव जिला ले सुरू होही। आयरन विटामिनयुक्त ए चाउर ल बांटे के काम सार्वजनिक वितरण प्रणाली-पीडीएस अउ आने योजना के तहत करे जाही।
खबर के मुताबिक ए योजना ल सुरू करे के घोषणा मुख्यमंत्री भूपेश बघेल ह अपन बजट भासन म करे रिहीस। एखर बर बजट म पांच करोड़ अस्सी लाख रूपिया के प्रावधान घलो करे गेहे।
सिनेमाहाॅल/थियेटर
देस म आज ले सिनेमाहाॅल, थियेटर अउ मल्टीप्लेक्स पचास प्रतिसत क्षमता के संग खुल गेहे। केन्द्रीय सूचना अउ प्रसारण मंत्रालय के मानक संचालन प्रक्रिया के मुताबिक थियेटर, सिनेमाहाॅल अउ मल्टीप्लेक्स म दर्सक के बीच सुरक्षित दूरी रखना होही अउ जम्मों कर्मचारी के संगेसंग दर्सक बर मास्क पहिनना जरूरी होही।
केन्द्रीय मंत्रिमंडल-फैसला
प्रधानमंत्री नरेन्द्र मोदी के अध्यक्षता म काली केन्द्रीय मंत्रिमंडल के बइठका म कई ठिन बड़का फैसला ले गीस। मंत्रिमंडल ह राज्य मन बर शिक्षण-अध्ययन अउ परिणाम बेवस्था ल मजबूत करे के स्टार्स परियोजना ल मंजूरी दीन। ए परियोजना विश्व बैंक के मदद ले संचालित करे जाही। स्टार्स परियोजना म सैक्षिक परिणाम म सुधार बर राज्य मन ल सिक्षा संबंधी परियोजना के विकास, मूल्यांकन अउ सुधार के बेवस्था हे।
केन्द्रीय मंत्री प्रकाश जावड़ेकर ह किहीन कि स्टार्स परियोजना ल केन्द्र डहार ले प्रयोजित नवा योजना के रूप म स्कूली सिक्षा अउ साक्षरता विभाग के तहत लागू करे जाही।
अब्दुल कलाम-जयंती
डाॅक्टर ए.पी.जे. अब्दुल कलाम के नवासी जयंती आज मनाय जावत हे। ओमन देस के ग्यारहवां राष्ट्रपति रिहीन। केन्द्रीय सूचना अउ प्रसारण मंत्रालय के फिल्म्स डिविजन ह श्रद्धांजलि के रूप म अपन वेबसाइट अउ यू-टयूब चैनल म पीपुल्स प्रेसीडेंट सीर्षक ले एक बिसेस वृत्तचित्र प्रसारण करीन।
राष्ट्रपति रामनाथ कोविंद अउ उप राष्ट्रपति एम. वैंकैया नायडू ह डाॅक्टर कलाम के जयंती म ओमन ल भावभीनी श्रद्धांजलि दीन हे।
छत्तीसगढ़ के मुख्यमंत्री भूपेश बघेल ह घलो डाॅक्टर कलाम के जयंती म ओमन म नमन करीन। श्री बघेल ह किहीन कि श्री कलाम के जिनगी ह राष्ट्र सेवा के आखिरी तक पढ़े वाला महाग्रंथ हरय।
सुकमा-माओवादी बैठक
सुकमा जिला म माओवादी मनके खिलाफ चलाय जात अभियान के समीक्षा बर एक ठिन बइठका राखे गीस। स्पेशल डीजी अशोक जूनेजा अउ सीआरपीएफ के आईजी प्रकाश डी. ह किस्टाराम गांव म अधिकारी मनके संग माओवादी मन ल निपटे बर बनाय गे रणनीति ल लेके गोठबात करीन। बइठका म बस्तर आईजी सुंदरराज पी. घलो मौजूद रिहीन।
ए दउरान अधिकारी मन ह जिला म माओवाद प्रभावित इलाका म पदस्थ सुरक्षा बल के संग भेंट घलो करीन अउ उंखर हौसला बढ़ाईन।
दीपक चंद्राकर-कोरोना सावधानी अपील
छत्तीसगढ़ के जाने-माने लोकगायक ह लोगन मन ले कोरोना संक्रमण ले बचाव बर जरूरी सावधानी बरते के अपील करे हे।
विशेष कार्यक्रम
आकाशवाणी केन्द्र, रईपुर डहार ले काली सोलह अक्टूबर के एक बिसेस कारीकरम- ‘‘त्यौहारों के मौसम में कोरोना संक्रमण से कैचे बचें‘‘ प्रसारित करे जाही। एमा रईपुर मेडिकल काॅलेज के बड़का डाॅक्टर ओ.पी. सुंदरानी ले लेगे भेंटवार्ता प्रसारित करे जाही। प्रादेशिक समाचार एकांश डहार ले तैयार करे गे ए कारीकरम ह काली बिहनिया साढ़े दस बजे प्रसारित होही, जेला छत्तीसगढ़ स्थित आकाशवाणी के जम्मों केन्द्र रिले करही।
मरवाही उपचुनाव
मरवाही विधानसभा क्षेत्र म होवइया उपचुनाव बर नामांकन भरे के काली आखिरी दिन हरय। आज भाजपा प्रत्यासी डाक्टर गंभीर सिंह संघरा कुल जमा चार उम्मीदवार मन ह नामांकन पत्र दाखिल करीन। ए बेरा म भाजपा के राष्ट्रीय उपाध्यक्ष अउ पूर्व मुख्यमंत्री डाक्टर रमन सिंह, नेता प्रतिपक्ष धरमलाल कौशिक, भाजपा प्रदेश अध्यक्ष विष्णुदेव साय अउ चुनई प्रभारी अमर अग्रवाल संघरा पार्टी के कई झिन बड़का नेता मन मौजूद रहीन।
उहें, मरवाही उपचुनाव बर भाजपा ह स्टार प्रचारक मन के सूची घलो जारी कर देहे।
दूसर कोती, ए उपचुनाव म कांग्रेस प्रत्यासी डाॅक्टर के.के. धु्रव ह काली अपन नामांकन दाखिल करही। नामांकन दाखिल के दउरान प्रदेस कांग्रेस अध्यक्ष मोहन मरकाम समेत पार्टी के कतकोन नेता मौजूद रइही।
ए उपचुनाव बर अब तक कुल सात ठिन नामांकन पत्र दाखिल करे जा चुके हे। ए सीट म तीन नवंबर के वोट डारे जाही।
मुख्यमंत्री-विद्यार्थी बातचीत
‘‘छू लो आसमान‘‘ कारीकरम के तहत बीजापुर अउ सुकमा जिला म आदिवासी लइका मन बर अवइया सिक्षा सत्र ले चालीस सीट बढ़ाय के संग चुने गे विद्यार्थी मन ल आर्थिक सहायता देवाय जाही। ए घोसना मुख्यमंत्री भूपेश बघेल ह आज दंतेवाड़ा जिला के जेईई मेन्स म सफल होय लइका मन संग गोठबात म करीन। गोठबात के दउरान मुख्यमंत्री ह बतईन कि अवइया बछर म विकासखंड स्तर म इंग्लिश मीडियम स्कूल चालू करे जाही।
कृषि संशोधन विधेयक
अखिल भारतीय किसान संघर्ष समन्वय समिति के आह्वान म राजनांदगांव जिला के किसान मन न्यूनतम समर्थन मूल्य अधिकार दिवस मनाईस।
केन्द्रीय सहकारी बैंक के आगू चैपाल लगाके किसान मन ह जिला कलेक्टर मन ल प्रधानमंत्री अउ मुख्यमंत्री के नाव ज्ञापन सौंपीन। ए ज्ञापन म किसान मन ह सरकार मन ले न्यूनतम समर्थन मूल्य गारंटी कानून पास कराय के मांग करीन। संगेसंग राज्य म एक नवंबर ले धान खरीदी सुरू करे अउ हरेक एकड़ बीस कुंटल धान खरीदी के मांग घलो करे गीस।
उहें, कृषि संसोधन विधेयक मनके विरोध म राजनांदगांव के बसंतपुर कृषि उपज मंडी के आगू किसान मन ह प्रदर्सन करीन। ए दउरान किसान मन ह जिला कलेक्टर ल ज्ञापन सौंप के ए विधेयक मन ल वापिस लेेके मांग करीन।
मौसम
मौसम विभाग ह अवइया चैबीस घंटा के दउरान राज्य के एक-दू जघा म गरज-चमक के संग बरसा होय अउ गाज गिरे के संभावना जताय हे।
रईपुर स्थित मौसम विज्ञान केन्द्र के मुताबिक दक्षिण मध्य महाराष्ट्र अउ दक्षिण कर्नाटक के उपर एक ठिन निम्न दाब के क्षेत्र बने हे। संगेसंग मध्य बंगाल के खाड़ी ले पूर्व मध्य अरब सागर तक एक ठिन द्रोणिका बने हे। एखर असर ले राज्य के कुछेक जघा म हल्का ले मध्यम बरसा होही। राजधानी रईपुर म आज बिहनिया ले बदली छाय रिहीस अउ थिरा-थिरा के पानी गिरत हे।
ठगी मामला-खुलासा
अंबिकापुर पुलिस ह रकम दुगुना करे के नाव म करीबन एक करोड़ रूपिया के ठगी करइया गिरोह के तीन आरोपी मन ल गिरफ्तार करे हे। पुलिस के मुताबिक जादा ब्याज दे के नाम म ए फर्जी कंपनी के संचालक मन ह अंबिकापुर के करीबन एक सौ पचहत्तर लोगन ले लाखों रूपिया के धोखाधड़ी करीन अउ एखर बाद अपन आॅफिस बंद करके फरार होगे। सिकायत के बाद पुलिस के टीम ह गिरोह के तीन झिन आरोपी मन ल रईपुर ले गिरफ्तार करीन।
ओति, दुरूग म घलो एक राजनीतिक दल के नेता मनके खिलाफ जमीन दिलाय के नाव म धोखाधड़ी करे के मामला म पुलिस ह अपराध दर्ज करे हे।